Na opobaka—Wan tumusi moi howpu

NA ALA sei fu grontapu sma e bribi na ini na opobaka. Na ini a santa buku fu na Islam, namku a Koran, wan heri kapitel e taki fu na opobaka. Wan pisi fu Surah 75 (noso kapitel 75) e taki: „Mi e sweri na a Opobaka Dei . . . Libisma e denki taki Wi no man tyari den bonyo fu en kon na wán? . . . Den e aksi: ’O ten na a Dei fu na Opobaka?’ A no En, (a srefiwan), abi a makti fu gi libi na den dedewan?”​—Surah 75:1-6, 40.

A buku The New Encyclopædia Britannica e taki dati a Zoroaster bribi e sori taki te fu kaba ogri o kon na wan kaba, wan opobaka sa de gi ala sortu sma, wan lasti krutu o de, grontapu o kon krin baka, èn regtfardikisma sa libi na tapu.

A buku Encyclopaedia Judaica e taki dati na opobaka na „a bribi di sma e bribi taki te fu kaba den dedewan sa opo baka na ini den eigi skin èn den o libi baka na grontapu”. A srefi buku e taki tu dati wan muilek problema opo kon di a Dyu bribi teki a denki abra taki libisma abi wan sili di no man dede. A buku e taki: „Fu taki en leti, den tu sani disi di sma e bribi, namku taki wan opobaka o de, èn taki libisma abi wan sili di no man dede, no e kruderi nanga makandra.”

A Hindu bribi e leri taki libisma e kon gebore wan tu leisi baka makandra, noso den e nasi. Efu disi de so trutru, dan libisma musu fu abi wan sili di e libi go doro baka te a sma dede. A santa buku fu den Hindusma, namku a Bhagavad Gita e taki: „A sani di de na ini a heri skin, no kan pori noiti. Nowan sma man pori a sili di no kan pori noiti.”

A Buda bribi de tra fasi leki a Hindu bribi fu di a no e leri sma taki libisma abi wan sili di no man dede. Ma toku, furu disiten Budasma di e libi na ini den kondre di de na ini a birti fu Owstu Asia, e bribi taki libisma abi wan sili di no man dede èn di e kon baka na ini wan tra skin. *

Bruya kon fu a leri fu na opobaka

Nofo tron te kerki fesiman fu a Kresten bribi e taki wan sani na a beri fu wan sma, dan den e taki fu a sili di e libi go doro te a sma dede, èn fu na opobaka sosrefi. Fu eksempre, nofo tron den kerki fesiman fu na Anglikan Kerki e taki den wortu disi: „Fu di a ben de a wani fu na Almakti Gado nanga a bigi sari-ati fu en, meki a teki gi ensrefi, a sili fu wi lobi brada di gowe libi wi, èn dati meki wi e gi en skin na a gron; a gron sa tron gron baka, asisi sa tron asisi baka, doti sa tron doti baka; wi abi a trutru howpu taki seiker na Opobaka fu libi fu têgo o kon, nanga yepi fu wi Masra Yesus Krestes.”—The Book of Common Prayer.

Kande den wortu disi e meki wan sma aksi ensrefi efu Bijbel e taki fu na opobaka, noso efu a e taki fu a leri taki libisma abi wan sili di no e  dede. Ma luku san Oscar Cullmann, wan Fransi professor fu a Protestant Kerki taki. A e skrifi na ini wan buku fu en: „Wan bigi difrenti de na mindri a bribi di Kresten e bribi na ini na opobaka, èn a Griki bribi taki a sili no man dede. . . . Aladi a Kresten bribi moksi den tu bribi disi bakaten, èn aladi moro furu Kresten no e si a difrenti na mindri den tu bribi disi, toku mi no abi nowan reide fu kibri san mi nanga furu tra sabiman e si leki tru tori. . . . Ala sani na ini a heri Nyun Testamenti e sori go na a bribi taki wan opobaka o de. . . . A heri sma, di dede trutru, e kon na libi baka fu di Gado e meki a sma disi baka” (Immortality of the Soul or Resurrection of the Dead? [A sili di no man dede, noso na opobaka fu den dedewan?]).

Fu dati ede a no de fu fruwondru taki furu sma no sabi san den musu denki fu dede èn fu na opobaka. Fu tyari wan lusu kon na ini a bruya tori disi, dan wi abi fu luku san skrifi na ini Bijbel, di e fruteri fu tru tori di Yehovah Gado, a Mekiman fu libisma, tyari kon na krin gi wi. Bijbel abi wan tu tori fu sma di ben kisi wan opobaka. Meki wi go luku fo fu den tori disi, èn meki wi luku san den e tyari kon na krin.

