Yongusma, un prèise Yehovah!
Yongusma, un prèise Yehovah!
„Prèise Yehovah komoto fu grontapu, . . . un yonkuman nanga un nyunwenke tu.”—PSALM 148:7, 12.
1, 2. (a) Sortu sani furu yongusma no mag du, soleki fa densrefi sabi heri bun? (b) Fu san ede yongusma no abi fu mandi taki a papa nanga mama fu den no e gi den primisi fu du ala san den wani?
NOFO TRON a de so, taki yongusma sabi heri bun san den mag du èn san den no mag du. Furu fu den man taigi yu wantewante omeni yari den musu abi fu man abra strati den wawan, noso fu mag tan na ai na neti te o lati, noso fu mag rèi wagi. Son leisi wan yongu sma kan feni taki te a e aksi wan sani di a wani trutru, dan nofo tron a e kisi a srefi sani fu yere: „Wakti teleki yu kon moro owru.”
2 Unu leki yongusma sabi taki un papa nanga mama feni taki a de wan koni sani fu no gi unu primisi gi ala sani, kande fu di den no wani taki wan sani e pasa nanga unu. Un musu fu sabi tu taki a e plisi Yehovah te unu e gi yesi na un papa nanga mama (Kolosesma 3:20). Ma unu abi a firi son leisi taki den sani disi e tapu unu fu go libi un eigi libi? A de so taki un no mag du nowan fu den prenspari sani teleki unu kon moro owru? Dati no de so kwetikweti! Na ini a ten disi, wan wroko e du di de moro prenspari leki iniwan grani di unu ben sa wani kisi kande. Yonguwan, unu kisi primisi fu du a wroko disi? We, unu no kisi primisi wawan fu du a wroko disi, ma unu e kisi a kari tu fu a Moro Hei Gado srefi fu du dati!
3. Gi sortu spesrutu grani Yehovah e gi yongusma wan kari, èn sortu aksi wi o go luku now?
3 Fu sortu wroko wi e taki? Luku san skrifi na ini a tekst di de na a bigin fu na artikel: „Prèise Yehovah komoto fu grontapu, . . . un yonkuman nanga un nyunwenke tu, un owru man makandra nanga den boi” (Psalm 148:7, 12). Iya, disi na a bigi grani di unu kan kisi: Unu kan prèise Yehovah. A de so taki yu leki yongusma breiti fu teki prati na a wroko dati? Furu yongusma breiti fu du disi. Kon meki wi go luku dri aksi di o sori wi fu san ede a bun fu abi a firi disi. A fosi aksi di wi o luku, na fu san ede yu musu prèise Yehovah? A di fu tu aksi, na fa yu man prèise en na wan bun fasi? A di fu dri aksi, na o ten a bun fu bigin nanga a wroko fu prèise Yehovah?
Fu san ede yu musu prèise Yehovah?
4, 5. (a) Na ini sortu moi situwâsi wi de, soleki fa Psalm 148 e sori? (b) Fa den sani di Gado meki èn di no man taki noso di no abi frustan, man prèise Yehovah?
4 Wan tumusi prenspari sani fu san ede wi musu prèise Yehovah, na fu di a de a Mekiman. Psalm 148 e yepi wi fu poti prakseri na a tru tori disi. Prakseri nomo fu disi: Efu yu ben sa waka go miti wan bigi grupu sma èn den alamala e singi wan moi singi di e naki yu ati, dan fa yu ben o firi? San yu ben o du efu yu ben sabi taki den sani di den e singi, de so trutru? San yu ben o du efu yu ben sabi taki den e singi fu prenspari sani di e gi unu prisiri nanga deki-ati? Unu ben o wani leri den wortu èn singi den tu? Furu fu wi ben o wani dati. We, Psalm 148 e sori taki yu de na ini wan srefi sortu situwâsi, ma a situwâsi disi moro moi srefi. A psalm dati e taki fu wan bun bigi ipi di e prèise Yehovah leki wán man. Ma te yu e leisi a psalm, dan yu o si wan tumusi aparti sani. San na dati?
