A preikiwroko e gro na ini wan kondre pe a Kresten bribi fu fositen ben e go na fesi

ITALIAKONDRE, a pisi kondre di gersi wan buta èn di bigi go te na a Mindrikondre Se, ben de wan presi pe kerki nanga kulturu ben abi krakti tapu a historia fu grontapu. A kondre e hari milyunmilyun sma di lobi koiri, fu di a abi difrenti sortu moi kontren, a abi moi sani di sma meki nanga den anu, èn a abi sosrefi switi nyanyan. Disi na sosrefi wan kondre pe furu sma e kisi leri fu Bijbel.

Den Dyu nanga sma di ben teki a Dyu bribi ben tron Kresten na a Pinksterfesa fu 33 G.T. èn den ben go baka na Rome, baka di den ben go na Yerusalem. A kan taki na a ten dati a tru Kresten bribi ben doro Rome, a mamafoto fu a grontapumakti fu a ten dati. Na wan sani fu 59 G.T., na apostel Paulus ben fisiti Italiakondre gi a fosi leisi. Na ini Puteoli, wan foto na a syoro fu a se, a „feni brada” di ben de na bribi.​—Tori fu den Apostel 2:5-11; 28:11-16.

Soleki fa Yesus nanga den apostel ben taki na fesi, dan bifo a kaba fu a fosi yarihondro G.T., den sma di fadon komoto na bribi, safrisafri ben gowe libi a tru Kresten bribi. Ma bifo a kaba fu na ogri seti fu sani disi, tru disipel fu Yesus ben teki fesi fu preiki a bun nyunsu na heri grontapu, sosrefi na ini Italiakondre.​—Mateyus 13:36-43; Tori fu den Apostel 20:29, 30; 2 Tesalonikasma 2:3-8; 2 Petrus 2:1-3.

Sani no ben waka so bun na ini a bigin

Na ini a yari 1891, Charles Taze Russell di ben teki fesi na ini a preikiwroko di den Bijbel Ondrosukuman (soleki fa sma ben kari Yehovah Kotoigi na a ten dati) ben du na heri grontapu, ben fisiti wan tu foto fu Italiakondre gi a fosi leisi. A ben musu erken taki den bakapisi fu a diniwroko di a ben du drape, no ben bun srefisrefi. A ben taki: „Wi no si nowan sani di ben kan gi wi a deki-ati fu bribi taki wi sa man meki disipel na ini Italiakondre.” Na ini a lente fu 1910, Brada Russell go baka na Italiakondre èn a ben hori wan Bijbel lezing na ini wan sportskoro na ini a foto Rome. San ben de a bakapisi? A fruteri taki „ala nanga ala, a konmakandra ben meki wi firi lasi-ati srefisrefi.”

Fu taki en leti, na ini a bigin a preikiwroko fu a bun nyunsu no ben go na fesi na ini Italiakondre; wan reide ben de fu di den ogri-ati tiriman di ben de Fascist-sma, ben frufolgu den Kotoigi fu Yehovah. Na ini a pisi ten dati, no moro leki 150 Kotoigi fu Yehovah ben de na ini a kondre, èn a moro bigi pisi fu den ben leri a Bijbel waarheid fu famiri, noso fu mati di ben libi na ini tra kondre.

A wroko e gro na wan tumusi moi fasi

Baka a di fu Tu Grontapufeti, wan tu zendeling ben seni go na Italiakondre. Ma soleki fa den lantibuku e sori, dan den heihei man na ini a Vaticaan ben aksi lanti fu yagi den zendeling gowe fu a kondre. A no ala zendeling den ben seni gowe fu a kondre.

Aladi den problema disi ben de, toku ipi-ipi sma bigin lon go na „a bergi” fu Yehovah fu  anbegi en (Yesaya 2:2-4). A nomru fu Kotoigi ben gro na wan tumusi moi fasi. Na ini 2004 wan heimarki fu 233.527 preikiman fu a bun nyunsu ben de; dati na 1 preikiman fu ibri 248 sma na ini a kondre, èn 433.242 sma ben fisiti a Memrefesa fu a dede fu Krestes. Yu ben abi 3049 gemeente fu Yehovah Kotoigi di ben kon makandra na ini moi Kownukondre zaal. No so langa pasa, son grupu fu sma na ini a kondre ben gro trutru.

