Na opobaka howpu—San a wani taki gi yu?

„Yu e opo yu anu èn e meki ala libisani kisi den sani di den wani.”​—PSALM 145:16.

1-3. Sortu howpu son sma abi gi a ten di e kon? Gi wan eksempre.

CHRISTOPHER, di ben abi neigi yari, nanga en brada ben go preiki makandra nanga wan omu, wan tanta, nanga tu neef fu den. A heri mamanten den ben e preiki oso fu oso krosibei fu Manchester, na Ingrisikondre. A tijdschrift Ontwaakt! e fruteri san pasa moro fara. „Na a bakadina dati, den go na Blackpool, wan presi krosibei fu a se pe sma gwenti fu go koiri. Ala den siksi sma disi ben de na mindri den 12 sma di dede wantronso di wagi rèi naki makandra; skowtu taki dati na ongoloku disi ben de wan trutru rampu fu di den wagi ben teki faya èn sma lasi den libi.”

² A neti bifo a sari sani disi pasa, na osofamiri fu Christopher ben go na a Gemeente Bukustudie, pe den ben taki fu a dede di sma e dede. „Christopher ben de wan boi di ben e denki dipi fu sani”, na so en papa taki. „A neti dati, a ben fruteri krin fu a nyun grontapu èn fu a howpu di a ben abi gi a ten di e kon. Di wi ben e go doro nanga a Bukustudie, dan wantronso Christopher taki: ’A wini di wi leki Yehovah Kotoigi abi, na taki aladi dede na wan hati sani trutru, toku wi sabi taki wi sa si makandra baka na grontapu wan dei.’ Na a ten dati, nowan fu wi di ben drape, ben denki taki wi ben o tan memre den wortu disi ala ten.” *

³ Wan heri pisi ten na fesi, na ini 1940, Franz, wan Kotoigi fu Oostenrijk, ben kisi dedestrafu èn den ben o koti en ede puru fu di a no ben wani drai baka gi Yehovah. Na ini wan strafu-oso na Berlijn, Franz skrifi wan brifi gi en mama, pe a ben taki: „Ala den sani di mi sabi meki mi kon frustan taki efu mi ben o sweri [fu tron srudati], dan mi ben o du wan sondu fu san mi ben o frudini fu dede. Noiti mi ben o man du so wan sani. Noiti mi ben o kisi wan opobaka. . . . Èn now, mi lobi mama èn ala mi brada nanga sisa, tide den taigi mi sortu strafu mi kisi. No skreki, mi kisi dedestrafu, èn tamara mamanten den o kiri mi. Gado e gi mi krakti, neleki fa a ben du dati nanga ala tru Kresten na ini den ten di pasa. . . . Efu unu tanapu kánkan te na dede, dan wi sa miti makandra baka te wi kisi wan opobaka. . . . Adyosi, tan bun.” *

4. Sortu krakti den ondrofenitori di wi fruteri dyaso abi na yu tapu, èn san wi o luku now?

⁴ Na opobaka howpu ben wani taki furu gi Christopher nanga Franz. A ben de wan trutru sani gi den. A no de fu taki dati den tori disi e naki wi ati trutru! Fu kisi moro lobi nanga warderi gi Yehovah, èn fu tranga a howpu di wi abi na ini na opobaka, meki wi o go luku fu san ede wan opobaka sa de èn sortu krakti disi musu abi tapu wi eigi libi.

Wan fisyun fu na opobaka na grontapu

5, 6. San a fisyun di na apostel Yohanes skrifi na Openbaring 20:12, 13, e tyari kon na krin?

⁵ Na ini wan fisyun di e sori san o pasa na ini a Dusun Yari Tiri fu Krestes Yesus, na apostel Yohanes ben si fa sma ben e kisi wan opobaka na grontapu. „Mi ben si den dedewan, den bigiwan nanga den pikinwan”, na so a ben fruteri. „Èn a se ben gi den dedewan abra di ben de na en ini, èn dede nanga Hades ben gi den  dedewan abra di ben de na den ini” (Openbaring 20:12, 13). Awinsi sortu posisi wan sma ben abi, efu na wan „bigiwan” noso wan „pikinwan”, toku ala sma di de na ini katibo na ini Hades (Syeol), noso a grebi fu ala libisma, sa kon fri. Na a ten dati, den wan di ben lasi libi na ini se, sa kon na libi sosrefi. A moi sani disi, na wan fu den sani di Yehovah abi na prakseri fu du.

