Na tapu sortu fondamenti yu e bow?

A FONDAMENTI fu wan oso, e meki taki na oso e tanapu steifi, noso taki a e degedege. Son tron Bijbel e gebroiki a wortu „fondamenti” na wan agersi fasi.

A profeiti Yesaya, fu eksempre, e taki dati Yehovah Gado na a sma di „e poti a fondamenti fu grontapu” (Yesaya 51:13). A fondamenti disi, noso den wet fu Gado di no e kenki noiti, e meki taki grontapu e tan drai na a srefi fasi, èn den e hori grontapu na a srefi presi (Psalm 104:5). Gado Wortu, a Bijbel, e taki tu fu „den fondamenti” fu a libisma libimakandra. Den fondamenti disi na den wet nanga komando di libisma poti. Ma te krukafasi, kruktudu nanga ogridu lai, dan den fondamenti e „broko fadon”, noso den e kon swaki, èn disi e meki taki a heri libimakandra e kon bruya.​—Psalm 11:2-6; Odo 29:4.

A wortu „fondamenti” kan abi fu du nanga a libi fu ibriwan sma sosrefi. Na a kaba fu a barinen Bergitaki fu Yesus Krestes, a taki: „Efu wan sma e yere den sani disi di mi taki èn a e du den, dan a sa de leki wan koni man di bow en oso na tapu bigi ston. Ne alen fadon, bigi frudu kon, winti wai èn a naki na oso dati bun tranga, ma na oso no fadon, bika a ben bow na tapu bigi ston. Sosrefi, efu wan sma e yere den sani disi di mi taki èn a no e du den, dan a sa de leki wan don man di bow en oso na tapu santi. Ne alen fadon, bigi frudu kon, winti wai èn a naki na oso dati bun tranga èn na oso fadon broko èn noti fu en tan abra.”​—Mateyus 7:24-27.

Na tapu sortu fondamenti yu e bow yu libi? Yu e bow na tapu wan safu fondamenti fu santi, dati wani taki tapu denki, noso filosofia fu libisma di no e dini Gado? So wan fondamenti sa fadon broko. Ma te yu e bow na tapu wan tranga fondamenti fu bigi ston, sobun te yu e gi yesi na den sani di Yesus leri sma, dan so wan fondamenti o yepi yu fu tan tanapu kánkan na ini a libi te problema di de leki bigi winti e wai kon miti yu.