Yehovah e kibri den wan di e howpu na en tapu
Yehovah e kibri den wan di e howpu na en tapu
„Meki yu lobi bun-ati nanga yu waarheid kibri mi doronomo.”—PSALM 40:11.
1. San Kownu David ben aksi fu Yehovah, èn fa Yehovah e du now san David ben aksi fu en?
KOWNU DAVID fu owruten Israel ben e „howpu fayafaya tapu Yehovah” èn den sani di a ben ondrofeni, ben meki a taki dati Yehovah ’ben poti en yesi arki en, èn taki a ben yere fa a bari kari en fu yepi en’ (Psalm 40:1). Ibri tron baka a ben si nanga en eigi ai fa Yehovah ben kibri den wan di lobi En. Fu dati ede, David ben kan aksi Yehovah fu kibri en doronomo (Psalm 40:11). Fu di David ben de wan fu den getrow man nanga uma di Yehovah pramisi „wan moro bun opobaka”, meki Yehovah e hori David na ini En prakseri now leki wan sma di sa kisi a pai dati (Hebrewsma 11:32-35). Na so fasi David kisi a moro bun dyaranti taki sani sa waka bun nanga en na ini a ten di e kon. A nen fu en skrifi na ini Yehovah en ’memrebuku’.—Maleaki 3:16.
2. Fa den Buku fu Bijbel e yepi wi fu frustan san a wani taki fu kisi kibri fu Yehovah?
2 Aladi den getrow sma di kari na ini Hebrewsma kapitel 11 ben e libi bifo a ten di Yesus ben de na grontapu, toku den ben e libi akruderi san Yesus Krestes ben leri sma. Yesus ben taki: „A sma di lobi en libi, o lasi en, ma a sma di no lobi en libi na ini a grontapu disi, o kibri en fu kan kisi têgo libi” (Yohanes 12:25). Sobun, wi e si krin taki te Yehovah e kibri wi, dan dati no wani taki dati wi no sa kisi pina, noso frufolgu. A wani taki dati wi sa kisi kibri na yeye fasi, so taki wi man tan abi wan bun nen na Gado.
3. Sortu buweisi wi abi taki Krestes Yesus ben kisi kibri fu Yehovah, èn san ben de a bakapisi?
3 Yesus srefi ben kisi hebi frufolgu, sma ben kosi en, èn te fu kaba den feanti fu en meki a kisi bigi syen di den kiri en na wan tumusi ogri-ati fasi. Ma toku a sani disi no wani taki dati Gado no hori ensrefi na a pramisi di a ben meki taki a ben o kibri a Mesias (Yesaya 42:1-6). Baka di sma kiri Yesus na so wan lagi fasi, dan a kisi wan opobaka tapu a di fu dri dei. A sani disi e buweisi taki Yehovah yere di Yesus ben e suku yepi, neleki fa a yere di David ben e suku yepi. Fu dati ede Yehovah gi Yesus a krakti fu tan getrow (Mateyus 26:39). Fu di Yesus ben kisi kibri na a fasi disi, meki a kisi libi na hemel pe a no o man dede noiti, èn milyunmilyun libisma di sori bribi na ini a lusu-paiman, kon abi a howpu fu libi fu têgo.
4. Sortu dyaranti den salfu Kresten nanga den „tra skapu” kisi?
4 Wi kan abi a frutrow taki Yehovah sa de klariklari fu kibri den futuboi fu en na ini a ten disi, neleki fa a ben du dati na ini den dei fu David Yakobus 1:17). A pikin grupu salfu brada fu Yesus di de na grontapu ete, kan frutrow tapu san Yehovah ben pramisi: „Wan gudu di no man pori, di no doti, èn di no sa lasi gowe . . . poti na wan sei na ini hemel gi unu, di e kisi kibri nanga yepi fu a krakti fu Gado fu di unu abi bribi, so taki unu kan kisi wan frulusu di de fu kon na krin na ini den lasti dei” (1 Petrus 1:4, 5). Den „tra skapu”, di abi a howpu fu libi na grontapu, kan poti den frutrow tu na ini Gado èn na ini a pramisi di a gi den nanga yepi fu a psalm skrifiman: „O lobi Yehovah, ala un loyaalwan fu en. Na den getrow sma Yehovah e kibri.”—Yohanes 10:16; Psalm 31:23.
nanga Yesus (Den e kisi kibri na yeye fasi
5, 6. (a) Fa Gado pipel kisi kibri na ini a ten disi? (b) Sortu banti den salfuwan abi nanga Yehovah, èn fa a de nanga den wan di abi a howpu fu libi na grontapu?
