Den de klariklari fu gi densrefi

„A PIPEL fu yu sa de klariklari fu gi densrefi” (Psalm 110:3). Den wortu dati na prenspari wortu gi den 46 studenti fu a di fu 118 klas fu a Waktitoren Bijbelskoro Gilead. Fa den sreka densrefi fu go na a skoro disi di e leri sma di wani tron zendeling fu tapu a yeye nowtu fu sma na ini tra kondre? Mike nanga Stacie di de memre fu a di fu 118 klas, e taki: „A bosroiti di wi teki fu libi wan libi sondro tumusi furu pranpran, yepi wi fu no lasi tumusi furu fu wi ten na sani di no de so prenspari, èn na so fasi wi ben kan poti yeye afersi na a fosi presi na ini wi libi. A bisnis fu wi ben e waka bun, ma wi ben abi a fasti bosroiti fu no gi pasi taki a sani dati ben o tapu wi fu poti yeye marki.” Neleki Mike nanga Stacie, den tra studenti fu a klas disi ben de klariklari fu gi densrefi, èn now den e dini leki Kownukondre preikiman na fo difrenti pisi fu grontapu.

Tapu satra 12 maart 2005, wan grupu fu 6843 sma arki a programa di ben hori na a kaba fu a skoro, èn a ben de krin fu si taki den sma dati ben e prisiri srefisrefi. Theodore Jaracz, wan memre fu a Tiri Skin fu Yehovah Kotoigi, ben de fesiman fu a programa. A gi wan waran switikon na den sma fu 28 difrenti kondre di ben kon arki a programa disi, èn baka dati a taki fu Bijbel leri fu sori sma o prenspari a leri disi de. A takiman gebroiki den wortu fu William Lyon Phelps, wan leriman fu Amerkankondre, di ben taki: „Te wan sma abi soifri sabi fu Bijbel, dan wi kan taki nanga leti taki a sma dati kisi bun leri.” Aladi grontapuleri kan de yepi, toku Bijbel leri na a moro bun leri. A leri disi e yepi sma fu kisi sabi fu Gado, èn disi kan meki taki den kisi têgo libi (Yohanes 17:3). Brada Jaracz prèise den nyun zendeling fu di den de klariklari fu abi wan moro bigi prati na a Bijbel leriwroko di e du na heri grontapu na ini moro leki 98.000 gemeente fu Yehovah Kotoigi.

Den nyun zendeling e kisi a deki-ati di den abi fanowdu

Di a fesiman kaba taki wan tu sani na a bigin fu a programa, dan William Samuelson taki fu a tori „Fa yu kan de leki wan moi olèifbon na ini na oso fu Gado”. A tori disi ben abi fu du nanga Psalm 52:8. A brada tyari kon na krin taki na ini Bijbel, na olèifbon e prenki den moi froktu di wan sma e meki, èn a e prenki sosrefi moifasi, nanga wartifasi (Yeremia 11:16). A takiman agersi den studenti nanga olèifbon, èn a taki: „Yehovah sa si unu leki sma di abi moifasi nanga wartifasi, fu di unu e preiki a Kownukondre na wan getrow fasi na den presi pe unu musu go dini leki zendeling.” Neleki fa na olèifbon abi rutu fanowdu di e panya go na ala sei fu man tan na libi na dreiten, na so den studenti musu krakti den yeye rutu fu den fu man horidoro  te sma e sori mi-no-ke fasi, te den e kisi gens, noso tra tesi na den kondre pe den e dini.​—Mateyus 13:21; Kolosesma 2:6, 7.

John E. Barr, wan fu den dri memre fu a Tiri Skin di ben teki prati na a programa, ben taki fu a tori „Yu na a sowtu fu grontapu” (Mateyus 5:13). A ben tyari kon na krin taki neleki fa sowtu e meki taki nyanyan no e pori, na so a preiki di den zendeling e preiki fu Gado en Kownukondre, sa kibri a libi fu den wan di e arki, fu di a sa tapu den fu no lasi den bun gwenti nanga a yeyefasi fu den. Baka dati Brada Barr taigi den studenti na wan switi fasi fu „libi na ini vrede” nanga trawan (Markus 9:50). „Kweki a froktu fu a yeye, èn sorgu taki ala ten yu e taki èn e tyari yusrefi na wan switi fasi èn na wan fasi di e sori taki yu e hori den firi fu trawan na prakseri”, na so a takiman ben gi leki rai.

„Tan na ini a boto na ini dipi watra” ben de a nen fu a lezing fu Wallace Liverance, wan fu den leriman na a Gileadskoro. Neleki fa wan sipi di e seiri na ini dipi watra kan waka a yoisti pasi, na so wan sma kan go na fesi tu na yeye fasi te a e frustan „den dipi sani fu Gado”. Den „dipi sani fu Gado” na den tru tori di abi fu du nanga a prakseri fu Gado èn di e sori fa a prakseri dati sa kon tru (1 Korentesma 2:10). Te wi e tan nomo na ini yeye watra di no dipi, fu di wi feni en bun kaba taki wi sabi „den fosi santa sani di Gado taki”, dan dati sa tapu wi fu go na fesi, èn a kan meki srefi taki „a bribi fu [wi] e kon lasi, neleki wan sipi di sungu” (Hebrewsma 5:12, 13; 1 Timoteyus 1:19). „Meki ’a bigi gudu nanga a koni nanga a sabi fu Gado’ yepi unu na ini a zendelingwroko fu unu”, na so Brada Liverance ben taki na a kaba fu a lezing fu en.​—Romesma 11:33.

