Suma sa kisi wan opobaka?

„No fruwondru fu disi, bika a yuru e kon pe ala sma di de na ini den memregrebi, sa yere en sten èn sa kon na doro.”​—YOHANES 5:28, 29.

1. Sortu prenspari sani wan sten taigi Moses na a makabusi di ben teki faya, èn suma ben taki den srefi wortu bakaten?

WAN tumusi freimde sani pasa moro leki 3500 yari pasa. Moses ben e luku den skapu di ben de fu a famiri-edeman Yeitro. Krosibei fu a Horeb-bergi, wan engel fu Yehovah ben sori ensrefi na ini wan faya, mindrisei fu wan makabusi. „Moses ben e tan luku, èn a si taki a makabusi ben teki faya, ma toku a makabusi no ben e bron”, na so a Bijbel buku Exodus e fruteri. Ne wan sten na ini a makabusi kari en. „Mi na a Gado fu yu tata”, na so a sten taki, „a Gado fu Abraham, a Gado fu Isak, èn a Gado fu Yakob” (Exodus 3:1-6). Bakaten, na ini a fosi yarihondro G.T., Yesus, a Manpikin fu Gado ben taigi sma den srefi wortu disi baka.

2, 3. (a) Sortu howpu de gi Abraham, Isak, nanga Yakob? (b) Sortu aksi e opo kon?

² Yesus ben gebroiki den wortu disi na ini wan takimakandra nanga wan tu Saduseiman, di no ben e bribi na ini na opobaka. Yesus ben taki: „Srefi Moses ben tyari kon na krin taki den dedewan e kisi wan opobaka, na ini a tori fu a makabusi, di a e kari Yehovah ’a Gado fu Abraham èn a Gado fu Isak èn a Gado fu Yakob’. A no de wan Gado fu den dedewan, ma fu den libiwan, bika gi en, den alamala e libi” (Lukas 20:27, 37, 38). Nanga den wortu disi, Yesus ben sori taki Gado e memre Abraham, Isak, nanga Yakob leki sma di de na libi ete, aladi den ben dede langa ten kaba. Neleki Yob, den man disi e wakti a ten te a „fruplekti wroko” fu den o kon na wan kaba, dati wani taki a kaba fu a pisi ten di den dede (Yob 14:14). Na ini a nyun grontapu fu Gado, den sa kisi wan opobaka.

³ Ma fa a de nanga den furu milyardmilyard tra sma di dede na ini a heri historia fu libisma? Den sa kisi wan opobaka tu? Fosi wi go suku wan bun piki tapu na aksi disi, dan meki wi ondrosuku Gado Wortu fu kon sabi pe sma e go te den dede.

Pe den dedesma de?

4. (a) Pe sma e go te den dede? (b) San na Syeol?

⁴ Bijbel e taki dati den dedewan „no sabi notinoti”. A no e taki dati dedesma e kisi skin-ati na ini wan helfaya, noso taki den abi fu wakti wan langa pisi ten na ini Limbo, nanga bun furu muiti. * Bijbel e taki nomo dati dedesma e tron doti. Fu dati ede, Gado Wortu e taigi den sma di de na libi: „Ala san yu anu feni fu du, du dati nanga yu krakti srefi, bika nowan wroko noso prakseri noso sabi noso koni no de na  ini Syeol, a presi pe yu e go” (Preikiman 9:5, 10; Genesis 3:19). Furu sma no sabi a wortu „Syeol”. A de wan wortu di den Hebrewsma ben e gebroiki, ma wi no sabi soifri fu pe a komoto. Furu kerki e leri taki den dedewan de na libi ete, ma a Wortu fu Gado di sma skrifi nanga a krakti fu a santa yeye, e sori taki den sma na ini Syeol dede èn den no sabi notinoti. Syeol na a grebi pe ala dedesma de.

5, 6. Pe Yakob go di a dede, èn suma ben de drape kaba?

