Tru leri di e plisi Gado

EFU libisma na grontapu musu kon sabi sortu leri tru èn sortu leri e plisi Gado, dan Gado musu sori den san na den prakseri fu en. Boiti dati, a musu gi ala sma na okasi fu kon sabi den prakseri disi tu. Bika na sortu tra fasi libisma ben kan kon sabi sortu leri, noso sortu fasi fu anbegi, Gado feni bun? Fa den ben kan kon sabi fa Gado wani taki sma musu tyari densrefi? Gado fruteri wi den sani disi? Efu a du disi, dan fa a du en?

Ma yu denki taki wan sma di e libi wan tu tenti yari nomo sa man fruteri ala libisma di de san na den prakseri fu Gado? Nôno. Ma wan sani di skrifi poti na tapu papira man du disi. Fu dati ede, a ben o de wan bun sani efu Gado ben o gebroiki wan buku fu tyari den prakseri fu en kon na krin, a no so? Wan owru buku de di e sori taki na Gado srefi meki sma skrifi en, èn a buku dati na Bijbel. Wan fu den skrifiman fu Bijbel e taki: „Na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti, fu leri sma na wan regtfardiki fasi” (2 Timoteyus 3:16). Kon meki wi go luku Bijbel moro fini fu si efu trutru a de a buku pe sma kan feni tru leri.

O owru a de?

Fu ala den prenspari buku di e taki fu kerkitori, Bijbel na wan fu den moro owruwan. Den fosi pisi fu Bijbel skrifi sowan 3500 yari pasa. A buku disi kaba skrifi na ini 98 G.T. * Aladi sowan 40 man skrifi Bijbel na ini wan pisi ten fu 1600 yari, toku ala den pisi fu a buku disi e kruderi nanga makandra. Disi de so, fu di a tru Skrifiman fu Bijbel, na Gado.

Na ini a heri historia, nowan buku no prati so furu leki Bijbel èn nowan buku no poti abra na ini someni tra tongo leki a buku disi. Ibri yari, sowan 60 milyun kopi fu a heri Bijbel, noso fu difrenti pisi fu Bijbel e prati gi sma. A heri Bijbel, noso pisi fu en vertaal na ini moro leki 2300 tongo.  Moro leki 90 procent fu ala libisma kan feni wan Bijbel, noso wan pisi fu Bijbel na ini a tongo fu den. A buku disi di de gi ala sma, no ben abi trobi fu sortu kondre wan sma komopo, noso fu sortu ras noso kulturu a de.

Fa a Bijbel seti?

Efu yu abi wan Bijbel, dan fu san ede yu no e opo en fu si fa a seti? * Go fosi na a bladzijde pe skrifi san de fu feni na ini a Bijbel. Na ini furu Bijbel disi skrifi na a bigin, èn drape yu kan si a nen fu ibriwan fu den buku èn sosrefi a nomru fu a bladzijde pe yu kan feni a buku. Yu o si tu taki Bijbel na wan bigi buku pe wan heri ipi pikin buku de na ini, èn ibriwan fu den pikin buku disi abi den eigi nen. A fosi buku na Genesis, èn a lasti buku na Openbaring, noso na Apokalips. Den Buku fu Bijbel prati na ini tu grupu. Sma e kari den fosi 39 buku, den Hebrew Buku fu Bijbel, fu di a moro bigi pisi fu den buku disi ben skrifi fosi na ini Hebrewtongo. Den lasti 27 buku ben skrifi na ini Grikitongo, èn sma e kari den buku disi den Griki Buku fu Bijbel. Son sma e kari den tu pisi disi na Owru Testamenti nanga a Nyun Testamenti.

Den Buku fu Bijbel abi kapitel nanga vers so taki yu kan feni sani makriki. Te wan tekst kari na ini a tijdschrift disi, dan yu e si taki nomru skrifi na baka a nen fu a Bijbel buku. A fosi nomru e sori yu na ini sortu kapitel yu musu luku, èn a tra nomru abi fu du nanga a vers. Fu eksempre, a tekst „2 Timoteyus 3:16” wani taki A di fu tu buku fu Timoteyus, kapitel 3, vers 16. Luku efu yu man feni a vers disi na ini Bijbel.

