Bun nyunsu gi sma fu ala kondre

„Unu sa de kotoigi fu mi . . . te na den moro farawe presi fu grontapu.”​—TORI FU DEN APOSTEL 1:8.

1. Na sortu sani wi leki leriman fu Bijbel e poti prakseri, èn fu san ede?

BUN leriman no e luku nomo san den e taigi den studenti fu den, ma den e luku tu fa den e taki en. Wi leki leriman fu a waarheid fu Bijbel e du a srefi. Wi e hori na prakseri san na a boskopu di wi e preiki èn sosrefi na sortu fasi wi e du dati. A boskopu fu wi, namku a bun nyunsu fu Gado Kownukondre, no e kenki, ma te a de fanowdu, dan wi e kenki a fasi fa wi e preiki a boskopu disi. Fu san ede? Fu man feni someni sma leki a kan.

2. Na eksempre fu suma wi e teki te wi e fiti wisrefi na sma di wi e miti na ini a preikiwroko?

² Te wi e kenki a fasi fa wi e preiki fu di dati de fanowdu, dan wi e du a srefi sani di den futuboi fu Gado ben du na ini owruten. Fu eksempre, luku san na apostel Paulus ben e du. A ben taki: „Gi den Dyu mi kon de leki wan Dyu . . . Gi den sma di no abi wet, mi kon de leki wan sma di no abi wet . . . Gi den swakiwan mi kon de leki wan sma di swaki, so taki mi kan wini den swakiwan. Mi tron ala sani gi ala sortu sma, so taki mi kan du iniwan sani di de fanowdu fu frulusu awinsi wan tu sma nomo” (1 Korentesma 9:19-23). Paulus ben abi bun bakapisi fu di a ben fiti a fasi fa a ben e preiki, na san den sma ben abi fanowdu. Wi o abi bun bakapisi tu te wi e kenki a fasi fa wi e preiki, so taki wi kan fiti wisrefi na a sma gi suma wi e preiki.

Te „na den moro farawe presi fu grontapu”

3. (a) Nanga sortu tyalensi wi e kisi fu du te wi e du a preikiwroko fu wi? (b) Fa den wortu fu Yesaya 45:22 e kon tru na ini a ten disi?

³ Wan fu den moro bigi tyalensi di e miti den sma di e preiki a bun nyunsu, na taki den musu du dati na wan kontren di bigi srefisrefi, namku „na heri grontapu” (Mateyus 24:14). Na ini a yarihondro di pasa, furu futuboi fu Yehovah du muiti trutru fu go na tra kondre fu kan panya a bun nyunsu. San ben de a bakapisi? Na heri grontapu, a wroko bigin gro srefisrefi. Na a bigin fu a di fu 20 yarihondro, Yehovah Kotoigi ben e preiki na ini wan tu kondre nomo, ma nownowde den e preiki na ini 235 kondre! Fu tru, a Kownukondre nyunsu e meki bekènti srefi na „den moro farawe presi fu grontapu”.​—Yesaya 45:22.

4, 5. (a) Suma du bun furu fu panya a bun nyunsu? (b) San son bijkantoro taki fu den sma di e komoto fu tra kondre fu kon dini na ini a kontren fu den bijkantoro disi?

⁴ Fa a du kon taki a wroko e gro so esi? We, furu sani de di e meki taki disi e pasa. Zendeling go na a Waktitoren Bijbelskoro Gilead fu kisi leri, èn na ini den yari di pasa no so langa ete, moro leki 20.000 sma klari a Dinariskoro nanga bun bakapisi. Ala den sma disi du bun furu fu meki a wroko go na fesi. Furu tra Kotoigi du wan srefi sortu sani, fu di den pai den eigi moni fu froisi go na kondre pe moro Kownukondre preikiman de fanowdu. Den Kresten disi, man nanga uma, yonguwan nanga owruwan, du furu muiti, èn den wroko tranga fu preiki a Kownukondre boskopu na heri grontapu (Psalm 110:3; Romesma 10:18). Wi e warderi den srefisrefi. Luku san wan tu bijkantoro skrifi fu den sma di komoto fu tra kondre fu kon dini na ini kontren pe moro preikiman de fanowdu.