⁵ A fosi leisi di Bijbel e taki fu „Syeol” skrifi na ini Genesis 37:35. Di a famiri-edeman Yakob ben denki taki en lobi manpikin Yosef dede, dan a no ben wani taki sma trowstu en. A ben taki: „Nanga sari mi o saka go na mi manpikin na ini Syeol!” Fu di Yakob ben e bribi taki en manpikin dede, meki a ben wani dede tu fu go na ini Syeol. Bakaten, neigi fu den moro owru manpikin fu Yakob ben wani teki Benyamin, a moro yongu manpikin fu en, fu tyari en go na Egepte so taki den ben man kisi nyanyan di angriten ben de. Ma Yakob no ben wani seni a boi, sobun a taki: „Mi manpikin no o saka go na Egepte nanga unu, bika en brada dede èn en wawan tan abra. Efu wan ogri ben o miti en, so taki a kon dede na a pasi pe unu o go, dan fu tru, nanga mi weti wiwiri èn nanga sari, unu ben o meki mi saka go na ini Syeol” (Genesis 42:36, 38). Den tu tori disi e sori taki dede abi fu du nanga Syeol; den no e sori taki libi de ete, baka te wan sma dede.

⁶ Genesis e fruteri taki Yosef ben tron a fesiman di ben musu taki fa a nyanyan musu prati na ini Egepte. Dati meki Yakob ben man go drape so taki a ben kan miti Yosef baka, wan sani di ben e meki en prisiri srefisrefi. Baka dati, Yakob tan libi na ini a kondre dati, teleki a kon owru srefisrefi èn a dede di a ben abi 147 yari. Soleki fa Yakob ben taki di a ben de fu dede, den manpikin fu en teki en dedeskin èn den tyari en go beri na ini a bergi-olo fu Makpela na ini a kondre Kanan (Genesis 47:28; 49:29-31; 50:12, 13). Na so Yakob ben kon de na a srefi presi pe en papa Isak nanga en granpapa Abraham ben de.

’Den go na den afo fu den’

7, 8. (a) Pe Abraham go di a dede? Fruklari dati. (b) San e sori taki tra sma go na ini Syeol tu di den dede?

⁷ Wan pisi ten na fesi, di Yehovah ben seti wan frubontu nanga Abraham èn di a ben pramisi Abraham taki a ben o kisi furu bakapikin, dan Yehovah sori en tu san ben o pasa nanga en. „Yu fu yu sei”, na so Yehovah ben taki, „sa go na den afo fu yu na ini vrede; den sa beri yu te yu kon owru srefisrefi” (Genesis 15:15). Èn disi na soifri san pasa. Genesis 25:8 e taki: „Ne Abraham hari en lasti bro èn a dede, di a ben kon owru srefisrefi, a ben owru èn a ben de tevrede nanga en libi, èn den ben tyari en poti na a pipel fu en.” Suma ben de a pipel fu en? Genesis 11:10-26 e kari ala den afo fu Abraham, teleki Sem srefi di ben de wan manpikin fu Noa. Sobun, a pipel pe Abraham ben go di a dede, na den dedesma di ben de na ini Syeol kaba.

⁸ Den wortu „tyari en poti na a pipel fu en” de fu feni furu tron na ini den Hebrew Buku fu Bijbel. Dati meki wi kan frustan taki Ismael, a manpikin fu Abraham, èn sosrefi Aron, a brada fu Moses, ben go tu na ini Syeol di den dede, èn den o tan drape teleki den kisi wan opobaka (Genesis 25:17; Numeri 20:23-29). Na so a de tu taki Moses go na ini Syeol tu, aladi nowan sma sabi pe a grebi fu en de (Numeri 27:13; Deuteronomium 34:5, 6). Na so a de tu taki Yosua, di ben tron fesiman fu Israel baka Moses, èn wan heri grupu sma di ben e libi na ini a ten dati, saka go na ini Syeol tu di den dede.​—Krutuman 2:8-10.

9. (a) Fa Bijbel e sori taki a Hebrew wortu „Syeol” nanga a Griki wortu „Hades” e sori go na a srefi presi? (b) Sortu howpu den sma abi di de na ini Syeol, noso Hades?

