Heri esi pôtifasi no sa de moro na grontapu

PRENKI di abi fu du nanga a Paradijs, soleki a prenki di yu e si na tapu a kafti fu a tijdschrift disi, e hari a prakseri fu pôtisma. A fosi man nanga uma, Adam nanga Eva, ben e libi na ini wan paradijs. A tanpe fu den, ben de a dyari fu Eden (Genesis 2:7-23). Aladi a Paradijs dati no de moro, toku a no de wan dren fu bribi taki wan paradijs o kon na ini a ten di de na wi fesi, èn taki wi sa libi na ini wan nyun grontapu pe pôtifasi no sa de moro. Wi kan bribi disi fu di Bijbel e pramisi taki disi o pasa trutru.

Prakseri san Yesus Krestes ben pramisi na a lasti dei fu en libi na grontapu. Wan fu den ogriman di dede makandra nanga Yesus, ben sori taki a ben e bribi taki Gado abi a makti fu lusu den problema fu libisma. A ben taki: „Yesus, memre mi te yu kon na ini yu kownukondre.” Disi e sori taki na ogriman disi ben e bribi taki Yesus ben o tiri leki Kownu èn taki den dedewan ben o kisi libi baka. Yesus ben piki: „Fu tru, mi e taigi yu tide: Yu sa de nanga mi na ini Paradijs.”​—Lukas 23:42, 43.

Bijbel e fruteri wi fu den sma di o libi na ini a Paradijs. A e taki: „Den sa bow oso trutru èn libi na ini, èn den sa prani droifidyari trutru èn nyan fu den froktu fu den” (Yesaya 65:21). Iya, „den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi; bika na a mofo fu Yehovah fu den legre srefi taki disi”.​—Mika 4:4.

Ma fu san ede meki Gado gi pasi taki pôtifasi de na ini a ten disi? Sortu yepi Gado e gi den sma di e pina fu di den na pôtisma? O ten pôtifasi sa kon na wan kaba trutru?

Fu san ede Gado gi pasi taki pôtifasi de?

A Paradijs pe Gado ben poti Adam nanga Eva ben kon lasi, fu di den meki na ogri engel Satan Didibri kori den fu opo densrefi teige Gado. A ben gebroiki wan sneki fu kori Eva, so taki na uma disi no gi yesi na a wet fu Gado di ben taki dati a no ben musu nyan fu a froktu fu a bon di Gado ben sori den. Didibri ben kori Eva, so taki na uma disi go prakseri taki a ben o abi wan moro bun libi efu a no ben sa abi fu gi yesi na Gado. Di Eva gi Adam wan pisi fu a froktu di den no ben mag nyan, dan Adam nyan tu, èn na so fasi a drai en baka gi Gado fu kan horibaka gi na uma fu en.​—Genesis 3:1-6; 1 Timoteyus 2:14.

Nanga reti Gado ben yagi a man nanga na uma disi komoto na ini a Paradijs, fu di den ben opo densrefi teige en; èn sensi a ten dati den ben abi fu feti fu kan tan na libi. Te na ini a ten disi, Yehovah gi Satan na okasi fu tiri a sondu libisma famiri, fu sori san na den bakapisi te sma no e gi yesi na Gado. A historia sori taki libisma no man kenki grontapu kon tron wan Paradijs (Yeremia 10:23). Na presi fu dati, a denki di sma abi fu libi sondro fu Gado tiri den, ben abi leki bakapisi taki bigi problema kon. Wán fu den problema dati, na pôtifasi.​—Preikiman 8:9.

 Ma den pôtiwan no de sondro yepiman na ini a grontapu disi di lai so furu problema. Bijbel, a Wortu fu Gado, di a meki sma skrifi, abi bun rai na ini di kan sori sma san fu du.