⁶ Na a bigin fu den dusun yari di Krestes o tiri, a sa tai Satan èn trowe en go na ini na agersi peti di no abi gron. Fu di Satan no sa man du noti na a ten dati, meki a no sa man kori nowan fu den sma di kisi wan opobaka èn nowan fu den sma di pasa a bigi banawtu libilibi (Openbaring 20:1-3). Wán dusun yari kan gersi wan langa pisi ten gi yu, ma fu taki en leti, Yehovah e si en „leki wán dei” nomo.​—2 Petrus 3:8.

7. Sortu sani o meki wan sma kisi krutu na a ten fu a Dusun Yari Tiri fu Krestes?

⁷ Soleki fa a fisyun e sori, dan a ten fu a Dusun Yari Tiri fu Krestes sa de wan ten pe sma o kisi krutu. Na apostel Yohanes ben skrifi: „Mi ben si den dedewan, den bigiwan nanga den pikinwan, e tanapu na fesi a kownusturu, èn bukulolo ben e opo. Ma wan tra bukulolo ben e opo; a de a bukulolo fu libi. Èn den dedewan ben kisi krutu tapu a gron fu den sani di ben skrifi na ini den bukulolo, akruderi den du fu den. . . . Èn den ben krutu ibriwan fu den aparti akruderi den du fu den” (Openbaring 20:12, 13). Luku taki den sma no ben o kisi krutu fu den sani di den ben du, noso den sani di den no ben du bifo den dede (Romesma 6:7). Na presi fu dati, a krutu abi fu du nanga „bukulolo” di musu opo ete. Den sani di wan sma du baka te a kon sabi san skrifi na ini den bukulolo dati, sa sori efu en nen skrifi na ini „a bukulolo fu libi”.

„Wan opobaka fu libi”, noso „wan opobaka fu krutu”

8. Sortu tu sani kan pasa te fu kaba nanga den wan di kisi wan opobaka?

⁸ A bigin fu a fisyun fu Yohanes, e sori taki Yesus abi „den sroto fu dede èn fu Hades” (Openbaring 1:18). Yehovah poti Yesus na wroko leki „a Moro Prenspariwan di kan gi sma libi”, èn a gi en a makti fu krutu „den libiwan nanga den dedewan” (Tori fu den Apostel 3:15; 2 Timoteyus 4:1). Fa a sa du disi? A sa meki den sma di dede, kon na libi baka. „No fruwondru fu disi”, na so Yesus ben taigi den ipi-ipi sma gi suma a ben e preiki, „bika a yuru e kon pe ala sma di de na ini den memregrebi, sa yere en sten èn sa kon na doro.” Dan a taki moro fara: „Den wan di ben du bun sani, fu kisi wan opobaka fu libi, den wan di ben du tegu sani, fu kisi wan opobaka fu krutu” (Yohanes 5:28-30). Sobun, san e wakti den getrow man nanga uma fu owruten?

9. (a) San furu sma o kon sabi te den kisi wan opobaka? (b) Sortu tumusi bigi leriwroko sa du na a ten dati?

⁹ Te den getrow sma fu owruten kisi wan opobaka, dan heri esi den sa kon si taki den pramisi fu Gado di den ben e bribi, kon tru. Prakseri fa den o de fayafaya fu kon sabi suma na a Siri fu na uma fu Gado, fu san a fosi Bijbel profeititori e taki na ini Genesis 3:15! Den sa breiti srefisrefi fu yere taki Yesus, a Mesias di Gado ben pramisi, tan getrow te na dede, èn taki na so fasi a ben gi en libi leki frulusu-ofrandi! (Mateyus 20:28) Den wan di o gi den wan switikon te den kon na libi baka, o breiti srefisrefi fu yepi den frustan taki a frulusu-ofrandi disi na wan fasi fa Yehovah sori wi en no-frudini bun-ati nanga sari-ati. Te den wan di kisi wan opobaka, kon si san Gado Kownukondre e du fu meki den sani kon tru di Yehovah ben abi na prakseri gi grontapu, dan a no de fu taki dati na soso prèise den o wani prèise Yehovah. Den o kisi bun furu okasi fu sori taki den de loyaal na a lobi-ati hemel Tata fu den nanga en Manpikin. Ibri sma di de na libi na a ten dati, sa prisiri fu abi wan prati na a tumusi bigi leriwroko, fu di den sa musu gi leri na ala den milyardmilyard sma di komoto fu a grebi, èn di musu sori ete taki den e warderi a frulusu-paiman di Gado gi.