5 Furu fu den sani na ini Psalm 148 di e prèise Yehovah, no man taki èn den no abi frustan. Fu eksempre, wi e leisi taki a son, a mun, den stari, snew, winti, den hei bergi nanga den pikin bergi e prèise Yehovah. Fa den sani disi di no abi libi, kan prèise Yehovah? (Vers 3, 8, 9) We, den e du dati na a srefi fasi fa den bon, den sani di e libi na ini a se, èn sosrefi den meti e du dati (Vers 7, 9, 10). Oiti yu si wan moi sondongo kaba? Yu luku go na loktu wan leisi kaba di a ben de furu mun èn a hemel ben lai nanga stari? Oiti yu lafu fu di yu ben e prisiri fu si fa meti ben e prei? Noso yu fruwondru di yu si kefalek moi bergi, busi, noso liba? We, efu dati de so, dan yu „yere” a singi di den sani disi e singi fu prèise Yehovah. Ala sani di Yehovah meki e memre wi taki a de na almakti Mekiman, èn taki nowan sma na hemel noso na grontapu abi so furu makti, someni koni, noso someni lobi.—Romesma 1:20; Openbaring 4:11.
6, 7. (a) Sortu libisani di abi frustan, e prèise Yehovah, soleki fa Psalm 148 e sori? (b) Fu san ede wi ben sa wani prèise Yehovah? Gi wan eksempre.
6 Psalm 148 e fruteri wi tu taki libisani di abi frustan, e prèise Yehovah. Na ini vers 2 wi e leisi taki Yehovah en „legre” na ini hemel, namku den engel, e prèise Gado. Na ini vers 11, heihei man di abi furu makti, soleki kownu nanga krutuman, e kisi a kari fu prèise Yehovah tu. Efu makti engel e prisiri fu prèise Yehovah, dan sortu libisma man taki nanga reti dati a hei tumusi fu prèise Yehovah? Now unu leki yongusma e kisi a kari na ini vers 12 nanga 13 fu prèise Yehovah tu. Yu ben sa wani du dati?
7 Luku wan agersitori. Kande yu abi wan bun mati di sabi du wan sani heri bun; kande a sabi wan sport bun, noso a man meki moi skedrei, noso a man meki poku noso singi heri bun. Yu ben o taki fu a mati disi nanga yu famiri noso nanga tra mati? Iya, yu ben o du dati seiker. We, te wi kon sabi ala sani di Yehovah du, dan dati kan naki wi ati tu. Fu eksempre, Psalm 19:1, 2 e taki dati den stari di lai na hemel, e meki taki sma ’musu fu taki’ wan sani. We, te wi fu wi sei e prakseri fu den tumusi moi sani di Yehovah du, dan wi no man hori wisrefi fu taki nanga trawan fu wi Gado.
8, 9. Fu san ede Yehovah wani taki wi musu prèise en?
8 Wan tra prenspari sani fu san ede wi musu prèise Yehovah, na fu di a wani taki wi e prèise en. Fu san ede? A de so taki libisma musu prèise en so taki a kan firi bun? Nôno. Na wi libisma abi trawan fanowdu fu prèise wi ten na ten, ma Yehovah hei moro wi (Yesaya 55:8). A no e tweifri na ensrefi, noso na den sani di a man du (Yesaya 45:5). Toku a wani taki wi musu prèise en èn a e prisiri te wi e du disi. Fu san ede? Kon meki wi go luku tu sani. A fosi sani, na taki Gado sabi taki wi abi fu prèise en. A meki wi na so wan fasi taki wi abi en fanowdu na yeye fasi, iya, taki wi wani anbegi en (Mateyus 5:3). Te wi e sori Yehovah taki wi abi en fanowdu, dan dati e prisiri en, neleki fa un papa nanga mama e prisiri te unu e nyan wan sani di den sabi taki a bun gi unu.—Yohanes 4:34.
