’Hori yusrefi te ogri e miti yu’

„Wan srafu fu Masra no abi fu feti, ma a musu abi switifasi gi ala sma, . . . wan sma di man hori ensrefi te ogri e miti en.”​—2 TIMOTEYUS 2:24.

1. Te wi e du wi Kresten preikiwroko, dan fu san ede wi e miti sma son leisi di e taki na wan grofu fasi?

SAN yu e du te yu e miti sma di no lobi yu, noso a boskopu di yu e tyari? Di na apostel Paulus ben e fruteri fa den lasti dei ben o de, dan a ben taki na fesi dati sma ben o ’afrontu Gado, . . . den ben o de ogri-ati leiman, den no ben o man dwengi densrefi, èn den ben o abi wan krasi fasi fu du sani’ (2 Timoteyus 3:1-5, 12). Kande yu e miti den sortu sma disi na ini a preikiwroko fu yu, noso te yu e du tra sani.

2. Sortu bijbeltekst kan yepi wi fu handri na wan koni fasi te sma e taki grofu nanga wi?

² A no ala sma di e taki na wan grofu fasi, na sma di no wani abi noti fu du nanga san reti. Kande fu di den abi bigi problema, noso fu di den e bruya, meki den e taki grofu nanga tra sma (Preikiman 7:7). Furu sma e handri na a fasi disi fu di den e libi èn e wroko na mindri sma di gwenti fu taki na wan grofu fasi. Aladi wi leki Kresten no e feni en bun te sma e taki na so wan fasi, toku disi e yepi wi fu frustan fu san ede sma e du dati. Fa wi musu handri te sma e taki grofu nanga wi? Odo 19:11 e taki: „Te wan sma abi koni fu si sani krin, dan dati sa meki trutru taki a no kisi atibron esi-esi.” Èn Romesma 12:17, 18 e gi wi a rai disi: „No pai wan sma ogri fu ogri. . . . Efu a kan, solanga a de na unu, abi vrede nanga ala sma.”

3. San a lobi di wi musu lobi vrede abi fu du nanga a boskopu di wi e preiki?

³ Efu wi lobi vrede trutru, dan disi sa de fu si na a fasi fa wi e handri. Sma sa man si disi na den sani di wi e taki èn na den sani di wi e du; kande den sa si dati tu na wi fesi, èn den sa yere dati na  wi sten sosrefi (Odo 17:27). Di Yesus seni den apostel fu en fu go preiki, dan a gi den a rai disi: „Te unu e go na ini wan oso, dan taki den ososma odi [„oen moe taki: ’Vrede moe de nanga disi hoso!’”, Njoe Testament nanga dem Psalm]; èn efu na oso warti, meki a vrede di unu e winsi en kon na en tapu; ma efu a no warti, meki a vrede fu unu kon baka na un tapu” (Mateyus 10:12, 13). A boskopu di wi e tyari na bun nyunsu. Bijbel e kari en „a bun nyunsu fu vrede”, „a bun nyunsu fu a no-frudini bun-ati fu Gado”, èn „a bun nyunsu disi fu a kownukondre” (Efeisesma 6:15; Tori fu den Apostel 20:24; Mateyus 24:14). Wi no e go na sma fu krutu a bribi fu den, noso fu haritaki nanga den fu a fasi fa den e si sani, ma wi e go na den fu prati a bun nyunsu di de na ini Gado Wortu.

4. San yu kan taki te wan ososma taki „mi no wani sabi noti”, aladi a no gi yu na okasi srefi fu fruteri en fu san ede yu kon na en?

⁴ Kande sondro fu arki a boskopu fu yu, wan ososma e taki wantewante: „Mi no wani sabi noti.” Furu tron wi kan taki: „Mi ben wani leisi soso a syatu tekst disi na ini Bijbel gi yu.” Kande na ososma e feni dati bun. Ma son tron, a bun fu taki kande: „We, mi ben wani fruteri yu fu wan ten pe nowan kruktudu sa de èn ala sma sa leri fu lobi makandra.” Efu den wortu disi no e meki taki na ososma wani sabi moro, dan kande yu kan taki: „Ma soleki fa mi si, dan disi a no wan bun ten gi yu.” Te na ososma no e handri na wan switi fasi, dan disi wani taki dati a „no warti” fu yere a bun nyunsu? Awinsi san wan ososma e du noso e taki, wi musu memre a rai di Bijbel e gi fu ’abi switifasi gi ala sma, èn fu hori wisrefi te ogri e miti wi’.​—2 Timoteyus 2:24.

