Filo fu Aleksandria—A moksi Bijbel tori nanga en eigi denki

NA INI 332 b.G.T., Aleksander a Bigiwan hari go na ini Egepte nanga a legre fu en. Ma bifo Aleksander hari go na owstusei di a ben e suku fu teki grontapu abra, dan a bow wan foto na ini Egepte, èn a kari a foto dati Aleksandria. A foto dati ben tron a moro prenspari foto fu a Griki kulturu. Na wan pisi ten fu 20 b.G.T., wan tra man gebore drape. A man disi ben wani teki sani abra tu, ma na wan tra sortu fasi. A no ben e gebroiki feti-owru nanga lansri, ma a ben e gebroiki libisma filosofia, noso libisma denki. Sma sabi a man disi leki Filo fu Aleksandria, noso leki Filo Judaeus, fu di a ben de wan Dyu.

A froisi di someni Dyu froisi go na tra kondre, baka di Yerusalem kisi pori na ini 607 b.G.T., ben abi leki bakapisi taki furu Dyu lowe go libi na Egepte. Dusundusun fu den ben e libi na ini Aleksandria. Ma problema ben de na mindri den Dyu, nanga den Grikisma. Den Dyu ben e weigri fu anbegi den Griki gado, èn den Grikisma ben e spotu den Hebrew Buku fu Bijbel. Filo ben kisi leri fu den Grikisma, aladi a ben kweki leki wan Dyu. Dati meki a ben sabi taki problema ben de na mindri den tu grupu disi. A ben e bribi taki a Dyu bribi ben de a tru anbegi. Ma tra fasi leki furu sma na ini a ten dati, Filo ben e suku wan fasi fu yepi sma di no ben de Dyu fu go dini Gado; a ben wani du dati sondro fu tyari dyugudyugu. A ben wani fu meki den sma kon si a Dyu bribi leki wan bun bribi.

A fruklari owru tori na wan nyun fasi

Furu fu den Dyu na ini Aleksandria ben e taki Grikitongo, èn so a ben de tu nanga Filo. Sobun, te a ben e stuka, dan a ben e gebroiki a Griki Septuaginta-vertaling fu den Hebrew Buku fu Bijbel. O moro a ben e ondrosuku den tekst na ini a Septuaginta-vertaling, o moro a ben e feni taki den sani di Moses ben skrifi, ben abi fu du sosrefi nanga filosofia èn taki Moses srefi ben de „wan kefalek bun filosofiaman”.

Hondrohondro yari na fesi kaba, den Griki koniman no ben wani bribi taki den tori fu den gado nanga den umagado fu den, ben de sani di pasa trutru. Den fositen gado tori disi fu den Grikisma ben abi fu du nanga bigi langa man èn nanga ogri yeye. Dati meki den ben bigin suku tra fasi fu fruklari den owru tori dati. James Drummond na wan sabiman di e ondrosuku sani di sma ben skrifi na ini a ten fu den Grikisma nanga den sma fu Rome. Luku san a taki fu a fasi fa den sma disi ben e fruklari sani: „A filosofiaman ben e go suku fu puru moro dipi sani na ini den anansitori fu den gado fu en, èn a ben e pruberi fu sori san den skrifiman fu den anansitori disi ben wani tyari kon na krin nanga den tori disi di ben lai ogri-ati sani èn tra sani sosrefi di sma no man frustan. A ben e suku fu sori tu fa den skrifiman ben wani gebroiki den boskopu disi di e wroko tapu den firi fu sma, fu fruteri den wan tu prenspari tru tori.” A sani disi na san sma e kari allegorie (a suku di sma e suku fu puru moro na ini wan tori leki san skrifi na tapu papira). Filo gebroiki a srefi sistema disi fu fruklari den Buku fu Bijbel.

Prakseri Genesis 3:22 leki eksempre, soleki fa a skrifi na ini a Bagster’s Septuaginta-vertaling, pe skrifi: „Masra Gado ben meki gi Adam nanga en wefi, krosi fu skin buba, èn a weri dati gi den.” Den Grikisma ben feni taki a Moro Hei Gado no ben o  lagi ensrefi trutru fu meki krosi gi sma. Sobun Filo taki dati a pisi tori na ini a tekst dati ben e prenki wan sani. A ben taki: „A krosi fu skin buba e prenki a trutru skin, dati wani taki, wi libisma skin; bika na a fosi presi, di Gado meki a sani di wi e kari frustan, dan a kari a sani dati Adam; baka dati a meki wan sani di ben meki taki a frustan man taki èn buweigi, èn a kari a sani dati Libi. Leki di fu dri sani, dan fu di a ben kon de fanowdu, a ben meki wan skin tu, èn dati na a sani di, na wan agersi fasi, a ben kon kari a krosi fu skin buba.” Na so fasi Filo pruberi fu meki a sani di Gado du fu meki krosi gi Adam nanga Eva, kon gersi wan sortu filosofia tori di yu musu go sidon denki dipi fu dati, fosi yu man frustan en.

