Leri sabi den pasi fu Yehovah

„Meki mi kon sabi den pasi fu yu, so taki mi kan kon sabi yu.”​—EXODUS 33:13.

1, 2. (a) an Moses du di a si fa wan Egeptesma ben du ogri nanga wan Hebrewsma, èn fu san ede Moses handri na a fasi dati? (b) Efu Moses ben wani taki Yehovah gebroiki en, dan san a ben musu leri?

MOSES ben gro kon bigi na ini na osofamiri fu Farao èn a ben kisi a moro bun leri di soso den heihei sma fu Egepte ben e kisi. Toku, Moses ben sabi taki a no ben de wan Egeptesma. En papa nanga mama ben de Hebrewsma. Di a ben abi 40 yari, a go luku fa sani ben e waka nanga a pipel fu en, namku den manpikin fu Israel. Di a si fa wan Egeptesma ben du ogri nanga wan Hebrewsma, dan Moses no draidrai fu du wan sani. A naki na Egeptesma kiri. Moses bosroiti fu teki a sei fu a pipel fu Yehovah èn a ben denki taki Gado ben e gebroiki en fu frulusu a pipel fu en (Tori fu den Apostel 7:21-25; Hebrewsma 11:24, 25). Di sma kon sabi san Moses du, dan den sma di ben e tiri Egepte bigin si Moses leki wan sma di opo ensrefi teige a tirimakti fu den, èn Moses ben abi fu lowe gowe fu den no kiri en (Exodus 2:11-15). Efu Moses ben wani taki Gado gebroiki en, dan a ben musu leri sabi den pasi fu Yehovah moro bun. Moses ben o de klariklari fu teki a leri dati?​—Psalm 25:9.

² Na ini den 40 yari baka dati, Moses ben e libi leki wan loweman èn wan skapuman. Na presi fu kweki bita-ati fu di den Hebrewsma no ben warderi san a ben du, Moses saka ensrefi fu libi na a fasi fa Gado ben wani. Aladi a no kisi nowan spesrutu grani na ini den furu yari baka dati, toku Moses gi Yehovah pasi fu kenki en soleki fa En ben wani. A no fu meki bigi gi ensrefi, ma nanga a krakti fu Gado en santa yeye, Moses ben skrifi bakaten: „A man Moses ben de a moro safri-ati sma fu ala libisma di ben de na grontapu” (Numeri 12:3). Yehovah ben gebroiki Moses na difrenti moi fasi. Te wi e du muiti fu abi safri-ati tu, dan Yehovah sa blesi wi.​—Sefanya 2:3.

Moses ben kisi wan wroko fu du

3, 4. (a) Sortu wroko Yehovah ben gi Moses fu du? (b) Sortu yepi Moses ben kisi?

³ Wan dei, Yehovah seni wan engel fu taki nanga Moses krosibei fu a Horeb-bergi na a smara pisi kontren fu Sinai di de na ini a se. Na engel taigi Moses: „Sondro tweifri mi si a pina fu mi pipel, di de na Egepte, èn mi yere fa den e bari fu di tra sma e dwengi den fu wroko; bika mi sabi heri bun sortu pen den e firi. Èn mi e saka go na ondro fu frulusu den fu na anu fu den Egeptesma èn fu tyari den gowe fu a kondre dati fu go na wan kondre di bun èn bigi, wan kondre pe merki nanga oni e lon” (Exodus 3:2, 7, 8). Fu meki a sani disi pasa, dan Gado gi Moses wan wroko fu du, ma Moses ben abi fu du a wroko na a fasi fa Yehovah ben wani.

⁴ Na engel fu Yehovah taki moro fara: „Kon meki mi seni yu go na Farao now, èn na yu musu tyari mi pipel, den manpikin fu Israel, komoto fu Egepte.” Moses ben e draidrai. A ben denki taki a no ben o man du a wroko dati, èn a tru taki nanga en eigi krakti a no ben o man du dati kwetikweti. Ma Yehovah gi Moses a dyaranti disi: „Mi sa sori taki mi de nanga yu” (Exodus 3:10-12). Yehovah ben gi Moses a krakti fu man du wondru di ben o sori sma taki na Gado seni en trutru. Aron, a brada fu Moses, ben musu go nanga en fu taki gi en. Yehovah ben o leri den san den musu taki èn san den musu du (Exodus 4:1-17). Moses ben o du a wroko fu en na wan getrow fasi?