10, 11. (a) Sortu okasi sa de gi ala sma na grontapu na ini a Dusun Yari Tiri? (b) Sortu krakti disi musu abi na wi tapu?

 ¹⁰ Te Abraham kisi wan opobaka a sa kisi furu trowstu te ensrefi e ondrofeni san a wani taki fu libi ondro a tiri fu a „foto” di a ben e wakti (Hebrewsma 11:10). Prakseri fa Yob sa breiti te a kon sabi taki a fasi fa a ben e libi, gi furu tra futuboi deki-ati te den ben e kisi tesi tapu a soifri retifasi fu den! Èn a no de fu taki dati Danièl sa wani sabi nomonomo fa den profeititori kon tru di Gado ben meki en skrifi!

¹¹ Iya, ala sma di o libi na ini a regtfardiki nyun grontapu, efu na den wan di kisi wan opobaka noso den wan di pasa a bigi banawtu libilibi, den alamala sa musu leri bun furu ete fu den sani di Yehovah abi na prakseri gi grontapu nanga den sma di e libi na tapu. A no de fu taki dati a howpu fu libi fu têgo èn fu prèise Yehovah fu têgo sa meki taki a leri di sma sa kisi na ini den dusun yari, de wan prisiri sani trutru. Ma a moro prenspari sani na a ten dati, na san ibriwan fu wi sa du te wi o leri san skrifi na ini den bukulolo. Wi sa du san wi leri? Wi sa denki dipi fu den tumusi prenspari sani disi èn wi sa du den, so taki disi sa gi wi krakti fu kakafutu gi Satan te a e pruberi wan lasti leisi fu puru wi komoto fu a waarheid?

12. San sa meki taki ibriwan sma sa man teki prati dorodoro na a wroko fu gi sma leri, èn fu kenki grontapu kon tron wan paradijs?

¹² Wi no musu frigiti den tumusi moi blesi sosrefi di wi sa kisi te Krestes sa gebroiki a waarde fu en frulusu-ofrandi fu tyari wini kon gi wi. Den sma di kon na libi fu di den kisi wan opobaka, no sa abi den siki di den ben abi bifo den ben dede èn den no sa malengri (Yesaya 33:24). Den o abi wan gosontu skin fu di ala sma di e libi na ini a nyun grontapu no sa siki srefisrefi. Disi o gi den na okasi fu teki prati dorodoro na a wroko fu leri den milyardmilyard sma di kisi wan opobaka, na sortu fasi den musu libi. Ala den sma disi di o libi na ini a nyun grontapu, sa abi wan prati tu na a moro bigi wroko di o du na grontapu, namku fu kenki heri grontapu kon tron wan paradijs so taki Yehovah sa kisi prèise.

13, 14. Fu san ede Satan sa lusu baka fu tesi sma wan lasti leisi, èn san kan pasa nanga ibriwan fu wi?

¹³ Te Satan lusu komoto fu a dipi peti, dan a o pruberi fu kori libisma baka, so taki a kan tesi den wan lasti leisi. Soleki fa Openbaring 20:7-9 e sori, dan Gado o krutu ala ’den pipel di Satan o kori’ noso ala den grupu sma di o brokokindi gi na ogri krakti di Satan o abi na den tapu, èn den o kisi pori, iya, ’faya o saka kon fu hemel èn a o swari den’. Sonwan fu den sma di Satan o kori, na sma di kisi wan opobaka na ini a Dusun Yari Tiri, sobun te den o kisi pori dan dati o sori taki den kisi wan opobaka fu krutu. Na a tra sei, te den sma di kisi wan opobaka, tan hori a soifri retifasi fu den, dan den sa kisi a presenti fu têgo libi. Fu tru, na opobaka fu den sa de „wan opobaka fu libi”.​—Yohanes 5:29.

¹⁴ Fa na opobaka howpu kan trowstu wi nownow kaba? Wan moro prenspari aksi na: San wi musu du fu abi a dyaranti taki wi o kisi wini fu na opobaka howpu na ini a ten di e kon?