A ben asranti fu di sma ben kori en

5, 6. Fa Saulus ben e handri nanga den bakaman fu Yesus, èn fu san ede a ben e handri so?

⁵ Na ini a fosi yarihondro, sma ben sabi a man di nen Saulus, leki wan man di no ben e taki na wan lespeki fasi èn di ben gwenti fu du ogri-ati sani nanga sma. Bijbel e taki dati a ben ’de wan kefar gi den disipel fu Masra fu di a ben wani kiri den’ (Tori fu den Apostel 9:1, 2). Bakaten ensrefi ben taki dati a ben de ’wan sma di ben e afrontu Gado, wan sma di ben e frufolgu trawan, èn wan asranti sma’ (1 Timoteyus 1:13). Aladi a kan taki wan tu famiriman fu en ben tron Kresten kaba, toku ensrefi ben fruteri fa a ben e handri nanga den bakaman fu Krestes: „Fu di mi ati ben faya srefisrefi nanga den, meki mi ben go so fara taki mi ben frufolgu den srefi te na ini den  foto na dorosei fu wi kondre” (Tori fu den Apostel 23:16; 26:11; Romesma 16:7, 11). Buweisi no de di e sori taki den disipel ben pruberi fu haritaki nanga Saulus na fesi tra sma, na a ten di Saulus ben e tyari ensrefi na a fasi disi.

⁶ Fu san ede Saulus ben e handri na a fasi dati? Furu yari baka dati, a ben skrifi: „Mi no ben sabi èn mi ben handri sondro fu abi bribi” (1 Timoteyus 1:13). Saulus ben de wan Fariseiman di kisi leri „soifri soleki fa a Wet fu den fositen tata e taki” (Tori fu den Apostel 22:3). Soleki fa a sori, dan Gamalièl, a leriman fu Saulus, no ben abi wan takru denki fu sma di ben abi wan tra bribi, ma Saulus ben kon abi demakandra nanga a granpriester Kayafas di ben de teige iniwan tra bribi. Kayafas ben de wan fu den prenspari sma di ben seti sani, so taki sma kiri Yesus Krestes te fu kaba (Mateyus 26:3, 4, 63-66; Tori fu den Apostel 5:34-39). Baka dati, Kayafas ben meki taki den wipi den apostel fu Yesus, èn a komanderi den krinkrin taki den no ben musu preiki moro na ini a nen fu Yesus. Kayafas ben e teki fesi na ini a Sanhedrin di wan grupu sma di ben atibron srefisrefi, teki Stefanus tyari go na doro fu ston en kiri (Tori fu den Apostel 5:27, 28, 40; 7:1-60). Saulus ben si fa den ben e ston en kiri, èn Kayafas ben gi Saulus a wroko fu tan meki muiti fu gens den bakaman fu Yesus; a ben musu go teki den nanga skowtu na ini Damaskus (Tori fu den Apostel 8:1; 9:1, 2). A krakti di Kayafas ben abi tapu Saulus, ben meki taki Saulus kisi a denki taki a ben e tyari ensrefi leki wan sma di e dini Gado fayafaya. Ma te yu luku en bun, dan Saulus no ben abi trutru bribi (Tori fu den Apostel 22:3-5). Leki bakapisi fu dati, a no ben man frustan taki Yesus ben de a tru Mesias. Ma Yesus, di kisi wan opobaka, ben taki nanga Saulus na wan wondru fasi di a ben de na pasi fu go na Damaskus, èn na so Saulus kon frustan taki a ben e tyari ensrefi na wan ogri-ati fasi trutru.​—Tori fu den Apostel 9:3-6.