5 Na ini a ten disi, Yehovah seti sani fu kibri en pipel na yeye fasi. Aladi a no e kibri den gi frufolgu, noso gi den problema nanga rampu di e miti sma na ini a libi, toku na wan loyaal fasi a e gi den a yepi nanga a deki-ati di den abi fanowdu fu sorgu taki a tranga banti di den abi nanga en, e tan bun. Den kon abi a bun banti disi, fu di den e bribi na ini a seti fu a lusu-paiman di Gado ben gi na wan lobi-ati fasi. Sonwan fu den getrow Kresten disi, salfu nanga Gado en yeye fu tron tiriman makandra nanga Krestes na ini hemel. Gado fruklari den regtfardiki leki yeye manpikin fu en, èn den wortu disi abi fu du nanga den: „A puru wi na ondro a makti fu a dungru, èn a poti wi na ini a kownukondre fu en lobi Manpikin, di meki wi kon fri nanga yepi fu a lusu-paiman fu en, èn dati wani taki dati wi kisi pardon fu wi sondu.”—Kolosesma 1:13, 14.
6 Milyunmilyun tra getrow Kresten abi a dyaranti taki den sosrefi kan kisi wini fu a lusu-paiman di Gado seti. Wi e leisi: „A Manpikin fu libisma no kon fu sma dini en, ma a kon fu dini sma èn fu gi en sili leki wan lusu-paiman fu frulusu furu sma” (Markus 10:45). Den Kresten dati e fruwakti taki te a reti ten doro, den o tron „pikin fu Gado èn den o kisi kefalek bigi fri” (Romesma 8:21). Na a srefi ten, den e warderi a banti di den abi nanga Gado, èn den e du ala san den man fu tranga a banti dati.
7. San Yehovah e gebroiki na ini a ten disi fu sorgu taki sani e waka bun na yeye fasi nanga a pipel fu en?
7 Wán fasi fa Yehovah e sorgu taki sani e waka bun na yeye fasi nanga a pipel fu en, na taki a seti sani fu gi den leri doronomo. Disi e gi den na okasi fu kisi moro nanga moro soifri sabi fu a waarheid. Boiti dati, Yehovah e tan gi den tiri nanga yepi fu en Wortu, en organisâsi, èn en santa yeye. Ondro a tiri fu „a getrow èn koni srafu”, Gado en pipel na heri grontapu de leki wan bigi famiri. A srafu grupu e sorgu gi den sani di a grupu futuboi fu Yehovah abi fanowdu na yeye fasi, èn te a de fanowdu, dan a e sorgu tu gi den sani di den abi fanowdu na skin fasi, awansi fu sortu kondre den de èn awansi den gudu noso pôti.—Mateyus 24:45.
8. Sortu frutrow Yehovah abi na ini den loyaalwan fu en, èn sortu dyaranti a e gi den?
Yob 1:8-12; Odo 27:11). Noiti Yehovah sa frigiti den wan di de loyaal na en, „bika Yehovah na wan sma di lobi retidu, èn a no sa gowe libi den loyaalwan fu en. Fu tru den sa kisi kibri te ten di no skotu.”—Psalm 37:28.
8 Neleki fa Yehovah no ben kibri Yesus gi den ogri-ati sani di den feanti fu en ben e du nanga en, na so A no e kibri Kresten na a fasi dati tu na ini a ten disi. Ma disi no wani taki dati Gado no feni den bun. Kwetikweti! Na presi fu dati, a sani disi e sori krin taki Gado abi a frutrow taki den sa teki en sei na ini a bigi strei di abi fu du nanga a reti di a abi fu tiri ala sani (A lobi bun-ati èn a waarheid fu Yehovah e kibri wi
9, 10. (a) Fa a waarheid fu Yehovah e kibri en pipel? (b) Fa Bijbel e sori taki Yehovah e kibri den loyaalwan fu en nanga yepi fu en lobi bun-ati?
