Papa nanga mama, gi yu osofamiri san den abi fanowdu

„Efu wan sma no e sorgu den sma fu en, . . . dan a drai en baka gi a bribi.”​—1 TIMOTEYUS 5:8.

1, 2. (a) Fu san ede a e gi wi furu deki-ati fu si taki osofamiri e kon na den Kresten konmakandra? (b) San na wan tu tyalensi di osofamiri e miti te den wani go na den konmakandra biten?

TE YU e luku lontu na ini a Kresten gemeente bifo wan konmakandra e bigin, dan yu kan si fa pikin-nengre di krin èn di weri bun krosi, e go sidon na sei a papa nanga mama fu den. A no wan prisiri sani fu si a lobi di den osofamiri disi abi gi Yehovah èn sosrefi gi makandra? Ma a makriki fu frigiti omeni muiti wan osofamiri musu du fu doro biten na den konmakandra.

² Nofo tron a de so, taki heri dei papa nanga mama abi furu fu du, èn na den dei fu den konmakandra, a wroko na ini na osofamiri e kon moro furu srefi. A nyanyan musu sreka, sani musu du na ini na oso, èn den pikin musu klari a skorowroko fu den. Papa nanga mama e tyari a moro hebi lai, fu di den musu sorgu taki ala sma krin, taki den nyan, èn taki den de srekasreka biten. A no de fu taki dati te yu abi pikin, dan sani kan pasa di yu no ben fruwakti, èn nofo tron disi no e pasa na wan bun ten. A moro bigi boi e priti en bruku te a e prei. A moro yonguwan e morsu nanga en nyanyan. Den pikin e bigin meki trobi (Odo 22:15). San na a bakapisi? Srefi te papa nanga mama sreka ala sani bun na fesi, toku a kan taki sani no e go soleki fa den ben abi na prakseri. Ma toku a de so, taki pikinmoro ala ten na osofamiri de na ini a Kownukondre zaal wan moi pisi ten bifo a konmakandra o bigin. A e gi wi furu deki-ati fu si taki na osofamiri de drape ibri wiki baka, iya, ibri yari baka, aladi den pikin e gro kon bigi fu dini Yehovah!

3. Fa wi du sabi taki Yehovah e warderi osofamiri trutru?

³ Son leisi a muilek fu du a wroko di unu abi leki papa noso mama, iya, a e weri un skin srefi, ma unu kan de seiker taki Yehovah e warderi en trutru taki unu e du so furu muiti. Yehovah na a Sma di seti na osofamiri-libi. Fu dati ede en Wortu e taki dati ibri famiri kisi „a nen fu den” fu Yehovah, iya, na fu en ede meki den de (Efeisesma 3:14, 15). Sobun, te unu leki papa nanga mama e du muiti fu tyari un frantwortu na wan yoisti fasi na ini na osofamiri, dan unu e gi grani na a Moro Hei Masra fu hemel nanga grontapu (1 Korentesma 10:31). Disi na wan bigi grani, a no so? Sobun, a fiti fu go luku sortu wroko Yehovah gi papa nanga mama fu du. Na ini na artikel disi, wi o si san a wroko disi abi fu du nanga a fasi fa papa nanga mama musu sorgu gi na osofamiri. Kon meki wi go luku dri fasi fa Gado wani taki papa nanga mama musu sorgu gi na osofamiri.

Sorgu gi na osofamiri na materia sei

4. Sortu sani Yehovah seti na ini na osofamiri, so taki den pikin man kisi san den abi fanowdu?

⁴ Na apostel Paulus ben skrifi: „Fu tru, efu wan sma no e sorgu den sma fu en, spesrutu den sma fu en osofamiri, dan a drai en baka gi a bribi, èn a takru moro leki wan sma di no e bribi” (1 Timoteyus  5:8). Suma Paulus ben abi na prakseri di a ben taki dyaso fu „wan sma”? A ben abi na edeman fu na osofamiri na prakseri, èn nofo tron dati na a papa. Gado gi na uma wan lespeki wroko tu leki a yepiman fu en masra (Genesis 2:18). Nofo tron den umasma na ini Bijbel ten ben e yepi a masra fu den fu sorgu gi na osofamiri (Odo 31:13, 14, 16). Na ini a ten disi, moro nanga moro osofamiri de di abi soso a papa, noso soso a mama. * Furu Kresten papa noso mama di no abi wan patna, man sorgu heri bun gi na osofamiri fu den. A no de fu taki, dati a moro bun te wan osofamiri abi a papa èn sosrefi a mama, èn taki a papa e teki fesi.

