„A feti-owru fu Yehovah èn a di fu Gideon!”

DEN feanti furu neleki sprenka di e meki den fatu gron kon tron gron pe sani no man gro so makriki. Disi e pasa na wan ten di den krutuman e tiri na ini Israel, èn den Israelsma de na ini bigi nowtu. So esi leki den siri di sai e bigin gro, dan den bigi grupu fu Midiansma, Amaleksma, nanga den sma fu na Owstusei di e rei na tapu kameili e broko kon na ini a kondre fu teki ala sani tyari gowe. Disi den e du seibi yari langa. Den ipi meti fu den fufuruman disi e waka go na ala sei fu suku weigron, èn den e nyan ala grasi di den feni. Ma a pipel fu Israel no abi nowan buriki, nowan mankaw, èn nowan skapu. Na ogri-ati tiri fu den Midiansma takru so kefalek, taki den pôti Israelsma musu go na mindri den bergi fu kibri a nyanyan fu den na ondro gron, na ini bergi olo, èn na tra presi pe sma no ben man go makriki.

Fu san ede den de na ini a muilek situwâsi disi? Israel di fadon komoto na bribi, e dini falsi gado. Fu dati ede, Yehovah gi den abra na sma di e kwinsi den. Te den manpikin fu Israel no man teki a pina moro, dan den e bari kari Yehovah fu yepi den. A sa arki den? San wi kan leri fu den sani di Israel ondrofeni?​—Krutuman 6:1-6.

Wan gronman di e du sani fredefrede nanga koni, noso wan ’tranga man di abi deki-ati’?

Den gronman fu Israel abi a gwenti fu gebroiki wan mankaw nanga wan wagi fu masi tarwe (wan sortu siri fu meki blon). Disi den e du na wan opo presi pe den e trowe a tarwe go na ini a loktu so taki a winti kan wai a buba fu a tarwe gowe. Ma te den ben o du a wroko disi na wan opo presi, dan den fufuruman di abi a fasti bosroiti fu fufuru ala sani na ini a kondre, ben o si den makriki. Na wan presi pe den Midiansma no man si en, Gideon e masi tarwe na ini wan baki di den e gebroiki fu masi droifi. A kan taki disi ben de wan bigi ston baki di ben de na ini wan kibripresi (Krutuman 6:11). Drape, a kan masi a tarwe pikinsopikinso nanga wan tiki. Fu di Gideon no man tra fasi, meki a e gebroiki den sani di a abi.

Prakseri fa Gideon e fruwondru te wan engel fu Yehovah e kon na en èn e taki: „Yehovah de nanga yu, yu tranga man di abi deki-ati” (Krutuman 6:12). Leki wan man di e masi tarwe kibrikibri na ini wan baki di sma e gebroiki fu masi droifi, Gideon no e firi ensrefi leki wan man di abi deki-ati kwetikweti. Ma den wortu dati e sori taki Gado abi a frutrow taki Gideon kan de wan man di e teki fesi na ini Israel nanga deki-ati. Toku Gideon srefi musu kisi na overtoigi taki dati de so.

Te Yehovah e gi Gideon a wroko fu „frulusu Israel puru fu na anu fu Midian”, dan nanga sakafasi a e taki: „Pardon, Yehovah. Nanga sortu sani mi sa frulusu Israel? Luku! A grupu fu mi fu wán dusun mansma na a moro mendriwan na ini Manase, èn misrefi na a moro pikinwan na ini na oso fu mi papa.” Gideon di e handri nanga koni, e aksi Gado wan marki di ben o gi en a dyaranti taki Gado ben yepi en fu wini den Midiansma. Fu di Yehovah e frustan dati, meki a de klariklari fu du san Gideon aksi en. Baka dati, Gideon e gi na engel di kon fisiti en, wan tu nyanyan sani leki presenti, èn a e poti dati na tapu wan ston. Dan faya e komoto fu a ston, èn e bron a nyanyan krinkrin. Baka di Yehovah sori Gideon taki a no abi fu frede, dan Gideon e bow wan altari na a presi dati.​—Krutuman 6:12-24.

„Meki Bâal opo taki gi ensrefi akruderi wet”

A moro bigi problema di Israel abi, a no taki den Midiansma e kwinsi den. A problema fu den, na taki den de na ini katibo fu na anbegi fu Bâal. Yehovah na „wan dyarusu Gado”, èn nowan sma di e dini tra gado kan anbegi En na wan fasi di A  feni bun (Exodus 34:14). Fu dati ede, Yehovah e gi Gideon a komando fu pori na altari di en papa ben meki gi Bâal èn fu koti a santa postu trowe. Fu di Gideon e frede gi san en papa èn den tra sma kan du efu a ben o du dati te deiten, meki a e handri te neti, aladi tin futuboi e yepi en.