5. Fu san ede a fasi fa den Israelsma ben e handri, ben de wan problema gi Moses?

⁵ Biginbigin, den owru man fu Israel ben e bribi Moses nanga Aron (Exodus 4:29-31). Ma heri  esi, „den skowtu fu den manpikin fu Israel” ben feni taki Moses nanga en brada ben meki taki den Israelsma kon de leki „wan tingi sani” gi Farao nanga den futuboi fu en (Exodus 5:19-21; 6:9). Di den Israelsma ben e gowe libi Egepte, den ben kon frede di den si den asiwagi fu Egepte e kon na den baka. Fu di a Redi Se ben de na den fesi èn den fetiwagi fu Egepte na den baka, meki den ben e firi leki den fasi na ini wan trapu, èn den bigin krutu taki na Moses poti den na ini a problema disi. San yu ben o du? Den Israelsma no ben abi boto, ma toku Yehovah taigi Moses fu meki a pipel seti densrefi fu gowe. Ne Gado pusu a watra fu a Redi Se go na seisei, èn a gron fu a se kon drei, so taki Israel ben kan waka pasa.​—Exodus 14:1-22.

Wan sani di de moro prenspari leki a frulusu fu den Israelsma

6. San Yehovah ben sori Moses krin di a gi en wan wroko fu du?

⁶ Di Yehovah gi Moses a wroko, a sori Moses krin o prenspari En nen de. A ben de tumusi prenspari fu abi lespeki gi a nen dati èn gi a Sma di abi a nen dati. Di Moses aksi san na a nen fu Gado, dan Yehovah piki en: „Mi sa sori fu de san mi sa sori fu de.” Boiti dati, Moses ben musu taigi den manpikin fu Israel: „Yehovah, a Gado fu un fositen tata, a Gado fu Abraham, a Gado fu Isak èn a Gado fu Yakob, seni mi kon na unu.” Yehovah ben taki moro fara: „Disi na mi nen te ten di no skotu, èn disi na a sani fu den kan memre mi, a wán geslakti baka a trawan” (Exodus 3:13-15). Te now ete, den futuboi fu Gado na heri grontapu sabi taki En nen na Yehovah.​—Yesaya 12:4, 5; 43:10-12.

7. San Gado taigi Moses fu du, awinsi Farao ben e handri na wan heimemre fasi?

⁷ Di Moses nanga Aron go na Farao, dan den tyari a boskopu fu den na ini a nen fu Yehovah. Na wan heimemre fasi, Farao taki: „Suma na Yehovah taki mi ben musu arki en sten fu seni Israel gowe? Mi no sabi Yehovah kwetikweti, èn boiti dati, mi no sa seni Israel gowe” (Exodus 5:1, 2). Aladi a ben de krin fu si taki Farao en ati ben tranga èn taki a no ben de fu frutrow, toku Yehovah taigi Moses fu tyari boskopu gi en ibri tron baka (Exodus 7:14-16, 20-23; 8:1, 2, 20). Moses ben kan si taki Farao no ben lobi a sani disi. A ben o abi bun bakapisi efu a ben o go baka na Farao? Israel ben e angri fu kon fri. Farao ben tan weigri fu seni Israel gowe. Efu yu ben de Moses, dan san yu ben o du?

8. Sortu wini sma kisi fu a fasi fa Yehovah handri na ini a tori fu Farao, èn sortu krakti den sani di pasa na a ten dati musu abi na wi tapu?