9 Wan tra sani, na taki Yehovah sabi taki a de fanowdu fu tra sma yere taki wi e prèise en. Na apostel Paulus ben skrifi den wortu disi gi Timoteyus di ben yongu moro en, èn a ben taki: „Tan poti prakseri na yusrefi èn na a fasi fa yu e gi leri. Hori yusrefi na den sani disi, bika te yu du disi, dan yu sa frulusu yusrefi èn sosrefi den sma di e arki yu” (1 Timoteyus 4:16). Iya, te yu e leri tra sma fu Yehovah Gado èn yu e prèise en, dan den kan kon sabi Yehovah tu. Te den sabi en, dan dati kan meki den kisi frulusu fu têgo!—Yohanes 17:3.
10. Fu san ede wi wani prèise wi Gado?
10 Ete wan sani de fu san ede wi musu prèise Yehovah. Memre na eksempre fu yu mati di sabi du wan sani heri bun. Te yu e yere trawan e fruteri lei fu en, èn taki den e gi en porinen, dan yu sa wani du moro muiti fu prèise en, a no so? We, furu sma na grontapu e gi Yehovah porinen (Yohanes 8:44; Openbaring 12:9). Fu dati ede den sma di lobi en, wani fruteri trawan san tru fu en, iya, den wani sori taki den leitori di sma e fruteri fu en, no tru kwetikweti. Yu ben sa wani sori Yehovah tu taki yu lobi en èn taki yu e warderi en? Yu ben sa wani sori en sosrefi taki yu wani En leki yu Tiriman, na presi fu abi en bigi feanti Satan leki tiriman? Ala den sani disi yu kan du te yu e prèise Yehovah. Sobun, na aksi di e kon now na: fa yu kan prèise en.
Fa son yongusma ben prèise Yehovah
11. Sortu eksempre na ini Bijbel e sori wi taki yongusma man prèise Yehovah heri bun?
11 Bijbel e sori wi taki nofo tron yongusma man prèise Yehovah heri bun. Fu eksempre, wan leisi Siriasma ben teki wan meisje fu Israel tyari gowe. Di a meisje taki nanga na uma di ben e hori en leki srafu, dan sondro fu frede a fruteri fu Elisa, a profeiti fu Yehovah. Den sani di a meisje taki, meki taki wan wondru pasa èn taki a gi kotoigi na wan krakti fasi (2 Kownu 5:1-17). Di Yesus ben de wan pikin, dan en sosrefi ben gi kotoigi sondro fu frede. Sma ben abi na okasi fu skrifi fu someni sani di pasa na ini den yongu yari fu Yesus, ma Yehovah meki den skrifi wán fu den sani dati nomo na ini Bijbel. A sani disi abi fu du nanga a ten di Yesus ben de wan boi fu 12 yari; a ben abi a deki-ati fu poti aksi gi den kerki leriman na ini a tempel na Yerusalem. Den man disi ben fruwondru srefisrefi taki Yesus ben frustan so furu fu den pasi fu Yehovah.—Lukas 2:46-49.
12, 13. (a) San Yesus du na ini a tempel syatu bifo a dede, èn sortu krakti disi ben abi tapu den sma di ben de drape? (b) San Yesus ben feni fu a prèise di wan tu yongu boi prèise en?