Mark Noumair, wan tra Gilead leriman, ben taki fu a tori „Yu sa sori taki yu e warderi a gudu fu yu?” Moro leki 60 yari kaba, a Waktitoren Bijbelskoro Gilead na wan skoro di e drai bun èn di abi wan heri bun nen, fu di den nyun zendeling di komoto fu a skoro disi, de leki wan ’ipi di e dini leki wan bun kotoigi’ (Genesis 31:48). A bun nen disi fu a Gileadskoro de leki wan gudu, èn den studenti fu a di fu 118 klas kisi a srefi gudu disi. Brada Noumair gi den studenti deki-ati fu teki na eksempre fu den owruten Tekoasma fu a ten fu Nehemia, èn fu sori sakafasi te den e wroko makandra nanga a gemeente pe den e dini èn nanga tra zendeling. Den kisi a rai fu wai pasi gi a denki fu den heimemre sma di Nehemia ben kari „den heiwan”, èn na presi fu dati den musu de klariklari fu wroko sondro opo-opo, èn sondro taki den e suku fu kisi grani gi densrefi.—Nehemia 3:5.

Ondrofenitori nanga interview di e gi leri

A programa go doro nanga a lezing di nen „Moro nanga moro sma e kon yere a wortu fu Gado” (Tori fu den Apostel 6:7). A Gilead leriman Lawrence Bowen ben teki fesi di sonwan fu den studenti demo wan tu sani di den ondrofeni na ini a preikiwroko na a ten di den ben de na a skoro. Den ondrofenitori ben sori taki den studenti preiki Gado Wortu fayafaya, èn taki Yehovah blesi den bogobogo gi a muiti di den du.

Richard Ashe hori interview nanga memre fu a Bethelfamiri di e wroko skinskin nanga a skoro. Den sani di den taki, yepi den arkiman fu frustan moro bun fa a Bethelfamiri e yepi Gilead studenti fu kisi so furu wini leki den man fu a leri di den e kisi na a skoro. Baka dati, Geoffrey Jackson taki nanga wan tu sma di ben klari a Gileadskoro wan tu yari na fesi kaba. Den poti krakti tapu den someni okasi di a zendeling-libi e gi fu prèise Yehovah èn fu gi grani na en. Wan fu den zendeling ben taki: „Te yu na wan zendeling, dan sma e luku ala san yu e du. Den e arki, den e luku, èn den e memre sani.” Fu dati ede den studenti ben kisi a deki-ati fu tan hori na prakseri taki den musu de wan bun eksempre ala ten. A no de fu taki dati a bun rai disi sa de wan bigi yepi gi den na ini a ten di e kon.

Stephen Lett, wan memre fu a Tiri Skin, hori a lasti taki di ben nen „Go na fesi leki tyariman fu ’watra di e gi libi’” (Yohanes 7:38). A ben taki dati na ini den feifi mun di pasa, den studenti kisi bun furu wini, fu di den dringi furu fu Gado en Wortu fu waarheid di de leki yeye watra. Ma san den nyun zendeling sa du nanga a  leri di den kisi? Brada Lett ben gi den nyun zendeling deki-ati fu prati a yeye watra disi bogobogo, so taki trawan sa kon kisi na ini densrefi ’wan peti pe watra e komopo di e gi sma têgo libi’ (Yohanes 4:14). A takiman ben taki moro fara: „Noiti no frigiti fu gi Yehovah, ’a sma fu pe a watra di e gi libi e komoto’, a grani nanga a glori di a warti fu kisi. Abi pasensi te yu e gi leri na den wan di komoto na ini Babilon a Bigiwan pe wan bigi dreiten de” (Yeremia 2:13). Na a kaba fu a lezing, Brada Lett gi den nyun zendeling deki-ati fu de klariklari fu teki na eksempre fu a yeye nanga a trowmisi, èn fu tan taki: „’Kon!’ Ibri sma di watra e kiri en, meki a kon; meki ibri sma di wani, kon dringi fu a watra di e gi libi èn di de fu kisi fu soso.”​—Openbaring 22:17.

Na a kaba fu a programa, Brada Jaracz ben gi den arkiman den odi di difrenti kondre ben seni kon. Baka dati, wan fu den nyun zendeling leisi wan brifi fu sori fa den alamala ben de nanga tangi na ati.

Yu kan gi yusrefi fu dini pe moro yepi de fanowdu? Efu dati de so, dan poti yeye marki gi yusrefi, soleki fa den nyun zendeling disi du dati. Yu kan ondrofeni koloku nanga prisiri te yu de klariklari fu gi yusrefi na ini a diniwroko fu Gado, awansi yu na wan zendeling na ini wan tra kondre, noso wan preikiman na ini yu eigi kondre.

[Faki tapu bladzijde 13]

WAN TU SANI FU A KLAS

A nomru fu kondre di ben de drape: 8

A nomru fu kondre pe den e go dini: 19

A nomru fu studenti: 46

Gemiddeld yari di den abi: 33,0

Gemiddeld yari di den de na ini a waarheid: 16,5

Gemiddeld yari di den e du furuten diniwroko: 12,9

[Prenki na tapu bladzijde 15]

A di fu 118 klas fu a Waktitoren Bijbelskoro Gilead di klari a skoro nanga bun bakapisi

Den nen di de fu si na ondrosei, poti na ini rei di nomru fu fesisei go na bakasei, èn den nen poti fu a kruktu-anusei go na a reti-anusei na ini ibri rei.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.