„Den frufolgu en fu di a ben abi bribi”

DEN sma na ini a foto Cernobbio di de na a noordsei fu Italiakondre ben teki wan pisi fu wan presi pe sma e go koiri, èn drape den meki wan sani fu memre den sma di lasi den libi fu di trawan di no ben span nanga den reti fu libisma, ben handri nanga den na wan ogri-ati fasi. Wan fu den plakati di sma anga na a presi disi, abi a nen fu Narciso Riet na tapu. Riet ben gebore na ini Doisrikondre. En papa nanga mama na Italiasma, èn a ben tron wan Kotoigi fu Yehovah na a pisi ten baka 1930. Na a pisi ten di Hitler ben e tiri, Yehovah Kotoigi kisi frufolgu fu di den ben weigri fu si Hitler moro prenspari leki a tru Gado, Yehovah.

Di den Gestapo ben kon sabi taki Riet ben e tyari A Waktitoren go na ini den strafuman-kampu, dan a lowe go na Cernobbio. Drape den brada aksi en fu vertaal A Waktitoren na ini Italiatongo èn fu prati a tijdschrift disi gi tra bribiman na ini a birti. Ma sma ben kon si a tranga wroko di a ben e du. Wan SS ofsiri nanga den man fu en broko kon na ini na oso fu Riet, den grabu en, èn den teki den buweisi di den ben wani gebroiki fu sori taki a „du wan ogri”, namku tu Bijbel nanga wan tu brifi! Den seni Riet go na Doisrikondre, den poti en na ini a strafuman kampu fu Dachau, èn den kiri en syatu bifo a kaba fu a di fu Tu Grontapufeti. Den ben „frufolgu en fu di a ben abi bribi”, na so a plakati na ini Cernobbio e taki.

A bribi fu Narciso Riet nanga furu tra Kotoigi di den Nazi ben frufolgu, na wan deki-ati gi den Kresten na ini a ten disi fu tan getrow na Yehovah, di de a wan-enkri Sma na ini hemel èn na grontapu di wi musu anbegi (Openbaring 4:11). Yesus ben taki: „Koloku fu den sma di kisi frufolgu fu di den regtfardiki.” Gado sa memre den sani di den du èn a sa blesi den fu di den ben abi deki-ati.​—Mateyus 5:10; Hebrewsma 6:10.