⁵ „Den lobi brada nanga sisa disi e teki fesi na ini a preikiwroko di e du na ini den farawe kontren, den e yepi fu seti nyun gemeente, èn den e yepi brada nanga sisa dyaso fu kon tranga na yeye fasi” (Ekwador). „Efu den hondrohondro brada nanga sisa fu tra kondre di e dini dyaso, ben musu gowe libi a kondre, dan den gemeente ben o kon swaki. A de wan blesi taki den de nanga wi” (Dominikan Republiek). „Furu fu den gemeente fu wi lai sisa. Son leisi sowan 70 procent fu den sma na ini a gemeente na sisa (Psalm 68:11). Moro furu fu den sisa no de so langa na ini a waarheid, ma pionier sisa di komoto fu tra kondre èn di no trow ete, e du furu fu yepi  den nyun sisa disi. Den sisa disi di komopo fu tra kondre na wan presenti gi wi trutru!” (Wan kondre na ini Owstu-Europa) Yu prakseri wan leisi kaba fu froisi go na ini wan tra kondre? *​—Tori fu den Apostel 16:9, 10.

’Tin man fu ala den tongo’

6. Fa Sakaria 8:23 e sori taki a ben o de wan tyalensi gi wi fu preiki gi sma di e taki difrenti tongo?

⁶ Ete wan bigi tyalensi na den furu difrenti tongo di sma e taki na grontapu. Gado Wortu ben taki na fesi: „Na ini a ten dati a sa de so, taki tin man fu ala den tongo di e taki na ini den kondre, fu tru o grabu hori a mofokanti fu a krosi fu wan man di de wan Dyu, èn den o taki: ’Wi wani go nanga unu, fu di wi yere taki Gado de nanga unu’” (Sakaria 8:23). A profeititori di e kon tru na ini a ten disi, e sori taki den tin man na a bigi ipi, soleki fa disi e kon na krin na ini a profeititori di skrifi na ini Openbaring 7:9. Ma luku taki a profeititori fu Sakaria e taki dati den „tin man” no ben o komoto nomo fu ala kondre, ma taki den ben o de ’fu ala tongo’ tu. Wi si taki a prenspari pisi disi fu a profeititori kon tru? Iya, fu tru.

7. Sortu tori e sori taki sma fu ’ala tongo’, e yere a bun nyunsu?

⁷ Luku wan tu tori. Feifitenti yari pasa, den buku nanga tijdschrift fu wi ben e tyari kon na doro na ini 90 tongo. Na ini a ten disi, a nomru dati pasa 400 kaba. „A getrow èn koni srafu” du ala san den ben man du fu meki buku gi ala sma, srefi gi den wan di e taki wan tongo di wan tu sma nomo e taki (Mateyus 24:45). Fu eksempre, nownowde buku di e tyari sani fu Bijbel kon na krin, de fu feni na ini Groenlandtongo (sowan 47.000 sma e taki a tongo disi), na ini Palawantongo (sowan 15.000 sma e taki a tongo disi), èn na ini Yaptongo (den wan di e taki a tongo disi no doro 7000 sma srefi).

„Wan bigi doro” opo di e gi sma nyun okasi

8, 9. Sortu sani pasa di meki taki „wan bigi doro” kon opo gi wi, èn san dusundusun Kotoigi du fu dati ede?

⁸ Ma na ini a ten disi, wi no abi fu go na tra kondre fu preiki a bun nyunsu gi sma di e taki ala sortu tongo. Na ini den yari di pasa, milyunmilyun sma go libi na tra kondre fu di sani e go moro bun drape na ekonomia sei, noso fu di den ben abi fu lowe komoto na ini den eigi kondre. Disi meki taki furu kontren de now pe furu trakondre sma e libi di e taki wan heri ipi tra tongo. Fu eksempre, na ini a foto Parijs na Fransikondre, sma e taki sowan 100 difrenti tongo. Na ini a foto Toronto na Kanada, den e taki sowan 125 tongo, èn na ini Londen na Ingrisikondre, den e taki moro leki 300 tra tongo! Fu di furu trakondre sma go libi na ini a kontren fu someni difrenti gemeente, meki „wan bigi doro” kon opo di e gi brada nanga sisa fu den gemeente dati nyun okasi fu preiki a bun nyunsu gi sma fu ala kondre.​—1 Korentesma 16:9.