⁸ Moses ben abi fu tyari ete wan tra boskopu, namku: „Disi na san Yehovah, a Gado fu den Hebrewsma taki: ’Seni mi pipel gowe so taki den kan dini mi.’” Gado ben taki tu: „Nownow kaba mi ben kan langa mi anu fu naki yu nanga yu pipel nanga pestsiki, so taki mi figi yu puru na grontapu. Ma fu taki en leti, na fu a sani disi ede mi meki yu tan na libi, fu sori yu mi krakti èn fu meki mi nen bekènti na heri grontapu” (Exodus 9:13-16). Yehovah ben abi na prakseri fu strafu a tranga-ede Farao na so wan fasi taki a ben o kon na krin o bigi a makti fu En de, èn disi ben o de leki wan warskow gi ala sma di wani opo densrefi teige En. Sobun, a warskow disi ben o de gi Satan sosrefi, a sma di Yesus Krestes ben kari bakaten „a tiriman fu grontapu” (Yohanes 14:30; Romesma 9:17-24). Soleki fa ben taki na fesi kaba, a nen fu Yehovah ben meki bekènti na heri grontapu.  Fu di Yehovah ben sori langa pasensi, meki den Israelsma tan na libi èn sosrefi wan bigi grupu trakondre sma di ben go nanga den fu anbegi En (Exodus 9:20, 21; 12:37, 38). Sensi a ten dati, milyunmilyun tra sma di kon na ini a tru anbegi kisi wini fu di a nen fu Yehovah meki bekènti.

Fa Moses ben handri nanga wan muilek pipel

9. Fa Moses en eigi pipel sori taki den no ben e lespeki Yehovah?

⁹ Den Hebrewsma ben sabi a nen fu Gado. Moses ben gebroiki a nen dati te a ben e taki nanga den, ma a no ala ten den ben e sori a yoisti lespeki gi a Sma di abi a nen. Na wan wondru fasi Yehovah ben frulusu den Israelsma fu Egepte, ma san ben pasa syatu baka dati di den no ben man feni bun watra fu dringi wantewante? Den bigin krutukrutu teige Moses. Baka dati den bigin kragi fu a nyanyan di den ben e kisi. Moses warskow den taki den no ben e krutukrutu teige en nanga Aron wawan, ma sosrefi teige Yehovah (Exodus 15:22-24; 16:2-12). Na a Sinaibergi, Yehovah ben gi den Israelsma a Wet, èn a ben du disi na wan wondru fasi. Ma toku a pipel ben trangayesi Gado fu di den ben meki wan pikin kaw fu gowtu fu anbegi dati, aladi den ben taki dati den e hori ’wan fesa gi Yehovah’.​—Exodus 32:1-9.

10. Fu san ede spesrutu den Kresten opziener na ini a ten disi musu poti prakseri na san Moses ben aksi na ini Exodus 33:13?

¹⁰ Fa Moses ben musu handri nanga wan pipel di Yehovah srefi ben kari wan tranga-ede pipel? Moses ben begi Yehovah: „Grantangi, efu a de so taki yu feni mi bun, dan mi e begi yu, meki mi kon sabi den pasi fu yu, so taki mi kan kon sabi yu, fu yu kan feni mi bun” (Exodus 33:13). Na ini a ten disi, Kresten opziener di e dini leki skapuman e sorgu wan ipi fu Kotoigi di abi moro sakafasi leki den Israelsma. Ma toku den opziener e begi tu: „Meki mi kon sabi den pasi fu yu, o Yehovah; leri mi den pasi fu yu” (Psalm 25:4). Te den opziener sabi den pasi fu Yehovah, dan den o sabi fa fu handri na ini difrenti situwâsi. Den o handri akruderi Gado Wortu èn den o sori den srefi fasi di Gado abi.