Gideon ben abi leti fu handri na a fasi dati, bika di den sma drape di e anbegi Bâal kon si san Gideon du nanga den sokari santa sani fu den, dan den wani kiri en. Ma na wan tumusi bun fasi, Yoas, a papa fu Gideon, e taki-go-taki-kon nanga den sma èn a e sori den taki efu Bâal na Gado, dan a musu man kibri ensrefi. Ne Yoas e gi en manpikin wan nen di fiti, namku Yerub-bâal, san wani taki „Meki Bâal opo taki gi ensrefi akruderi wet”.​—Krutuman 6:25-32.

Ala ten Gado e blesi den futuboi fu en te den no e frede fu horibaka gi a tru anbegi. Te den Midiansma nanga den kompe fu den e broko kon na ini a kondre baka, dan ’a yeye fu Yehovah e furu Gideon’ (Krutuman 6:34). Nanga yepi fu Gado en yeye, noso en wroko krakti, Gideon e tyari fetiman kon na wan fu den lo fu Manase, Aser, Seibulon, nanga Naftali.​—Krutuman 6:35.

Sreka gi a feti

Aladi Gideon abi wan legre now fu 32.000 sma, toku a e aksi Gado fu gi en wan marki. Efu wan pisi skapububa di a libi na tapu a gron pe sma ben e masi sani, e kon nati fu a dow aladi a gron lontu en e tan drei, dan disi sa de wan buweisi taki Gado sa frulusu Israel nanga yepi fu en. Yehovah e du a wondru disi. Ma fu di Gideon wani abi na overtoigi taki Yehovah o horibaka gi en, meki ete wan tron a e aksi Yehovah fu meki a pisi skapububa tan drei aladi a gron lontu a skapububa e nati nanga dow. A de so taki Gideon e broko en ede pasa marki? Soleki fa a sori, dan dati no de so, fu di Yehovah e du san Gideon aksi en, soso fu gi en a dyaranti taki sani sa waka bun (Krutuman 6:36-40). Na ini a ten disi, wi no e fruwakti den sortu wondru disi. Ma nanga yepi fu en Wortu, Yehovah e tiri wi èn a e gi wi a dyaranti taki a e horibaka gi wi.

Now Gado e taki dati a legre fu Gideon bigi tumusi. Efu den wini den feanti fu den nanga so wan bigi legre, dan den Israelsma kan go skepi taki den frulusu densrefi. Ma na Yehovah musu kisi a grani te den o wini a strei. Fa a problema disi lusu? Akruderi wan fu den seti na ini a Wet fu Moses, Gideon musu aksi den man di e frede, fu komoto na ini a legre. Ne 22.000 man komoto fu a legre fu en, èn 10.000 man nomo tan abra.​—Deuteronomium 20:8; Krutuman 7:2, 3.

Gi Gado a legre bigi tumusi ete. Dati meki Gado e taigi Gideon fu saka go na a watra, makandra nanga a legre. A Dyu historia skrifiman Josephus e taki dati Gado meki Gideon waka nanga a legre go na wan liba, na a pisi ten fu a dei te a son faya trutru. Awinsi fa a situwâsi de, Gideon e luku fa den man e dringi. Soso 300 man e teki pikinso watra na ini den anu fu dringi, aladi den e luku efu den feanti e kon fu feti nanga den. Soso den 300 man disi di de na ai sa go makandra nanga Gideon (Krutuman 7:4-8). Prakseri fa a ben o de efu yu ben de na ini den presi. Fu di den feanti fu yu abi wan legre fu 135.000 man, meki yu sa musu frustan taki yu no o man wini a strei nanga yu eigi krakti, ma soso nanga a krakti fu Yehovah!

 Gado e aksi Gideon fu meki wan futuboi go makandra nanga en fu go luku fa sani de na a kampu fu den Midiansma. Te Gideon doro drape, a e yere fa wan man e fruteri wan mati fu en san a dren. Sondro draidrai a mati e fruteri a man taki a dren wani taki dati Gado abi a fasti bosroiti fu gi den Midiansma abra na ini na anu fu Gideon. Dati na soifri san Gideon ben musu yere. Now a de seiker taki Yehovah sa meki taki en nanga den 300 fetiman fu en o wini a strei teige den Midiansma.​—Krutuman 7:9-15.

