Aksi fu leisiman

Di den disipel yere taki Petrus di ben de na strafu-oso, kon na a mofodoro, dan fu san ede den taki dati „na a engel fu Petrus”?​—Tori fu den Apostel 12:15.

Kande den disipel ben denki taki wan engel di ben e teki presi gi Petrus, ben tyari wan boskopu gi den, ma dati no ben de so. Luku den tra tekst na fesi a wan disi.

Herodes, di ben kiri Yakobus, ben poti Petrus na strafu-oso. Sobun, yu kan frustan taki den disipel ben denki taki a srefi sani ben o pasa nanga Petrus leki san ben pasa nanga Yakobus. Fo srudati ben e luku Petrus di ben tai nanga keti, èn fo leisi wan dei fo tra srudati ben e teki a presi fu den wan di ben de nanga Petrus. Ne wan neti, wan engel kon fri Petrus na wan wondru fasi èn a tyari en komoto fu a strafu-oso. Te fu kaba, di Petrus kon frustan san ben e pasa, a taki: „Now mi sabi trutru taki Yehovah seni en engel kon fu puru mi na Herodes anu.”​—Tori fu den Apostel 12:1-11.

Wantewante Petrus go na a oso fu Maria, a mama fu Yohanes Markus, pe wan tu disipel ben kon makandra. Di a naki na a portu, dan wan uma-srafu di ben nen Roda go luku suma drape. Di a kon frustan taki na Petrus sten a yere, a lon go taigi den trawan, ma a ben frigiti fu opo a doro gi Petrus! Biginbigin, den disipel no ben wani bribi taki na Petrus ben de na a portu. Na presi fu dati, den ben denki taki „na a engel fu Petrus”.​—Tori fu den Apostel 12:12-15.

A de so taki den disipel ben denki taki sma ben kiri Petrus kaba èn taki a yeye fu en ben de na a portu? Disi no kan de so noiti, bika den bakaman fu Yesus ben sabi san Bijbel e taki fu dedesma, namku taki den „no sabi notinoti” (Preikiman 9:5, 10). Ma dan san den disipel ben e denki kande di den taki dati „na a engel fu Petrus” de na a portu?

Den disipel fu Yesus ben sabi taki na ini a heri historia engel ben yepi a pipel fu Gado. Fu eksempre, Yakob ben taki fu ’na engel di ben e frulusu en fu ala rampu’ (Genesis 48:16). Èn wan leisi di wan pikin ben de na den mindri, dan Yesus taigi den bakaman fu en: „Luku bun taki unu no e lagi wan fu den pikinwan disi, bika mi e taigi unu taki den engel fu den na ini hemel, ala ten e si mi Tata di de na hemel.”​—Mateyus 18:10.

A moi fu si taki wan buku vertaal a Griki wortu agʹge·los („engel”) nanga a wortu „boskopuman” (Young’s Literal Translation of the Holy Bible). Soleki fa a sori, dan son Dyu ben e bribi taki ibri futuboi fu Gado abi en eigi engel di ben e kibri en. A no de fu taki dati Gado Wortu no e leri sma a sani disi. Toku a kan dati di den disipel taki dati „na a engel fu Petrus” de na a portu, dan den ben denki taki wan engel di ben teki presi gi Petrus, ben tyari wan boskopu gi den.