Preiki na ini furu tongo

Furu sma di froisi gowe fu Afrika, Asia, nanga Owstu-Europa ben kon na Italiakondre fu feni wroko noso fu feni wan moro bun libi, èn sonwan fu den ben wani lowe fu a takru situwâsi pe den ben de na ini. Fa den milyunmilyun sma disi ben kan kisi yepi na yeye fasi?

Furu Kotoigi na ini Italiakondre teki a tyalensi fu leri wan tu muilek tongo soleki Albaneisitongo, Amhareisitongo, Arabiatongo, Bengalitongo, Sneisitongo, Punyabitongo, Singaleisitongo, nanga Tagalogtongo. Na ini a yari 2001, den Kotoigi di ben wani, ben leri fa fu gi kotoigi na ini tra tongo. Na ini den dri yari di pasa, 3711 Kotoigi ben teki 79 les di ben gi na ini 17 difrenti tongo. Disi ben meki taki 146 gemeente ben meki èn ben kon tranga, èn taki 274 grupu ben meki na ini 25 difrenti tongo. Na a fasi disi furu opregti sma yere a bun nyunsu èn den bigin studeri Bijbel. Furu tron den bakapisi de tumusi moi.

Wan Kotoigi fu Yehovah ben taki fu Bijbel nanga George, wan man di ben komoto fu India èn di ben taki Malayalamtongo. Aladi George ben abi bigi problema fu feni wroko, toku a teki wan bijbelstudie nanga prisiri. Wan tu dei na baka, George en mati, Gil, di kon fu India èn di e taki Punyabitongo, ben go na a Kownukondre zaal, èn den Kotoigi bigin studeri Bijbel nanga en. Gil tyari David, wan man fu India di e taki Telugutongo, go na den Kotoigi. Syatu baka dati, David bigin studeri Bijbel tu. Tu tra sma fu India, Sonny nanga Shubash, ben e tan na ini a srefi oso leki David. Den ala tu ben de na a bijbelstudie sosrefi.

Wan tu wiki na baka, Dalip, wan man di e taki Maratitongo, ben bel den Kotoigi. A taki: „Mi na wan mati fu George. Grantangi, yu kan yepi mi fu kon leri sabi Bijbel?” Sosrefi Sumit, wan man di e taki Tamiltongo, ben wani studeri. Bakaten, wan tra mati fu George ben bel èn a ben aksi fu studeri Bijbel. Dan George tyari wan tra yonguman, Max, kon na a Kownukondre zaal. En tu ben aksi fu studeri Bijbel. Te nanga now, siksi bijbelstudie e hori, èn sani e seti fu hori ete fo bijbelstudie. Den studie e hori na ini Ingrisitongo, ma den e gebroiki buku tu na ini Hinditongo, Malayalamtongo, Maratitongo, Punyabitongo, Tamiltongo, Telugutongo, nanga Urdutongo.

Den dofuwan „e yere” a bun nyunsu

Moro leki 90.000 dofusma de na ini Italiakondre. Na mindri den yari 1970 nanga 1980, den Kotoigi bigin poti prakseri fu leri dofusma a waarheid fu Bijbel. Na ini a bigin, wan tu dofu Kotoigi ben leri a Dofusma-tongo fu Italiakondre na tra Kotoigi di ben wani preiki gi sma di dofu. Baka dati, moro nanga moro dofusma ben wani sabi moro fu Bijbel. Na ini a ten disi, moro leki 1400 sma di e gebroiki a Dofusma-tongo fu Italiakondre, e fisiti den Kresten konmakandra. Tinafeifi gemeente nanga 52 grupu e hori den konmakandra na ini a Dofusma-tongo fu Italiakondre.

Na ini a bigin, na wanwan Kotoigi ben bigin  du wan sani fu preiki gi den dofusma. Ma na ini a yari 1978, a bijkantoro fu Yehovah Kotoigi na ini Italiakondre bigin orga kongres gi den dofusma. Na ini mei fu a yari dati, a ben meki bekènti taki na a internationaal kongres di ben o hori na ini Milaan, wan programa ben o de tu gi den dofusma. A fosi kring konmakandra gi den dofusma ben hori na a Kringhal na ini Milaan, na ini februari 1979.