12 Di Yesus gro kon bigi, dan a ben leri pikin-nengre tu taki den musu prèise Yehovah. Fu eksempre, wan tu dei fosi Yesus dede, a go na a tempel na ini Yerusalem. Bijbel e taki dati a du bigi „wondru” drape. A trowe sma go na dorosei fu di den ben e meki a santa presi dati kon tron wan presi pe soso fufuruman ben e tan. A ben e dresi brenisma nanga malengrisma tu. Yu ben sa fruwakti taki ala sma drape, spesrutu den kerki fesiman, ben sa wani prèise Yehovah nanga en Manpikin, a Mesias. Ma na wan sari sani taki furu fu den sma na ini a ten dati no ben e prèise Yehovah noso Yesus. Den ben sabi taki na Gado seni Yesus kon, ma den ben frede den kerki fesiman. Ma wan grupu ben de di no ben frede fu taki wan sani. Yu sabi suma na den? Bijbel e taki: „Di den edeman fu den priester nanga den leriman fu Wet si den wondru di [Yesus] ben du èn di den si taki den boi ben e bari na ini a tempel, taki: ’Grantangi, wi e begi yu, frulusu a Manpikin fu David!’, den atibron srefisrefi; dati meki den aksi [Yesus]: ’Yu e yere san den e taki?’”—Mateyus 21:15, 16; Yohanes 12:42.
13 Den priester disi ben howpu taki Yesus ben o taigi den boi di ben e prèise en, taki den ben musu hori den mofo. Na dati a du? Kwetikweti! Yesus piki den priester: „Iya. Noiti unu no leisi a sani disi: ’Yu meki pikin-nengre nanga pikin di de na bobi ete prèise yu nanga den mofo’?” A de krin taki Yesus nanga en Tata ben e prisiri di den yongu boi prèise den. Den pikin dati ben du san ala bigisma di ben de drape ben musu du. Aladi den ben yongu ete, toku den ben frustan krin san den ben musu du. Den si taki a man disi ben e du bigi wondru, taki a ben e taki nanga deki-ati èn nanga bribi, èn taki a ben lobi Gado nanga en pipel trutru. A ben de trutru a sma di a ben taki dati a de, namku a Mesias, a pramisi „Manpikin fu David”. Fu di den boi ben abi bribi, meki Gado blesi den, èn den ben kisi a grani srefi fu meki wan profeititori kon tru.—Psalm 8:2.
14. Sortu okasi yongusma abi fu prèise Gado nanga den moi sani di den man du?
14 San wi kan leri fu den eksempre disi? Wi kan leri taki yongusma man prèise Yehovah heri bun. Nofo tron den man si krin san tru èn san no tru, èn fu dati ede den e sori a bribi fu den na wan opregti fasi èn nanga faya. Den yongusma disi abi wan tra sani tu di e kon na krin na ini Odo 20:29. A tekst disi e taki: „A moi fu yongusma na a krakti di den abi.” Iya, unu leki yongusma tranga, unu abi krakti, èn dati na wan sani di unu kan gebroiki bun fu prèise Yehovah. Ma na sortu spesrutu fasi unu kan gebroiki un krakti bun?
Fa yu kan prèise Yehovah?
15. San de fanowdu efu wi wani prèise Yehovah na wan bun fasi?
15 Efu wi wani prèise Yehovah na wan bun fasi, dan wi musu du dati nanga wi heri ati. Yu no man prèise Yehovah bun efu yu e du en soso fu di trawan wani taki yu musu du en. Memre taki a moro bigiwan fu ala komando na a wan disi: „Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan” (Mateyus 22:37). A de so taki yu kon sabi Yehovah fu di yu studeri en Wortu? Te yu e leri san skrifi na ini Gado Wortu, dan a bakapisi ben sa musu de taki yu e kon lobi Yehovah. Te yu lobi en, dan yu sa wani fu prèise en. Te yu sabi krin fu san ede yu wani prèise Yehovah, dan yu de srekasreka fu du dati nanga yu heri ati.
16, 17. Sortu bakapisi a kan abi te wan sma di wani prèise Yehovah, e tyari ensrefi na wan bun fasi? Gi wan eksempre.
