„Mi sa kisi yepi fu Yehovah”

Osofamiri e kisi krakti nanga yepi fu a sabi fu Gado

NA INI a Doisri foto Berlijn, sma ben bow wan bigi skotu fu tyari pratifasi kon na mindri na Owstusei nanga a Westsei fu a foto. Wan trowpaar na ini Argentinia e taki dati wan pisi ten a ben gersi leki so wan sortu skotu ben kon de na den mindri; wan skotu di ben e prati na osofamiri libi fu den na tu pisi. Fu di a ben de so furu tron taki den no ben e agri nanga makandra kwetikweti, meki den ben e teige makandra srefisrefi.

A de wan sari sani fu taki dati den tu sma disi a no den wan-enkri sma di de na ini so wan situwâsi. Na ini furu osofamiri, sma e feti nanga makandra, na wan kibrifasi son masra nanga wefi e libi nanga sma di no de den trowpatna, èn furu tron sma na ini den osofamiri e du wan lo ogri-ati sani nanga makandra. Disi na wan sari tori, spesrutu fu di Gado srefi ben seti na osofamiri (Genesis 1:27, 28; 2:23, 24). A seti disi na wan presenti fu Gado di e gi libisma a tumusi moi okasi fu sori lobi gi makandra (Rut 1:9). Te sma na ini wan osofamiri e du san Gado e taigi den fu du, dan den kan gi grani na Yehovah, èn den kan de wan blesi gi makandra trutru. *

Fu di na Gado seti na osofamiri libi, meki wi musu sorgu taki a fasi fa En e denki, abi krakti tapu a fasi fa wi e denki. Na so fasi wi kan kon sabi krin san wi musu du fu meki na osofamiri drai bun. A Wortu fu en e gi furu bun rai di kan yepi osofamiri na ini a pisi tori disi, spesrutu te den e kisi tyalensi. Bijbel e fruteri san na a frantwortu fu masra na ini na osofamiri. Wi e leisi: „Masra musu lobi den wefi fu den leki den eigi skin.” Te wan masra e tyari a frantwortu fu en, dan nanga prisiri a wefi sa sori taki a abi „bigi lespeki gi en masra”.​—Efeisesma 5:25-29, 33.

Luku san na apostel Paulus ben skrifi fu a banti di musu de na mindri papa, mama, nanga den pikin fu den: „Papa, no tanteri den pikin fu unu, ma tan kweki den nanga a trangaleri èn a seryusu frumane fu Yehovah” (Efeisesma 6:4). Disi e meki, taki wan bun banti e kon de na mindri ala sma na ini na osofamiri, so taki a de moro makriki gi den pikin fu gi yesi na a papa, nanga a mama fu den.​—Efeisesma 6:1.

Den sani di wi kari na fesi, na wan tu eksempre nomo fu den tumusi bun rai di Bijbel e gi sma fu kan seti wan bun osofamiri libi. Furu sma di e fiti den rai fu Gado na ini den aladei libi, e si taki na osofamiri fu den e prisiri trutru. Prakseri a man nanga na uma na ini Argentinia di wi ben taki fu den na a bigin. Baka di den studeri Bijbel nanga Yehovah Kotoigi sowan dri mun langa, den alatu bigin gebroiki den koni rai di den ben kisi, èn den fiti den na ini den trowlibi. Den du furu muiti fu kan taki moro bun nanga makandra, den du muiti fu poti prakseri na den nowtu fu makandra èn sosrefi fu tron sma di de klariklari fu gi makandra pardon (Odo 15:22; 1 Petrus 3:7; 4:8). Den leri fu dwengi densrefi fu no kisi atibron lawlaw èn den leri fu suku yepi na Gado te a ben gersi leki sani no ben o waka bun (Kolosesma 3:19). Heri esi a „bigi skotu” di ben de na den mindri, ben broko fadon!

Gado kan meki wan osofamiri kon tranga

Te sma sabi den markitiki fu Gado èn te den e gebroiki den na ini den libi, dan dati kan tranga na osofamiri fu den, so taki den man kakafutu gi problema. Disi de tumusi prenspari, fu di den profeititori ben sori na fesi taki osofamiri ben o kisi furu problema na ini a ten fu wi. Paulus ben taki na fesi taki na ini a ten disi, moro nanga moro sma no ben o hori densrefi na bun gwenti nanga gronprakseri, èn taki a libisma famiri ben o kon moro ogri tu. A ben taki dati na ini „den lasti dei” furu sma no ben o de loyaal na makandra, taki sma no ben o „lobi trawan”, èn taki pikin ben o trangayesi papa nanga mama. Paulus ben sori taki disi ben o de so, srefi nanga den sma di ’ben o du leki den lobi Gado’.​—2 Timoteyus 3:1-5.

