Ondrofenitori

Mi e prisiri pasa marki nanga ’a libi di mi e libi now’!

SOLEKI FA TED BUCKINGHAM FRUTERI

Mi ben de wan furuten dinari siksi yari kaba èn mi ben trow siksi mun di wan siki naki mi di meki mi kon lan. A ben de 1950, èn mi ben abi 24 yari nomo. Fu di mi tan neigi mun na ini ati-oso, meki mi ben abi nofo ten fu prakseri fu mi libi. San ben o miti mi nanga mi wefi Joyce, now di mi ben kon lan?

NA INI 1938, mi papa di no ben de wan sma di ben e go na kerki, bai wan buku di nen Regeering. * Kande a bai a buku fu di furu bruya ben de na politiek sei èn fu di a ben gersi leki wan orloku ben o kon. Mi no denki taki a leisi a buku, ma mi mama di ben bribi tranga na ini Gado, leisi en. Wantewante mi mama drai en libi di a frustan a boskopu di skrifi na ini a buku. A gowe libi na Anglikan Kerki èn aladi mi papa ben gens en, toku a tron wan getrow Kotoigi fu Yehovah. A tan getrow teleki a dede na ini 1990.

Mi mama tyari mi go na mi fosi Kresten konmakandra na wan Kownukondre zaal na ini Epsom, na a zuidsei fu Londen. A gemeente ben kon makandra na ini wan presi di ben de wan wenkri fosi, èn wi ben arki a lezing fu J. F. Rutherford na tapu plaat; en ben de a sma di ben e tiri a wroko fu Yehovah Kotoigi na a ten dati. A lezing ben naki mi ati srefisrefi.

Di opolani frei abra Londen fu trowe bom fu pori a foto, dan sani ben kon moro muilek gi wi. Sobun, na ini 1940, mi papa teki a bosroiti fu froisi na osofamiri go na Maidenhead, wan pikin foto di ben de 45 kilometer fu Londen, èn drape wi ben kan feni moro kibri. Disi ben de wan bun sani, fu di den 30 brada nanga sisa fu a gemeente drape ben gi mi furu deki-ati. Fred Smith, wan getrow brada di ben tranga na yeye fasi èn di ben dopu na ini 1917, poti prakseri na mi èn a leri mi fu tron wan moro bun preikiman. Te na a dei fu  tide, mi de nanga tangi taki a gi mi wan bun eksempre èn taki a yepi mi na wan lobi-ati fasi.

Mi e go na ini a furuten diniwroko

Na ini 1941, di mi ben abi 15 yari, mi teki dopu na ini a Theems-liba na wan kowru dei na ini maart. Na a ten dati, mi bigi brada Jim ben tron wan furuten preikiman. Now, en nanga en wefi Madge e libi na ini Birmingham, baka di den gebroiki wan bigi pisi fu den libi na ini a diniwroko fu Yehovah fu du kring-wroko nanga distrikt-wroko na ini heri Ingrisikondre. Mi sisa Robina, di yongu moro mi, nanga en masra Frank, de getrow futuboi fu Yehovah tu te now ete.

Mi ben abi a wroko fu luku den monitori fu wan fabriki di ben e meki krosi. Wan dei, a driktoro kari mi kon na ini a kantoro fu en fu di a ben wani gi mi a wroko fu bai sani gi a fabriki; nanga a wroko disi mi ben kan meki furu moni. Ma wan pisi ten kaba, mi ben e prakseri fu teki na eksempre fu mi brada. Fu dati ede, na wan switi fasi mi weigri fu teki a wroko di mi basi ben wani gi mi, èn mi sori en fu san ede mi no ben wani a wroko. Mi fruwondru di a prèise mi na wan switi fasi taki mi ben wani du so wan moi Kresten wroko. Sobun, baka di mi go na wan distrikt kongres na Northampton na ini 1944, mi tron wan furuten preikiman.