⁹ Wan tu hondro yari baka dati, David tron kownu fu den 12 lo fu Israel. Di a dede, a „go didon na den afo fu en” (1 Kownu 2:10). A ben de na ini Syeol tu? A moi fu si taki na a Pinksterfesa fu 33 G.T., di na apostel Petrus ben taki fu a dede fu David, dan a ben taki san skrifi na ini Psalm 16:10: „Yu no sa libi a sili fu mi na ini Syeol.” Baka di Petrus taki dati David ben de na  ini en grebi ete, dan Petrus sori taki den srefi wortu disi ben abi fu du nanga Yesus. A ben sori tu taki David „ben si na fesi èn a ben taki fu na opobaka fu Krestes, taki Gado no ben libi en na ini Hades èn taki en skin no ben kisi pori. Gado ben gi a Yesus disi wan opobaka, èn fu a sani disi wi alamala na kotoigi” (Tori fu den Apostel 2:29-32). Dyaso Petrus gebroiki a Griki wortu „Hades” di wani taki a srefi leki a Hebrew wortu „Syeol”. Sobun, te Bijbel e taki dati sma de na ini Hades, dan den sma disi de na ini a srefi situwâsi leki den sma fu suma Bijbel e taki dati den de na ini Syeol. Na agersi fasi den e sribi, èn den e wakti fu kisi wan opobaka.

Onregtfardiki sma de na ini Syeol?

10, 11. Fu san ede wi kan taki dati son onregtfardiki sma go na ini Syeol, noso Hades, di den dede?

¹⁰ Baka di Moses tyari a pipel Israel komoto fu Egepte, dan wan tu fu den opo densrefi teige Moses èn den bigin meki dyugudyugu na ini a gran sabana. Moses taigi a pipel fu komoto na ini a birti fu Korak, Datan, nanga Abiram di ben e teki fesi na ini a dyugudyugu disi. Den man disi ben o dede na wan ogri-ati fasi Moses ben taki: „Efu den sma disi o dede leki fa ala libisma e dede èn efu den o kisi strafu leki fa ala libisma e kisi strafu, dan a no Yehovah seni mi kon. Ma efu na wan aparti sani di Yehovah o meki pasa, taki a gron musu opo en mofo èn swari den sma disi makandra nanga ala sani fu den, èn taki den musu saka go na ini Syeol libilibi, dan unu sa sabi seiker taki den man disi wisiwasi Yehovah” (Numeri 16:29, 30). Sobun, awinsi fa den sma di ben meki dyugudyugu dede, efu na a gron opo en mofo swari den, noso efu na faya bron den leki fa ben pasa nanga Korak nanga den 250 Leifisma di ben teki en sei, toku den alamala go na ini Syeol, noso Hades.​—Numeri 26:10.

¹¹ Simei, di ben fluku Kownu David, ben kisi en strafu fu Salomo, di ben tron kownu baka David. „No libi en sondro fu strafu en”, na so David ben taki, „bika yu na wan koni man èn yu sabi heri bun san yu musu du nanga en; nanga brudu yu musu meki en weti wiwiri saka go na ini Syeol.” Salomo ben meki Benaya strafu Simei (1 Kownu 2:8, 9, 44-46). Wan tra sma di Benaya ben musu kiri tu fu di a ben kisi dedestrafu, ben de Yoab di ben de a legre-edeman fu Israel fosi. Den weti wiwiri fu en no ben „saka go na ini Syeol na ini vrede” (1 Kownu 2:5, 6, 28-34). Ala den tu eksempre disi e sori taki den sani di David ben singi nanga a krakti fu a santa yeye, na tru sani, namku: „Den ogrisma sa drai go baka na ini Syeol, sosrefi ala pipel di e frigiti Gado.”​—Psalm 9:17.

12. Suma ben de Akitofel, èn pe a go di a dede?

¹² Akitofel ben de David en eigi raiman. Sma ben e si a rai fu en leki rai di komoto fu Yehovah srefi (2 Samuel 16:23). Ma a de wan sari taki a futuboi disi di ala sma ben e frutrow, ben tron wan toriman bakaten èn a ben go teki a sei fu Absalom, a manpikin fu David di ben opo ensrefi teige en papa. Soleki fa a sori, dan David ben e taki fu a toriman disi, di a skrifi: „Bika a no wan feanti ben e gi mi porinen; efu dati ben de so, dan mi ben sa man frudrage en. A no wan sma di abi bita-ati gi mi, ben du leki a hei  moro mi; noso mi ben kan kibri gi en.” David ben taki moro fara: „Meki den kisi pori! Meki den saka go na ini Syeol libilibi; bika di den ben e libi leki freimdesma na ini a kondre, ogri sani ben de na ini den” (Psalm 55:12-15). Di Akitofel nanga den mati fu en dede, den go na ini Syeol.