⁹ Dusundusun Kotoigi go leri wan tra tongo fu man fiti densrefi na a tyalensi disi. Gi furu fu  den a no makriki fu leri wan tra tongo, ma toku den e si taki a muiti fu den no de fu soso fu di den e prisiri fu yepi trakondre sma di kon libi na ini a kondre fu den, noso fu yepi sma di ben abi fu lowe komoto na ini den eigi kondre. Na so fasi den sma disi kan leri a waarheid di de fu feni na ini Gado Wortu. Na ini wan fu den yari di no pasa so langa ete, sowan 40 procent fu ala den sma di teki dopu na den distrikt kongres na ini wan kondre na ini West-Europa, ben de sma fu tra kondre.

10. Fa yu gebroiki a buku di nen ’Bun nyunsu gi sma fu ala kondre’? (Luku a faki di nen „Wan tu moi sani di de fu feni na ini a pikin buku ’Bun nyunsu gi sma fu ala kondre’, na tapu bladzijde 26.)

¹⁰ A tru taki furu fu wi no abi na okasi fu leri wan tra tongo. Ma toku wi kan yepi trakondre sma di kon libi na ini a kondre fu wi, te wi e gebroiki a nyun buku di nen Goed nieuws voor mensen uit alle landen (Bun nyunsu gi sma fu ala kondre). * A pikin buku disi abi wan moi Bijbel boskopu di skrifi na ini furu difrenti tongo (Yohanes 4:37). Yu e gebroiki a pikin buku disi na ini a diniwroko?

Te sma no wani arki

11. Sortu tra tyalensi wi e kisi na ini son kontren?

¹¹ Dei fu dei, Satan e kisi moro makti tapu sma na grontapu, èn fu dati ede wi e kisi fu du nanga wan tra tyalensi, namku taki na ini son kontren furu sma no wani arki moro. A no de fu taki dati wi no e fruwondru fu disi fu di Yesus ben taki na fesi dati disi ben o pasa. Di Yesus fruteri san ben o pasa na ini a ten fu wi, dan a taki: „A lobi fu furu sma o kon kowru” (Mateyus 24:12). Iya, furu sma no e bribi moro na ini Gado èn den no abi lespeki moro gi Bijbel (2 Petrus 3:3, 4). Fu dati ede a de so taki, na son presi fu grontapu, wan tu sma nomo e tron nyun disipel fu Krestes. Ma dati no wani taki, dati den lobi Kresten brada nanga sisa fu wi di e preiki na wan getrow fasi na ini den kontren disi pe sma no wani arki, e wroko tranga fu soso (Hebrewsma 6:10). Fu san ede wi kan taki dati? Luku san e kon now.

12. San na tu sani di e sori wi fu san ede wi e preiki?

¹² Na Evangelie fu Mateyus e tyari tu prenspari sani kon na krin di e sori fu san ede wi e preiki. Wan fu den sani na taki wi e go ’na sma fu ala kondre fu meki den tron disipel’ (Mateyus 28:19). Wan tra sani na taki wi e preiki a Kownukondre boskopu fu „gi kotoigi” na sma (Mateyus 24:14, futuwortu). Ala tu sani di kari dyaso de prenspari, ma a lastiwan de tumusi prenspari. Fu san ede?

13, 14. (a) San na wan tumusi prenspari sani di abi fu du nanga a marki fu Krestes en denoya? (b) Sortu sani wi musu hori na prakseri, spesrutu te wi e preiki na ini kontren pe furu sma no wani arki?

¹³ A Bijbel skrifiman Mateyus skrifi taki den apostel ben aksi Yesus: „San o de a marki fu yu denoya èn fu a kaba fu a grontapu sistema disi?” (Mateyus 24:3) Yesus ben piki den taki den ben o si wan tumusi aparti marki, namku wan preikiwroko di ben o du na heri grontapu. A ben taki fu a wroko di wi ben o du fu meki sma tron disipel? Nôno. A taki: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati” (Mateyus 24:14). Na so fasi Yesus ben sori taki a Kownukondre preikiwroko srefi ben o de wan fu den tumusi prenspari marki.