Sensi a ten dati, a bijkantoro ben du muiti fu gi yeye nyanyan na den dofusma, fu di den ben e gi moro nanga moro preikiman a deki-ati fu kon leri sabi a tongo disi moro bun. Fu sensi 1995, den seni spesrutu pionier (furuten preikiman) go na wan tu grupu fu leri den dofu Kotoigi fa fu du a diniwroko èn fa fu orga Kresten konmakandra. Dri kongreshal abi den moro nyun video apparaat so taki sma kan si a programa moro bun. Kresten publikâsi de sosrefi na tapu videocassette fu gi den dofusma yeye nyanyan.

Sma di e luku den Kotoigi kon si taki den e sorgu bun gi den sani di dofusma abi fanowdu na yeyefasi. P@role & Segni, wan tijdschrift di na Italian Deaf Society tyari kon na doro, ben taki san wan Lomsu fesiman ben skrifi na ini wan brifi: „A de wan muilek sani te wan sma dofu, fu di doronomo dofusma abi yepi fanowdu. Fu eksempre, na wan makriki fasi a e doro na a kerki en wawan, ma a abi yepi fanowdu fu wan sma di e vertaal so taki a kan sabi san sma e leisi, e fruklari, noso e singi te kerki e hori.” A tijdschrift e taki moro fara taki a fesiman fu kerki „e taki dati a de wan sari sani taki a kerki no sreka sani ete fu yepi den sma di dofu, èn a e taki dati furu dofusma e kisi moro bun yepi na ini den Kownukondre zaal fu Yehovah Kotoigi, leki na ini den kerki”.

Strafuman e yere a bun nyunsu

Wan sma kan de fri, aladi a de na strafu-oso? Iya, bika a Wortu fu Gado abi a krakti fu „fri” den sma di e bribi na ini Bijbel èn di e du san  Bijbel e taki. A boskopu di Yesus ben preiki gi „den strafuman” ben de taki den ben o kon fri fu sondu èn fu falsi anbegi (Yohanes 8:32; Lukas 4:16-19). Den Kotoigi abi moi bakapisi na ini Italiakondre fu di den e preiki na ini strafu-oso. Pikinmoro 400 Kotoigi fu Yehovah kisi primisi fu lanti fu fisiti den strafuman so taki den kan yepi den na yeye fasi. Yehovah Kotoigi na a fosi organisâsi di no de Lomsu, di aksi fu go na den strafuman èn di kisi a primisi tu.

A Bijbel boskopu kan panya na wan fasi di wi no ben prakseri. Strafuman e taki nanga tra strafuman, fu a Bijbel leriwroko fu Yehovah Kotoigi. A bakapisi ben de taki wan tu fu den strafuman dati ben aksi taki wan Kotoigi kon fisiti den. Noso famiriman di bigin studeri Bijbel e gi den strafuman a deki-ati fu aksi den Kotoigi meki den kon fisiti den. Wan tu strafuman di musu sidon na strafu den heri libi langa fu di den kiri wan sma, noso fu di den du wan tra seryusu ogri, ben kisi berow èn den ben drai den libi trutru. Disi e meki taki den kan gi den libi abra na Yehovah Gado èn teki dopu.

Na ini furu strafu-oso, sani ben seti fu hori publikitaki di abi fu du nanga Bijbel, noso fu hori a Memrefesa fu a dede fu Yesus, èn fu sori video di e gi Bijbel leri. Yehovah Kotoigi meki den video disi. Nofo tron wan bigi grupu strafuman e fisiti den konmakandra disi.

Fu yepi den strafuman na ini den aladei libi, dan den Kotoigi prati furu tijdschrift di e taki fu tori di sa yepi den strafuman. Wan fu den tijdschrift ben de na Ontwaakt! fu 8 mei 2001, di ben taki fu a tori „Zijn gevangenen te veranderen?” („Strafuman kan kenki den libi?”) A tijdschrift fu 8 april 2003 ben taki fu a tori Drugs in het gezin—Wat kunt u doen?” („Drugs na ini yu osofamiri—San yu kan du?”) Den ben prati dusundusun fu a tijdschrift disi gi den strafuman. A bakapisi de taki den Kotoigi abi wan tu hondro bijbelstudie. Wan tu waktiman fu den strafu-oso ben wani sabi moro tu fu a Bijbel boskopu.