Prakseri tu san skrifi na Genesis 2:10-14 pe wi e leisi fu den watra fonten di ben de na ini a dyari fu Eden èn fu den fo liba di ben e lon pasa na ini a dyari. Filo pruberi fu sori taki den wortu disi wani taki moro leki san yu e leisi nomo, èn a suku fu sori sortu dipi sani de fu feni na ini a tori disi di e sori fa a dyari fu Eden ben de. Baka di a taki pikinso fa a dyari ben de, a taki moro fara: „A kan taki a pisi tori disi abi fu du nanga wan moro dipi tori sosrefi; bika den fo liba na den marki fu fo prenspari fasi.” A ben feni taki Pisonliba ben e prenki a koni di wan sma abi fu man si sani krin, taki Gihonliba ben e prenki seryusu fasi, taki Tigrisliba ben e prenki deki-ati, èn taki na Eufraatliba ben abi fu du nanga retidu. Na so fasi den dipi tori fu en ben teki a presi fu san Genesis e taki fu a dyari fu Eden.

Na wan srefi sortu fasi Filo pruberi fu fruklari a heri pisi tori di e taki fu a ten di Gado meki sani, a tori fu Kain di ben kiri Abel, a tori fu a Frudu na ini  a ten fu Noa, a bruya di Gado ben bruya sma tongo na Babel, èn furu difrenti gronprakseri fu a Wet fu Moses. Soleki fa na eksempre na ini a paragraaf na fesi e sori, dan Filo ben sori furu tron taki a ben e frustan bun san a leisi na ini a bijbeltekst, ma dan baka dati a ben e suku fu sori taki a tekst ben abi fu du nanga wan tra moro dipi tori tu, fu di a ben e taki: „Ma kande den wortu disi abi fu du nanga wan moro dipi tori.” A de wan sari sani fu si fa den sani di Filo skrifi e poti so furu krakti tapu den dipi tori di ensrefi suku fu puru na ini den Buku fu Bijbel, taki den makriki tori di de na ini Bijbel, kon tron dangra tori di sma no man frustan so krin.

Suma na Gado?

Filo ben gebroiki wan kefalek hebi agersitori fu sori taki Gado de trutru. Baka di a taki fosi fu a doti fu grontapu, den liba, den planeiti, nanga den stari, dan a taki te fu kaba: „A grontapu meki na wan tumusi moi èn koni fasi, moro moi leki ala sani di meki wan ten; a gersi neleki a sma di meki en, na wan sma di sabi furu sani èn wan sma di sabi sani na wan volmaakti fasi. Na a fasi dati wi kon si pikinso taki Gado de trutru.” Den sani disi di Filo ben taki ben de tru.​—Romesma 1:20.

Ma di Filo bigin taki moro fini fu a fasi fa na Almakti Gado de, dan a bigin taki sani di no tru kwetikweti. Filo ben feni taki Gado a no wan sma di „abi spesrutu fasi” èn taki A de wan sma di yu „no sa man frustan noiti”. Filo ben feni tu, taki sma no abi fu du muiti fu kon sabi Gado; a ben taki dati a de wan don sani efu wan sma ben „o pruberi fu kon sabi moro fu Gado fu di den ben sa wani ondrosuku suma na Gado èn san na den spesrutu fasi fu en”. A denki disi no de fu feni na ini Bijbel, ma a de wan denki di kon fu Plato, wan heiden filosofiaman.

Filo ben taki dati, fu kon frustan Gado na wan sani di muilek so te, taki wi no sa man kari en na en nen kwetikweti. Filo ben taki: „Dati meki, wi kan frustan fu san ede sma no man feni wan nen di fiti fu gi a sma di de a libi Gado trutru.” Disi no de so kwetikweti!

Bijbel e sori krin taki Gado abi wan nen. Psalm 83:18 e taki: „Yu, di nen na Yehovah, yu wawan na a Moro Heiwan fu heri grontapu.” Na ini Yesaya 42:8 wi e leisi dati Gado ben taki: „Mi na Yehovah. Dati na mi nen.” Fu san ede meki Filo, wan Dyu di ben sabi den bijbeltekst disi, ben e leri sma taki Gado no abi wan nen? We, disi ben de fu di a no ben e taki fu a Gado fu Bijbel, wan Gado di abi firi, ma fu wan gado fu a Griki filosofia, wan gado di no abi nen èn di no e gi sma pasi fu taki nanga en.