9 Na ini a begi di skrifi na ini Psalm 40, David aksi Yehovah fu kibri en nanga yepi fu en lobi bun-ati èn en waarheid. Fu di Yehovah na wan Gado fu waarheid èn fu di a lobi san de regtfardiki, meki a taki krin san na den markitiki fu en. Furu tron a de so, taki den wan di e hori densrefi na den markitiki disi, no e ondrofeni a sari, den broko-ede, nanga den problema di sma e ondrofeni te den no e poti prakseri na den markitiki dati. Fu gi wan eksempre, te wi e wai pasi gi drugs, te wi no e dringi sopi pasa marki, te wi no e teki a gwenti fu du hurudu, èn te wi no e du ogri-ati sani, dan wi kan kibri wisrefi èn sosrefi den lobiwan fu wi gi furu problema di e tyari sari kon. Èn srefi den wan di komoto fu Yehovah en pasi fu waarheid, soleki fa David ben du dati son leisi, abi a dyaranti taki Gado e tan „wan kibripresi” gi ogrisma di e sori berow. Den sortu sma dati kan bari nanga prisiri: „Yu sa kibri mi fu banawtu srefi” (Psalm 32:7). Disi na trutru wan moi fasi fa Gado e sori lobi bun-ati!
10 Wan tra eksempre di e sori taki Gado abi lobi bun-ati, na taki Gado e warskow den futuboi fu en fu hori densrefi aparti fu na ogri grontapu di a sa pori heri esi. Wi e leisi: „No lobi grontapu nanga den sani fu grontapu. Efu wan sma lobi grontapu, dan a lobi fu a Tata no de na ini en. Bika ala den sani di de fu grontapu, namku a lostu fu a skin, a lostu fu den ai, èn a prodo di wan sma e prodo nanga den gudu di a abi, no e kon fu a Tata, ma den sani disi e kon fu grontapu.” Te wi e poti prakseri na a warskow disi èn te wi e gi yesi na en, dan wi kan kibri wi libi fu têgo trutru, fu di a tekst e taki moro fara: „Boiti dati, grontapu e pasa gowe nanga den lostu fu en, ma a sma di e du a wani fu Gado sa tan fu têgo.”—1 Yohanes 2:15-17.
Wi e kisi kibri fu di wi e gebroiki wi frustan, fu di wi man si sani krin, èn fu di wi abi koni
11, 12. Fruteri fa wi e kisi kibri te wi e gebroiki wi frustan, te wi man si sani krin, èn te wi abi koni.
11 Nanga yepi fu santa yeye, David en manpikin Salomo ben skrifi disi gi den wan di wani taki Gado feni den bun: „Yu frustan srefi sa hori wakti gi yu, a koni fu man si sani krin srefi sa Odo 2:11; 4:5, 6.
kibri yu.” A ben gi den a deki-ati disi tu: „Kisi koni . . . No gowe libi en, èn a sa kibri yu. Lobi en, èn a sa kibri yu.”—12 Wi e gebroiki wi frustan te wi e denki dipi fu den sani di wi e leri fu Gado Wortu. Te wi e denki dipi fu sani, dan dati e yepi wi fu man si sani moro krin, so taki wi kan poti den yoisti sani na a fosi presi na ini wi libi. Furu fu wi sabi, kande fu di wisrefi ondrofeni dati kaba, taki problema e kon te sma no e poti den moro prenspari sani na a fosi presi na ini den libi. A kan taki den e du dati sondro fu den sabi, noso fu di densrefi wani en so. Fu dati ede a de tumusi prenspari taki wi e denki dipi fu sani. A grontapu fu Satan e suku fu kori wi nanga sani soleki gudu, biginen, nanga makti, aladi Yehovah e gi wi deki-ati fu suku fu doro marki di abi fu du nanga na anbegi fu wi, fu di den sani dati de moro prenspari. Te sma no e si na anbegi leki wan sani di prenspari moro leki gudu, biginen, nanga makti, dan dati kan meki taki osofamiri e broko, matifasi e pori, èn den sma disi no sa meki muiti moro fu doro marki na yeye fasi. Leki bakapisi fu dati, wan sma sa ondrofeni soso a sari sani fu san Yesus ben taki, namku: „Sortu bun a e du wan sma efu a abi heri grontapu, ma a e lasi en libi?” (Markus 8:36) Te wi abi koni, dan wi sa frustan taki wi musu gi yesi na a rai fu Yesus, di ben taki: „Fu dati ede, tan suku a kownukondre nanga En regtfardikifasi fosi, dan unu sa kisi ala den tra sani tu.”—Mateyus 6:33.
A no bun te wi e denki wisrefi nomo
13, 14. O ten yu kan taki dati wan sma e denki ensrefi nomo, èn fu san ede wi no musu de so?