7. San ben pasa nanga Saulus di a miti Yesus na wan wondru fasi di a ben de na pasi fu go na Damaskus?

⁷ A no langa baka dati, a disipel Ananias ben kisi a komando fu go preiki gi Saulus. Yu ben o de klariklari fu go preiki gi Saulus? Aladi Ananias ben frede, toku a ben e taki nanga Saulus na wan switi fasi. A miti di Saulus miti Yesus na wan wondru fasi di a ben de na pasi fu go na Damaskus, ben meki taki Saulus kenki a denki fu en (Tori fu den Apostel 9:10-22). Sma ben kon sabi en leki na apostel Paulus, wan fayafaya Kresten zendeling.

A ben abi safri-ati, ma a ben abi deki-ati tu

8. Te Yesus ben e handri nanga sma di ben du ogri sani, dan fa a ben e sori taki a abi den srefi fasi leki en Tata?

⁸ Yesus ben de wan fayafaya Kownukondre preikiman di ben abi safri-ati, ma a ben abi deki-ati tu te a ben e handri nanga sma (Mateyus 11:29). A ben e sori den srefi fasi leki en hemel Tata, di e gi sma deki-ati fu tapu nanga den ogri sani di den e du (Yesaya 55:6, 7). Te Yesus ben kisi fu du nanga sondari, dan a ben e poti prakseri na den sma disi te a ben si taki den ben wani kenki den ogri fasi fu den, èn a ben e gi den deki-ati (Lukas 7:37-50; 19:2-10). Yesus no ben e krutu trawan neleki libisma di e si nomo san na ai e si. Na presi fu dati, a ben e du neleki en Tata di abi switifasi, di e dwengi ensrefi, èn di e sori langa pasensi, fu di a e howpu taki a sma o sori berow (Romesma 2:4). Yehovah wani taki ala sortu sma sori berow, so taki den kan kisi frulusu.​—1 Timoteyus 2:3, 4.

9. San wi kan leri fu a fasi fa Yesaya 42:1-4 kon tru na ini Yesus?

⁹ Na Evangelie skrifiman Mateyus ben taki fu wan profeititori di e sori fa Yehovah e denki fu Yesus Krestes: „Luku! A sma di mi teki leki mi futuboi, mi lobiwan, a wan di mi feni bun! Mi sa poti mi yeye na en tapu èn a sa sori den trakondre sma san na retidu. A no sa haritaki, a no sa bari tranga èn nowan sma sa yere en sten na tapu den bigi strati. A no sa masi wan kenpeiri di broko, èn a no sa kiri wan faya di e suku fu dede, teleki a sa meki retidu abi bun bakapisi. Iya, na tapu en nen den tra pipel sa howpu” (Mateyus 12:17-21; Yesaya 42:1-4). Soleki fa a profeititori e taki, dan Yesus no ben e haritaki nanga sma èn a no ben e bari den. Srefi te a ben de na ini muilek situwâsi, a ben e taki fu a waarheid na wan fasi di ben e hari opregtisma.​—Yohanes 7:32, 40, 45, 46.

10, 11. (a) Fu san ede Yesus ben gi kotoigi na son Fariseiman, aladi den Fariseiman ben de den moro bigi gensman di ben e taki ogri fu en? (b) Na sortu fasi Yesus ben e piki gensman son tron, ma san a no ben du?

 ¹⁰ Na ini en diniwroko, Yesus ben taki nanga furu Fariseiman. Aladi sonwan fu den ben pruberi fu kisi en nanga den sani di a ben e taki, toku Yesus no ben e denki taki alamala fu den ben abi takru prakseri. Soleki fa a sori, dan Simon, wan Fariseiman di ben e luku sani finifini, ben wani si moro bun fa Yesus ben e handri, èn fu dati ede a kari Yesus fu kon nyan nanga en. Yesus teki a kari èn a gi kotoigi na den sma di ben de drape (Lukas 7:36-50). Na wan tra okasi, wan prenspari Fariseiman di ben nen Nikodeimus, kon na Yesus na neti-yuru, so taki sma no ben o si en. Yesus no ben krutu a man disi fu di a wakti teleki a kon dungru. Na presi fu dati, Yesus fruteri Nikodeimus fu a lobi di Gado sori di a seni en Manpikin kon fu opo a pasi gi den wan di sori bribi, so taki den kan kisi frulusu. Na wan switi fasi, Yesus sori en tu o prenspari a de fu gi yesi na a seti fu Gado (Yohanes 3:1-21). Bakaten, di den tra Fariseiman pruberi fu gi Yesus porinen aladi sma ben e taki bun fu en, dan Nikodeimus opo taki gi Yesus.​—Yohanes 7:46-51.