¹⁴ Fu dati ede, te wi e preiki a bun nyunsu fu a  Kownukondre, dan wi musu hori na prakseri taki srefi efu wi no man yepi sma ala ten fu tron disipel, toku wi sabi taki wi ben man gi den „kotoigi”. A no abi trobi efu sma wani arki wi, den sabi san wi e du, èn na so fasi wi e meki a profeititori fu Yesus kon tru (Yesaya 52:7; Openbaring 14:6, 7). Jordy, wan yongu Kotoigi na ini West-Europa ben taki: „Mi e firi koloku trutru fu di mi sabi taki Yehovah e gebroiki mi fu meki Mateyus 24:14 kon tru” (2 Korentesma 2:15-17). Wi de seiker taki na so yu e firi tu.

Te sma e gens a boskopu fu wi

15. (a) Gi san Yesus ben warskow den bakaman fu en? (b) San e meki taki wi man preiki awansi sma e gens wi?

¹⁵ Wan tra tyalensi na taki sma kan gens a wroko di wi e du fu preiki a bun nyunsu fu a Kownukondre. Yesus ben warskow den bakaman fu en: „Na ini ala kondre den sma o teige unu fu mi nen ede” (Mateyus 24:9). Neleki fa sma ben e teige den fosi Kresten, na so sma e teige Yesus en bakaman na ini a ten disi, sma gens den èn frufolgu den (Tori fu den Apostel 5:17, 18, 40; 2 Timoteyus 3:12; Openbaring 12:12, 17). Na ini son kondre, a de so taki lanti no wani gi den primisi fu du a wroko fu den. Toku tru Kresten di e libi na ini den kondre dati e tan preiki a bun nyunsu fu a Kownukondre fu di den wani gi yesi na Gado (Amos 3:8; Tori fu den Apostel 5:29; 1 Petrus 2:21). San meki taki den, èn sosrefi ala den tra Kotoigi na grontapu, man du disi? Yehovah e gebroiki en santa yeye fu gi den a krakti.​—Sakaria 4:6; Efeisesma 3:16; 2 Timoteyus 4:17.

16. Fa Yesus ben sori taki a preikiwroko ben o abi furu fu du nanga a yeye fu Gado?

¹⁶ Yesus ben wani sori den bakaman fu en krin taki a yeye fu Gado abi furu fu du nanga preikiwroko, èn dati meki a taigi den: „Unu sa kisi krakti te a santa yeye kon na un tapu, èn unu sa de kotoigi fu mi . . . te na den moro farawe presi fu grontapu” (Tori fu den Apostel 1:8; Openbaring 22:17). Na ini a tekst disi, a moi fu si sortu sani e pasa fosi. A fosi sani na taki santa yeye ben kon na tapu den disipel, èn baka dati den bigin du a preikiwroko na heri grontapu. Soso te a yeye fu Gado ben o yepi den, dan den ben o abi a krakti fu tan preiki „so taki sma fu ala kondre kan yere dati” (Mateyus 24:13, 14; Yesaya 61:1, 2). Fu dati ede a fiti taki Yesus ben kari a santa yeye „a yepiman” (Yohanes 15:26). A ben taki dati Gado en yeye ben o gi den disipel fu en leri èn dati a ben o tiri den.​—Yohanes 14:16, 26; 16:13.

17. Fa santa yeye e yepi wi te wi e kisi fu du nanga gens?

¹⁷ Na sortu fasi a yeye fu Gado e yepi wi na ini a ten disi pe sma e gens wi srefisrefi fu di wi e  preiki a bun nyunsu? Gado en yeye e tranga wi, èn a e gens den sma di e frufolgu wi. Meki wi go luku wan sani di pasa na ini a libi fu Kownu Saul, fu sori taki disi de so trutru.

A yeye fu Gado e gens den

18. (a) Fa Saul ben kenki kon tron wan takru sma? (b) Na sortu fasi Saul ben frufolgu David?

