„A koniwan e luku pe a e poti en futu”

WAN koni sma sabi san fu du te problema de, a srapu, a man krutu sani na wan yoisti fasi èn a man si sani krin. A no e kori sma èn a no e hoigri. „Ibriwan sma di koni sa handri nanga sabi”, na so Odo 13:16 e taki. Iya, konifasi na wan tumusi moi sani di ala sma ben sa wani.

Fa wi kan handri na wan koni fasi na ini wi aladei libi? Fa den bosroiti di wi e teki, a fasi fa wi e handri nanga trawan, èn a fasi fa wi e handri na ini difrenti situwâsi, e sori taki wi abi koni? Sortu wini den koniwan e kisi? Gi sortu rampu den e wai pasi? Kownu Salomo fu owruten Israel e gi bun piki tapu den aksi disi, soleki fa wi sa leisi na ini Odo 14:12-25. *

Teki koni bosroiti

Efu wi wani teki koni bosroiti èn efu wi wani abi bun bakapisi na ini wi libi, dan a no de fu taki dati wi musu man si krin san bun èn san fowtu. Ma Bijbel e warskow wi: „Wan pasi de di de reti ini na ai fu wan man, ma den pasi fu dede de bakaten a kaba fu en” (Odo 14:12). Fu dati ede, wi musu leri fu man si krin o ten wan sani bun trutru, èn o ten a gersi nomo leki wan sani bun. Den wortu „den pasi fu dede” e sori taki furu fu den sortu pasi disi de di e kori sma. Luku wan tu sani nanga san wi musu luku bun èn gi san wi musu wai pasi.

Nofo tron sma e si den gudusma nanga den pôpisma fu grontapu leki sma di wi musu lespeki. A posisi di den abi na ini a libimakandra èn den gudu fu den kan meki a gersi leki a fasi fa den e du sani, bun. Ma fa a de nanga den sani di furu fu den sortu sma disi e du soso fu kon gudu, noso fu kon pôpi? Na ala ten den e handri na wan opregti fasi èn na wan krin fasi? Dan yu abi sma di de fayafaya gi a bribi fu den èn furu sma e lespeki den. Ma a de so taki fu di den de opregti, dan dati e sori taki a bribi fu den de yoisti?​—Romesma 10:2, 3.

Son leisi wi kan kori wisrefi fu denki taki wan pasi bun. Efu wi e teki bosroiti akruderi san wisrefi feni bun, dan wi e frutrow tapu wi ati, èn wi ati na wan sani di e kori wi (Yeremia 17:9). Te wi no e teki sabi na ini wi fu oefen a konsensi fu wi, dan a kan meki wi prakseri taki wan sani bun, aladi a sani dati no bun kwetikweti. Ma san sa yepi wi dan fu teki yoisti bosroiti?

Efu wi wani ’leri fa fu gebroiki wi frustan fu man si sani krin, so taki wi kan sabi san bun èn san no bun’, dan a de tumusi prenspari fu studeri den dipi waarheid fu Gado Wortu fayafaya. Boiti dati, wi musu leri fu ’gebroiki wi frustan’ fu di wi e fiti Bijbel gronprakseri na ini wi libi (Hebrewsma 5:14). Wi musu luku bun taki wi no e gi pasi dati sani di gersi bun sani, e puru wi fu ’a smara pasi di e tyari sma go na libi’.​—Mateyus 7:13, 14.

Te ’na ati e sari’

Wi kan de koloku te wi no e firi korostu? A de so taki lafu nanga prisiri e puru a bigi sari nanga pen di wi abi? A de wan koni sani fu gebroiki sopi fu no firi brokosaka moro, noso fu gebroiki drugs na wan fowtu fasi, noso fu pruberi fu puru den firi dati fu di wi e go libi wan yayo  libi? Kwetikweti. „Srefi na ini lafu na ati kan abi sari”, na so a koni kownu e taki.​—Odo 14:13a.