¹¹ Yesus ben man si a hoigrifasi fu den sma di ben e suku fu kisi en. A ben e luku bun taki gensman no tyari en kon na ini wan haritaki fu soso. Ma na son okasi te a ben fiti, dan Yesus ben piki den krin èn syatu fu di a ben e taki fu wan gronprakseri, a ben e gebroiki wan agersitori, noso a ben taigi den san skrifi na ini wan bijbeltekst (Mateyus 12:38-42; 15:1-9; 16:1-4). Na tra okasi, Yesus no ben piki den sma srefisrefi, te a ben de krin fu si taki nowan bun bakapisi ben o kon efu a ben du dati.​—Markus 15:2-5; Lukas 22:67-70.

12. Fa Yesus ben man yepi sma, srefi te den ben bari sani gi en?

¹² Son tron, sma di ben abi ogri yeye na den tapu, ben e bari sani gi Yesus. Te dati ben e pasa, dan a ben e hori ensrefi èn a ben gebroiki a krakti srefi di a kisi fu Gado fu puru den ogri yeye na den sma tapu (Markus 1:23-28; 5:2-8, 15). Te son sma e atibron na wi tapu èn te den e bari sani gi wi te wi e du wi diniwroko, dan wi musu hori wisrefi tu, èn wi musu meki muiti fu handri na wan switi fasi èn na wan lespeki fasi na ini den sortu situwâsi disi.​—Kolosesma 4:6.

Na ini na osofamiri

13. Fu san ede sma e gens wan famiriman fu den son tron te a e bigin studeri Bijbel nanga Yehovah Kotoigi?

¹³ Na ini na osofamiri wi e si furu tron taki a de prenspari gi bakaman fu Yesus fu hori densrefi. Te a waarheid fu Bijbel naki na ati fu wan sma, dan nofo tron a sma dati wani taki den famiri fu en musu lobi a waarheid tu. Ma soleki fa Yesus ben taki, dan sma na ini na osofamiri kan gens wi (Mateyus 10:32-37; Yohanes 15:20, 21). Difrenti sani kan meki taki den e handri na a fasi disi. Fu eksempre, den leri fu Bijbel kan yepi wi fu tron sma di no e bedrigi trawan, di sabi tyari frantwortu, èn di e handri na wan lespeki fasi. Ma Bijbel e leri wi tu taki na a fosi presi, wi abi fu gi frantwortu na wi Mekiman, awinsi na ini sortu situwâsi wi de (Preikiman 12:1, 13; Tori fu den Apostel 5:29). Te wi e tan getrow na Yehovah, dan wan famiriman kan kisi a denki taki wi no e lespeki en posisi moro na ini na osofamiri èn fu dati ede a kan taki a e bigin gens wi. Te wi de na ini so wan situwâsi, dan a de tumusi prenspari fu hori  wisrefi neleki fa Yesus ben du dati!​—1 Petrus 2:21-23; 3:1, 2.

14-16. San meki taki son sma kenki, aladi den ben e gens den famiriman fu den fosi?

¹⁴ Furu sma di e dini Yehovah now, ben abi wan trowpatna noso wan tra famiriman di no ben lobi den kenki di den sma disi ben e tyari kon na ini den libi di den bigin studeri Bijbel. Kande den gensman ben yere sma e taki takru sani fu Yehovah Kotoigi, èn kande den ben e frede taki den Kotoigi ben o abi krakti tapu na osofamiri na wan fasi di no bun. San meki taki den kenki a denki fu den? Nofo tron a de a bun fasi fa a sma di de na bribi e tyari ensrefi. Aladi a e go doronomo na den Kresten konmakandra èn e teki prati na a preikiwroko, a e tyari en frantwortu na ini na osofamiri tu èn a e hori ensrefi te trawan e taki ogri sani fu en. Iya, fu di a sma di de na bribi, e tan gebroiki a rai fu Bijbel doronomo, meki son leisi den famiriman fu en no e gens en so furu moro.​—1 Petrus 2:12.