5, 6. (a) San na wan tu fu den tyalensi di sma e miti te den e pruberi fu gi na osofamiri fu den san a abi fanowdu na materia sei? (b) Fa Kresten papa musu si grontapuwroko èn fa dati sa yepi den fu horidoro?

⁵ San Paulus ben abi na prakseri na ini 1 Timoteyus 5:8 di a ben taki dati wan sma musu sorgu na osofamiri fu en? Den tra vers e sori taki a ben taki krinkrin fu sani di na osofamiri abi fanowdu na materia sei. Na ini a ten disi, wan osofamiri edeman kan kisi fu du nanga furu problema te a wani sorgu gi en osofamiri na materia sei. Problema na ekonomia sei na wan aladei sani na heri grontapu; sma e lasi den wroko, furu sma no man feni wroko, èn a libi e kon diri dei fu dei. San kan yepi wan papa noso mama fu horidoro te a e kisi fu du nanga den sortu tyalensi disi?

⁶ Wan sma di musu sorgu gi en osofamiri musu hori na prakseri taki a e du wan wroko di Yehovah gi en fu du. Den wortu di Paulus ben skrifi nanga yepi fu santa yeye, e sori taki te wan sma man du san a komando disi e taki, ma a e weigri fu du en, dan a de a srefi leki wan sma di „drai en baka gi a bribi”. Wan Kresten sa du ala muiti fu no abi a nen dati na fesi en Gado. Ma a de wan sari sani taki furu sma na ini a ten disi ’no lobi tra sma’ (2 Timoteyus 3:1, 3). Wi sabi taki bun furu papa no wani teki a frantwortu fu den, èn den e gowe libi na osofamiri fu den sondro fu luku den na wan ai. Den sma disi no abi firi èn den no e si a sorgu di den musu sorgu gi na osofamiri fu den leki wan seryusu sani, ma nanga Kresten masra disi no de so. Kresten papa e si srefi a moro lagi wroko leki wan lespeki èn prenspari sani, aladi furu sma di e wroko makandra nanga den no e si en so. Kresten papa e si en leki wan fasi fa den kan plisi Yehovah Gado, fu di disi e gi den na okasi fu sorgu gi den lobiwan fu den.

7. Fu san ede a fiti te papa nanga mama e prakseri dipi fu Yesus eksempre?

⁷ Wan sani di kan yepi osofamiri edeman tu, na te den e prakseri dipi fu a tumusi bun eksempre fu Yesus. Memre taki wan Bijbel profeititori e kari Yesus wi „Têgo Tata” (Yesaya 9:6, 7). Yesus, „a lasti Adam”, teki a presi fu „a fosi libisma, Adam”, èn na so a de a papa fu den libisma di abi bribi (1 Korentesma 15:45). Adam ben de wan papa di ben e prakseri ensrefi nomo èn di ben e suku wini gi ensrefi wawan, ma nanga Yesus a de tra fasi, iya, en na a moro bun papa di wan sma kan abi. Bijbel e taki fu en: „Na so wi kon sabi san na lobi, bika a sma dati gi en libi fu a bun fu wi” (1 Yohanes 3:16). Iya, Yesus ben de klariklari fu gi en eigi libi fu a bun fu tra sma. Ma ibri dei a ben e du sani tu fu sori taki a ben feni den sani di tra sma ben abi fanowdu, moro prenspari leki san ensrefi ben abi fanowdu, awinsi den sani dati ben de pikinpikin sani. Papa nanga mama, a bun te unu e gi unsrefi neleki fa Yesus ben du dati.

8, 9. (a) San papa nanga mama kan leri fu fowru di e sorgu gi den pikin fu den sondro fu prakseri densrefi nomo? (b) Fa furu Kresten papa nanga mama e sori taki den no e prakseri den eigi bun nomo?