16 We, fosi wi e go luku san yu o taki, meki wi go luku fosi fa yu o tyari yusrefi. Efu a meisje fu Israel di ben e libi na ini a ten fu Elisa, ben abi a gwenti fu taki grofu nanga sma, fu no sori lespeki gi sma, noso fu bedrigi sma, dan yu denki taki den Siriasma di ben teki en tyari gowe, ben o arki san a fruteri den fu Yehovah en profeiti? Kande den no ben o du dati. Na so a de tu taki sma sa wani arki yu te den e si taki yu e sori lespeki gi trawan, taki yu de opregti, èn taki yu abi bun maniri (Romesma 2:21). Luku wan eksempre.
17 Sma na skoro ben wani dwengi wan meisje fu 11 yari di ben e libi na Potogisikondre fu teki prati na grontapu fesa, ma fu di a kisi leri fu Bijbel, meki en konsensi piki en fu no du dati. Na wan lespeki fasi a sori a skoromisi fu san ede a no ben man du so wan sani, ma a skoromisi bigin dreigi en. Wan heri pisi ten, a skoromisi ben e pruberi ibri tron baka fu meki a meisje firi syen, èn a ben e spotu nanga a bribi fu a meisje. Ma a yongu meisje ben tan sori lespeki. Baka wan tu yari, a yongu sisa dati tron wan gewoon pionier, noso wan furuten dinari. Na wan kongres a ben e luku fa sma ben e teki dopu, di a si wan sma di a sabi. A ben de na owru skoromisi fu en! Baka di den brasa makandra hori èn den krei, a moro owru uma taigi a yongu sisa taki a no frigiti noiti fa a sisa disi ben e tyari ensrefi na wan lespeki fasi. Wan Kotoigi ben kon na a skoromisi, èn a fruteri a Kotoigi fu a fasi fa wan meisje di ben de wan studenti fu en fosi, ben tyari ensrefi. A bakapisi ben de taki a Kotoigi ben kan bigin wan bijbelstudie, èn na uma disi kon bribi a waarheid fu Bijbel. Iya, a fasi fa yu e tyari yusrefi kan de wan tumusi krakti fasi fu prèise Yehovah!
18. San wan yongu sma kan du efu a frede fu bigin taki nanga sma fu Bijbel èn fu Yehovah Gado?
18 Yu abi muiti son leisi fu bigin taki nanga sma na yu skoro fu a bribi fu yu? A no yu wawan abi a firi disi. Ma yu kan du wan tu sani di kan meki taki trawan sa aksi yu fu a bribi fu yu. Fu eksempre, te lantiwet nanga a skoro fu yu e gi primisi fu du disi, dan fu san ede yu no e tyari buku di e taki fu Bijbel, go na skoro? Kande yu kan leisi den te yu abi pauze noso na tra okasi te a fiti fu du disi. Kande den pikin fu yu klas o aksi yu san yu e leisi. Te yu e piki den èn e fruteri den san yu feni moi na ini na artikel noso a buku di yu e leisi, dan fosi yu denki, yu kan abi wan moi takimakandra. No frigiti fu poti aksi, so taki yu kan kon sabi san den pikin fu yu skoro e bribi. Arki na wan lespeki fasi, aladi yu e fruteri den san yu leri na ini Bijbel. Soleki fa den ondrofenitori na tapu bladzijde 29 e sori, dan furu yongusma e prèise Gado na skoro. A sani disi e gi den prisiri srefisrefi, èn a e yepi furu sma fu kon sabi Yehovah.
19. San yongusma kan du fu abi moro bun bakapisi na ini na oso-fu-oso wroko?
19 Wan heri bun fasi fu prèise Yehovah na fu preiki oso fu oso. Efu yu no e preiki ete, dan fu san ede yu no e poti dati leki marki? Efu yu e du disi kaba, dan tra marki de di yu kan poti gi yusrefi? Fu eksempre, na presi fu taki a srefi sani ibri leisi baka na ibri oso, dan yu kan suku fasi fu preiki moro bun. Kande yu kan aksi yu papa nanga mama, noso tra sma di abi moro ondrofeni, fu gi yu rai. Leri fa fu gebroiki Bijbel moro furu, fa fu tyari bun gobaka, èn fa fu bigin wan bijbelstudie (1 Timoteyus 4:15). O moro yu e prèise Yehovah na den fasi disi, o moro bun yu sa man preiki, èn o moro yu sa prisiri nanga a preikiwroko fu yu.
