No tapu fu du san bun
No tapu fu du san bun
„TAN tyari unsrefi na wan bun fasi na mindri den grontapusma”, na a rai di na apostel Petrus ben gi (1 Petrus 2:12). A Griki wortu di vertaal nanga „bun”, e sori go na wan sani ’di moi, di warti, di sma e lespeki, di de tumusi bun’. Na ini a ten disi, wi no abi fu fruwakti taki sma o tyari densrefi na wan warti fasi noso na wan lespeki fasi. Ma toku a moro bigi pisi fu a disiten pipel fu Yehovah ben man gi yesi na a rai di Petrus ben gi. Fu taki en leti, sma na heri grontapu sabi den leki sma di e tyari densrefi na wan bun fasi.
Disi de wan aparti sani trutru te yu e hori na prakseri taki wi e kisi fu du nanga den tesi èn nanga den problema fu den ’muilek ten disi di tranga fu pasa’ (2 Timoteyus 3:1). Ala dei wi e kisi tesi, èn a de wan aladei sani gi wi taki sma e gens a fasi fa wi e libi leki Kresten. Boiti den tesi di wi e kisi fu wan syatu pisi ten nomo, wi kan kisi tra tesi tu di e tan fu wan langa pisi ten èn di e kon moro ogri srefi. Toku, na apostel Paulus ben gi wi a deki-ati: „No meki wi tapu fu du san bun, bika na a reti ten wi sa koti efu wi no e kon weri” (Galasiasma 6:9). Ma fa wi kan du san bun, aladi wi e kisi tesi di e meki wi sari èn aladi sma e tan handri nanga wi na wan ogri-ati fasi? Iya, fa wi kan kisi a gwenti fu tan du san bun?
Sani di kan yepi wi fu du san bun
A de krin taki efu wan sma wani de wan ’warti, lespeki, èn tumusi bun’ sma, dan dati abi fu du nanga a fasi fa en ati de. Fu dati ede, te tesi nanga problema miti wan sma, dan a no wantronso a o man tyari ensrefi na wan bun fasi. A sa man du disi soso te a e gi yesi na Bijbel markitiki ibri dei èn te a e tan du muiti fu hori ensrefi na den markitiki disi na ini ibri pisi fu en libi. Sortu sani kan de wan yepi fu du disi? Luku wan tu sani.
Leri fu denki leki Krestes. Wan sma musu abi sakafasi fu man horidoro te a abi a firi taki sma e handri takru nanga en. Nofo tron a de so taki wan sma di e denki furu fu ensrefi no o gi pasi taki trawan handri takru nanga en. Ma Yesus ’ben saka ensrefi èn a ben gi yesi te na dede’ (Filipisma 2:5, 8). Te wi e du leki en, dan wi no sa „kon weri èn lasi-ati” na ini a santa diniwroko di wi e du (Hebrewsma 12:2, 3). Leri fu gi yesi na wan saka fasi fu di yu o de klariklari fu wroko makandra nanga den wan di e teki fesi na ini a gemeente pe yu e go (Hebrewsma 13:17). Leri fu si trawan „moro hei” leki yusrefi fu di yu o poti prakseri na den afersi fu den, bifo yu poti prakseri na den afersi fu yu.—Filipisma 2:3, 4.
Hori na prakseri taki Yehovah lobi yu. Wi musu abi na overtoigi taki Yehovah „de trutru èn taki a sa pai den sma di e suku en fayafaya” (Hebrewsma 11:6). A e broko en ede nanga wi trutru èn a wani taki wi kisi têgo libi (1 Timoteyus 2:4; 1 Petrus 5:7). Hori na prakseri taki noti kan tapu Gado fu lobi wi, èn disi sa yepi wi fu tan du san bun te tesi e miti wi.—Romesma 8:38, 39.
Poti ala yu frutrow na ini Yehovah. A de prenspari fu frutrow tapu Yehovah, spesrutu te a gersi leki den tesi e go nanga langa, noso te a gersi leki wi o lasi wi libi. Wi musu abi ala frutrow taki Yehovah no sa gi pasi taki wi kisi tesi ’di 1 Korentesma 10:13). Srefi te sma e suku fu kiri wi, wi sa man abi deki-ati te wi e frutrow tapu Yehovah.—2 Korentesma 1:8, 9.
moro hebi leki san wi man frudrage’, èn ala ten a o ’tyari wan frulekti kon’ so taki wi man tyari a tesi (Horidoro na ini begi. Te wi e begi, dan a de tumusi prenspari fu taki san de tapu wi ati (Romesma 12:12). Wan fu den fasi fa wi kan kon krosibei na Yehovah, na fu begi nanga wan opregti ati (Yakobus 4:8). Den sani di wi e ondrofeni e leri wi taki „awansi san wi e aksi . . . , a e yere wi” (1 Yohanes 5:14). Efu Yehovah e gi pasi taki wi tan na ini wan tesi so taki a kan luku efu wi o hori wi soifri retifasi, dan wi musu begi en fu yepi wi fu horidoro (Lukas 22:41-43). Begi e leri wi taki noiti wi de wi wawan, èn taki ala ten wi sa wini a strei fu di Yehovah de na wi sei.—Romesma 8:31, 37.
Bun wroko sa meki ’wi kisi prèise nanga grani’
Ten na ten, ala Kresten e kisi ’difrenti tesi di e meki den de nanga sari’. Toku, wi ’no musu tapu fu du san bun’. Te yu de nanga broko-ede, dan yu kan kisi krakti te yu hori na prakseri taki a getrowfasi fu yu kan meki taki yu „kisi prèise èn sosrefi glori nanga grani” te fu kaba (1 Petrus 1:6, 7). Gebroiki ala den yepisani na yeye fasi di Yehovah gi yu fu tranga a bribi fu yu. Te yu abi yepi fanowdu, dan go na den wan di e dini leki skapuman, leriman, nanga raiman na ini a Kresten gemeente (Tori fu den Apostel 20:28). Go doronomo na ala gemeente konmakandra di e gi wi „deki-ati fu abi lobi èn fu du bun wroko” (Hebrewsma 10:24). Abi wan schema fu leisi èn studeri Bijbel ibri dei, bika disi sa yepi yu fu tan na ai èn fu tan tranga na yeye fasi. Efu yu e teki prati na a Kresten diniwroko doronomo, dan dati sa yepi yu tu fu tan tranga na yeye fasi.—Psalm 1:1-3; Mateyus 24:14.
O moro yu e ondrofeni fa Yehovah lobi yu èn e broko en ede nanga yu, o moro yu o angri fu de „fayafaya fu du bun wroko” (Titus 2:14). Hori na prakseri taki „a sma di horidoro te na a kaba, na en o kisi frulusu” (Mateyus 24:13). Iya, abi a fasti bosroiti fu ’no tapu fu du san bun’!
[Prenspari pisi na tapu bladzijde 29]
Wi musu abi ala frutrow taki Yehovah no sa gi pasi taki wi kisi tesi ’di hebi moro leki san wi man frudrage’, èn taki ala ten a o ’tyari wan frulekti kon’
[Prenki na tapu bladzijde 30]
Te wi tan du wi theokrasia wroko fayafaya, dan dati kan sreka wi fu horidoro te tesi miti wi