Baka di den tiriman ben gi spesrutu primisi, dan wan strafuman di nen Costantino ben dopu na ini wan Kownukondre zaal na ini San Remo, èn 138 Kotoigi fu a presi ben de drape. „Den sma ben sori mi kefalek furu lobi”, na so Costantino ben taki di a dopu, èn yu ben kan si taki a ben naki en ati trutru. Wan koranti fu a presi drape ben skrifi san wan waktiman fu a strafu-oso ben taki: „Nanga furu prisiri . . . wi ben gi a primisi disi. Wi musu du ala san wi man fu meki wan strafuman kon bun baka na ini a libimakandra, taki a kan kenki en eigi libi, èn taki a kan kon bun baka na yeye fasi.” A ben naki na ati fu a wefi nanga na umapikin fu Costantino fu si fa a soifri sabi fu Bijbel ben abi krakti tapu a libi fu Costantino. Den taki: „Wi e prisiri nanga en fu di a kenki en libi. A tron wan sma di lobi vrede, èn a e broko en ede nanga wi moro nanga moro. Wi e frutrow en baka èn wi e lespeki en baka.” Den srefi bigin studeri Bijbel èn bigin go na den Kresten konmakandra.

Sergio di ben fufuru nanga gon, di ben smokkel drugs, èn di ben kiri sma, ben kisi wan strafu fu sidon na strafu-oso teleki a yari 2024. Baka di a studeri Bijbel dri yari langa èn a drai en libi, dan a teki a bosroiti fu teki dopu. En na a di fu tinafeifi strafuman di teki dopu fu tron wan Kotoigi fu Yehovah, na a Porto Azzurro strafu-oso, na a Elba-èilanti. Nanga tra strafuman di ben de drape, a ben teki dopu na wan presi di sma poti spesrutu gi na okasi disi na a preigron fu a strafu-oso.

 Leonardo, di kisi wan strafu fu 20 yari, ben kisi spesrutu primisi fu teki dopu na ini wan Kownukondre zaal na ini Parma. Di wan koranti fu a kontren ben poti aksi gi Leonardo, dan Leonardo taki dati sma „musu sabi taki a teki a bosroiti fu tron wan Kotoigi fu Yehovah, no fu di a wani komoto na strafu-oso, ma fu di a ben abi wan prenspari sani fanowdu na yeye fasi.” Leonardo ben taki: „Mi meki wan lo fowtu na ini mi libi, ma mi gowe libi ala den sani dati. Mi drai mi libi, ma mi no du dati wantronso. Mi sa abi fu tan de opregti.”

Salvatore di ben kisi strafu fu di a ben kiri sma, de na ini a Spoleto strafu-oso pe den waktiman e luku den strafuman moro fini leki na tra strafu-oso. A ben dopu na ini a strafu-oso, èn dati ben naki na ati fu furu sma. A waktiman fu a strafu-oso ben taki: „Wi musu meki sma si o prenspari a de gi a libimakandra te wan sma teki a bosroiti fu tyari ensrefi na wan moro bun fasi, bika a abi wini gi a strafu-oso èn gi a heri libimakandra.” Salvatore ben kenki en libi èn dati ben abi leki bakapisi taki en wefi nanga wan umapikin fu en e fisiti den konmakandra fu Yehovah Kotoigi now. Wan strafuman gi suma Salvatore ben preiki, ben teki dopu èn ben tron wan futuboi fu Yehovah di gi en libi abra na En.

A fosi Kresten bribi ben gro tu na ini Italiakondre (Tori fu den Apostel 2:10; Romesma 1:7). Na ini a ten disi pe a kotiwroko e du, a bun nyunsu e tan gro na ini den srefi kontren pe Paulus makandra nanga den tra Kresten brada nanga sisa fu en ben wroko tranga fu preiki a bun nyunsu.​—Tori fu den Apostel 23:11; 28:14-16.

[Karta tapu bladzijde 13]

(Efu yu wani si pe den sani disi skrifi, luku a tijdschrift)

ITALIAKONDRE

Rome

[Prenki na tapu bladzijde 15]

A Bitonto kongreshal nanga wan gemeente fu Dofusma-tongo fu Italiakondre, na ini Rome

[Prenki na tapu bladzijde 16]

A waarheid fu Bijbel ’e fri’ strafuman

[Prenki na tapu bladzijde 17]

A preikiwroko e tan gro na ini wan kondre pe a Kresten bribi fu fositen ben e go na fesi