A fosi presi pe mi ben musu go ben de Exeter, na ini a distrikt Devon. Na ini a pisi ten fu na orloku, a foto disi ben tron wan brokobroko presi fu di feanti ben trowe bom na en tapu, ma den sma fu a foto ben e du muiti fu kisi densrefi baka. Mi go libi na ini wan oso pe tu pionier, Frank nanga Ruth Middleton, ben de kaba, èn den ben abi switifasi gi mi trutru. Mi ben abi 18 yari nomo, èn mi no ben sabi wasi krosi noso bori, ma safrisafri mi ben leri fu du den sani disi moro bun.

Mi patna na ini a preikiwroko ben de Victor Gurd, di ben abi 50 yari. A ben de fu Ierland èn a ben e preiki sensi 1920 kaba. A leri mi fu gebroiki mi ten na wan bun fasi. A leri mi sosrefi fa fu kisi moro lobi gi a leisi fu Bijbel, èn fa fu si den difrenti bijbelvertaling leki wan warti sani. Na ini den yari disi pe mi ben e leri fu tron wan lepi sma, na eksempre fu Victor di ben e tanapu kánkan, ben de soifri san mi ben abi fanowdu.

Mi e kisi fu du nanga a tyalensi fu no teki sei na ini feti

Na orloku ben e kon na wan kaba, ma lanti ben e suku yongu man ete fu go na ini a legre. Na ini 1943, mi ben go na fesi krutu kaba na ini Maidenhead, èn drape mi ben taki krin taki mi no ben o man go na ini a legre fu di mi na wan preikiman fu a bun nyunsu. Aladi mi no ben kisi primisi fu no go na ini a legre, toku mi teki a bosroiti fu froisi go na Exeter fu bigin baka nanga a preikiwroko fu mi. Fu dati ede, di den kari mi te fu kaba fu go na krutu, mi ben de na Exeter. Di a krutuman leisi strafu gi mi, a taigi mi taki mi ben musu go na strafu-oso siksi mun langa pe mi ben o wroko bun tranga. A taigi mi tu taki a ben e sari taki a no ben man seni mi go na strafu-oso gi wan moro langa pisi ten. Baka di mi tan siksi mun na ini strafu-oso, den seni mi go baka na strafu-oso gi ete fo mun.

Fu di mi ben de a wan-enkri Kotoigi na ini a strafu-oso, meki den waktiman di ben e luku den strafuman, kari mi Yehovah. Mi ben feni en pikinso fruferi fu piki den te den ben e kari mi na a nen dati, ma mi ben musu fu piki den. Toku a ben de wan bigi grani fu yere den e meki Gado nen bekènti ibri dei baka! Na so fasi den tra strafuman ben kan kon sabi taki mi ben de na mindri den fu di mi na wan Kotoigi fu Yehovah, èn mi konsensi ben meki taki mi ben e hori misrefi na gronprakseri. Bakaten, di den seni Norman Castro kon na a srefi strafu-oso, den kenki a nen. Now den ben e kari wi Moses nanga Aron.

Baka dati den puru mi na ini a strafu-oso fu Exeter, èn den froisi mi go na a strafu-oso fu Bristol, èn te fu kaba den seni mi go na a strafu-oso fu Winchester. Sani no ben prisiri ala ten, ma toku mi ben kan lafu fu a tori. Mi nanga Norman ben prisiri fu hori a Memrefesa nanga makandra di wi ben de na Winchester. Francis Cooke, di ben kon luku wi na ini strafu-oso, hori wan moi lezing gi wi.

 Sani e kenki na ini den yari di ben kon baka na orloku

Na a kongres di ben hori na ini 1946 na Bristol, den tyari wan yepisani fu studeri Bijbel kon na doro, namku „Let God Be True” (God zij waarachtig). Drape mi miti Joyce Moore, wan moi yongu uma di ben de wan pionier tu na Devon. Wi ben tron bun mati, èn fo yari baka dati wi trow na Tiverton, pe mi ben de sensi 1947. Wi go libi na ini wan kamra di wi ben yuru gi 1,10 Amerkan dala wan wiki. Wi ben libi wan switi libi!