Te wan sma e lafu, dan dati kan kibri a pen di a e firi, ma a no man puru a pen. „Gi ala sani wan fasti ten de”, Bijbel e taki. Fu tru, ’wan ten de fu krei èn wan ten fu lafu, wan ten fu bari krei èn wan ten fu dyompodyompo’ (Preikiman 3:1, 4). Te wi e tan firi brokosaka, dan wi musu bigin du sani fu basi a firi dati, fu di wi e suku „bekwaam tiri” te dati de fanowdu (Odo 24:6). * Lafu nanga prisiri kan yepi pikinso, ma furu tron den no man puru wan problema. Salomo e warskow wi fu no meki prisiri na wan fasi di no fiti èn fu no meki prisiri pasa marki, te a e taki: „Prisiri abi wan kaba na ini sari.”​—Odo 14:13b.

A sma di no abi bribi èn a bun sma​—Fa den e prisiri nanga san den abi?

A kownu fu Israel e taki moro fara: „A sma di no de getrow na ini en ati, en bere sa furu nanga den bakapisi fu en eigi fasi, ma a bun man nanga den bakapisi fu en du” (Odo 14:14). Fa den sma di no abi bribi èn den bun sma e prisiri nanga a bakapisi fu a fasi fa den e handri?

Wan sma di no abi bribi no e broko en ede fu gi frantwortu na Gado. Fu dati ede, gi wan sma di no abi bribi a no prenspari fu du san bun na ini Yehovah ai (1 Petrus 4:3-5). A feti di so wan sma e feti baka gudu e meki a firi bun (Psalm 144:11-15a). Na a tra sei, a bun sma wani du san bun na ini na ai fu Gado. Na ini ala san a e du, a e poti prakseri na den regtfardiki markitiki fu Gado. So wan sma e prisiri nanga den bakapisi fu di Yehovah na en Gado èn a e prisiri pasa marki fu di a e dini a Moro Heiwan.​—Psalm 144:15b.

No „bribi ibri wortu”

Fu sori a difrenti na mindri den pasi fu den wan di no abi ondrofeni nanga den wan di abi koni, dan Salomo e taki: „Ibriwan sma di no abi ondrofeni, e bribi ibri wortu, ma a koniwan e luku pe a e poti en futu” (Odo 14:15). Wan koni sma no e fadon na ini trapu makriki. Na presi fu bribi ala san a e yere noso fu meki trawan denki gi en, dan na wan koni fasi a e luku pe a e poti en futu. Fu di a e suku fu sabi sani finifini, meki a e handri nanga sabi.

 Luku fu eksempre na aksi „Wan Gado de?” A sma di no abi ondrofeni, lobi fu waka baka sani di furu sma e du, noso a e bribi san prenspari sma na ini a libimakandra e bribi. A koni sma na a tra sei, e teki ten fu ondrosuku fa sani de trutru. A e poti prakseri na bijbeltekst soleki Romesma 1:20 nanga Hebrewsma 3:4. Na ini afersi di abi fu du nanga Gado, a koni sma no e bribi ala san kerki fesiman e taigi en. A e ’ondrosuku ala sani di gersi leki den e kon fu Gado en yeye, fu si efu den e kon fu Gado trutru’.​—1 Yohanes 4:1.

Fu tru, a de wan koni sani fu gi yesi na a rai fu no „bribi ibri wortu”! Spesrutu den wan di abi a frantwortu fu gi rai na trawan na ini a Kresten gemeente musu hori disi na prakseri. A sma di e gi rai musu sabi finifini fa wan spesrutu tori waka. A musu arki bun èn a musu tyari buweisi kon na wan fu ala sma di abi fu du nanga a tori, so taki a no e gi rai aladi a no yere a heri tori.​—Odo 18:13; 29:20.

„Sma sa abi bita-ati gi a man di abi frustan”

A kownu fu Israel e sori go na wan tra difrenti na mindri a koni sma nanga a don sma, te a e taki: „A koniwan e frede, a e drai baka gi takru pasi, ma a sma sondro frustan, en ati e bron, a e frutrow tumusi tapu ensrefi. A sma di e atibron esi-esi sa handri na wan don fasi, ma sma sa abi bita-ati gi a man di abi frustan.”​—Odo 14:16, 17.

