Aksi fu leisiman

Kownu Salomo fu owruten Israel no ben de getrow na Gado moro na ini en owrudei. Ma disi wani taki dati a no sa kisi wan opobaka?​—1 Kownu 11:3-9.

Aladi Bijbel e kari a nen fu wan tu mansma nanga umasma di ben e dini Gado èn di o kisi wan opobaka seiker, toku a no e taki soifri efu ibriwan sma di a e kari abi a howpu fu kisi wan opobaka (Hebrewsma 11:1-40). Toku wi kan kon sabi fa Gado krutu a tori fu Salomo, te wi e luku san pasa nanga en di a dede èn san pasa nanga son getrow sma di den dede.

Den Buku fu Bijbel e taki fu tu sani nomo di kan pasa nanga wan dedesma: a kan taki a no de moro fu wan pisi ten nomo, noso a kan taki a dede fu têgo. Den sma di no warti fu kisi wan opobaka, trowe go na ini „Gehena”, noso „a se di e bron nanga faya” (Mateyus 5:22; Markus 9:47, 48; Openbaring 20:14). Wan tu fu den sma disi na a fosi libisma trowpaar Adam nanga Eva, a toriman Yudas Iskariot, èn son sma di dede di Gado strafu den, soleki den sma na ini den dei fu Noa èn den sma di ben e libi na ini Sodom nanga Gomora. * Den dedesma di o kisi wan opobaka, e go na ini Syeol noso Hades, a grebi pe ala libisma e go. Bijbel e taki san o pasa nanga den sma disi: „A se lusu den dedesma di ben de na ini en, èn dede nanga Hades lusu den dedesma di ben de na ini den, èn ibriwan fu den dedesma ben kisi krutu fu den sani di den du.”​—Openbaring 20:13.

Sobun, den getrow sma fu suma Hebrewsma kapitel 11 e taki, de na ini Syeol noso Hades, èn den e wakti fu kisi wan opobaka. Wan tu fu den loyaal futuboi fu Gado di de na ini a grupu getrow sma disi, na Abraham, Moses, nanga David. Luku now san Bijbel e taki fu a dede fu den. „Yu fu yu sei”, na so Yehovah ben taigi Abraham, „sa go na den afo fu yu na ini vrede; den sa beri yu te yu kon owru srefisrefi” (Genesis 15:15). Yehovah ben taigi Moses: „Luku! Yu e go didon na den afo fu yu” (Deuteronomium 31:16). Bijbel e taki fu David, a papa fu Salomo: „David go didon na den afo fu en èn den beri en na ini a Foto fu David” (1 Kownu 2:10). Sobun, den wortu ’go didon na den afo’ na wan tra fasi fu taki dati wan sma go na Syeol.

San pasa nanga Salomo di a dede? Bijbel e piki: „A ten di Salomo ben e tiri heri Israel komoto fu Yerusalem, ben de fotenti yari. Dan Salomo go didon na den afo fu en, èn den beri en na ini a Foto fu David, en papa” (1 Kownu 11:42, 43). Fu dati ede, wi kan taki dati Salomo de na ini Syeol, noso Hades, pe a e wakti fu kisi wan opobaka.

Te wi e luku a tori na a fasi disi, dan wi kan frustan taki tra sma fu suma Bijbel e taki krin taki ’den go didon na den afo fu den’, sa man kisi wan opobaka tu. Fu taki en leti, Bijbel e taki a srefi sani disi fu furu fu den kownu di kon baka Salomo, aladi den no ben de getrow. Toku a kan taki den sma disi o kisi wan opobaka, fu di „Gado sa gi wan opobaka na den regtfardikiwan nanga den onregtfardikiwan” (Tori fu den Apostel 24:15). A no de fu taki dati a wan-enkri fasi fa wi sa man sabi seiker suma kisi wan opobaka, na fu wakti teleki „ala den sma di de na ini den grebi” kisi wan opobaka (Yohanes 5:28, 29). Sobun, na presi fu gi wan krin piki sortu sma fu owruten o kisi wan opobaka, wi e wakti nanga ala frutrow taki Yehovah sa teki a moro bun bosroiti.

[Futuwortu]