Kownukondre preikiman e fruteri

Wan opregti pipel e meki taki Yehovah e kisi prèise

NA HERI grontapu, sma sabi Yehovah Kotoigi, yonguwan nanga owruwan, leki sma di no e bedrigi trawan èn di no e fufuru. Luku wan tu eksempre di e komoto fu dri difrenti kontren na grontapu.

Olusola di abi 17 yari, e libi na ini Nigeria. Wan dei, di a ben e go na oso baka di skoro tapu, a feni wan portmoni na tapu a gron. A tyari en go na a edeman fu a skoro, èn a man disi teri a moni di ben doro 6200 naira (sowan 45 Amerkan dala). Na edeman fu a skoro gi a portmoni baka na a leriman di ben lasi en. Fu di a leriman ben breiti, meki a gi Olusola 1000 naira (sowan 7 Amerkan dala), èn a taigi en fu pai skoro nanga a moni dati. Di tra studenti kon yere san pasa, dan den lafu Olusola. Wan tu wiki baka dati, wan studenti taigi na edeman fu a skoro taki wan sma fufuru en moni, sobun den leriman ben musu luku na ini den saka nanga den tas fu ala den studenti fu kon sabi suma ben fufuru a moni. „Yu kan tanapu dyaso”, na so a leriman taigi Olusola. „Mi sabi taki yu no e fufuru, bika yu na wan Kotoigi fu Yehovah.” Den feni a moni na tu fu den boi di ben lafu Olusola, èn den kisi hebi strafu. Olusola skrifi: „Mi breiti trutru taki sma sabi mi leki wan Kotoigi fu Yehovah di noiti no sa fufuru, èn na so fasi mi e gi Yehovah glori.”

Di Marcelo, wan man fu Argentinia, ben komoto fu en oso wan dei, dan a feni wan kofru na tapu a gron, wan tu meter moro fara fu a baka-doro fu en oso. A tyari a kofru go na ini na oso, èn en nanga en wefi opo en safrisafri. Den fruwondru trutru di den feni wan bigi ipi moni na ini, sosrefi krediet karta, nanga wan tu tyèk di ben teken. Wan fu den tyèk disi ben de fu wán milyun peso (dati na 250.000 euro). Na tapu wan papira di ben de na ini a kofru, den feni wan telefon-nomru. Den bel a sma di ben abi a kofru, èn den seti sani fu gi en a kofru baka nanga ala sani na ini, na Marcelo en wrokopresi. Di a sma di ben abi a kofru doro drape, dan a ben gersi leki a ben e senwe. A wrokobasi fu Marcelo taigi en fu no frede, bika Marcelo na wan Yehovah Kotoigi. A man di ben abi a kofru, gi Marcelo 20 peso nomo (sowan 6 Amerkan dala) fu di a ben feni a kofru. A sani disi meki a wrokobasi atibron srefisrefi, fu di a ben naki en ati trutru taki Marcelo no ben fufuru noti. A sani disi gi Marcelo na okasi fu fruklari taki a wani de opregti ala ten, fu di a de wan Kotoigi fu Yehovah.

Na ondrofenitori di e kon now na fu Kirgistan. Rinat, wan boi di abi siksi yari, ben feni wan portmoni di ben de fu wan uma di ben e tan krosibei fu en. A portmoni ben abi 1100 som na ini (sowan 25 Amerkan dala). Di Rinat tyari a portmoni disi go baka gi na uma, dan na uma disi teri a moni, èn baka dati a taigi Rinat en mama taki 200 som ben mankeri. Rinat taki dati a no ben teki a moni. Ne den alamala go suku a moni di ben mankeri, èn den feni en krosibei fu a presi pe Rinat ben feni a portmoni. Na uma no ben man bribi. A taigi Rinat tangi taki a ben tyari a moni di a ben lasi kon baka gi en, èn a taigi en mama tangi sosrefi taki a ben leri a boi fu en fu de wan Kresten.