A koni sma e frede den bakapisi di e kon te a ben o tyari ensrefi na wan fowtu fasi. Fu dati ede, a de na ai èn a e warderi iniwan rai di kan yepi en fu wai pasi gi san ogri. A don sma no abi a frede dati. Fu di a e frutrow tapu ensrefi nomo, meki a e poti a rai fu trawan na wan sei. Fu di so wan sma e atibron esi-esi, meki a e handri na wan don fasi. Ma fa a kan taki sma e kisi bita-ati gi wan man di abi frustan?

Den wortu di vertaal nanga „frustan”, wani taki tu sani. Te a abi fu du nanga bun sani, dan den wortu disi e sori go na a koni di wan sma abi fu man si sani krin, noso den e sori go na a konifasi fu en (Odo 1:4; 2:11; 3:21). Te a abi fu du nanga sani di no bun, dan a kan sori go na den takru prakseri di wan sma abi, noso den prakseri di wan sma abi fu du wan trawan ogri.​—Psalm 37:7; Odo 12:2; 24:8.

Efu den wortu „a man di abi frustan” e sori go na wan man di abi takru prakseri, dan a no muilek fu si fu san ede sma sa abi bita-ati gi so wan man. Ma son leisi a kan taki sma di no abi frustan abi bita-ati gi wan man di abi frustan. Fu eksempre, grontapu abi bita-ati gi den wan di e leri fu gebroiki a koni di den abi fu frustan sani èn di bosroiti fu „no de wan pisi fu grontapu” (Yohanes 15:19). Sma e spotu Kresten yonguwan di e gebroiki den frustan èn di e kakafutu gi takru kompe fu no tyari densrefi na wan takru fasi. Fu taki en leti, grontapu, di de ini a makti fu Satan Didibri, abi bita-ati gi tru anbegiman.​—1 Yohanes 5:19.

„Ogri sma sa musu fu boigi gi den bun sma”

Wan tra fasi de fa den koniwan e difrenti fu den wan di no abi ondrofeni. „Den wan di no abi ondrofeni sa kisi donfasi leki a gudu fu den, ma den koniwan sa weri sabi leki wan moi sani na tapu den ede” (Odo 14:18). Fu di den wan di no abi ondrofeni, no abi a koni fu man si sani krin, meki den e frukisi fu du san don. Disi e kon tron a fasi fa den e libi. Na a tra sei, sabi e moi den koniwan, neleki fa wan kownu-ati e meki wan kownu kisi grani.

„Ogri sma sa musu fu boigi gi den bun sma”, na so a koni kownu e taki, „èn den takru sma sa musu fu boigi na den portu fu a regtfardikiwan” (Odo 14:19). Nanga tra wortu, den bun sma sa wini den takru sma te fu kaba. Prakseri fa a pipel fu Yehovah e kon moro furu, èn fa den abi wan moro bun libi na ini a ten disi. Fu di son gensman ben o si fa Yehovah e blesi den futuboi fu en, meki den ben o abi fu „boigi” gi na agersi hemel uma fu Yehovah, èn gi a fika pisi fu den wan di salfu nanga santa yeye èn di e teki presi gi na uma disi. Na Armagedon den gensman dati sa musu kon frustan taki a pisi fu  na organisâsi fu Gado di de na grontapu, e teki presi gi a pisi di de na hemel.​—Yesaya 60:1, 14; Galasiasma 6:16; Openbaring 16:14, 16.

„Sori bun-ati gi den wan di e kisi kwinsi”

Di Salomo ben e luku a fasi fa libisma e handri, dan a ben taki: „Wan sma di no abi furu sani, a sma na en sei srefi no wani si en na ai, ma a gudu sma abi furu mati” (Odo 14:20). Te yu luku en bun, dan na so sondu libisma de trutru! Fu di den lobi fu prakseri densrefi nomo, meki den e sori moro bun-ati gi den guduwan leki gi den pôtiwan. Aladi a gudusma abi furu mati, toku den e tan fu wan syatu pisi ten, neleki fa a gudu fu a gudu sma de fu wan syatu pisi ten. Fu dati ede, wi no musu suku fu tron mati nanga sma nanga yepi fu moni, noso nanga switi wortu, a no so?