 Te wi e pruberi fu plisi Gado, dan dati kan yepi wi fu feti teige den sani disi di kan pori na osofamiri libi. Furu osofamiri kon si taki den abi yepi fu Gado fanowdu fu man lusu furu fu den problema di den e kisi. Efu den sma na ini wan osofamiri wani tan abi wan bun matifasi nanga Gado, dan na a fosi presi den musu du ala san den man fu fiti Bijbel gronprakseri na ini den libi èn den no musu frigiti taki „efu Yehovah srefi no bow na oso, dan na fu soso den wrokoman wroko tranga na en” (Psalm 127:1). A moro prenspari sani di kan yepi sma fu abi wan koloku osofamiri, na te den e poti Gado na a fosi presi na ini den osofamiri libi.​—Efeisesma 3:14, 15.

Na ini Hawai, wan man di nen Dennis ben kon si taki disi de so trutru. Aladi a ben taki dati en na wan Kresten, toku a ben abi a gwenti fu taki hati sani èn a ben lobi feti. A man disi ben go na ini a legre fu wan pisi ten, ma di a komoto, a ben kon moro ogri srefi. „Ala ten mi ben e kisi trobi nanga sma”, na so ensrefi e taki. „Mi no ben e span san ben o pasa nanga mi, èn mi no ben frede fu dede. Mi ben tan taigi sma hati sani èn mi ben tan feti nanga sma. A wefi fu mi, di ben de wan Kotoigi fu Yehovah, ben gi mi deki-ati fu studeri Bijbel.”

Dennis ben kakafutu gi den muiti di a wefi fu en ben e du fu yepi en. Ma fu di en wefi tan tyari ensrefi na wan tumusi moi fasi, leki fa a fiti wan Kresten uma, meki na ati fu Dennis ben kon safu pikinso. Te fu kaba Dennis go na wan Kresten konmakandra makandra nanga en wefi èn den pikin fu en. Baka dati, den ben bigin wan bijbelstudie nanga Dennis, èn a ben go na fesi trutru. A no ben e smoko moro, aladi a ben abi a gwenti dati 28 yari langa kaba, èn a no ben abi demakandra moro nanga mati di ben e du sani di ensrefi no ben wani du moro. Fu di Dennis ben de nanga bigi tangi fu a fasi fa Yehovah yepi en, meki a ben taki: „Mi osofamiri libi kon moro bun. Leki osofamiri wi ben man go na den konmakandra èn na ini a preikiwroko. Den tu pikin fu mi no ben e frede mi moro, fu di mi ben leri fu no atibron so esi, èn fu di mi no ben e taki sani moro fu hati trawan. Nanga prisiri wi ben kan sidon taki fu Bijbel tori. Efu mi no ben kon sabi den tru tori di skrifi na ini Bijbel, dan mi no ben o de dyaso tide; mi ben e atibron tumusi esi.”

Osofamiri kan de koloku te den e wroko tranga fu du a wani fu Yehovah. Ondrofeni leri wi taki awinsi efu na wán sma nomo na ini na osofamiri e hori ensrefi na Bijbel gronprakseri, dan toku sani e waka moro bun leki te nowan sma na ini na osofamiri e du dati. Fu meki wan Kresten osofamiri drai bun, na wan tranga wroko. Yu musu abi koni fu man du a wroko disi, èn a e teki ten fu du dati. Ma den sma na ini den osofamiri disi sabi taki Yehovah o blesi den muiti fu den, so taki sani sa waka bun gi den. Den kan taki den srefi wortu fu a psalm skrifiman di ben taki: „Mi sa kisi yepi fu Yehovah.”​—Psalm 121:2.

[Futuwortu]

[Prenspari pisi na tapu bladzijde 9]

’Na Gado gi ibri famiri na hemel èn na grontapu a nen fu den.’​—EFEISESMA 3:15

[Faki na tapu bladzijde 8]

YEHOVAH E SI NA OSOFAMIRI LEKI WAN TUMUSI WARTI SANI

„Gado ben blesi den èn Gado ben taigi den: ’Un meki pikin èn kon furu èn furu grontapu.’”​—Genesis 1:28.

„Koloku fu ibriwan sma di e frede Yehovah . . . Yu wefi sa de leki wan droifitaki di abi froktu na ini den moro inisei pisi fu yu oso.”​—Psalm 128:1, 3.