Tru leri​—Pe yu kan feni den?

WAN man na ini Tibet e gebroiki wan pikin lontu dosu di abi wan pikin pisi papira na ini pe begi skrifi na tapu. A e bribi taki ibri tron te a e drai a dosu lontu, dan a e taki a begi fu en ete wan tron. Na ini wan bigi oso na India, wan pikin kamra seti spesrutu fu hori puya. Puya na wan fasi fu anbegi pe sma e bron switismeri, èn e poti bromki nanga tra sani gi popki fu difrenti mangado nanga umagado. Bun fara fu India, na Italiakondre, wan uma de na ini wan kerki di lai ala sortu moi sani. A e kindi na fesi a popki fu Maria, a mama fu Yesus, èn a e begi aladi a e hori wan rowskransi na ini en anu.

Kande yusrefi si sortu krakti bribi abi tapu a libi fu sma. Wan buku e taki dati ala ten bribi ben de wan tumusi prenspari sani na ini libimakandra na ala sei fu grontapu, èn te now ete disi de so (The World’s Religions​—Understanding the Living Faiths). Na ini a buku di John Bowker skrifi, a e taki: „Noiti ete wan libimakandra ben de pe sma no ben e bribi na ini Gado, èn nofo tron sma e si Gado leki a Tiriman èn a Mekiman fu hemel nanga grontapu. Na so a de tu srefi na ini libimakandra pe sma feni taki a no de prenspari fu bribi na ini Gado” (God—A Brief History).

Iya, den difrenti bribi ben abi furu krakti tapu a libi fu milyunmilyun sma. A sani disi no e sori wi taki libisma abi wan sani fanowdu na yeye fasi èn taki den e angri fu disi trutru? Datra Carl G. Jung, wan pôpi datra di e ondrosuku a gosontu fu sma na frustan sei, ben skrifi na ini en buku di nen The Undiscovered Self, taki sma abi a firi fu anbegi wan moro hei makti. A e taki tu dati „na ini a heri historia fu libisma disi ben de so”.

Ma toku furu sma e taki dati den no e bribi na  ini Gado, noso den no wani sabi noti fu kerkitori. Son sma e tweifri efu Gado de, noso den e taki dati a no de srefisrefi, fu di den kerki di den sabi no ben man gi den san den abi fanowdu na yeye fasi. Wortubuku e taki dati bribi na „te wan sma e hori ensrefi fayafaya na gronprakseri; te wan sma de getrow dorodoro na wan sani; te wan sma e du ala sani soleki fa a konsensi fu en e taigi en; te wan sma e du sani fu di a abi dipi lespeki gi wan gado”. Te yu luku a sani disi, dan pikinmoro ala sma e anbegi wan sma, noso wan sani na ini en libi. Disi de so, srefi nanga sma di e taki dati den no e bribi na ini wan gado.

Na ini ala den dusundusun yari fu a historia fu libisma, sma suku omeni sortu fasi fu feni a sani di den abi fanowdu na yeye fasi, èn fu dati ede den pruberi fu anbegi Gado na ala sortu fasi. A bakapisi de taki na heri grontapu wan lo difrenti bribi de now. Fu eksempre, pikinmoro ala kerki e taki dati den e bribi na ini wan moro hei makti, ma toku ibriwan fu den abi wan tra denki fu suma a makti disi de, noso san a de. Furu kerki e taki tu dati a de prenspari fu kisi frulusu noso fu kon fri. Ma toku den leri fu den e difrenti te den musu fruklari san na frulusu èn fa wan sma kan kisi en. Efu someni sortu bribi de, dan fa wi kan kon sabi san na den tru leri di e plisi Gado?