„Noiti un musu broko un ede nanga sani”

Di Yesus ben e taki nanga wan bigi grupu fu sma pe pôtiwan ben de na ini tu, dan a taigi den sma: „Luku den fowru bun di e frei na loktu, bika den no e sai siri, den no e koti nyanyan èn den no e kibri nyanyan na ini maksin; toku un Tata na hemel e gi den nyanyan. Unu no warti moro den? . . . Fu dati ede, noiti un musu broko un ede nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ Bika ala den sani disi na san den grontapusma e feti fu kisi. Bika un Tata na hemel sabi taki unu abi ala den sani disi fanowdu. Fu dati ede, tan suku a kownukondre nanga En regtfardikifasi fosi, dan unu sa kisi ala den tra sani tu.”​—Mateyus 6:26-33.

Wan pôtisma no abi fu go fufuru (Odo 6:30, 31). A o kisi san a abi fanowdu efu a poti Gado na a fosi presi na ini en libi. Prakseri a tori fu Tukiso, wan man fu a kondre Lesoto, na a zuidsei fu Afrika. Na ini 1998, srudati fu wan tra kondre ben broko kon na ini Lesoto, di sma ben go na strati fu puru a tirimakti fu a kondre. Leki bakapisi fu a feti dati, sma ben broko go na ini den wenkri fu teki sani, trawan lasi den wroko, èn nyanyan no ben de.

Tukiso ben e libi na ini a moro pôti kontren fu a mamafoto. Furu fu den birtisma fu en go fufuru sani na ini wenkri fu kan tan na libi. Di Tukiso doro baka na ini a pikin oso fu en, di ben abi wán kamra nomo, dan a si Maseiso, na uma di ben e libi nanga en, sidon nanga bun furu nyanyan sani di a ben fufuru na ini wenkri. „Tyari den sani disi go na dorosei”, Tukiso ben taigi en. A ben fruteri na uma taki a wet fu Gado e sori taki yu no mag fufuru. Maseiso du san Tukiso taigi en. Den birtisma fu den ben spotu den èn den teki den fufuru sani, tyari go na den oso.

Tukiso ben du disi fu di a ben e studeri Bijbel nanga Yehovah Kotoigi èn fu di a ben e prakseri den sani di a ben leri. Ma dati wani taki dati a man disi ben tan nanga angri fu di a gi yesi na a wet fu Gado? Nôno. Syatu baka dati den owruman fu a gemeente fu Yehovah Kotoigi pe Tukiso ben e go, ben tyari nyanyan kon gi en. Iya, den Kotoigi fu Yehovah na ini Zuid-Afrika di de leti sei a kondre disi, ben seni bun furu sani fu yepi den Kresten brada nanga sisa fu den na ini Lesoto. Di Maseiso si fa Tukiso gi yesi na Gado èn di a si fa a gemeente ben yepi den na wan lobi-ati fasi, dan dati ben naki en ati trutru. Ensrefi ben bigin studeri Bijbel tu. Te fu kaba, den trow na lanti, so taki den ben kan doro a marki fu teki dopu leki Kotoigi fu Yehovah, èn te now den e dini Gado getrow.

Yehovah Gado e broko en ede nanga den pôtiwan. (Luku a faki di nen „Fa Gado e prakseri fu  pôtisma?”) Na wan lobi-ati fasi a seti sani fu yepi tra sma fu kon sabi en, sma di de neleki Tukiso nanga Maseiso. Na ini a Wortu fu en a e gi rai tu di wi kan gebroiki na ini wi aladei libi.

Wan moi seti di e tyari wini kon

Ala ten Yehovah Kotoigi pruberi fu sori taki den e broko den ede nanga pôtisma neleki fa Gado e broko en ede nanga den sma dati (Galasiasma 2:10). Furu tron a de so taki te rampu pasa na ini wan kondre èn te tru Kresten kisi problema leki bakapisi fu dati, dan sani e seti fu gi den a yepi di de fanowdu. San de moro prenspari, na taki den Kotoigi e seti sani fu gi ala sma san den abi fanowdu na yeye fasi; den e du disi sosrefi gi den pôtiwan (Mateyus 9:36-38). Na ini den 60 yari di pasa, dusundusun bedinari di kisi leri fu du a diniwroko fu den moro bun, ben pristeri densrefi fu dini leki zendeling na ini tra kondre. Leki eksempre, a zendeling brada nanga a sisa di ben yepi Tukiso nanga Maseiso fu tron disipel fu Yesus, ben de fu Fensikondre èn den ben leri Sesototongo fu man yepi den (Mateyus 28:19, 20). Furu tron sma di e tron zendeling e gowe libi a switi libi di den ben abi na ini wan gudu kondre, fu go dini na wan pôti kondre.