Na ini a fosi yari di wi trow, wi ben musu froisi baka. Wi go na a zuidsei pisi fu Ingrisikondre, na wan foto di nen Brixham, pe wan lanpresi ben de. A ben de a fosi presi pe sma ben e leri kisi fisi nanga boto di abi wan bigi srepi. Ma wi no ben de langa drape di wan siki naki mi di ben meki mi kon lan, aladi mi ben de na pasi fu go na wan kongres na ini Londen. A siki disi ben meki taki mi go na ini coma, noso wan dipi sribi pe pikinmoro mi no ben man wiki moro. Ma te fu kaba, baka neigi mun, mi ben kan gowe libi na ati-oso, soleki fa mi ben fruteri na fesi kaba. Mi reti-anu nanga mi tu futu no ben man wroko bun moro, èn na so a de te na a dei fu tide. Mi ben musu waka nanga wan wakatiki. Mi lobi wefi ben de nanga mi doronomo leki wan mati di ben de nanga prisiri ala ten èn di ben e gi mi deki-ati, spesrutu fu di a ben man go doro nanga a furuten diniwroko. Ma san wi ben o du now? Heri esi mi ben o kon sabi taki noiti na anu fu Yehovah syatu.

A yari na en baka, wi go na wan bigi konmakandra na Wimbledon, na ini Londen. Na a pisiten dati, mi ben e waka kaba sondro mi tiki. Drape wi miti Pryce Hughes, di ben e tiri a wroko na Ingrisikondre. Wantewante a bari mi wan odi nanga den wortu disi: „Yere, wi wani taki yu musu go du a kring-wroko!” Disi ben de a moro bigi deki-ati di mi ben man kisi! Mi ben gosontu nofo? Mi nanga Joyce ben e tweifri fu disi, ma baka di wi teki wán wiki fu leri a wroko èn wi poti ala wi frutrow tapu Yehovah, wi ben go baka na a zuidsei fu Ingrisikondre, pe mi ben musu dini leki kring-opziener. Na a ten dati mi ben abi 25 yari nomo, ma te now ete mi kan memre nanga tangi na ati fa den Kotoigi drape di ben abi switifasi nanga pasensi, ben yepi mi.

Mi nanga Joyce ben feni taki nowan grani ben meki wi firi so krosibei fu wi Kresten brada nanga sisa, leki te wi ben e fisiti den gemeente. Wi no ben abi wan wagi, dati meki wi ben e teki loko noso bus fu go na den presi. A siki fu mi ben meki  taki mi no ben man du ala sani moro, èn mi ben e leri ete fa fu fiti misrefi na a situwâsi disi, ma toku wi ben prisiri nanga den grani di wi ben kisi teleki a yari 1957. Wi ben firi koloku trutru, ma a yari dati ben o tyari moro tyalensi kon gi wi.

Wi e go dini leki zendeling

Wi ben breiti srefisrefi di wi kisi a kari fu go na a di fu 30 klas fu Gilead. Aladi wan pisi fu mi skin ben lan, toku mi ben man du furu sani ete, dati meki mi nanga Joyce ben e prisiri fu teki a kari. Ondrofeni ben leri wi taki Yehovah e gi wi krakti ala ten, efu wi e meki muiti fu du a wani fu en. Feifi mun langa, wi ben kisi furu leri na a Waktitoren Bijbelskoro Gilead, di ben de na a moi presi di nen South Lansing, na Amerkankondre, ma fosi yu denki a ten disi pasa. Furu fu den studenti ben de trowpaar di ben e du kring-wroko. Di den aksi den studenti efu den ben sa wani go du zendeling-wroko na ini wan tra kondre, wi ben de na mindri den wan di ben de klariklari fu go. Pe wi ben o go? Na Uganda, Owstu Afrika!