Sani di wi kan leri nownow kaba

15. Fa a bribi di wi e bribi na ini na opobaka kan yepi wi nownow kaba?

¹⁵ Kande a no de so langa pasa di yu lasi wan lobiwan fu yu na ini dede èn kande yu e pruberi ete fu fiti yusrefi na a bigi kenki di kon na ini yu libi, now di yu lasi a sma disi. Na opobaka howpu kan meki yu firi korostu èn a kan gi yu a krakti di trawan no abi fu di den no sabi a waarheid. „Wi no wani taki unu no sabi fu den wan di e sribi na ini dede”, na so Paulus ben trowstu den Tesalonikasma, „so taki unu no e sari neleki fa den tra sma e sari di no abi wan howpu” (1 Tesalonikasma 4:13). Yu e si yusrefi na ini a nyun grontapu kaba pe yu e si fa sma e kisi wan opobaka? Yu kan kisi trowstu nownow kaba te yu e tan hori na prakseri taki yu o miti den lobiwan fu yu baka.

16. Fa wi sa firi te sma o kisi wan opobaka?

¹⁶ Di Adam opo ensrefi teige Gado, dan wan fu den bakapisi di dati tyari kon, na taki a  gosontu fu libisma go na baka. Fu dati ede, a kan taki yu e nyan pina now fu di yu abi wan seryusu siki. No meki den broko-ede di a siki disi e gi yu, meki taki yu frigiti a tumusi moi howpu taki yusrefi kan kisi wan opobaka èn taki yusrefi kan kon na libi baka na ini a nyun grontapu, pe yu o de wan gosontu sma baka, di abi furu krakti. Te yu opo yu ai èn e si fa ala sma e prisiri fu gi yu wan switikon fu di yu kisi wan opobaka, dan a no de fu taki dati yu sa taki Gado tangi gi a lobi bun-ati fu en.

17, 18. Sortu tu prenspari sani wi musu tan hori na prakseri?

¹⁷ Ma solanga a ten dati no doro ete, tu prenspari sani de di wi musu tan hori na prakseri. A fosiwan, na taki a de prenspari fu dini Yehovah nownow nanga wi heri ati. Neleki wi Masra, Krestes Yesus, wi musu libi sondro fu denki wisrefi nomo, bika dati e sori taki wi lobi Yehovah èn tra sma sosrefi. Efu sma e gens wi, noso e frufolgu wi so taki wi no man feni wan libi èn wi no man de fri fu du san wi wani, dan meki wi abi a fasti bosroiti fu tan tanapu kánkan na ini a bribi, awinsi sortu tesi e miti wi. Efu gensman wani kiri wi, dan na opobaka howpu e gi wi trowstu èn a e gi wi a krakti fu tan loyaal na Yehovah nanga a Kownukondre fu en. Iya, te wi de fayafaya fu du a Kownukondre preikiwroko èn fu meki disipel, dan dati kan meki taki wi tan abi a howpu fu kisi den têgo blesi di Yehovah pramisi den regtfardikiwan.

¹⁸ A di fu tu sani di wi musu tan hori na prakseri, abi fu du nanga a fasi fa wi e handri te tesi e miti wi leki sondusma. Fu di wi sabi taki wan opobaka howpu de, èn fu di wi e warderi a no-frudini bun-ati fu Yehovah, meki wi kon kisi wan moro fasti bosroiti fu tan tanapu kánkan na ini a bribi. „No lobi grontapu nanga den sani fu grontapu”, na so na apostel Yohanes ben warskow. „Efu wan sma lobi grontapu, dan a lobi fu a Tata no de na ini en. Bika ala sani di de fu grontapu, a lostu fu a skin nanga a lostu fu den ai nanga a prodo di wan sma e prodo nanga den gudu di a abi, no komoto fu a Tata, ma den sani disi komoto fu grontapu. Boiti dati, grontapu e pasa gowe nanga den lostu fu en, ma a sma di e du a wani fu Gado, e tan fu têgo” (1 Yohanes 2:15-17). Grontapu e gi sma deki-ati fu feti baka gudu, ma te wi e teki a grontapu libi gersi nanga „a trutru libi” di wi kan kisi, dan a grontapu libi no o hari wi srefisrefi (1 Timoteyus 6:17-19). Efu wi kisi tesi fu du hurudu, dan wi sa man kakafutu gi dati. Wi e frustan taki efu wi tan libi na wan fasi di no e plisi Yehovah èn wi kon dede fosi Armagedon doro, dan a kan taki wi de na ini a srefi situwâsi leki den sma di no sa kisi wan opobaka.

