Abi deki-ati te yu e kisi gens

WAN bigi grupu fu ogrisma ben dwengi Gayus nanga Aristarkus, tu kompe fu na apostel Paulus, fu go na ini a stadion fu Efeise. Drape a bigi grupu sma di ben atibron srefisrefi, ben e bari tu yuru langa, taki: „Artemis, a gado fu den Efeisesma, na wan bigi gado!” (Tori fu den Apostel 19:28, 29, 34) Den bakaman fu Paulus ben tan tanapu kánkan di den kisi a gens disi? Ma san ben meki taki den kon de na ini a situwâsi disi?

Dri yari langa Paulus ben preiki nanga bun bakapisi na ini a foto Efeise. A bakapisi ben de taki furu Efeisesma tapu fu anbegi kruktugado (Tori fu den Apostel 19:26; 20:31). A sani di den sma fu Efeise ben gwenti anbegi, ben de wan pikin solfru tempel fu Artemis, na uma-gado di sma ben anbegi fu man kisi furu pikin; a tempel fu en ben e tanapu na wan hei presi pe sma ben kan si a heri foto. Sma ben weri den sortu pikin tempel disi leki tapu, noso den ben poti den na ini den oso. A no de fu taki dati Kresten no ben o bai den pikin tempel disi.​—1 Yohanes 5:21.

Demetrius, wan fu den solfrusmeti, ben feni taki a diniwroko fu Paulus ben gens a bisnis fu den di ben e meki den kisi furu moni. A man disi bigin moksi tru tori nanga leitori èn a ben meki a tori gersi moro bigi leki fa a ben de trutru; na so fasi a ben overtoigi den tra solfrusmeti fu bribi taki den sma na ini heri Pikin Asia no ben o anbegi Artemis moro. Den solfrusmeti ben atibron, èn di den bigin bari prèise Artemis, dan wan bigi opruru opo kon èn a heri foto bruya.​—Tori fu den Apostel 19:24-29.

Dusundusun sma ben kon makandra na a stadion di ben kan teki 25.000 sma. Paulus ben aksi fu taki nanga a bigi grupu sma disi di ben atibron srefisrefi, ma wan tu ofsiri di ben abi switifasi ben taigi en fu no du dati. Te fu kaba, a komsarsi fu a foto meki den sma tan tiri, èn na so Gayus nanga Aristarkus ben man gowe fu drape sondro taki wan sani pasa nanga den.​—Tori fu den Apostel 19:35-41.

Na ini a ten disi, a kan pasa tu taki sma e gens a pipel fu Gado, èn sosrefi bigi opruru kan opo kon te den e du a diniwroko fu den. Nofo tron den e preiki a bun nyunsu na ini foto pe furu sma e du afkodrei, hurudu, nanga tra ogri. Ma toku, nanga deki-ati den e waka baka na eksempre fu na apostel Paulus di ’no draidrai fu gi leri na publiki èn oso fu oso’ na ini a foto Efeise (Tori fu den Apostel 20:20). Den e prisiri tu te den e si taki ’a wortu fu Yehovah e panya go na ala sei èn taki a abi krakti tapu moro nanga moro sma’.​—Tori fu den Apostel 19:20.

[Prenki na tapu bladzijde 30]

Den sani di tan abra fu a stadion fu Efeise