Na a ten dati, Yehovah Kotoigi na Uganda no ben abi primisi fu du a wroko fu den, dati meki den brada gi mi a rai fu go tan na wan boitipresi èn fu suku wan grontapuwroko te mi ben de na ini a kondre. Wi teki loko nanga boto, èn baka wan heri pisi ten wi doro na Kampala, na ini Uganda. Den sma di ben e wroko na a kantoro pe trakondre-sma musu kisi primisi fu kon na ini a kondre, no ben breiti fu si wi èn den ben gi wi primisi fu tan soso wan tu mun. Baka dati, wi kisi a komando fu gowe libi a kondre. Na edekantoro gi wi a rai fu go na Noord-Rodesia (now a nen Sambia). Drape wi ben prisiri srefisrefi fu miti baka nanga fo sma di ben de na ini a Gilead klas fu wi, namku Frank nanga Carrie Lewis, èn Hayes nanga Harriet Hoskins. Wi no ben de langa drape, di wi ben musu go na Zuid-Rodesia (now a nen Zimbabwe).

Wi teki loko fu kan go drape, ma bifo wi doro na a presi di nen Bulawayo, dan fosi tron wi kisi na okasi fu si pikinso fu a tumusi moi èn bigi sula di nen Victoriawatervallen. Wi tan wan pisi ten nanga a famiri McLuckie, di ben de na mindri den fosi Kotoigi di ben kon drape. Na ini den 16 yari baka dati, a ben de wan bigi grani gi wi fu leri sabi den bun.

Wi musu fiti wisrefi na nyun situwâsi

Baka di wi kisi leri tu wiki langa fu kon sabi fa a preikiwroko e du na ini Afrika, dan mi kisi a wroko fu dini leki kring-opziener. Fu man preiki na ini a busi fu Afrika, wi ben musu tyari watra, nyanyan, bedi, krosi, wan wrokosani di wi ben kan gebroiki fu sori felem, wan masyin fu meki stroom, wan bigi weti duku fu sori a felem, nanga tra sani di wi ben abi fanowdu. Ala den sani disi wi ben poti na ini wan truck di ben tranga nofo fu rèi na tapu den olo-olo pasi.

Mi ben e wroko nanga den kring-opziener fu Afrika, aladi Joyce ben e prisiri fu yepi den wefi  nanga den pikin fu den kring-opziener di ben kon tu. A kan weri a skin fu waka na ini na Afrikan sabana, spesrutu te a son faya na deiten. Ma heri esi mi ben kon si taki nanga a weer disi, mi no ben abi so furu problema nanga a gosontu fu mi, èn fu dati ede mi ben breiti.

Moro furu fu den sma ben pôti. Furu fu den ben de dipi na ini den gwenti nanga a kruktubribi fu den, èn den mansma ben abi moro leki wán wefi. Ma toku den ben sori dipi lespeki gi Bijbel. Na ini son kontren, den gemeente konmakandra ben e hori na ondro bigi bon di ben e gi skaduw, èn te neti den ben e leti kokolampu. Ala ten wi ben fruwondru te wi ben e sidon na dorosei fu studeri Gado Wortu pe wi ben kan si a hemel di ben lai nanga stari, wan fu den moi sani di Gado meki.

Ete wan sani di wi no man frigiti noiti moro na te wi ben e sori den felem fu a Waktitoren Genootschap na den sma di ben e libi na ini den kontren na ini Afrika di lanti ben sreka spesrutu gi den. Son leisi 30 Kotoigi ben kan de na ini wan gemeente, ma na den okasi disi wi ben sabi taki nofo tron wi ben kan fruwakti 1000, noso moro sma!

A no de fu taki, dati na ini den waran kontren fu grontapu, wan sma kan kon siki wanwan leisi, ma ala ten a de prenspari fu tan si sani na a yoisti fasi. Mi nanga Joyce ben leri fu du dati, fu di wanwan leisi mi ben kisi malaria, èn Joyce ben e feti nanga wan siki di a ben kisi fu di wan sortu bakterie ben kon na ini en skin.