¹⁸ Na ini a bigin, Saul di ben de a fosi kownu fu Israel, ben de wan bun kownu, ma bakaten a no ben e gi yesi moro na Yehovah (1 Samuel 10:1, 24; 11:14, 15; 15:17-23). A bakapisi ben de taki Gado en yeye no ben e horibaka moro gi a kownu. Saul ben kon atibron so te nanga David, taki a ben wani gi David mankeri srefi. A ben wani du disi fu di Gado ben salfu David fu tron kownu, èn now a yeye fu Gado ben e horibaka gi en (1 Samuel 16:1, 13, 14). Kande a ben gersi leki a ben o de makriki fu du ogri nanga David, bika Saul ben abi wan lansri, aladi David ben abi soso wan harpu. Sobun, wan dei di David ben e prei harpu, „Saul trowe a lansri go na en tapu èn a taki: ’Mi o sutu David fasi na a skotu!’, ma tu leisi David ben man wai pasi gi en” (1 Samuel 18:10, 11). Bakaten, Saul arki en manpikin Yonatan, di ben de wan mati fu David, èn a ben meki wan sweri, taki: „Neleki fa Yehovah de na libi trutru, na so seiker a de tu taki mi no sa kiri [David].” Ma ete wan tron, Saul „suku wan okasi fu sutu David fasi na a skotu nanga a lansri”. Ma David „ben man wai pasi gi Saul, so taki a lansri frei go fasi na a skotu”. Ne David lowe, ma Saul ben hari kon na en baka. Na a muilek ten dati, Gado en yeye ben tron a gensman fu Saul. Na sortu fasi?​—1 Samuel 19:6, 10.

19. Fa a yeye fu Gado ben kibri David?

¹⁹ David lowe go na a profeiti Samuel, ma Saul seni den man fu en fu go kisi David. Ma di den doro na a kibripresi fu David, „a yeye fu Gado kon na tapu den boskopuman fu Saul, èn den bigin tyari densrefi leki profeiti”. A yeye fu Gado ben teki den abra na so wan fasi taki den frigiti san den ben kon du drape. Ete tu leisi, Saul seni man fu go teki David tyari kon baka na en, èn a  srefi sani dati pasa baka. Te fu kaba, Kownu Saul srefi go na David, ma Saul no ben man kakafutu gi a yeye fu Gado tu. Fu taki en leti, „heri dei nanga heri neti” santa yeye ben e meki taki Saul no ben man du noti, èn na so fasi David ben kisi nofo ten fu lowe.​—1 Samuel 19:20-24.

20. San wi kan leri fu a tori fu Saul di ben e frufolgu David?

²⁰ A tori disi fu Saul nanga David e leri wi wan sani di e gi wi deki-ati, namku: Te sma e frufolgu den futuboi fu Gado, den no sa abi bun bakapisi te a yeye fu Gado e gens den (Psalm 46:11; 125:2). Yehovah ben abi na prakseri fu poti David leki kownu fu Israel. Nowan sma ben o man tapu Gado fu du disi. Na ini a ten fu wi, Yehovah bosroiti taki wi kan de seiker taki a ’bun nyunsu fu a kownukondre o preiki’. Nowan sma kan tapu a wroko disi.​—Tori fu den Apostel 5:40, 42.

21. (a) Fa son gensman na ini a ten disi e du? (b) San wi sabi seiker?

²¹ Son kerki fesiman nanga politiek tiriman e fruteri lei èn den e du ogri-ati sani srefi fu pruberi fu tapu wi. Ma neleki fa Yehovah ben kibri David na yeye fasi, na so A sa kibri En pipel na ini a ten disi (Maleaki 3:6). Fu dati ede, wi e taki nanga ala frutrow, neleki David: „Tapu Gado mi poti mi frutrow. Mi no sa frede. San wan sma fu grontapu kan du mi?” (Psalm 56:11; 121:1-8; Romesma 8:31) Meki a de so taki wi e tan kakafutu gi ala sortu tyalensi nanga yepi fu Yehovah, aladi wi e gi yesi na a komando di Gado gi wi fu preiki a bun nyunsu fu a Kownukondre gi sma fu ala kondre.

[Futuwortu]

Yu kan memre disi ete?

• Fu san ede wi e kenki a fasi fa wi e preiki, so taki wi kan fiti dati na san ososma abi fanowdu?

• Sortu nyun okasi wi abi now di „wan bigi doro” kon opo?

• Sortu bakapisi a preikiwroko fu wi abi, srefi na ini kontren pe furu sma no wani arki?

• Fu san ede nowan gensman kan tapu wi fu preiki a bun nyunsu fu a Kownukondre?

[Aksi fu a tori disi]

 [Faki na tapu bladzijde 22]

Den e firi koloku srefisrefi

„Den e firi koloku èn den e prisiri fu span anu makandra na ini a wroko di den e du gi Yehovah.” Na so wan osofamiri ben firi di den froisi fu Spanyorokondre go na Bolifia. Wan manpikin fu na osofamiri disi ben de na Bolifia kaba fu yepi wan grupu di ben e libi na wan farawe presi. A boi ben e prisiri so te, taki disi naki na ati fu en papa nanga mama. Dati meki fosi yu denki a heri osofamiri, sosrefi den tra fo boi fu den di ben abi 14 te go miti 25 yari, go dini drape tu. Dri fu den boi e pionier now, èn a wan di ben froisi go na Bolifia leki fosiwan, go na a Dinariskoro.