Suma de na ini Gehena?

13. Fu san ede Yesus kari Yudas „a manpikin di o kisi têgo pori”?

¹³ Teki a situwâsi fu David gersi nanga a di fu Yesus, a Moro Bigi David. Wan fu den 12 apostel fu Krestes, namku Yudas Iskariot, ben kon de wan toriman tu, neleki Akitofel. Ma a tori di Yudas tori Yesus ben ogri moro leki iniwan sani di Akitofel du. Yudas ben tori a wan-enkri gebore Manpikin fu Gado. Na a kaba fu en diniwroko na grontapu, di a Manpikin fu Gado ben e begi, dan a taki fu den bakaman fu en, taki: „Di mi ben de nanga den, mi ben kibri den fu yu eigi nen ede, a nen di yu gi mi; mi kibri den èn nowan fu den dede boiti a manpikin di o kisi têgo pori, so taki a sani di skrifi na ini Gado Buku kan kon tru” (Yohanes 17:12). Na ini a tekst disi, Yesus kari Yudas „a manpikin di o kisi têgo pori”, èn nanga disi a ben wani sori taki di Yudas dede, nowan howpu ben de gi en taki a ben o kisi wan opobaka. Gado no tan memre en. A no go na ini Syeol, ma a go na ini Gehena. San na Gehena?

14. San Gehena wani taki?

¹⁴ Yesus ben krutu den kerki fesiman fu a ten fu en, fu di den ben meki ibriwan fu den disipel fu den tron „wan sma di bun gi Gehena” (Mateyus 23:15). Na ini a ten dati, sma ben sabi a presi Gehena leki a Lagipresi fu Hinom sosrefi. Drape den ben e trowe doti èn sosrefi den dedeskin fu ogriman di ben kisi dedestrafu èn di no ben warti fu beri na wan lespeki fasi. Wan pisi ten na fesi, Yesus ben taki kaba fu Gehena na ini a Bergitaki fu en (Mateyus 5:29, 30). Sobun, den arkiman fu en ben frustan krin san Gehena ben wani taki na agersi fasi. Gehena ben e sori taki wan sma kisi pori krinkrin, so taki nowan howpu ben de gi en fu kisi wan opobaka. A de so taki tra sma, boiti Yudas Iskariot di ben e libi na ini a ten fu Yesus, go na ini Gehena tu di den dede, na presi fu go na ini Syeol, noso Hades?

15, 16. Suma nanga suma go na ini Gehena di den dede, èn fu san ede den go drape?

¹⁵ Di Gado meki den fosi libisma, Adam nanga Eva, den ben volmaakti. Fu espresi den sondu. Den ben kan teki a bosroiti fu libi fu têgo, noso fu dede. Den trangayesi Gado èn den teki a sei fu Satan. Di den dede, den no ben abi a howpu fu kisi wini fu a frulusu-ofrandi fu Krestes. Na presi fu dati, den go na ini Gehena.

¹⁶ Kain, a fosi manpikin fu Adam, kiri en  brada Abel, èn baka dati a ben e libi leki wan loweman. Na apostel Yohanes ben taki dati Kain ben de wan sma „di komoto fu na ogriwan” (1 Yohanes 3:12). Fu dati ede wi kan taki dati di a dede, a go na ini Gehena tu, neleki en papa nanga en mama (Mateyus 23:33, 35). A situwâsi fu en de heri tra fasi leki a di fu a regtfardiki Abel! „Fu di Abel ben abi bribi meki a tyari wan ofrandi gi Gado di ben warti moro di fu Kain, èn fu a bribi dati ede kotoigi ben gi taki a ben de regtfardiki, fu di Gado ben kan kotoigi fu den presenti di a ben gi”, na so Paulus ben taki, èn a ben taki sosrefi, „èn nanga dati a e taki ete, aladi a dede” (Hebrewsma 11:4). Iya, now Abel de na ini Syeol e wakti fu kisi wan opobaka.