⁸ Te papa nanga mama e luku san Yesus ben taigi a tranga-ede pipel fu Gado, dan den kan leri furu fu san a wani taki fu lobi wan sma sondro fu prakseri yu eigi bun nomo. Yesus ben taigi a pipel: „Someni leisi mi ben wani tyari den pikin fu yu kon na makandra, neleki fa wan umafowru e tyari den pikin fu en kon na makandra na ondro den frei fu en!” (Mateyus 23:37) Na wan moi fasi, Yesus ben e fruteri dyaso fu wan mamafowru di e kibri den pikin fu en na ondro den frei fu en. Fu tru, papa nanga mama kan leri furu fu a koni fasi fa wan mamafowru e kibri den pikin fu en sondro taki wan sma leri en. A mamafowru de klariklari fu dede srefi, so taki noti no e pasa nanga den pikin fu en. Ma a moi fu si tu san fowru e du ibri  dei fu sorgu gi den pikin fu den. Doronomo den e frei go suku nyanyan, dan den e drai kon na a nesi baka. Awinsi den weri srefisrefi, toku den e poti a nyanyan na ini na opo mofo fu den pikin fu den di e swari a nyanyan, èn nofo tron den e bari fu kisi moro. Furu fu den meti di Yehovah meki ’abi wan koni di Gado poti na ini den’, soleki fa dati de fu si na a fasi fa den e sorgu gi den pikin fu den.​—Odo 30:24.

⁹ Na so wi kan taki tu dati Kresten papa nanga mama na heri grontapu e sori na wan heri moi fasi taki den e gi densrefi sondro fu prakseri den eigi bun nomo. Moro betre wan sani e pasa nanga unu, na presi fu wan sani pasa nanga den pikin fu unu. Ibri dei unu de klariklari tu fu du ala san unu man fu sorgu gi na osofamiri fu unu. Furu fu unu e opo frukufruku mamanten fu go na wan wroko di e weri un skin, noso di soi. Unu e wroko tranga fu sorgu gi nyanyan di bun gi unu. Unu e du muiti fu sorgu taki den pikin fu unu kan abi krin krosi, wan bun tanpresi, èn taki den kan kisi bun skoro. Unu e du disi ibri dei baka, iya, ibri yari baka. Fu di unu e gi unsrefi sondro fu prakseri un eigi bun èn e horidoro na so wan fasi, meki unu kan de seiker taki disi e plisi Yehovah! (Hebrewsma 13:16) Ma unu kan memre tu taki moro prenspari fasi de fa un musu sorgu gi un osofamiri.

Sorgu gi na osofamiri na yeye fasi

10, 11. San na a moro prenspari sani di libisma abi fanowdu, èn san Kresten papa nanga mama musu du fosi fu kan gi den pikin fu den san den abi fanowdu?

¹⁰ Wan sani di de moro prenspari srefi leki fu sorgu gi na osofamiri na materia sei, na fu sorgu gi den na yeye fasi. Yesus ben taki: „Sma no musu libi fu brede wawan, ma fu ibri wortu di Yehovah mofo taki” (Mateyus 4:4; 5:3). San unu leki papa nanga mama kan du fu sorgu gi na osofamiri na yeye fasi?

¹¹ Ibri leisi te a tori disi e taki, dan nowan tra tekst kari so furu leki Deuteronomium 6:5-7. Grantangi, opo un Bijbel èn leisi den vers disi. Luku taki papa nanga mama musu sorgu fosi taki densrefi e kon tranga na yeye fasi, fu di den e kon lobi Yehovah èn e du san a e taki. Iya, un musu de sma di e studeri Gado Wortu seryusu, un musu leisi Bijbel ibri dei èn prakseri dipi fu den sani di unu leisi. Na so fasi unu sa kon frustan den pasi, den gronprakseri, nanga den wet fu Yehovah krinkrin, èn unu sa kon lobi den sani disi tu. A bakapisi sa de taki un ati sa kon furu nanga den moi waarheid fu Bijbel di sa meki taki unu firi prisiri, èn taki unu kisi lespeki nanga lobi gi Yehovah. Soso bun sani unu sa abi fu leri den pikin fu unu.​—Lukas 6:45.