San na a sili?

Filo ben e leri sma taki a sili de aparti fu a skin. A ben e taki dati libisma „meki fu skin nanga sili”. Ma a sili na wan sani di man dede dan? We, luku san Filo e fruklari: „Te wi de na libi dan wi skin de na libi, ma a sili fu wi dede èn a beri na ini wi skin, neleki na ini wan ston grebi. Ma efu a [skin] ben sa dede, dan a sili ben o kisi na okasi fu libi a libi di a musu libi, fu di a ben o kon fri fu na ogri èn dede skin na ini san a de.” Filo ben sori taki a dede fu a sili ben de na wan agersi fasi, fu di noiti a sili e dede trutru. Soleki fa en ben e si en, dan a sili no man dede kwetikweti.

Ma dan san Bijbel e leri wi fu a sili trutru? Genesis 2:7 e taki: „Yehovah Gado teki doti fu a gron, a meki libisma èn a bro a libibro na ini en noso-olo, èn libisma ben tron wan libi sili.” Soleki fa Bijbel e sori, dan libisma no abi wan sili, na presi fu dati, densrefi na sili.

Bijbel e leri wi sosrefi taki a sili a no wan sani di no man dede kwetikweti. Esekièl 18:4 e taki: „A sili di e sondu, ensrefi sa dede.” Den tekst disi e sori wi dati a no fowtu fu taki: Wan libisma na wan sili. Sobun te wan libisma e dede, dan na wan sili e dede.​—Genesis 19:19. *

Baka di Filo dede, dan den Dyu no poti so furu prakseri moro na den tori fu en. Ma Krestenhèit teki den leri fu en abra. Eusebius, makandra nanga tra kerki fesiman fu en ten, ben e bribi taki Filo ben drai en libi èn ben kon tron wan Kresten. Hièronimus ben skrifi taki Filo na wan fu den Kerki Tata. Fu taki en leti, a no den Dyu, ma den Kresten di ben fadon komoto na bribi kibri den sani di Filo ben skrifi.

 Den sani di Filo ben skrifi, tyari bigi kenki kon na ini kerki. Den tori fu en ben meki taki den sokari Kresten bigin bribi na ini a leri fu a sili di no man dede, aladi a leri dati no de fu feni na ini Bijbel. So a de tu taki den sani di Filo ben e leri sma fu a Logos (noso, a Wortu) ben meki taki sma kon nanga a leri fu a Dri-wánfasi te fu kaba. Ma a leri disi di no de fu feni na ini Bijbel, bigin na Kresten di ben fadon komoto na bribi.

No meki sma kori yu

Te Filo ben e studeri den Hebrew Buku fu Bijbel, dan a ben e sorgu fu „no misi nowan fu den dipi tori di a ben e prakseri taki e kibri na ini den wortu di a ben e leisi”. Ma luku san Moses ben taki fu a Wet fu Gado na ini Deuteronomium 4:2: „Un no musu skrifi nowan sani moro leki san mi e komanderi unu, un no musu puru nowan sani fu en tu, so taki unu kan tan hori den komando fu Yehovah un Gado, soleki fa mi e komanderi unu.” A kan taki Filo ben abi bun sani na prakseri, ma toku den leri fu en ben e meki taki den krin leri fu Gado Wortu, Bijbel, ben tron sani di sma no ben man frustan moro, fu di a no ben de krin moro san den sani ben wani taki.

„Di wi meki unu kon sabi fu a krakti nanga a denoya fu wi Masra Yesus Krestes, dan wi no gebroiki leitori di wisrefi ben meki fu kori unu”, na so na apostel Petrus ben taki (2 Petrus 1:16). Den rai di Petrus ben gi den Kresten fu a fosi yarihondro gemeente, ben de tra fasi leki den sani di Filo ben skrifi, fu di Petrus ben leri den Kresten fa sani ben de trutru èn soleki fa a yeye fu Gado, „a yeye fu waarheid”, ben e tiri en; a yeye disi ben e tiri den brada fu kon sabi a waarheid bun.​—Yohanes 16:13.