San Yehovah e fruwakti fu en pipel

11. San Yehovah du fu sori Moses fa a ben musu tyari ensrefi, èn fu san ede wi musu poti prakseri na dati?

¹¹ Na a Sinaibergi, Yehovah srefi ben taki san a e fruwakti fu en pipel. Bakaten a skrifi den Tin Komando na tapu plata pisi ston èn a gi den na Moses. Di Moses ben e saka kon fu a bergi, a si fa den Israelsma e anbegi a pikin kaw, èn nanga atibron a trowe den plata ston panya na tapu a gron. Agen Yehovah ben skrifi den Tin Komando na tapu plata pisi ston di Moses ben koti puru (Exodus 32:19; 34:1). Den komando disi no kenki sensi a fosi leisi di Yehovah gi den na den Israelsma. Moses ben musu du soleki fa den komando ben taki. Gado ben sori Moses krin tu sortu sma A de, èn na so fasi A ben sori Moses fa a ben musu tyari ensrefi leki wan sma di e teki presi gi Yehovah. Kresten no abi fu hori densrefi na a Wet fu Moses, ma den sani di Yehovah ben taigi Moses abi fu du nanga furu prenspari gronprakseri di no kenki, èn ala sma di e anbegi Yehovah musu hori densrefi na den gronprakseri disi (Romesma 6:14; 13:8-10). Meki wi luku wan tu fu den.

12. Di Yehovah taigi Israel taki den ben musu dini en wawan, dan sortu krakti disi ben musu abi na den tapu?

¹² Anbegi Yehovah wawan. A nâsi Israel ben de drape di Yehovah taki dati den musu anbegi en wawan (Exodus 20:2-5). Den Israelsma ben si bun furu buweisi taki Yehovah na a tru Gado (Deuteronomium 4:33-35). Yehovah ben sori krin taki awinsi san den sma fu tra kondre ben e du, noiti a ben o gi en pipel pasi fu anbegi kruktugado, noso fu du afkodrei na iniwan fasi. A gi di den ben gi densrefi na Yehovah, no ben musu de leki wan seremonia nomo. Ibriwan fu den ben musu lobi Yehovah nanga den heri ati, den heri sili, èn ala den krakti (Deuteronomium 6:5, 6). Sobun, den ben musu sori disi na ini a fasi fa den ben e taki, na ini a fasi fa den ben e tyari densrefi, iya, na ini ala san den ben e du na ini den libi (Lefitikus 20:27; 24:15, 16; 26:1). Yesus Krestes ben sori krin tu taki Yehovah wani taki sma musu dini en wawan.​—Markus 12:28-30; Lukas 4:8.

13. Fu san ede Israel ben musu gi yesi dorodoro na Gado, èn san musu meki taki wi gi yesi na en? (Preikiman 12:13)

 ¹³ Gi yesi dorodoro na den komando fu Yehovah. A pipel fu Israel ben musu hori na prakseri taki di den ben seti wan frubontu nanga Yehovah, dan den ben sweri fu gi yesi na en dorodoro. Den ben kan du furu sani soleki fa densrefi wani, ma te a ben abi fu du nanga afersi pe Yehovah ben gi den komando, dan den ben musu gi yesi dorodoro na den komando dati. Te den ben o du disi, dan dati ben o sori taki den lobi Gado, èn den nanga den pikin fu den ben o kisi wini, bika ala den wet di Yehovah ben poti gi den, ben de fu meki sani waka bun nanga den.​—Exodus 19:5-8; Deuteronomium 5:27-33; 11:22, 23.

14. Fa Gado sori Israel taki a de tumusi prenspari fu poti yeye afersi na a fosi presi na ini den libi?

¹⁴ Poti yeye afersi na a fosi presi. A nâsi Israel no ben musu poti so furu prakseri na den sani di den ben abi fanowdu na skin fasi, taki te fu kaba den no ben o abi ten moro gi yeye afersi. Den Israelsma no ben musu gebroiki den libi fu feti baka grontapu sani nomo. Yehovah ben poti wan spesrutu ten ibri wiki di den ben musu si leki wan santa ten, èn na a ten dati den ben musu du soso den sani di abi fu du nanga na anbegi fu a tru Gado (Exodus 35:1-3; Numeri 15:32-36). Ibri yari, den ben musu poti ten na wan sei tu fu go na spesrutu santa konmakandra (Lefitikus 23:4-44). Den konmakandra disi ben o gi den na okasi fu taki fu den wondru sani di Yehovah ben du, fu yere baka san na den pasi fu En, èn fu sori en taki den de nanga tangi gi ala den bun sani di a du gi den. Te a pipel ben o du sani di e sori taki den gi densrefi abra na Yehovah, dan den ben o kisi moro frede nanga lobi gi en, èn disi ben o yepi den fu waka den pasi fu en (Deuteronomium 10:12, 13). Den bun gronprakseri di de fu feni na ini den komando di Yehovah ben gi den Israelsma, e tyari wini te now ete gi den disiten futuboi fu en.​—Hebrewsma 10:24, 25.