Bakaten wi ben musu go wroko na a bijkantoro na Salisbury (now a nen Harare), èn drape a ben de wan grani fu wroko makandra nanga tra getrow futuboi fu Yehovah. Wan tu fu den ben de Lester Davey, èn George nanga Ruby Bradley. Lanti ben gi mi primisi fu trow sma, èn dati ben gi mi na okasi fu trow den Afrikan brada nanga sisa. Disi ben meki taki a trowlibi fu Kresten brada nanga sisa na ini a gemeente ben kon moro tranga. Wan tu yari baka dati, mi kisi wan tra grani. Mi ben musu go fisiti den gemeente di no ben e taki wan Afrikan tongo. Moro leki tin yari, mi nanga Joyce ben e prisiri fu kon sabi den brada nanga sisa fu wi na a fasi disi, èn wi ben breiti fu si taki den ben e go na fesi na yeye fasi. Na a ten dati, wi ben go tu na den brada nanga sisa fu wi na ini Botswana nanga Mosambik.

Wi musu go na wan tra presi baka

Na ini 1975, wi ben musu go baka na Sierra Leone, na ini West Afrika, baka di wi tan furu yari na ini a zuidsei pisi fu Afrika pe wi ben e firi koloku. Heri esi wi ben kon gwenti a libi na a bijkantoro, èn wi ben kan du a nyun wroko fu wi, ma disi no ben o de fu langa. Mi ben kon siki èn mi skin ben kon swaki fu di malaria ben naki mi hebi, èn te fu kaba mi ben abi fu go suku datrayepi na ini Londen. Drape den taigi mi taki a no ben o de wan bun sani, fu drai go baka na Afrika. Wi ben sari fu disi, ma a Bethelfamiri fu Londen gi mi nanga Joyce wan switikon. Wan lo Afrikan brada ben de na ini furu fu den gemeente na ini Londen, èn den ben gi wi a firi taki wi ben de na Afrika ete. Di mi ben firi moro betre, wi ben musu gwenti baka na wan tra fasi fu libi, èn den aksi mi fu teki fesi na a afdeling di e bai sani gi Bethel. Na ini den yari di pasa, a preikiwroko ben go na fesi, èn fu dati ede a wroko di mi e du na a afdeling moi srefisrefi.

Syatu baka 1990, mi lobi wefi Joyce kisi wan senwe siki, èn na ini 1994 a dede. A ben de wan lobi wefi di ben de loyaal èn getrow, èn ala ten a ben de klariklari fu fiti ensrefi te wi ben kisi fu du nanga difrenti situwâsi. Mi kon si taki te mi e sari, a de prenspari fu tan si sani na wan yeye fasi èn fu tan luku go na a ten di e kon. Wan tra sani di e yepi mi tu fu no meki sani puru mi prakseri, na fu begi Yehovah taki mi man tan hori misrefi na wan bun schema, so taki mi man du den frantwortu di mi abi na theokrasia sei, èn sosrefi taki mi man du a preikiwroko.​—Odo 3:5, 6.

Fu dini na Bethel, na wan grani èn wan moi fasi fa mi kan gebroiki mi libi. Mi kan wroko nanga someni yongusma èn mi kan ondrofeni furu prisiri sani. Wan fu den blesi na taki someni sma e kon luku wi dyaso na ini Londen. Son leisi te mi e si bun mati di mi ben leri sabi na a pisi ten di mi ben e wroko na ini Afrika, dan mi e prakseri baka fu den moi sani di mi ben ondrofeni drape. Ala den sani disi e yepi mi fu tan prisiri dorodoro nanga ’a libi di mi e libi now’ èn nanga ala frutrow mi e tan prakseri fu a howpu di wi abi fu a libi „di wi o kisi na ini a ten di o kon”.​—1 Timoteyus 4:8.

[Futuwortu]

[Prenki na tapu bladzijde 25]

Nanga mi mama na ini 1946

[Prenki na tapu bladzijde 26]

Mi nanga Joyce na wi trowdei na ini 1950

[Prenki na tapu bladzijde 26]

Na wan kongres na Bristol na ini 1953

[Prenki na tapu bladzijde 27]

Wi e wroko makandra nanga wan grupu di e libi na ini wan farawe presi (fowtow na tapusei) èn nanga wan gemeente (fowtow na a kruktu-anusei) na ini Zuid-Rodesia, now a nen Zimbabwe