Aksi fu leisiman

Fu san ede Paulus ben skrifi fu wan Kresten wefi, taki: „Efu wan uma e meki pikin, dan disi o kibri en?”​—1 Timoteyus 2:15.

San Paulus ben wani taki nanga den wortu disi, soleki fa den tra tekst lontu a vers disi e sori? Nanga yepi fu Gado en santa yeye, a ben gi rai di abi fu du nanga a frantwortu di Kresten uma abi na ini a gemeente. A ben skrifi: „Mi wani tu taki den umasma musu moi densrefi nanga krosi di fiti, èn den musu du dati na wan lespeki fasi èn nanga krin frustan, ma den no musu moi densrefi fu di den e brei den ede-wiwiri nanga ala sortu modo, noso fu di den e weri gowtu, peri noso diri krosi, ma den musu du dati soleki fa a fiti umasma di e taki dati den e anbegi Gado, iya, fu di den e du bun wroko” (1 Timoteyus 2:9, 10). Paulus ben gi den Kresten sisa fu en a deki-ati fu tyari densrefi na wan lespeki fasi, fu gebroiki koni te den ben bosroiti fa den ben o moi densrefi, èn a taigi den taki den ben musu „moi densrefi” nanga bun wroko.

Baka dati, Paulus ben taki fu na edeman-wroko na ini a gemeente, taki: „Mi no e gi wan uma pasi fu gi leri, noso fu basi wan man, ma a musu tan tiri” (1 Timoteyus 2:12; 1 Korentesma 11:3). A fruklari fu san ede a seti disi de, fu di a sori taki Satan no ben kori Adam, ma taki Satan ’ben kori na uma [Eva] trutru èn na uma ben sondu.’ Fa wan Kresten uma kan kibri ensrefi fu no sondu leki Eva? Paulus e piki: „Ma efu wan uma e meki pikin, dan disi o kibri en, ma soso efu a e tan bribi, e tan lobi sma, e tan santa èn e tan de nanga krin frustan” (1 Timoteyus 2:14, 15). San Paulus ben wani taki nanga den wortu disi?

Soleki fa a sori, dan son sma di vertaal Bijbel e taki dati efu wan uma wani kisi frulusu, dan a musu kisi pikin. Fu eksempre, Nyun Testamenti e taki: „Gado o ferlusu en fu di a e tyari pikin kon na grontapu.” Ma den wortu disi no e sori soifri san Paulus taki. Furu bijbeltekst e tyari kon na krin taki efu wan sma wani kisi frulusu, dan a musu kon leri sabi Yehovah, a musu bribi na ini Yesus, èn a musu sori nanga den sani di a e du taki a abi bribi (Yohanes 17:3; Tori fu den Apostel 16:30, 31; Romesma 10:10; Yakobus 2:26). Boiti dati, Paulus no ben taki dati umasma di e bribi, abi a dyaranti taki den sa meki pikin sondro taki ogri miti den na skin fasi. Umasma di abi bribi èn sosrefi den wan di no abi bribi, meki pikin sondro taki wan takru sani pasa nanga den. Èn a de wan sari sani taki son uma di abi bribi èn sosrefi den wan di no abi bribi, kon lasi libi di den ben meki pikin.​—Genesis 35:16-18.

Den tra rai di Paulus ben gi umasma baka ten na ini a srefi brifi disi, e yepi wi fu frustan san den wortu fu en ben wani taki. A e warskow son yongu uma di lasi den masra na ini dede, di ’no abi noti fu du èn den e waka e go na sma oso; ma boiti taki den no abi noti fu du, den e tron konkruman èn den e bumui nanga tra sma tori, fu di den e taki sani di den no musu taki’. Sortu rai Paulus ben gi den? A e taki moro fara: „Fu dati ede, mi wani taki yongu uma di lasi den masra na ini dede musu trow, den musu kisi pikin, èn den musu sorgu bun gi na osofamiri; den no musu gi a feanti na okasi fu taki ogri fu wi.”​—1 Timoteyus 5:13, 14.

Paulus e poti krakti tapu den bun sani di umasma kan du na ini na osofamiri. Te wan uma ben o du den sortu sani disi, soleki ’fu kisi pikin èn fu sorgu bun gi na osofamiri’, èn te a ben o ’tan bribi, tan lobi sma, tan santa èn tan de nanga krin frustan’, dan a no ben o kisi a firi fu du sani di no bun. Na so fasi a yeyefasi fu en ben o tan bun, noso a ben o „kibri” a yeyefasi fu en (1 Timoteyus 2:15). Te yongu uma ben o du den sani disi, dan dati ben o yepi furu fu den fu no fadon na ini den trapu fu Satan.

Den sani disi di Paulus ben taigi Timoteyus e memre wi alamala, mansma nanga umasma, fu gebroiki wi ten nanga wi krakti na wan fasi di e tyari wini kon. Gado Wortu e gi ala Kresten a rai: „Luku bun taki unu no e waka leki don sma, ma taki unu e waka leki koni sma.”​—Efeisesma 5:15.