12. Fa papa nanga mama kan waka baka na eksempre fu Yesus te den wani poti den waarheid fu Bijbel go dipi na ini den pikin fu den?

¹² Papa nanga mama di tranga na yeye fasi, de srekasreka fu gi yesi na a rai na ini Deuteronomium 6:7, pe skrifi taki papa nanga mama musu gebroiki ibri okasi fu ’poti den  wortu fu Yehovah go dipi’ na ini den pikin fu den. Fu ’poti wan sani go dipi’ na ini wan sma, wani taki dati yu e leri a sma wan sani èn taki yu e yepi en fu memre a sani dati fu di yu e taki fu en ibri tron baka. Yehovah sabi heri bun taki wi alamala, èn pikin-nengre spesrutu, musu yere wan sani ibri tron baka fu man leri en. Fu dati ede, te Yesus ben e preiki, dan a ben gwenti fu taki sani moro leki wan leisi. Fu eksempre, te a ben e leri den disipel fu en taki den ben musu abi sakafasi, na presi taki den abi bigifasi èn e strei nanga makandra, dan na difrenti fasi a ben taki moro leki wán leisi fu a srefi gronprakseri. Te a ben e gi den leri, dan a ben taki-go-taki-kon nanga den, a ben gebroiki agersitori, èn ensrefi ben sori den fa fu du san den leri (Mateyus 18:1-4; 20:25-27; Yohanes 13:12-15). Ma a moi fu si taki noiti Yesus lasi en pasensi. Na so papa nanga mama musu feni fasi tu fu leri den pikin fu den san na den moro prenspari sani di abi fu du nanga a waarheid, èn nanga pasensi den musu taki ibri tron baka fu den gronprakseri fu Yehovah, teleki den pikin e frustan den bun èn e gebroiki den.

13, 14. San na wan tu okasi di papa nanga mama kan gebroiki fu poti a waarheid fu Bijbel go dipi na ini den pikin fu den, èn sortu buku noso tijdschrift den kan gebroiki fu du disi?

¹³ Osofamiri-studie na bun okasi fu gi den pikin a leri disi. Iya, te wan osofamiri e studeri Bijbel doronomo na wan fasi di e gi prisiri nanga deki-ati, dan dati sa yepi den fu tan tranga na yeye fasi. Kresten osofamiri na heri grontapu e prisiri fu studeri na a fasi disi. Na den okasi dati, den e gebroiki den buku noso tijdschrift di na organisâsi fu Yehovah e gi wi, èn den e fiti a studie na san den pikin abi fanowdu. A buku Teki leri fu a Bigi Leriman na wan heri moi presenti di yepi osofamiri fu du disi, èn na so a de tu nanga a buku Wat jonge mensen vragen — Praktische antwoorden (Yongu sma e aksi—Piki di e wroko). * Ma na osofamiri studie a no a wan-enkri okasi fu gi den pikin leri.

¹⁴ Soleki fa Deuteronomium 6:7 e sori, dan furu okasi de pe unu leki papa nanga mama kan taki fu yeye sani nanga den pikin fu unu. Awinsi unu de na pasi fu go na wan presi, noso unu e du osowroko makandra, noso unu e du prisiri sani nanga makandra, unu man feni okasi fu gi den pikin fu unu san den abi fanowdu na yeye fasi. A no de fu taki, dati un no musu takitaki tumusi na a yesi fu un pikin fu Bijbel waarheid. Ma pruberi fu taki nanga na osofamiri na wan fasi di e gi den deki-ati èn di e tranga den na yeye fasi. Fu eksempre, a tijdschrift Ontwaakt! abi furu artikel di e taki fu wan lo difrenti tori. Den artikel disi kan yepi unu fu taki fu den meti di Yehovah meki, den moi presi di de fu si na grontapu, den furu difrenti kulturu di libisma abi èn den difrenti fasi fa sma e libi. Den sortu takimakandra disi kan gi yongusma deki-ati fu go leisi moro na ini den buku di a getrow èn koni srafu gi wi.​—Mateyus 24:45-47.

