Den e prèise Yehovah na skoro

NA HERI grontapu, yongu Kotoigi fu Yehovah e feni okasi fu prèise Gado na skoro. Den e du dati nanga den sani di den e taki èn nanga a fasi fa den e tyari densrefi. Luku wan tu ondrofenitori di e sori taki den yonguwan disi de fayafaya trutru.

Wan yongu Kotoigi na ini Grikikondre ben musu skrifi wan tori di abi fu du nanga a pori di a loktu fu a grontapu e pori. Baka di a go luku na ini na Index van Wachttoren-publikaties, dan a feni wan tu moi tori na ini a tijdschrift Ontwaakt! Di a kaba skrifi, dan a taki dati a ben teki den tori puru fu a tijdschrift Ontwaakt! En skoromisi taigi en taki disi ben de wan fu den moro bun tori di a leisi oiti. Bakaten a skoromisi gebroiki den tori disi na wan konmakandra, èn a ben abi bun bakapisi. Dati meki a yongu sisa bosroiti fu gi a skoromisi moro Ontwaakt!, sosrefi a wan di e taki fu a tori „Onderwijzers—Wat zouden we zonder hen beginnen?” („Fa wi ben o du efu skoromisi nanga skoromeester no ben o de?) Bakaten a skoromisi ben taki bun fu a tijdschrift Ontwaakt! na ini a klas, èn wan tu tra studenti ben wani den tijdschrift tu. A sisa ben musu tyari den tijdschrift kon na skoro so taki den studenti ben kan leisi den.

Na ini Benin, Afrika, wan tini Kresten ben kisi wan tesi di no e miti furu yonguwan. Soleki fa a gwenti ben de, dan den papa nanga mama fu wan tu studenti na tapu a skoro fu a yongu sisa, ben kon makandra fu suku leriman fu yepi den pikin fu den fu frustan den muilek sani di den ben e kisi na skoro, so taki den ben kan de srekasreka gi den examen di den ben o kisi. Ma den leriman ben teki satra mamanten fu gi den pikin leri. A yongu Kotoigi no ben wani dati, èn a ben taki: „Satra mamanten na a ten te a heri gemeente e go preiki makandra. A de a moro prisiri ten na ini a wiki gi mi, èn mi no wani du no wan tra sani tapu a ten dati!” En papa di de en wawan èn di de wan Kotoigi tu ben agri, èn a ben pruberi fu meki wan grupu papa nanga mama nanga den leriman kenki a dei. Ma nowan fu den ben wani. A yongu meisje teki a bosroiti fu no teki a les. Na presi fu dati, a go preiki nanga en gemeente. Den tra skoropikin spotu en, èn den taigi en fu tapu nanga a preikiwroko èn fu no dini en Gado moro. Den ben de seiker taki a Kotoigi no ben o man pasa na examen. Ma na presi fu dati, a grupu skoropikin di ben kisi a les no ben pasa na examen, aladi wi yongu sisa pasa na examen na wan bun fasi. A no de fu taki dati den no ben spotu en moro. Now den studenti e taigi en: „Yu musu tan dini yu Gado.”

Na ini a Tyekia Republiek, wan meisje di abi 12 yari ben musu sreka ensrefi fu fruteri wan sani fu wan buku di a leisi. En mama gi en a deki-ati fu gebroiki a buku A moro bigi man di oiti ben libi. A ben bigin a takimakandra fu en nanga den aksi disi: „San yu e denki? Suma na a moro bigi man di oiti ben libi?” A ben fruteri suma na Yesus, a ben taki fu a libi fu en na grontapu, èn den sani di Yesus ben leri sma. Dan a taki fu a kapitel di nen „A e leri den foe gi sma pardon”. En skoromisi taki: „Disi na a moro bun takimakandra di mi yere fu yu!” Nanga prisiri a skoromisi teki wan fu a buku disi. Wan tu fu den tra studenti ben wani a buku tu. A dei na baka, a meisje ben prisiri srefisrefi fu prati 18 buku.

Den sortu yonguwan disi e prisiri trutru fu prèise Yehovah na skoro. Wi alamala musu pruberi fu de fayafaya tu, neleki den yonguwan disi.