„Uma ben kisi den dedewan fu den baka nanga yepi fu wan opobaka”

Na ini a brifi di na apostel Paulus ben skrifi gi den Dyu di ben tron Kresten, a ben taki dati son uma di ben abi bribi „ben kisi den dedewan fu den baka nanga yepi fu wan opobaka” (Hebrewsma 11:35). Wan fu den uma disi ben e libi na ini Sarfat, wan foto fu den Fenisiasma di ben de krosibei fu Sidon, na a sesyoro fu a Mindrikondre Se. A ben de wan weduwe di ben teki Elia, a profeiti fu Gado, na ini oso; a ben gi Elia nyanyan srefi na wan ten di bigi angri ben de na ini a kondre. A de wan sari sani fu taki dati a boi fu na uma disi ben kon siki, ne a dede. Wantewante Elia tyari en go na tapu a daki fu na oso, na ini a kamra pe a ben e tan, dan a begi Yehovah fu gi a boi libi baka. Ne wan wondru pasa èn a boi „kon na libi baka”. Elia tyari en go na en mama baka èn a taki: „Luku, yu manpikin de na libi.” San na uma du dan? Nanga prisiri a taki: „Now mi sabi trutru taki yu na wan man fu Gado, èn taki a wortu fu Yehovah di komoto fu yu mofo, de tru.”​—1 Kownu 17:22-24.

Sowan 100 kilometer na a zuidsei fu Sarfat wan trowpaar ben e libi di ben lobi fu gi sma sani. Den ben e sorgu gi Elisa, a profeiti di ben kon baka Elia. A wefi ben de wan prenspari uma na ini a foto Sunem pe a ben e libi. En nanga en masra ben agri fu gi Elisa wan kamra na tapu a daki fu na oso fu den. Fosi, den ben e sari fu di den no ben man kisi pikin, ma bakaten den ben kon de nanga prisiri di na uma meki wan manpikin. Di a boi ben e gro kon bigi, a ben gwenti fu go nanga den man di ben e koti karu na den gron, fu miti en papa na ini a gron. Wan dei wan tumusi sari sani pasa. A boi bari taki en ede e hati en. Wan futuboi lon tyari en go baka na oso. En mama teki en na tapu en bowtu èn a bigin boboi en, ma te fu kaba a pikin dede. A mama, di ben bruya srefisrefi, bosroiti fu go kari Elisa meki a kon yepi en. Nanga wan futuboi fu en, a mama waka go noord-westsei teleki a doro a Karmelbergi, pe Elisa ben e tan.

Di a profeiti yere san pasa, a seni en futuboi Gehasi go luku san pasa, èn Gehasi kon si taki a  boi dede trutru. Ne Elisa nanga na uma ben e kon na Gehasi baka, ma san pasa di den doro na ini Sunem te fu kaba? A tori na 2 Kownu 4:32-37 e taki: „Te fu kaba Elisa kon na ini na oso èn luku! a boi ben dede èn den ben poti en na tapu a bedi pe a ben gwenti sribi. Dan Elisa kon na inisei, a tapu a doro na baka den tu sma, èn a bigin begi Yehovah. Ne a go na tapu a bedi, dan a go didon na tapu a pikin. A poti en eigi mofo na tapu a mofo fu a pikin, en eigi ai na tapu den ai fu a pikin, èn en eigi anu na tapu den anu fu a pikin. Na so a tan langa ensrefi na tapu a pikin èn safrisafri a skin fu a pikin ben e kon waran. Ne Elisa bigin waka na ini na oso baka, wan leisi a go disi sei èn wan leisi a go na a tra sei, èn baka dati a go na tapu a bedi èn a langa ensrefi na tapu a pikin. Dan a boi bigin meki etsjei; a du dati seibi tron srefi, èn baka dati a boi opo en ai. Ne Elisa kari Gehasi èn a taki: ’Kari a Sunem-uma kon.’ Sobun, a kari na uma èn na uma kon na en. Dan a taki: ’Opo yu manpikin.’ Fa na uma kon na inisei, a fadon na Elisa en futusei èn a boigi go na gron gi en; baka dati a opo en manpikin, dan a go na dorosei.”

Neleki a weduwe fu Sarfat, na so na uma fu Sunem ben sabi taki a sani di ben pasa, ben de nanga yepi fu a krakti fu Gado. Den tu uma disi ben prisiri srefisrefi di Gado ben meki a lobi pikin fu den kon na libi baka.