Angelica di abi 30 yari èn di komoto fu Kanada, e dini na ini Owstu-Europa. A e taki: „Wi e kisi furu tyalensi, ma mi e prisiri fu yepi sma na ini a diniwroko. San e naki mi ati tu, na taki furu Kotoigi dyaso e taki mi tangi fu di den breiti taki mi kon dyaso fu yepi den.”

„Someni difrenti sani ben de di wi ben musu kon gwenti.”, na so tu Amerkan sisa e taki, di e dini na ini Dominikan Republiek. Den na trutru sisa fu makandra èn den abi pikinmoro 30 yari. „Ma wi tan na ini a kontren pe wi ben musu preiki, èn now seibi bijbelstudenti fu wi e go na den konmakandra.” A wroko fu den tu sisa disi ben meki taki wan grupu fu Kownukondre preikiman ben kan seti na ini wan foto pe nowan gemeente no de.

Laura, wan sisa di abi pikinmoro 30 yari, e dini na ini wan tra kondre moro leki fo yari kaba. A e taki: „Mi e du ala muiti fu libi soso nanga den sani di mi abi fanowdu trutru. Disi e yepi den preikiman fu si taki te wan sma e teki a bosroiti fu no abi furu sani, dan a e du dati fu di ensrefi wani èn fu di a de nanga krin frustan, no fu di a pôti. Mi ben man yepi tra sma, spesrutu yongusma, èn dati ben gi mi furu prisiri, so taki mi ben man kakafutu gi den problema di wan sma kan miti te a e dini na ini wan tra kondre. Mi no ben sa wani tapu nanga a wroko disi, soso fu kan go libi na wan tra fasi, èn mi o tan du disi solanga Yehovah e gi mi na okasi.”

[Faki/​Prenki na tapu bladzijde 26]

Wan tu moi sani fu a pikin buku di nen ’Bun nyunsu gi sma fu ala kondre’

A pikin buku Goed nieuws voor mensen uit alle landen (Bun nyunsu gi sma fu ala kondre), abi wan boskopu di skrifi na tapu wán bladzijde nomo na ini sowan 92 difrenti tongo. A boskopu disi skrifi na sowan fasi dati a sma e firi taki a de spesrutu gi en. Sobun, te na ososma e leisi a boskopu, dan a gersi leki na yu e taki nanga en.

Na inisei fu a kafti abi wan karta fu grontapu. Gebroiki a karta disi fu bigin wan takimakandra nanga na ososma. Kande yu kan sori en a kondre pe yusrefi e libi, èn baka dati yu kan sori en taki yu ben sa wani sabi fu sortu kondre en komopo. Na a fasi dati, yu kan kon sabi san a e denki èn unu kan taki nanga makandra na wan switi fasi.

Na a bigin fu a pikin buku, wan tu sani skrifi di wi musu du fu man yepi den sma di e taki wan tongo di wi no e frustan. Grantangi, leisi den sani disi bun èn gebroiki den so bun leki yu man, bika a abi fu du nanga a libi fu sma.

Na tapu a bladzijde pe skrifi sortu tongo de fu feni na ini a pikin buku disi, yu abi wan marki tu na baka ibriwan fu den tongo. A marki disi skrifi sosrefi na tapu den buku nanga traktaat na ini den tongo dati. Na a fasi disi yu kan kon sabi makriki na ini sortu tongo so wan buku skrifi.

[Prenki]

Yu e gebroiki a pikin buku disi na ini a diniwroko?

[Prenki na tapu bladzijde 23]

Den buku nanga tijdschrift fu wi e tyari sani fu Bijbel kon na krin, èn den de fu feni now na ini moro leki 400 tongo

GANA

LAPLAND (SWEDEN)

FILIPPIJNEN

[Prenki na tapu bladzijde 24, 25]

A de so taki yu kan go dini na wan presi pe moro Kownukondre preikiman de fanowdu?

EKWADOR

DOMINIKAN REPUBLIEK