Wan „fosi” opobaka èn wan „moro bun” opobaka

17. (a) Suma e go na ini Syeol na ini a ’ten disi fu a kaba’? (b) San o pasa nanga den sma di de na ini Syeol, èn nanga den sma di de na ini Gehena?

¹⁷ Furu sma di e leisi na artikel disi, sa aksi densrefi san na a situwâsi fu den sma di e dede na ini a ’ten disi fu a kaba’ (Danièl 8:19). Openbaring kapitel 6 e fruteri fu fo man di ben o rèi na tapu asi na ini a pisi ten dati. A moi fu si, taki a lastiwan fu den man disi abi a nen Dede, èn leti na en baka Hades e kon. Sobun, den sani di den man na tapu den asi e du e meki taki furu sma e dede tumusi fruku èn den e go na ini Hades, pe den e wakti fu kisi wan opobaka na ini a nyun grontapu fu Gado (Openbaring 6:8). Sobun, san o pasa nanga den sma di de na ini Syeol (Hades), èn den sma di de na ini Gehena? Fu taki en syatu, den wan di de na ini Syeol o kisi wan opobaka, èn den wan di de na ini Gehena kisi pori fu têgo, sobun noiti den o kon na libi baka.

18. San na a howpu fu den sma di abi wan prati na „a fosi opobaka”?

¹⁸ Na apostel Yohanes ben skrifi: „Koloku èn santa ibri sma de, di abi wan prati na a fosi opobaka; na tapu den wan disi a di fu tu dede no abi makti, ma den sa de priester fu Gado èn fu Krestes èn den sa tiri leki kownu makandra nanga en, dusun yari langa.” Den sma di o tiri makandra nanga Krestes, abi wan prati na „a fosi opobaka”, ma sortu howpu de gi den tra libisma?​—Openbaring 20:6.

19. Fa son sma sa kisi wini fu „wan moro bun opobaka”?

¹⁹ Sensi den dei fu Elia nanga Elisa di ben de futuboi fu Gado, a wondru fu na opobaka meki taki sma kon na libi baka. „Uma ben kisi den dedewan fu den baka nanga yepi fu wan opobaka”, na so Paulus ben fruteri, „ma tra man ben kisi hebi skin-ati, bika den no ben wani fu kon fri nanga yepi fu wan sortu lusu-paiman, so taki den ben man kisi wan moro bun opobaka.” Iya, den getrow sma disi di ben tan hori a soifri retifasi fu den, no ben e howpu fu kisi wan opobaka di ben o meki den libi ete wan tu yari teleki den dede, ma den ben e howpu fu kisi wan opobaka fu libi fu têgo! Fu tru, dati sa de „wan moro bun opobaka”.​—Hebrewsma 11:35

20. San na artikel di e kon, sa sori wi?

²⁰ Efu wi tan getrow èn wi kon dede bifo Yehovah tyari wan kaba kon na a ogri sistema disi, dan wi abi a trutru howpu fu kisi „wan moro bun opobaka”. A de wan moro bun opobaka fu di wi e howpu fu libi fu têgo. Yesus ben pramisi: „No fruwondru fu disi, bika a yuru e kon pe ala sma di de na ini den memregrebi, sa yere en sten èn sa kon na doro” (Yohanes 5:28, 29). Na artikel di e kon, sa sori moro krin fu san ede wan opobaka o de. A sa sori wi fa na opobaka howpu e gi wi deki-ati fu tan hori wi soifri retifasi èn fa a e yepi wi fu du sani sondro fu denki wisrefi nomo.

[Futuwortu]

Yu e memre disi ete?

• Fu san ede Bijbel e kari Yehovah, a Gado „fu den libiwan”?

• San na a situwâsi fu den sma di de na ini Syeol?

• San pasa nanga den wan di de na ini Gehena?

• Fa son sma sa kisi wini fu „wan moro bun opobaka”?

[Aksi fu a tori disi]

[Prenki na tapu bladzijde 15]

Den wan di go na ini Syeol sa kisi wan opobaka, neleki Abraham

[Prenki na tapu bladzijde 16]

Fu san ede Adam nanga Eva, Kain, nanga Yudas Iskariot go na ini Gehena?