¹⁵ Te a sma di de na bribi e pruberi fu fruteri a gensman wan sani fu Bijbel, dan a kan tu taki a gensman no wani arki fu di a abi wan takru denki fu den Kotoigi, noso fu di a abi heimemre. Na so a ben de nanga wan man na Amerkankondre di ben taki dati a lobi en kondre trutru. Wan leisi di en wefi ben de na wan kongres, a teki ala en krosi, dan a froisi gowe. Wan tra leisi, a gowe libi oso nanga wan gon èn a taki dati a ben o kiri ensrefi. A ben feni taki na a kerki fu en wefi ben e meki taki a du den lawlaw sani disi. Ma toku a wefi ben tan du muiti fu gebroiki den rai fu Bijbel. Tutenti yari baka di a wefi tron wan Yehovah Kotoigi, a masra fu en tron wan Kotoigi tu. Na ini Albania, wan uma ben kisi atibron di en umapikin bigin studeri Bijbel nanga Yehovah Kotoigi èn di a teki dopu bakaten. Twarfu leisi a mama disi pori a Bijbel fu en umapikin. Ne wan dei a opo wan nyun Bijbel di en umapikin ben libi na tapu wan tafra. A ben de so, taki di a mama opo a Bijbel, en ai fadon na tapu Mateyus 10:36. Di a leisi en, a kon frustan taki a tekst disi ben abi fu du nanga ensrefi. Ma toku, fu di a mama disi ben e broko en ede nanga a tanbun fu en umapikin, meki a tyari en umapikin go na a boto di ben o tyari en nanga tra Kotoigi sosrefi, go na wan kongres na ini Italiakondre. Di a mama si fa a grupu Kotoigi ben lobi makandra, fa den ben e brasa, lafu, èn prisiri nanga makandra, dan a bigin denki tra fasi fu den. A no langa baka dati, a mama disi agri fu studeri Bijbel. Now a e yepi tra sma di ben e gens den Kotoigi biginbigin.

¹⁶ Wan leisi, wan masra waka kon miti en wefi wantronso di a ben de fu go na ini wan Kownukondre zaal. A masra ben abi wan nefi na ini en anu èn a ben e bari wan lo ogri-ati sani gi en wefi. Na wan safri fasi en wefi taki: „Kon na ini a Kownukondre zaal, dan yusrefi kan si san e pasa.” A masra ben du disi, èn baka wan pisi ten a tron wan Kresten owruman.

17. Efu wan kesekese opo kon son leisi na ini wan Kresten osofamiri, dan sortu rai fu Bijbel kan de wan yepi?

¹⁷ Srefi te ala sma na ini yu osofamiri de Kresten, toku a kan pasa ten na ten taki kesekese e opo kon èn taki unu e taki hati sani. Disi de so, fu di wi alamala na sondu sma. A moi fu si taki den Kresten na ini na owruten foto Efeise ben kisi a rai disi: „Puru ala takru bita-atifasi nanga atibron nanga babari nanga skempi taki na un mindri, makandra nanga ala takrudu” (Efeisesma 4:31). Soleki fa a sori, dan a fasi fa sma na ini Efeise ben  gwenti tyari densrefi, sosrefi na onvolmaakti fasi fu den Kresten, èn son leisi a fasi fa den ben e libi fosi, ben abi furu krakti na den tapu. San ben o yepi den fu kenki? Den ben musu ’meki kon nyun na ini a krakti di ben e pusu a prakseri fu den’ (Efeisesma 4:23). Den froktu fu Gado en yeye ben o de moro krin fu si na ini a libi fu den te den ben o studeri Gado Wortu, te den ben o denki dipi fu a krakti di a ben musu abi tapu a libi fu den, te den ben o abi demakandra nanga tra Kresten, èn te den ben o begi fayafaya. Den ben o leri fu „tron sma di abi switifasi gi makandra, di abi safu sari-atifasi, èn di e gi makandra pardon na wan fri fasi, neleki fa Gado ben gi [den] pardon na wan fri fasi nanga yepi fu Krestes” (Efeisesma 4:32). Awinsi san tra sma e du, wi musu sorgu taki wi e hori wisrefi, taki wi e sori switifasi nanga sari-ati, èn taki wi e gi den pardon. Iya, wi ’no musu pai nowan sma ogri fu ogri’ (Romesma 12:17, 18). A moro bun sani fu du ala ten, na fu sori trutru lobi neleki Gado.​—1 Yohanes 4:8.