Efu yu na wan sma di wani dini a Gado fu Bijbel, dan yu abi tiri fanowdu di yu kan frutrow; yu no kan wroko nanga san libisma e prakseri. Yu musu kon sabi soifri san na a wani fu Yehovah èn yu musu abi sakafasi fu kan de wan opregti studenti. Efu na so yu e prakseri te yu e studeri Bijbel, dan yu sa kon sabi ’den santa buku di kan meki yu kon koni, so taki yu kan kisi frulusu fu di yu e bribi na ini Krestes Yesus’. Yu sa si taki a Wortu fu Gado kan meki taki yu kon „bun dorodoro èn de srekasreka fu du ibri bun wroko”.​—2 Timoteyus 3:15-17.

[Futuwortu]

[Faki/​Prenki na tapu bladzijde 10]

A FOTO PE FILO BEN E LIBI

Filo ben e libi na ini Aleksandria, wan foto na ini Egepte, èn drape a ben e wroko tu. Hondrohondro yari langa a foto disi ben de a moro prenspari foto na grontapu pe yu ben kan feni ala sortu buku èn pe koniman ben e kon makandra fu taki fu difrenti dipi tori.

Studenti di ben e go na skoro na ini a foto dati, ben e kisi leri fu difrenti pôpi leriman. Na heri grontapu sma ben kon sabi a bibliotheek fu Aleksandria. A bibliotheek ben kon abi dusundusun buku, fu di den sma di ben e wroko drape ben e tan du muiti fu kisi kopi fu iniwan sani di sma ben e skrifi.

Bakaten, Aleksandria kon lasi a barinen di a ben abi na grontapu èn safrisafri sma no ben e poti so furu prakseri moro na ala den buku di ben de drape. Den Gran Kownu fu Rome ben bigin poti moro prakseri na den eigi foto, èn na so fasi Europa ben kon tron a moro prenspari kontren pe sma ben e go fu kisi leri èn fu du tra prenspari sani. Aleksandria lasi a glori fu en krinkrin di feanti teki a foto abra na ini a di fu seibi yarihondro G.T. Te nanga now historiaman e sari taki a barinen bibliotheek dati ben lasi gowe na a ten dati. Den feni taki na so fasi bun furu koni ben kon lasi, èn taki a ben o teki a libisma famiri wán dusun yari fu kon kisi a koni dati baka.

[Sma di abi a reti fu a prenki]

L. Chapons/Illustrirte Familien-Bibel nach der deutschen Uebersetzung Dr. Martin Luthers

[Faki na tapu bladzijde 12]

DIPI TORI NA INI A TEN DISI

Son leisi sma e gebroiki wan sani di wi sabi, noso wan anansitori fu poti wi prakseri na wan moro dipi tori di abi fu du nanga a libi. Leki fa den sma disi e taki, dan den tori disi abi fu du nanga ala sortu agersi sani di e prenki moro prenspari tori di yu no man si wantewante. Furu kerki leriman na ini a ten disi de neleki Filo fu Aleksandria, fu di den e gebroiki den srefi sortu fruklari disi fu sori san Bijbel e taki.

Luku Genesis kapitel 1-11 pe wi e leisi fu a historia fu libisma, fu sensi a ten di Gado meki sani, teleki a ten di a panya libisma na heri grontapu di den ben wani bow a toren fu Babel. Prakseri san wan Lomsu Bijbel e taki fu a pisi tori disi: „Fu ben kan meki taki den Israelsma frustan den tori disi, di den ben musu kibri, dan den tori disi ben musu tyari kon na fesi nanga yepi fu sani di sma na ini a ten dati ben man frustan. Dati meki aladi den sani skrifi moi, toku wi musu man si krin san na den dipi tru tori di den e tyari kon na fesi” (The New American Bible). Na a fasi disi den wani sori taki wi no musu si den tori fu Genesis kapitel 1-11 leki sani di pasa trutru soleki fa den skrifi. Sobun, neleki fa krosi e tapu wan sma skin, na so den wortu di gebroiki na ini den kapitel disi e kibri san a pisi tori wani taki trutru.

Ma Yesus ben leri sma taki den fosi kapitel fu Genesis abi fu du nanga tori di pasa so trutru, soifri leki fa den skrifi (Mateyus 19:4-6; 24:37-39). Na apostel Paulus èn na apostel Petrus ben du a srefi tu (Tori fu den Apostel 17:24-26; 2 Petrus 2:5; 3:6, 7). Opregti bijbelstudenti no wani yere nowan sani di no e kruderi nanga den sani di skrifi na ini Gado Wortu.

[Prenki na tapu bladzijde 9]

A bigi toren fu Aleksandria

[Sma di abi a reti fu a prenki]

Archives Charmet/Bridgeman Art Library