15. Fa papa nanga mama kan yepi den pikin fu den fu si a Kresten diniwroko leki wan moi sani di kan gi den prisiri nanga furu blesi?

 ¹⁵ Te unu e taki nanga den pikin fu unu na wan fasi di e gi den deki-ati, dan dati sa yepi unu fu sorgu gi ete wan sani di den abi fanowdu na yeye fasi. Kresten pikin musu leri fu taki na wan bun fasi nanga tra sma fu a bribi fu den. Te unu e taki fu wan moi sani di unu leisi na ini A Waktitoren noso na Ontwaakt!, dan unu kan suku fasi fu sori den pikin fa den kan gebroiki disi na ini a preikiwroko. Fu eksempre, unu kan aksi: „A no ben o de wan moi sani efu moro sma ben sabi disi fu Yehovah? San yu denki wi musu du fu meki taki wan sma wani kon sabi moro fu a tori disi?” Den sortu takimakandra disi kan yepi yonguwan fu wani taki nanga trawan fu den sani di den e leri. Baka dati, te den pikin fu unu e go na ini a preikiwroko nanga unu, dan den sa man si nanga den eigi ai fa unu e fruteri tra sma den sani di yu nanga en ben e taki fu en. Den kan leri tu taki a preikiwroko na wan moi èn switi sani fu du, èn taki disi e gi wan sma furu prisiri.​—Tori fu den Apostel 20:35.

16. San pikin kan leri te den e arki den begi fu a papa nanga mama fu den?

¹⁶ Te papa nanga mama e begi, dan disi na ete wan fasi fa den kan gi den pikin fu den san den abi fanowdu na yeye fasi. Yesus ben leri den disipel fu en fa fu begi, èn na furu okasi a ben e begi nanga den (Lukas 11:1-13). Prakseri nomo omeni sani den ben leri te den ben e begi makandra nanga Yehovah en eigi Manpikin! Na so den pikin fu unu kan leri furu tu fu den begi fu unu. Fu eksempre, den kan leri taki Yehovah wani dati wi musu taki fri nanga en fu den sani di de tapu wi ati, èn dati wi kan taki nanga en fu iniwan problema di wi abi. Iya, den begi fu unu kan yepi den pikin fu unu fu leri wan tumusi prenspari tru tori, namku taki den kan abi wan banti nanga a hemel Tata fu den.​—1 Petrus 5:7.

Poti prakseri na den firi fu den pikin

17, 18. (a) Fa Bijbel e tyari kon na krin taki a de prenspari fu sori pikin-nengre taki unu lobi den? (b) Fa papa musu teki na eksempre fu Yehovah te den wani sori den pikin fu den taki den lobi den?

¹⁷ A no de fu taki dati pikin-nengre sosrefi e feti nanga den firi fu den. Gado Wortu e sori papa nanga mama o prenspari a de fu poti prakseri na a sani disi. Fu eksempre, yongu uma e kisi deki-ati „fu lobi den pikin fu den”. Disi abi fu du nanga yongu mama di ben musu leri san na a frantwortu fu den, noso di ben musu de „bun na den frustan” (Titus 2:4). Iya, a de wan koni sani fu sori wan pikin taki unu lobi en. Disi e leri wan pikin fu lobi trawan tu, èn en heri libi langa a sa tyari wini kon gi en. Na a tra sei, a de wan don sani fu no sori wan pikin taki unu lobi en. Te wan sma no e sori lobi gi wan pikin, dan disi e hati den firi fu a pikin trutru, èn so wan sma no e waka baka Yehovah di e sori wi bun furu lobi awinsi wi abi fowtu.​—Psalm 103:8-14.

¹⁸ Yehovah fosi sori taki a lobi den pikin fu en na grontapu. Soleki fa 1 Yohanes 4:19 e taki, dan „Gado fosi ben lobi wi”. Unu leki papa spesrutu, musu waka baka na eksempre fu Yehovah fu di unu fosi musu du muiti fu kon abi wan tranga banti nanga den pikin fu unu. Bijbel e gi papa deki-ati fu no tanteri den pikin fu den, „so taki den no lasi-ati” (Kolosesma 3:21). Wan fu den sani di e tanteri pikin-nengre srefisrefi, na te den e denki taki a papa noso a mama fu den no lobi den, noso taki a papa noso a mama e si den leki soso sani. Papa di no e sori den firi fu den so makriki musu hori na prakseri sortu eksempre Yehovah gi. Komoto fu hemel srefi, Yehovah ben e taki dati a feni en Manpikin bun èn taki a ben lobi en (Mateyus 3:17; 17:5). A sani disi ben musu fu gi Yesus deki-ati trutru! Na so a de tu taki te papa nanga mama e sori den pikin taki den lobi den èn taki den feni den bun, dan disi sa tranga den èn a sa gi den deki-ati.