Rai gi ala Kresten

18. Fu san ede a rai na ini 2 Timoteyus 2:24 ben fiti gi wan owruman na ini a gemeente fu owruten Efeise, èn fa ala Kresten kan kisi wini fu a rai disi?

¹⁸ A rai fu ’hori wisrefi te ogri miti wi’ abi fu du nanga ala Kresten (2 Timoteyus 2:24). Ma na a fosi presi, a rai disi ben de gi Timoteyus, fu di a ben abi en fanowdu di a ben e dini leki owruman na ini Efeise. Son sma na ini a gemeente dati ben lobi fu fruteri trawan den eigi denki èn den ben e leri sma sani di abi fu du nanga falsi bribi. Fu di den sma disi no ben frustan bun fu san ede Gado ben gi a Wet fu Moses, meki den no ben man si o prenspari a de fu abi bribi, lobi, nanga wan bun konsensi. A heimemre fu den ben meki taki den ben e haritaki fu son wortu, èn na so den no ben frustan san Krestes ben wani leri sma trutru èn o prenspari a de fu dini Gado na wan getrow fasi. Fu man tyari wan lusu kon na ini a situwâsi disi, dan Timoteyus ben musu hori ensrefi finifini na a waarheid fu Bijbel, ma na a srefi ten a ben musu handri na wan switi fasi nanga den brada fu en. Neleki den owruman na ini a ten disi, na so Timoteyus ben sabi taki na ipi disi fu Kresten brada nanga sisa no ben de fu en, èn taki a ben musu handri nanga den na wan fasi di ben o tyari lobi nanga wánfasi kon na mindri den Kresten.​—Efeisesma 4:1-3; 1 Timoteyus 1:3-11; 5:1, 2; 6:3-5.

19. Fu san ede a de prenspari gi wi alamala fu „suku safri-atifasi”?

¹⁹ Gado e gi en pipel deki-ati fu „suku safri-atifasi” (Sefanya 2:3). A Hebrew wortu di vertaal nanga „safri-ati” e sori go na wan fasi di e meki taki wan sma man hori pasensi te a e nyan pina, ma toku a no e fruferi èn a no e pramisi fu du ogri baka nanga den wan di e meki a pina. Meki wi begi Yehovah fayafaya fu yepi wi, so taki wi kan hori wisrefi èn so taki wi kan tyari wisrefi soleki fa a fiti wan dinari fu en, awinsi wi de na ini muilek situwâsi.

San yu leri?

• Sortu bijbeltekst kan yepi yu te sma e taki na wan grofu fasi nanga yu?

• Fu san ede Saulus ben e handri na wan grofu fasi?

• Fa na eksempre fu Yesus e yepi wi fu handri nanga ala sortu sma na wan fasi di fiti?

• Efu wi e hori wisrefi te wi e taki nanga trawan na ini wi osofamiri, dan sortu wini dati sa tyari kon?

[Aksi fu a tori disi]

[Prenki na tapu bladzijde 26]

Aladi Saulus ben abi a nen taki a ben e du sma ogri, toku Ananias ben e handri nanga en na wan switi fasi

[Prenki na tapu bladzijde 29]

Te wan Kresten e tyari en frantwortu na wan getrow fasi, dan dati kan meki taki en famiri no gens en so furu moro

[Prenki na tapu bladzijde 30]

Kresten e du muiti fu tyari lobi nanga wánfasi kon