Baka te wi ondrosuku wisrefi, dan san wi musu du efu wi si taki wi e du sani fu abi wan bun nen na den guduwan èn taki wi e wisiwasi den wan di no abi so furu moni? Wi musu frustan taki Bijbel e krutu sma di e teki sei na so wan fasi. Bijbel e taki: „A sma di e wisiwasi en eigi kompe e sondu, ma a sma di e sori bun-ati gi den wan di e kisi kwinsi sa de koloku.”​—Odo 14:21.

Wi musu poti prakseri na den wan di de na ini muilek situwâsi (Yakobus 1:27). Fa wi kan du dati? Wi kan gebroiki „grontapu gudu” fu yepi den; wi kan yepi den nanga sani soleki moni, nyanyan, wan tanpresi, krosi, nanga a ten fu wi (1 Yohanes 3:17). Koloku fu a sma di e sori bun-ati gi den sortu sma disi, fu di „wan sma sa de moro koloku te a e gi sani, leki te a e kisi sani”.​—Tori fu den Apostel 20:35.

Fa sani e waka nanga den te fu kaba?

A gronprakseri „san wan sma e sai, na dati a sa koti tu”, abi krakti tapu a koni sma èn sosrefi tapu a don sma (Galasiasma 6:7). A koni sma e du bun, ma a don sma abi soso takru sani na prakseri. „A no den wan di e prakseri soso ogri, e waka lontu nomo?”, na so a koni kownu e aksi. A piki na iya; den e „lasi pasi” trutru (Da Bijbel na ini Sranantongo). „Ma lobi bun-ati nanga waarheid de gi den wan di e prakseri bun sani” (Odo 14:22). Den wan di e du bun, e kisi a bun-ati fu trawan èn sosrefi a lobi bun-ati fu Gado.

Salomo e sori taki sani e waka bun gi wan sma di e wroko tranga ma a e sori sosrefi taki sani no e waka bun nanga wan sma di e takitaki furu nomo èn no e du noti. A e taki: „Fu ibri sortu tranga wroko wan winimarki e kon, ma soso den wortu fu den mofobuba, e tyari pina kon” (Odo 14:23). A no de fu taki dati a gronprakseri disi abi fu du nanga den muiti di wi e meki na yeye sei. Te wi e wroko tranga na ini a Kresten diniwroko, dan wi e kisi a grani fu leri trawan a waarheid fu Gado Wortu di kan kibri den libi. Te wi e du iniwan frantwortu di wi kisi na ini a diniwroko fu wi na wan getrow fasi, dan wi sa de koloku èn wi sa firi bun.

„A kownu-ati fu den koniwan na den gudu fu den; a donfasi fu den donwan na donfasi”, na so Odo 14:24 e taki. A kan taki disi wani taki dati a gudu di den koniwan e pruberi fu kisi na koni srefi, èn dati de leki wan kownu-ati gi den, noso a e moi den. Na a tra sei, den donwan e kisi soso donfasi. Soleki fa wan buku e taki, dan a kan taki na odo disi wani taki tu dati „gudu e moi den sma di e gebroiki en na wan yoisti fasi . . . [aladi] don sma abi soso a donfasi fu den”. Awinsi fa no fa, sani e waka moro bun gi den koniwan leki gi den donwan.

„Wan kotoigi di e taki waarheid e frulusu sili”, a kownu fu Israel e taki, „ma wan kotoigi di e kori sma, e taki soso lei” (Odo 14:25). Te a abi fu du nanga krutu afersi, dan disi de tru, ma luku san disi abi fu du nanga a diniwroko fu wi. Te wi e preiki a Kownukondre boskopu èn te wi e meki disipel, dan wi e gi kotoigi fu a waarheid fu Gado Wortu. A kotoigiwroko dati e frulusu opregti sma fu falsi anbegi èn a e kibri sma libi. Te wi e poti prakseri doronomo na wisrefi èn na a fasi fa wi e gi leri, dan wi sa frulusu wisrefi èn den sma di e arki wi (1 Timoteyus 4:16). Aladi wi e tan du disi, dan meki wi du muiti fu handri na wan koni fasi ala ten.

[Futuwortu]

[Prenki na tapu bladzijde 18]

Efu wi wani kon sabi san bun èn san ogri, dan a de tumusi prenspari taki wi e studeri den dipi waarheid fu Gado Wortu

[Prenki na tapu bladzijde 18]

A e gi trutru prisiri fu feti baka gudu?