Tru Kresten no e si en leki wan bun sani fu go fufuru, soso fu kan tan na libi. Na presi fu dati, den e bribi taki Yehovah man gi den san den abi fanowdu (Hebrewsma 13:5, 6). Wán fasi fa Yehovah e sorgu gi a pipel fu en de nanga yepi fu en organisâsi fu anbegiman na heri grontapu; na organisâsi abi anbegiman di e broko den ede nanga makandra.

Wan tra fasi fa Yehovah e yepi den pôtisma, de nanga yepi fu den bun rai di a e gi den fu sori den fa den musu libi. Leki eksempre, Bijbel e gi a komando: „Meki a sma di e fufuru, no fufuru  moro, ma na presi fu dati meki a go wroko tranga, fu di a e du bun wroko nanga en anu, so taki a kan abi wan sani fu prati nanga wan sma di de ini nowtu” (Efeisesma 4:28). Furu sma di no ben abi wroko, ben man sorgu gi densrefi, fu di den go du tranga wroko soleki gron-wroko. Bijbel e leri pôtisma tu fu no frumorsu a moni fu den, fu di Bijbel e leri den fu wai pasi gi takru gwenti, soleki a dringi fu sopi pasa marki.​—Efeisesma 5:18.

Wan grontapu pe pôtifasi no de moro —O ten?

Bijbel e leri wi taki wi e libi na ini „den lasti dei” fu a tiri fu Satan (2 Timoteyus 3:1). Heri esi Yehovah Gado sa seni Yesus Krestes fu krutu a libisma famiri. San o pasa na a ten dati? Yesus ben gebroiki wán fu den agersitori fu en fu gi piki tapu na aksi disi. A ben taki: „Te a Manpikin fu libisma kon nanga en glori, makandra nanga ala den engel, dan a o go sidon na tapu en gran kownusturu. Den o tyari ala pipel kon na en fesi, èn a o prati den sma neleki fa wan skapuman e prati den skapu fu den bokoboko.”​—Mateyus 25:31-33.

Den skapu na ini na agersitori disi na den sma di e saka densrefi ondro Krestes leki kownu. Yesus teki den gersi nanga skapu fu di den e si en leki a Skapuman fu den (Yohanes 10:16). Den sma disi di de leki skapu sa kisi libi ondro a volmaakti tiri fu Yesus. Den sa libi wan koloku libi na ini wan nyun grontapu pe pôtifasi no sa de moro. Sma di e tyari densrefi neleki bokoboko, fu di den e kakafutu gi a tiri fu Yesus, sa kisi pori fu têgo.​—Mateyus 25:46.

A Kownukondre fu Gado sa tyari wan kaba kon na ala ogridu. Na a ten dati pôtifasi no sa de moro. Na presi fu dati, grontapu sa kon furu nanga sma di lobi makandra èn di e broko den ede nanga makandra. Te yu luku a fasi fa Yehovah Kotoigi na heri grontapu e libi na ini wánfasi leki brada nanga sisa, dan yu e si krin taki so wan nyun grontapu kan kon trutru, bika Yesus ben taki: „Na a fasi disi ala sma o sabi taki unu na mi disipel, te unu lobi makandra.”​—Yohanes 13:35.

[Faki/​Prenki na tapu bladzijde 6, 7]

FA GADO E PRAKSERI FU PÔTISMA?

