Wi kan horidoro awinsi sortu tesi e miti wi!

YU E kisi wan tesi nownowde na ini yu libi? Yu e firi brokosaka fu di yu no man horidoro ondro a tesi? Yu e feni son leisi tu taki a problema fu yu na wan aparti problema èn taki wan lusu no de gi a problema? Efu dati de so, dan teki deki-ati! Awinsi sortu tesi wi e miti, Bijbel e gi wi a dyaranti taki Gado kan yepi wi fu kakafutu gi den.

Bijbel e taki dati den futuboi fu Gado o miti „difrenti tesi” (Yakobus 1:2). Poti prakseri na a wortu „difrenti” (na ini Grikitongo a de poi·kiʹlos). Soleki fa sma ben gebroiki a wortu na ini owruten, dan a Griki wortu wani taki „furu difrenti sortu”, noso „furu difrenti kloru”, èn a e poti krakti tapu „den difrenti sortu tesi” di de. Sobun, den „difrenti tesi” di wi e kisi, e kon na ini furu difrenti kloru, fu taki en so. Toku Yehovah e yepi wi so taki wi kan horidoro awinsi sortu tesi e miti wi. Fu san ede wi kan bribi dati?

’Gado e sori a no-frudini bun-ati fu en na difrenti fasi’

Na apostel Petrus e sori taki Kresten e sari fu di den e „kisi difrenti tesi” (1 Petrus 1:6). Na ini a brifi fu en di skrifi nanga yepi fu santa yeye, a e skrifi bakaten taki ’Gado e sori a no-frudini bun-ati fu en na difrenti fasi’ (1 Petrus 4:10). Den wortu „na difrenti fasi” teki fu a srefi Griki wortu poikilos, di wi ben kari na fesi. Sobun, a no-frudini bun-ati fu Gado abi difrenti kloru, fu taki en so. Wan sabiman fu Bijbel e taki fu den wortu disi, taki: „Disi na wan kefalek moi prakseri. . . . Te wi e taki dati a no-frudini bun-ati fu Gado abi difrenti kloru, noso taki Gado e sori en no-frudini bun-ati na difrenti fasi, dan dati wani taki dati awinsi sortu tesi wan libisma e kisi, a no-frudini bun-ati fu Gado kan meki wi horidoro na ondro a tesi dati.” A e taki moro fara: „Awinsi sortu problema wi abi, noso awinsi sortu nowtu sa miti wi, a no-frudini bun-ati fu Gado kan yepi wi nanga iniwan tesi na ini a libi. A wortu poikilos e memre wi taki Gado man du ala sani nanga a no-frudini bun-ati fu en; en no-frudini bun-ati bigi so te, taki a kan yepi wi fu horidoro na ini ala situwâsi.”

A no-frudini bun-ati fu Gado e yepi wi fu horidoro te tesi e miti wi

Soleki fa Petrus e sori, dan Gado e sori en no-frudini bun-ati nanga yepi fu den difrenti sma di de na ini a Kresten gemeente (1 Petrus 4:11). Ibri futuboi fu Gado abi yeye presenti, noso eigifasi, di a kan gebroiki fu gi deki-ati na den wan di e miti tesi (Romesma 12:6-8). Fu eksempre, son sma na ini a gemeente na kefalek bun leriman fu Bijbel. Den koni wortu di den e gebroiki e gi trawan deki-ati fu horidoro (Nehemia 8:1-4, 8, 12). Trawan na skapuman di e go na den oso fu den sma di abi yepi noso trowstu fanowdu. Na den sortu okasi dati, dan den e gi sma deki-ati èn ’den e trowstu sma’ (Kolosesma 2:2). Te den opziener e go luku den sma disi na oso fu tranga a bribi fu den, dan na so fasi den e gi presenti na yeye fasi (Yohanes 21:16). Tra sma na ini a gemeente abi a gwenti fu sori waran firi,  sari-ati, nanga lobi gi trawan, te den e handri nanga tra bribiman di e firi sari fu di den e kisi tesi (Tori fu den Apostel 4:36; Romesma 12:10; Kolosesma 3:10). Den lobi brada nanga sisa disi e sori taki den e frustan fa trawan e firi, èn den e yepi trawan trutru. Na so fasi Gado e sori a no-frudini bun-ati fu en na „difrenti fasi”, nanga yepi fu den brada nanga sisa disi.​—Odo 12:25; 17:17.

„A Gado fu ala trowstu”

Boiti dati, Yehovah e gi trowstu. En na „a Gado fu ala trowstu, di e trowstu wi na ini ala den banawtu fu wi” (2 Korentesma 1:3, 4). A koni di de fu feni na ini a Wortu fu Gado di skrifi nanga yepi fu en santa yeye, èn sosrefi a krakti di a santa yeye e gi, na prenspari fasi fa Yehovah e yepi wi te wi e begi en fu kisi yepi (Yesaya 30:18, 21; Lukas 11:13; Yohanes 14:16). A pramisi di na apostel Paulus ben du nanga yepi fu Gado en santa yeye, kan gi wi deki-ati. Paulus ben taki: „Gado de getrow, èn a no sa meki unu kisi tesi di hebi moro leki san unu man frudrage; ma te tesi miti unu, dan a sa tyari wan frulekti kon, so taki unu man horidoro.”​—1 Korentesma 10:13.

Iya, awinsi sortu tesi e miti wi, Gado sa yepi wi na difrenti fasi nanga en no-frudini bun-ati so taki wi man horidoro (Yakobus 1:17). Yehovah e gi den futuboi fu en yepi na a yoisti ten èn na wan fasi di fiti, awinsi o furu den tesi noso den tyalensi fu den de. A sani disi na wan buweisi nomo fa „Gado e sori en koni na furu difrenti fasi” (Efeisesma 3:10). Yu no e agri?

[Prenki na tapu bladzijde 31]

Yehovah e yepi wi fu horidoro te tesi e miti wi