Wi musu frustan èn warderi den fasi fu Yehovah

15. (a) Fu san ede Moses ben o kisi wini te a ben frustan sortu fasi Yehovah abi? (b) Sortu aksi kan yepi wi fu denki dipi fu ibriwan fu den fasi fu Yehovah?

¹⁵ Te Moses ben o frustan sortu fasi Yehovah abi, dan dati ben o yepi en tu fu sabi fa a ben musu handri nanga a pipel. Exodus 34:5-7 e taki dati Gado ben pasa na fesi Moses, èn a ben taki: „Yehovah, Yehovah, wan Gado di abi sari-ati nanga switifasi, di no e atibron esi-esi èn di abi lobi bun-ati nanga waarheid pasa marki, di e kibri lobi bun-ati gi dusundusun sma, di e gi pardon fu fowtu èn fu a pasa di sma pasa en wet èn sosrefi fu sondu, ma a no sa puru strafu kwetikweti, fu di a e tyari strafu fu a fowtu fu papa kon na tapu manpikin nanga granpikin, na tapu a di fu dri geslakti èn na tapu a di fu fo geslakti.” Teki ten fu denki dipi fu den wortu dati. Aksi yusrefi: ’San ibriwan fu den fasi disi wani taki? Fa Yehovah sori den fasi disi? Fa Kresten opziener kan sori den fasi disi? Fa den spesrutu fasi disi musu abi krakti tapu den sani di ibriwan fu wi e du?’ Luku wan tu eksempre nomo.

16. Fa wi kan kon sabi moro fu a sari-ati fu Gado, èn fu san ede a prenspari fu du disi?

¹⁶ Yehovah na „wan Gado di abi sari-ati nanga switifasi”. Efu yu abi a buku Inzicht in de Schrift,  dan yu kan leisi san a e taki fu a wortu „barmhartigheid” (sari-ati). Yu kan go suku sani di abi fu du nanga a wortu disi, na ini na Index van Wachttoren-publicaties sosrefi, noso na ini a computer programa Watchtower Library (na tapu CD-ROM). * Yu kan gebroiki wan concordantie tu fu feni bijbeltekst di abi fu du nanga sari-ati. Yu sa si taki a sari-ati fu Yehovah e meki son leisi taki a e lekti a strafu fu wan sma, ma boiti dati, a e meki taki Yehovah e firi gi libisma trutru. Sari-ati e meki taki Gado e du sani fu yepi en pipel. Wi e si wan buweisi fu disi te wi e luku a ten di Gado sorgu den Israelsma na skin fasi èn na yeye fasi na ini a pisi ten di den ben e waka go na a Pramisi Kondre (Deuteronomium 1:30-33; 8:4). Na wan sari-ati fasi, Yehovah gi den pardon te den ben du sani di no bun. A ben sori sari-ati gi en pipel fu owruten. Sobun, a no de fu taki dati den disiten futuboi fu en musu sori sari-ati gi makandra tu!​—Mateyus 9:13; 18:21-35.

17. Fa a tru anbegi o go na fesi te wi e frustan taki Yehovah abi switifasi?

¹⁷ A sari-ati fu Yehovah abi fu du nanga switifasi. Fa yu ben o fruteri wan sma san a wortu „switifasi” wani taki? Nanga disi na prakseri, luku den bijbeltekst di e taki dati Yehovah abi switifasi. Bijbel e sori taki a switifasi fu Yehovah e meki taki a e broko en ede na wan lobi-ati fasi nanga den mofinawan na mindri en pipel (Exodus 22:26, 27). Na ini ala kondre yu abi sma di de na ini muilek situwâsi, awinsi na trakondre sma noso sma fu a kondre srefi. Di Yehovah ben e leri en pipel taki den ben musu lobi ala sma èn taki den ben musu sori switifasi gi den sortu sma dati, dan a ben memre den taki densrefi ben de freimdesma na ini Egepte wan ten (Deuteronomium 24:17-22). Fa a de nanga wi leki pipel fu Gado na ini a ten disi? Te wi e sori switifasi, dan dati e yepi wi fu kon abi wánfasi èn dati e hari tra sma kon fu anbegi Yehovah.​—Tori fu den Apostel 10:34, 35; Openbaring 7:9, 10.