A fasi fa den ben o feti

Den 300 man prati na ini dri grupu fu 100 man. Ibri man e kisi wan tutu nanga wan bigi leigi watrakan. Den e poti wan frambo na ini den watrakan fu den. A fosi komando di Gideon e gi den na disi: „Luku san mi e du, èn du a srefi sani. Te mi e bro tapu mi tutu, dan un musu bro tapu di fu unu tu, èn un musu bari: ’A feti-owru fu Yehovah èn a di fu Gideon!’”​—Krutuman 7:16-18, 20.

Sondro fu meki babari den 300 fetiman fu Israel e go te na a lanki fu a kampu fu a feanti. A de so wan tin yuru na neti; no so langa pasa, tra waktiman teki a wakti wroko abra. Disi na a moro bun ten fu go feti, fu di a sa teki ten bifo den ai fu den nyun waktiman kon gwenti a dungru.

Bigi problema de fu miti den Midiansma now! Ala sani tiri. Wantronso, den 300 man e broko den watrakan fu den na pisipisi, den e bro tapu den tutu fu den, èn den e meki babari. Den Midiansma e skreki, spesrutu fu di den yere den wortu „A feti-owru fu Yehovah èn fu Gideon!”, èn dati meki densrefi e bigin meki babari. Na ini a heri bruya, den no man si kwetikweti suma na wan feanti. Den 300 man e tan tanapu na den presi, aladi Gado e meki taki den feanti e gebroiki den eigi feti-owru fu kiri makandra. Baka dati, den 300 man e broko a heri kampu, den e tapu den sma di wani lowe, èn den e lon baka iniwan Midiansma di tan abra fu pori den krinkrin. A langa pisi ten di den Midiansma ben e tiri a kondre na wan ogri-ati fasi, kon na wan kaba.​—Krutuman 7:19-25; 8:10-12, 28.

Srefi baka di den wini a strei disi, Gideon e tan sori sakafasi. Soleki fa a sori, dan a e hati den Efraimsma taki Gideon no kari den fu go feti. Te den e suku fu meki trobi nanga Gideon, dan a e handri na wan safri-ati fasi. A safri fasi fa a piki den, meki taki den no e atibron moro èn den ati e kon kowru.​—Krutuman 8:1-3; Odo 15:1.

Now di vrede de baka na ini a kondre, den Israelsma wani nomonomo taki Gideon musu tron den kownu. Dati na wan tesi trutru! Ma Gideon e weigri. A no frigiti suma ben wini a strei teige den Midiansma. „Misrefi no sa tiri unu, èn mi manpikin no sa tiri unu tu”, na so a e taki. „Yehovah na a sma di sa tiri unu.”​—Krutuman 8:23.

Ma fu di Gideon de wan sondu sma, meki a no ala ten a e krutu sani na wan bun fasi. Wi no sabi fu san ede Gideon gebroiki den gudu di a ben teki fu den feanti fu meki wan efod, èn a e poti en na ini a foto fu en. Bijbel e taki dati heri Israel bigin du „hurudu” nanga na efod. Den e anbegi na efod, èn a e kon tron wan trapu gi Gideon nanga en osofamiri srefi. Ma toku, a no kon tron wan trutru afkodreiman, fu di den Buku fu Bijbel e taki dati a ben de wan man di ben bribi na ini Yehovah.​—Krutuman 8:27; Hebrewsma 11:32-34.

Sani di wi kan leri

A tori fu Gideon e gi wi warskow èn deki-ati. Wi e kisi a warskow taki efu Yehovah e puru en yeye fu wi èn efu a no sa blesi wi moro fu di wi e tranga yesi en, dan na yeye fasi wi sa kon tron leki wan foto di kon pôti trutru èn di sprenka pori krinkrin. Wi e libi na ini muilek ten èn wi no musu frigiti noiti taki den blesi fu Yehovah „e meki sma kon gudu, èn A no e meki wi firi sari” (Odo 10:22). Wi e kisi blesi fu Gado fu di wi e ’dini en nanga wi heri ati èn nanga wan prisiri sili’. Efu wi no du dati, dan a sa poti wi na wan sei.​—1 Kroniki 28:9.

Wi kan kisi deki-ati fu a tori fu Gideon, fu di a e buweisi taki Yehovah kan frulusu en pipel fu iniwan ogri, èn a kan gebroiki den sma srefi di gersi leki den swaki, noso di gersi leki den no man du noti. Taki Gideon nanga den 300 man ben kan wini a strei teige 135.000 Midiansma, e buweisi taki Gado abi ala makti. Kande wi de na ini muilek situwâsi, èn a kan gersi leki den feanti fu wi lai trutru. Toku a Bijbel tori fu Gideon e gi wi a deki-ati fu frutrow tapu Yehovah, di sa blesi wi èn di sa frulusu ala sma di e sori taki den bribi na ini En.