Yu e taki nanga den lobiwan fu yu?

„WAN sani di e kon moro krin dei fu dei, na taki wi no abi bun takimakandra nanga den lobiwan fu wi”, na so na alawiki tijdschrift Polityka fu Polen taki. Soleki fa sma e denki, dan trowpatna na ini Amerkankondre e taki nanga makandra fu seryusu sani, soso siksi miniti wan dei. Son sabiman e denki taki afu fu den sma di prati-libi èn di brokotrow, na sma di no ben e taki nofo nanga a patna fu den.

Fa a de nanga takimakandra na mindri papa nanga mama èn den pikin fu den? A srefi tijdschrift e sori taki nofo tron den takimakandra disi, ’a no fu taki nanga den pikin, ma na soso fu aksi den pikin sani soleki: Fa a ben de na skoro? Fa a de nanga den mati fu yu?’ „Ma fa den pikin fu wi kan leri fu abi bun matifasi nanga trawan dan?”, na so a tijdschrift e aksi.

Fu man abi bun takimakandra nanga tra sma, a no wan sani di e kon fu ensrefi. Sobun, fa wi kan leri fu abi bun takimakandra nanga trawan? A Kresten disipel Yakobus gi wi wan prenspari rai: „Ibri sma musu de esi fu yere, ma a no musu de esi fu taki, èn a no musu atibron esi” (Yakobus 1:19). Iya, fu man abi bun takimakandra nanga trawan, wi musu arki nanga pasensi san a trawan abi fu taki, wi no musu koti en mofo ibri tron baka, èn wi no musu krutu en bifo wi yere ala san a abi fu taki. No go suku fowtu na a sma, bika dati kan pori a heri takimakandra makriki. Boiti dati, Yesus ben gebroiki aksi di e sori taki a ben e broko en ede nanga trawan; a no ben poti aksi soso fu kon sabi sani nomo. A ben sabi fa fu kon sabi san de na ini na ati fu a sma di ben e arki en, èn a ben sabi fa fu tranga a banti di a ben abi nanga den sma.​—Odo 20:5; Mateyus 16:13-17; 17:24-27.

Den gronprakseri na ini Bijbel e leri yu fa yu kan bigin nanga wan takimakandra èn fa yu musu taki nanga den lobiwan fu yu. Disi kan meki taki furu yari langa unu sa de trutru mati fu makandra, èn kande disi sa de so unu heri libi langa srefi.