13 Libisma lobi fu poti prakseri na den eigi afersi. Ma te wan sma en eigi lostu nanga en eigi afersi e tron den moro prenspari sani na ini en libi, dan dati sa tyari problema kon. Fu dati ede, Yehovah e taigi wi fu no denki wisrefi nomo, so taki wi kan tan abi wan bun banti nanga en. Te wan sma e denki ensrefi nomo, dan dati wani taki dati a sma e broko en ede soso nanga en eigi lostu, en eigi nowtu, noso en eigi afersi. Na ini a ten disi, wan lo sma de so, a no so? A moi fu si taki Bijbel e taki na fesi taki „na ini den lasti dei” fu Satan en ogri sistema, „sma sa lobi densrefi nomo”, noso den sa denki densrefi nomo.—2 Timoteyus 3:1, 2.
14 Kresten e frustan taki a de wan koni sani fu hori densrefi na a komando di Bijbel e gi fu poti prakseri na trawan, èn fu lobi den neleki fa wi lobi wisrefi (Lukas 10:27; Filipisma 2:4). Kande furu sma no feni a sani dati fanowdu, ma toku a de tumusi prenspari fu du dati efu wi wani abi wan bun trowlibi, wan koloku osofamiri-libi, èn sosrefi bun matifasi. Sobun, wan tru futuboi fu Yehovah noiti musu poti so furu prakseri na en eigi afersi, taki a no abi ten gi moro prenspari sani. Èn den sani di de moro prenspari leki ala tra sani, na den wroko di abi fu du nanga na anbegi fu en Gado, Yehovah.
15, 16. (a) San kan pasa te wan sma e denki ensrefi nomo, èn suma wi abi leki eksempre fu dati? (b) Fu taki en leti, san wan sma e du te a de gaw fu krutu trawan?
15 Te wan sma e denki ensrefi nomo, dan dati kan meki taki a e si ensrefi leki wan sma di no abi fowtu, èn a sani disi baka kan meki taki a e si sani na wán fasi nomo, noso a e prefuru fu du sani di a no abi a reti fu du. A e fiti taki Bijbel e taki: „Yu, awansi suma na yu, te yu e krutu trawan, yu no man taki dati yu no abi fowtu; bika te yu e krutu trawan, dan yu e krutu yusrefi, fu di yu di e krutu trawan, abi a gwenti fu du den srefi sani dati tu (Romesma 2:1; 14:4, 10). Den kerki fesiman na ini a ten fu Yesus ben kon de so seiker taki den de regtfardiki, taki den ben feni taki den abi a reti fu krutu Yesus èn den bakaman fu en. Fu di den kerki fesiman ben e du dati, meki den poti densrefi leki krutuman. Fu taki en leti, fu di den no ben e si den eigi fowtu, meki den ben tyari krutu kon na tapu densrefi.
16 Yudas, a bakaman fu Yesus di ben tori en, ben tron wan sma di e krutu trawan. Wan leisi na Betania, dan Maria, a sisa fu Lasarus, salfu Yesus nanga switismeri oli, ma Yudas no ben feni a sani dati bun srefisrefi. A meki sma kon sabi dati tu, fu di a krutu: „Fu san ede wi no seri a switismeri oli disi gi dri hondro denari, so taki wi ben kan gi a moni dati na den pôtisma?” Ma Bijbel e taki moro fara: „A no ben taki disi fu di a ben e broko en ede nanga den pôtisma, ma fu di a ben de wan fufuruman èn a monikisi ben de na en; a ben gwenti fu teki a moni di ben poti na ini a kisi” (Yohanes 12:1-6). Noiti wi musu kon de leki Yudas, noso leki den kerki fesiman di ben de gaw fu krutu trawan, bika a sani disi ben abi leki bakapisi taki densrefi kisi krutu.