Bijbel e taki dati a Mekiman fu a libisma famiri na „a Sma di e gi brede na den wan di de nanga angri” (Psalm 146:7). Bijbel abi moro leki wán hondro difrenti vers di e sori krin fa Gado e broko en ede nanga den pôtiwan.

Leki eksempre, di Yehovah gi a Wet fu en na a pipel fu Israel fu owruten, dan a komanderi den gronman fu Israel fu no koti den lanki fu den gron fu den. Efu den ben piki froktu fu wan olèifbon, noso na ini wan droifidyari, wán leisi kaba, dan den no ben musu go baka fu piki den froktu di ben tan abra na den bon. Den wet disi ben de wan lobi-ati seti fu yepi freimde sma di ben kon tan na ini a kondre, pikin di no ben abi papa noso mama, uma di den masra ben dede kaba, èn tra mofinawan.​—Lefitikus 19:9, 10; Deuteronomium 24:19-21.

Gado ben taigi den Israelsma sosrefi: „Un no musu kwinsi nowan weduwe noso boi di no abi papa. Efu toku yu ben sa kwinsi en, èn efu a bari kari mi, dan sondro misi mi sa yere a babari fu en èn fu tru mi sa kisi bigi atibron, èn trutru mi sa kiri unu nanga a feti-owru, èn un wefi musu tron weduwe èn un manpikin musu tron boi di no abi papa” (Exodus 22:22-24). A de wan sari sani taki furu fu den gudu Israelsma no ben gi yesi na den wortu dati. A sani disi, èn wan tu tra sani sosrefi, ben meki taki Yehovah seni profeiti fu warskow den Israelsma na difrenti okasi (Yesaya 10:1, 2; Yeremia 5:28; Amos 4:1-3). Te fu kaba Gado gi pasi taki den Asiriasma èn bakaten den Babilonsma teki a kontren fu Israel abra. Furu Israelsma ben lasi den libi èn den wan di ben tan na libi ben tyari go na tra kondre leki katiboman.

Yesus Krestes, a Manpikin fu Gado, ben sori taki a e broko en ede nanga pôtisma na a srefi lobi-ati fasi fa en Tata e broko en ede nanga den. Di Yesus ben fruklari fu san ede a ben e du a diniwroko fu en, dan a ben taki: „A yeye fu Yehovah de na mi tapu, bika a ben salfu mi fu meki bun nyunsu bekènti gi den mofinawan” (Lukas 4:18). Disi no wani taki Yesus ben e poti prakseri soso na pôtisma te a ben e du a diniwroko fu en, bika na wan lobi-ati fasi a ben yepi gudusma sosrefi. Ma te Yesus ben e yepi den guduwan, dan a ben e taigi den furu tron fa a e broko en ede nanga den pôtiwan. Leki eksempre, a ben gi wan gudu tiriman a rai disi: „Seri ala den sani di yu abi èn prati gi den pôti sma, èn yu sa abi gudu na ini hemel; èn kon tron mi bakaman.”​—Lukas 14:1, 12-14; 18:18, 22; 19:1-10.

Yehovah Gado nanga en Manpikin e broko den ede trutru nanga den pôtiwan (Markus 12:41-44; Yakobus 2:1-6). Wan sani di e sori taki disi de so trutru, na a memre di Yehovah e memre den milyunmilyun pôtisma di lasi den libi. Ala den sma disi sa kisi wan opobaka fu libi na ini wan nyun grontapu pe pôtifasi no sa de moro.​—Tori fu den Apostel 24:15.

[Prenki]

A wánfasi di de na mindri Yehovah Kotoigi na heri grontapu, e sori taki a nyun grontapu na wan sani di kan kon trutru

[Prenki na tapu bladzijde 5]

Tukiso nanga Maseiso, makandra nanga a zendeling di studeri Bijbel nanga Tukiso

[Prenki na tapu bladzijde 5]

Maseiso tanapu na a mofodoro fu en oso, makandra nanga a zendeling di studeri Bijbel nanga en