19. Sortu tumusi bigi grani wi no musu frigiti?

¹⁹ A moro prenspari sani di wi no musu frigiti noiti, na a tumusi bigi grani di wi abi fu prisiri na ati fu Yehovah nownow èn fu têgo (Odo 27:11). Te wi e tan getrow te na dede, noso te wi e tan hori wi soifri retifasi te na a kaba fu na ogri sistema disi, dan dati e sori Yehovah taki wi de na en sei na ini a strei fu suma abi a reti fu tiri hemel nanga grontapu. Dan a sa de wan prisiriten trutru fu libi na ini a Paradijs na grontapu, fu di wi pasa a bigi banawtu, noso fu di wi kisi wan opobaka na wan wondru fasi!

A sa meki wi kisi ala san wi wani

20, 21. San sa yepi wi fu tan getrow, srefi efu wi no kisi piki tapu ala den aksi di abi fu du nanga na opobaka? Fruklari dati.

²⁰ Na ini den artikel disi, wi no gi piki na tapu ala aksi di abi fu du nanga na opobaka. Fa Yehovah sa seti sani gi den wan di ben trow fosi den dede? (Lukas 20:34, 35) Den sma di dede sa kisi wan opobaka na a srefi presi pe den ben dede? Den sa kon na libi baka krosibei fu a presi pe den famiriman fu den e tan? Wan lo tra aksi de ete fu a fasi fa sani o seti na a ten fu na opobaka. Toku wi musu hori den wortu fu Yeremia na prakseri: „Yehovah bun gi a sma di e howpu na en tapu. A bun sosrefi gi a sili di e tan suku en. A bun taki wan sma musu wakti, iya, sondro fu taki wan sani, tapu a frulusu di e kon fu Yehovah” (Kragisingi 3:25, 26). Na a reti ten, Yehovah sa tyari ala sani di wi wani sabi, kon na krin gi wi. Fu san ede wi kan de seiker fu dati?

²¹ Prakseri den wortu di a psalm skrifiman ben singi fu Yehovah, di a krakti fu a santa yeye ben de na en tapu: „Yu e opo yu anu èn e meki ala libisani kisi den sani di den wani” (Psalm 145:16). O moro wi e kon owru, o moro wi e kenki prakseri fu den sani di wi wani. Den sani di wi ben e howpu na ini wi pikin-nengreten, no de san wi wani nownow. Den sani di wi e ondrofeni nanga den sani di wi e howpu, abi krakti tapu a fasi fa wi e si a libi. Ma toku, awinsi sortu bun sani wi wani na ini a nyun grontapu, Yehovah sa man gi wi ala den sani dati trutru.

22. Fu san ede wi musu prèise Yehovah?

²² A moro prenspari sani di ibriwan fu wi musu du now, na fu tan getrow. „Fu di wi na futuboi, meki wi musu de getrow” (1 Korentesma 4:2). Wi na futuboi di e preiki a tumusi moi bun nyunsu fu Gado Kownukondre. Te wi e meki a bun nyunsu disi bekènti fayafaya gi ala sma di wi e miti, dan dati sa yepi wi fu tan tapu a pasi fu libi. Noiti no frigiti taki „ten nanga sani di e pasa sondro fu sma fruwakti dati” e miti wi alamala (Preikiman 9:11). Wi no sabi san a libi o tyari gi wi, ma efu wi no wani broko wi ede tumusi furu nanga san kan pasa, dan wi musu tan abi wan tranga bribi na ini a tumusi moi howpu fu na opobaka. Abi na overtoigi taki efu a sori leki yu o dede bifo a Dusun Yari Tiri fu Krestes bigin, yu kan kisi trowstu fu di yu sabi taki wan moro bun ten o kon. Na a ten di Yehovah wani, yu sa man taki a srefi sani di Yob taigi en Mekiman, namku: „Yu sa kari, èn misrefi sa piki yu.” Meki wi prèise Yehovah di e angri fu meki ala sma di a e memre, kon na libi baka!​—Yob 14:15.

[Futuwortu]

 Yu e memre disi ete?

• San sa meki taki sma kisi krutu na ini a Dusun Yari Tiri?

• Fu san ede son sma o kisi „wan opobaka fu libi” èn trawan „wan opobaka fu krutu”?

• Fa na opobaka howpu kan trowstu wi nownow kaba?

• Fa den wortu fu Psalm 145:16 kan de wan yepi gi wi, awinsi wi no sabi den piki tapu ala aksi di abi fu du nanga na opobaka?

[Aksi fu a tori disi]

[Prenki na tapu bladzijde 21]

Fa a bribi di wi e bribi na ini na opobaka kan yepi wi nownow kaba?