18. Te wi e luku san Yehovah ben leri Israel fu no du te den ben o miti trakondre sma, dan san wi e leri fu dati?

¹⁸ Ma den Israelsma no ben musu lobi trakondre sma moro leki Yehovah èn moro leki den markitiki fu en di abi fu du nanga a fasi fa den ben musu tyari densrefi. Fu dati ede, den Israelsma ben leri taki den no ben musu teki den fasi fu den trakondre sma abra, den no ben musu teki den sani abra di den sma dati ben gwenti du te den ben e anbegi den gado fu den, èn den no ben musu libi wan yayolibi tu (Exodus 34:11-16; Deuteronomium 7:1-4). Wi na ini a ten disi abi fu hori wisrefi na den sani disi tu. Wi musu de wan santa pipel, neleki fa a Gado fu wi, Yehovah, de santa.​—1 Petrus 1:15, 16.

19. Fa a kan de wan yepi gi a pipel fu Yehovah te den e frustan fa a e denki fu ogridu?

¹⁹ Fu meki Moses frustan den pasi fu En bun, dan Yehovah ben sori krin taki aladi a no feni en  bun te sma e du sondu, toku a no e atibron esi-esi. A e gi sma ten fu kon leri sabi den markitiki fu en, èn fu libi akruderi den markitiki dati. Te wan sma e sori berow, dan Yehovah e gi en pardon fu den sondu fu en, ma a no e puru a strafu di a sma musu kisi fu seryusu sondu di a du. A ben warskow Moses taki den sani di den Israelsma ben e du, ben kan abi bun noso takru bakapisi gi den pikin nanga bakapikin fu den. Te a pipel fu Gado e frustan èn e warderi den pasi fu Yehovah, dan dati kan yepi den fu no krutu Gado te den kisi fu du nanga problema di densrefi tyari kon na den tapu. A kan yepi den tu fu no waka nanga a denki taki Gado no e du sani esi nofo.

20. San kan yepi wi fu handri na wan fasi di fiti te wi de nanga den Kresten brada nanga sisa fu wi èn nanga sma di wi e miti na ini a preikiwroko fu wi? (Psalm 86:11)

²⁰ Efu yu wani kon sabi moro fu den pasi fu Yehovah, dan yu musu tan ondrosuku sani moro bun èn denki dipi te yu e leisi Bijbel. Ondrosuku den difrenti moi fasi fu Yehovah finifini. Begi èn denki dipi fu a fasi fa yu kan de leki Gado, èn du moro muiti fu kenki yu libi soleki fa Gado wani. Disi sa yepi yu fu wai pasi gi den trapu fu Satan, fu handri na wan fasi di fiti te yu de nanga den Kresten brada nanga sisa fu yu, èn fu yepi trawan fu kon sabi èn fu lobi a bigi Gado fu wi.

[Futuwortu]

San yu leri?

• Fu san ede a ben de prenspari gi Moses fu abi safri-ati, èn fu san ede dati de prenspari gi wi?

• Sortu bun sani pasa fu di Moses ben taigi Farao ibri tron baka san Yehovah taki?

• San na wan tu moi gronprakseri di Moses ben leri èn di wisrefi musu hori na prakseri tu?

• Fa wi kan kon frustan den fasi fu Yehovah moro bun?

[Aksi fu a tori disi]

[Prenki na tapu bladzijde 21]

Na wan getrow fasi, Moses ben tyari a wortu fu Yehovah gi Farao

[Prenki na tapu bladzijde 23]

Yehovah ben tyari den markitiki fu en kon na krin gi Moses

[Prenki na tapu bladzijde 24, 25]

Denki dipi fu den fasi di Yehovah abi