Sma di kisi wan opobaka na a ten di Yesus ben e du en diniwroko

Sowan 900 yari baka dati, wan sma kisi wan opobaka krosibei fu Sunem, dorosei fu a dorpu Nain. Di Yesus Krestes nanga den disipel fu en komoto fu Kaperna-um èn den kon krosibei fu a portu fu Nain, dan den miti wan grupu sma di ben e go beri wan sma. Di Yesus si taki na wan weduwe lasi en wan-enkri manpikin, dan a taigi en fu no krei moro. Lukas, di ben de wan datra, e fruteri san pasa baka dati: „Dati meki [Yesus] waka go na a dragi èn a fasi en, èn den dragiman ben tan tanapu, èn a ben taki: ’Yonkuman, mi e taigi yu: Opo!’ Ne a dede man opo sidon, èn a bigin taki, dan Yesus gi en baka na en mama” (Lukas 7:14, 15). Den sma di si a wondru disi bigin gi Gado glori. A nyunsu fu na opobaka panya go te na a zuidsei na Yudea èn a heri kontren na ini a birti drape. Wan moi sani fu si, na taki den disipel fu Yohanes a Dopuman yere fu a wondru disi èn den go fruteri dati na Yohanes. Yohanes fu en sei, taigi den fu go suku Yesus èn fu aksi en efu na En ben de a Mesias di den ben e fruwakti. Yesus taigi den: „Go èn taigi Yohanes san unu si èn san unu yere: den breniwan e si baka, den malengriwan e waka, den gwasiman e kon krin èn den dofuwan e yere, den dedewan e opo baka, den pôtiwan e kisi a bun nyunsu fu yere.”​—Lukas 7:22.

Fu ala den wondru pe Yesus gi sma wan opobaka,  a wan di sma sabi moro furu, na a wondru pe a ben gi Lasarus, wan bun mati fu en, wan opobaka. Disi leisi, wan moi pisi ten ben pasa kaba fu a ten di Lasarus dede teleki a ten di Yesus doro na oso pe a famiri fu Lasarus ben e tan. Di Yesus doro Betania te fu kaba, dan Lasarus ben dede fo dei kaba. Di Yesus taigi den sma dati den musu puru a ston di ben tapu a grebi-olo, dan Marta no ben wani, èn a taki: „Masra, a musu fu tingi kaba now, bika na fo dei kaba di a de na ini a grebi” (Yohanes 11:39). Ma awinsi a skin fu Lasarus ben bigin pori kaba, toku dati no ben tapu Yesus fu gi en wan opobaka. Yesus gi a komando, èn „a man di ben dede, ben kon na doro, aladi den futu nanga den anu fu en ben domru nanga krosi èn en fesi ben tai nanga wan duku”. Den sani di den feanti fu Yesus du baka di a sani disi pasa, e sori taki trutru Lasarus ben kon na libi baka.​—Yohanes 11:43, 44; 12:1, 9-11.

San wi e frustan fu den fo tori disi di e taki fu sma di kisi wan opobaka? Ibriwan fu den sma disi kon na libi baka leki a srefi sma di den ben de fosi den dede. Sma ben sabi den alamala; srefi den krosibei famiriman fu den ben sabi den. Nowan fu den sma di kisi wan opobaka, ben fruteri san pasa na ini a syatu pisi ten di den ben dede. Nowan fu den ben taki dati den ben go na wan tra presi. Soleki fa a sori, dan den alamala ben de gosontu di den kon na libi baka. Gi den, a ben de leki den sribi fu wan pisi ten èn baka dati den wiki, neleki fa Yesus ben taki dati (Yohanes 11:11). Ma toku, baka wan pisi ten, den sma disi dede baka.

A tumusi moi howpu fu de makandra baka nanga den lobiwan fu wi

Syatu baka a sari dede fu Owen, fu suma wi ben taki na ini a fosi artikel, dan en papa go na a oso fu wan birtisma. Na tapu wan tafra drape, a feni wan traktaat di ben sori taki Yehovah Kotoigi ben seti sani fu hori wan publikitaki. A nen fu a publikitaki ben hari en prakseri fu di a ben nen, „Pe den dedewan de?” Dati na a aksi di ben de na en prakseri wan pisi ten kaba. A go na a publikitaki èn a kisi trutru trowstu di komoto fu Bijbel. A ben kon frustan taki den dedewan no e pina. Na presi taki den dedewan e kisi skin-ati na ini wan helfaya, noso na presi taki Gado teki den fu tron engel na hemel, den dedewan, èn Owen sosrefi, e wakti na ini a grebi, teleki a ten doro taki den o kisi wan opobaka.​—Preikiman 9:5, 10; Esekièl 18:4.

So wan sari sani pasa na ini yu famiri tu? A de so taki neleki a papa fu Owen, yu e aksi yusrefi pe den lobiwan fu yu de, now di den dede? Yu denki taki yu sa man si den baka? Efu yu e aksi yusrefi den sani disi, dan wi e gi yu a kari fu luku sortu tra sani Bijbel e leri fu na opobaka. Kande yu e aksi yusrefi: ’O ten na opobaka sa de? Suma nanga suma sa kisi wini fu dati?’ Grantangi, leisi den tra artikel fu kisi piki tapu den aksi disi èn tapu tra aksi sosrefi.

[Futuwortu]

[Prenki na tapu bladzijde 5]

Yehovah ben gebroiki Elisa fu gi wan opobaka na a manpikin fu wan uma fu Sunem

[Prenki na tapu bladzijde 5]

Elia ben begi Yehovah fu gi libi baka na wan boi

[Prenki na tapu bladzijde 6]

Yesus ben gi wan opobaka na a manpikin fu a weduwe fu Nain

[Prenki na tapu bladzijde 7]

Na opobaka sa meki taki famiriman miti baka nanga den lobiwan fu den