19. Fu san ede a de prenspari fu strafu wan pikin te disi de fanowdu, èn fa Kresten papa nanga mama e suku fu du disi na a yoisti fasi?

 ¹⁹ A no de fu taki, dati a no soso nanga mofo wawan papa nanga mama musu sori den pikin fu den taki den lobi den. A moro bun fasi fa wan sma kan sori wan trawan taki a lobi en, de nanga den sani di a e du. Wan fasi fa papa nanga mama kan sori taki den lobi den pikin fu den, na te den e sorgu gi den na materia sei èn na yeye fasi, spesrutu te den e du disi na wan lobi-ati fasi. Boiti dati, te papa nanga mama e strafu den pikin fu den te disi de fanowdu, dan dati na wan prenspari fasi fa den e sori lobi. Iya, „Yehovah e strafu a sma di a lobi” (Hebrewsma 12:6). Na a tra sei, te wan papa noso mama no e strafu a pikin te disi de fanowdu, dan a papa noso a mama e sori taki a no lobi a pikin! (Odo 13:24) Yehovah sabi ala ten fa a musu strafu wan sma „na a yoisti fasi” (Yeremia 46:28). A no ala ten a de makriki gi onvolmaakti papa nanga mama fu sabi fa fu strafu den pikin na a yoisti fasi. Toku a sa tyari furu wini kon te unu e meki muiti fu kon sabi san na a yoisti fasi fu dati. Te papa nanga mama no e draidrai fu strafu wan pikin na wan lobi-ati fasi, dan dati sa yepi a pikin fu gro kon tron wan bigisma di sa firi koloku èn di sa abi bun bakapisi na ini a libi (Odo 22:6). A no dati ibri Kresten papa noso mama wani gi a pikin fu en?

20. San na a moro bun fasi fa papa nanga mama kan yepi den pikin fu „teki a libi”?

²⁰ Te unu leki papa nanga mama e du a prenspari wroko di Yehovah gi unu fu du, namku taki un musu sorgu gi un pikin na materia sei èn na yeye fasi, èn taki un musu poti prakseri na den firi fu den, dan unu sa kisi furu blesi. Na so fasi unu e yepi den pikin fu unu na a moro bun fasi fu „teki a libi”, san sa meki taki den abi na okasi fu „tan na libi” (Deuteronomium 30:19). Te den pikin e gro kon bigi èn den e teki a bosroiti fu dini Yehovah èn fu tan waka na tapu a pasi di sa tyari den go na libi, dan dati e prisiri na ati fu a papa nanga mama fu den (Psalm 127:3-5). Den sa tan prisiri fu dati fu ala ten! Ma fa yongusma kan prèise Yehovah nownow kaba? Na artikel di e kon now sa taki fu a tori dati.

[Futuwortu]

San yu ben sa piki?

San papa nanga mama kan du fu man sorgu gi den pikin fu den

• na materia sei?

• na yeye fasi?

• fu di den e poti prakseri na den firi fu den?

[Aksi fu a tori disi]

[Prenki na tapu bladzijde 18]

Furu fowru e wroko bun tranga fu sorgu gi den pikin fu den

[Prenki na tapu bladzijde 20]

Papa nanga mama musu sorgu fosi taki densrefi e kon tranga na yeye fasi

[Prenki na tapu bladzijde 20, 21]

Papa nanga mama kan feni furu okasi fu leri den pikin fu den fu a Mekiman fu den

[Prenki na tapu bladzijde 22]

Te papa nanga mama e sori taki den feni den pikin fu den bun, dan dati e tranga den pikin èn a e gi den deki-ati