17. Sori fu san ede a no bun te wan sma e denki tumusi furu fu ensrefi, noso te a e frutrow tumusi furu tapu ensrefi.
17 A de wan sari sani, taki aladi wan tu fu den fosi Kresten no ben de fufuruman leki Yudas, toku den kisi heimemre, èn den bigin denki tumusi furu fu densrefi. Yakobus ben skrifi fu den sma disi: „Unu lobi meki bigi fu di unu e denki tumusi furu fu unsrefi.” Ne a taki moro fara: „A meki di unu e meki bigi na so wan fasi, na wan ogri-ati sani” (Yakobus 4:16). Te wi e meki bigi fu den sani di wi du, noso fu den grani di a abi na ini Yehovah en diniwroko, dan sani no sa waka bun gi wi (Odo 14:16). Wi sabi ete san ben pasa nanga na apostel Petrus di a meki bigi fu di a ben e frutrow tumusi furu tapu ensrefi. Disi na san a ben taki: „Awansi ala den trawan o fadon fu den sani ede di o pasa nanga yu, toku mi no sa fadon noiti! . . . Awansi mi musu dede nanga yu, toku mi no sa taki kwetikweti dati mi no sabi yu.” Fu taki en leti, wi no abi nowan enkri reide fu meki bigi fu wisrefi. Ala san wi abi, na soso fu di Yehovah sori lobi bun-ati gi wi. Te wi e hori disi na prakseri, dan wi no sa denki tumusi furu fu wisrefi.—Mateyus 26:33-35, 69-75.
18. Fa Yehovah feni en te wan sma abi heimemre?
18 „Bigimemre e kon bifo wan sma fadon, èn wan yeye fu heimemre e kon bifo wan sma e naki futu fadon”, na so Bijbel e taki. Fu san ede dati de so? Yehovah e piki: „A hei di wan sma e hei ensrefi èn bigimemre . . . mi no lobi kwetikweti” (Odo 8:13; 16:18). Dati meki a no e fruwondru wi taki Yehovah ben atibron nanga ’a kownu fu Asiria fu di na ati fu en ben asranti, èn fu di den ai fu en di abi heimemre ben e meki bigi’! (Yesaya 10:12) Yehovah strafu en fu a sani dati. Heri esi a heri grontapu fu Satan, makandra nanga den tiriman di abi heimemre èn di e denki tumusi furu fu densrefi, sa kisi strafu tu, awansi na tiriman di sma man si noso di sma no man si. Noiti wi musu tranga-ede neleki den feanti fu Gado!
19. A pipel fu Gado e si en leki wan grani taki den na futuboi fu En, ma na a srefi ten den e tan abi sakafasi. Fu san ede dati de so?
19 Tru Kresten abi ala reide fu si en leki wan grani taki den na futuboi fu Yehovah (Yeremia 9:24). Ma na a srefi ten, den abi ala reide tu fu tan sori sakafasi. Fu san ede? Fu di „den alamala sondu èn den no e doro a glori fu Gado” (Romesma 3:23). Sobun, fu sorgu taki wi no e lasi a grani di wi abi fu de wan futuboi fu Yehovah, dan wi musu abi a denki fu na apostel Paulus di ben taki dati „Krestes Yesus kon na grontapu fu frulusu sondari”, èn baka dati a taki moro fara: „Mi na a moro bigiwan fu den.”—1 Timoteyus 1:15.
20. Fa Yehovah e kibri a pipel fu en na ini a ten disi, èn fa a sa kibri den na ini a ten di e kon?
20 A pipel fu Yehovah de klariklari fu skoifi den eigi afersi go na wan sei, so taki den kan poti den afersi fu Gado na a fosi presi na ini den libi. Dati meki wi kan de seiker taki Yehovah sa tan kibri den na yeye fasi. Wi kan de seiker tu taki te a bigi banawtu kon, dan Yehovah no sa kibri a pipel fu en na yeye fasi wawan, ma na skin fasi sosrefi. Te den sa go na ini a nyun grontapu fu Gado, den sa man bari: „Luku! Disi na wi Gado. Wi howpu na en tapu, èn a sa frulusu wi. Disi na Yehovah. Wi howpu tapu en. Meki wi prisiri èn breiti nanga a frulusu di e kon fu en.”—Yesaya 25:9.
Yu e memre disi ete?
• Fa Kownu David nanga Yesus Krestes kisi kibri?
• Fa a pipel fu Yehovah e kisi kibri na ini a ten disi?
• Fu san ede wi no musu denki tumusi furu fu wisrefi?
• Sortu grani wi abi, ma fu san ede wi musu tan abi sakafasi?
[Aksi fu a tori disi]
[Prenki na tapu bladzijde 9]
Fa Yehovah kibri David nanga Yesus?
[Prenki na tapu bladzijde 10, 11]
Na sortu fasi a pipel fu Gado e kisi kibri na yeye fasi na ini a ten disi?
[Prenki na tapu bladzijde 12]
Aladi wi e si en leki wan grani taki wi e dini Yehovah, toku wi musu tan abi sakafasi ala ten