O ten yu musu bigin fu prèise Yehovah?
20. Fu san ede yongusma no musu denki taki den yongu tumusi fu prèise Yehovah?
20 Fu den dri aksi di wi luku na ini a studie disi, a piki tapu a lastiwan na a moro makrikiwan. Luku a krin piki di Bijbel e gi: „Memre now yu Gran Mekiman na ini den dei fu yu yongu yari” (Preikiman 12:1). Iya, now na a ten fu bigin prèise Yehovah. A makriki fu taki: „Mi yongu tumusi fu prèise Yehovah. Mi no abi ondrofeni. Mi musu wakti teleki mi kon moro owru.” A no yu wawan e denki so. Fu eksempre, di Yeremia ben yongu, dan a taigi Yehovah: „Ke, o Moro Hei Masra Yehovah! Luku, mi no sabi kwetikweti fa mi musu taki, bika mi na wan boi ete.” Yehovah ben gi en a dyaranti taki a no ben abi fu frede (Yeremia 1:6, 7). Sosrefi, wi no abi fu frede te wi e prèise Yehovah. Nowan ogri kan miti wi, di Yehovah no man puru na wi tapu.—Psalm 118:6.
21, 22. Fu san ede Bijbel e teki yongusma di e prèise Yehovah, gersi nanga dowdropu, èn fu san ede a sani disi e gi sma deki-ati?
21 Fu dati ede, un yonguwan, wi e gi unu a deki-ati: No draidrai fu prèise Yehovah! Fu di unu yongu ete, meki now na a moro bun ten fu teki prati na a moro prenspari wroko di e du na grontapu na ini a ten disi. Te unu o du disi, dan unu o tron wan pisi fu wan tumusi moi sani. Iya, unu o tron wan pisi fu wan bigi famiri di e prèise Yehovah na ini hemel èn na grontapu. Yehovah e prisiri taki unu sosrefi de wan memre fu a famiri disi. Luku san a psalm skrifiman taigi Yehovah nanga yepi fu santa yeye: „Yu pipel sa de klariklari fu gi densrefi na tapu a dei te yu sa tyari yu srudati legre fu go feti. Na ini tumusi moi santafasi, na a bigin fu musudei, yu abi yu grupu yongu sma di de neleki dowdropu.”—Psalm 110:3.
22 Te dowdropu e brenki na mamanten te son e skèin na den tapu, dan den moi fu si, a no so? Den switi fu si, den e brenki moi, èn nofo tron wi no man teri den fu di den furu tumusi. Dati na fa Yehovah e si unu yonguwan di e prèise en na wan getrow fasi na ini den muilek ten disi. A de krin taki Yehovah e prisiri taki unu teki a bosroiti fu prèise en (Odo 27:11). Fu dati ede, un yonguwan, awansi san e pasa, un prèise Yehovah!
San yu ben sa piki?
• San na wan tu prenspari sani fu san ede wi musu prèise Yehovah?
• Sortu eksempre na ini Bijbel e sori wi taki yongusma man prèise Yehovah heri bun?
• Fa yongusma na ini a ten disi kan prèise Yehovah?
• O ten yongusma musu bigin prèise Yehovah, èn fu san ede?
[Aksi fu a tori disi]
[Prenki na tapu bladzijde 25]
Efu yu mati sabi du wan sani heri bun, dan yu no ben o fruteri trawan?
[Prenki na tapu bladzijde 27]
Kande pikin na yu skoro wani sabi moro fu a bribi fu yu
[Prenki na tapu bladzijde 28]
Efu yu wani preiki moro bun, dan yu kan aksi wan Kotoigi di abi moro ondrofeni fu gi yu rai