Yu no e agri taki a moro bun fasi fu kon sabi san skrifi na ini Bijbel na te yu abi a gwenti fu leisi en? Son sma ben feni en makriki fu leisi den Griki Buku fu Bijbel fosi, èn den bigin nanga a buku Mateyus. Te yu e leisi sowan dri te nanga feifi kapitel ibri dei, dan yu man leisi a heri Bijbel na ini wán yari. Ma fa yu kan sabi seiker efu den sani di yu leisi, na sani di komoto fu Gado trutru?

Yu kan poti frutrow na ini Bijbel?

Efu Bijbel na wan buku fu Gado di skrifi gi ala sma, dan a musu abi rai na ini di no e kon owru èn di e sori sma krin fa fu libi, a no so? Bijbel e sori taki Gado e frustan a fasi fa libisma de, awansi na ini sortu pisi ten den ben libi, èn te na a dei fu tide, sma kan gebroiki den gronprakseri di skrifi na ini Bijbel. Wi kan si disi bun na ini wan barinen takimakandra fu Yesus Krestes, a Sma di seti a tru Kresten bribi. A takimakandra disi skrifi na ini Mateyus kapitel 5 te go miti 7. Sma sabi a takimakandra disi tu leki a Bergitaki. A no e sori wi nomo fa fu feni tru koloku, ma a e sori wi sosrefi fa fu lusu trobi, fa fu begi, fa fu si materia gudu, èn wan lo tra sani moro. Na ini a takimakandra disi, èn sosrefi na ini den tra pisi fu Bijbel, wi e leisi krin san wi musu du èn san wi no musu du fu kan plisi Gado èn fu libi wan moro betre libi.

Wan tra sani di e sori fu san ede yu kan poti frutrow na ini Bijbel, na taki te na owru buku disi e taki fu sabidensi tori, a e taki den sani soifri leki fa den de. Fu eksempre, wan pisi ten ben de taki furu sma ben e bribi taki grontapu plata, ma Bijbel ben taki fu „a lontu fu grontapu” (Yesaya 40:22). * So a de tu taki, a pôpi sabiman Sir Isaac Newton ben fruklari taki krakti di e hari ala sani di de na loktu kon na ondro (sobun, a zwaartekracht), e meki taki den planeiti man tan anga na loktu. Ma moro leki 3000 yari na fesi, Bijbel ben taki na ini wan puwema dati ’grontapu e anga na noti’ (Yob 26:7). Sowan 3000 yari pasa wan puwema skrifi sosrefi di e taki fu a fasi fa watra e fadon kon na grontapu, èn e opo go na loktu baka. Luku san a puwema e taki: „Ala liba e lon go na a se, ma noiti a se e kon  furu. Na a presi pe den liba e komoto, na drape den e drai go baka” (Preikiman 1:7, New International Version). Iya, a Mekiman fu hemel nanga grontapu na a Skrifiman fu Bijbel tu.

Bijbel skrifi fu sani di pasa na ini a historia, èn disi e sori taki a buku disi komoto fu Gado. Den sani di Bijbel e fruteri, a no soso anansitori, soleki fa sma e denki. Te Bijbel e taki dati wan sani pasa, dan a e kari dei, nen, nanga presi. Fu eksempre, Lukas 3:1 e taki krin fu „a di fu tinafeifi yari di Tiberius Caesar ben tiri, di Pontius Pilatus ben de granman fu Yudea, èn Herodes ben de tiriman fu Galilea”.

Pikinmoro ala ten, a de so taki den historiaman fu fositen ben skrifi soso fu den feti di tiriman ben wini èn fu den bun sani di den tiriman disi ben du, ma Bijbel skrifiman ben skrifi sani soleki fa den pasa trutru, èn den ben de klariklari srefi fu taki fu den fowtu fu den. Fu eksempre, Kownu David fu Israel ben taki: „A sani di mi du, na wan bigi sondu. . . . Mi du wan tumusi don sani.” Den wortu disi skrifi na ini Bijbel, èn ala sma kan leisi den (2 Samuel 24:10). A Bijbel skrifiman Moses srefi ben skrifi fu a wán leisi di ensrefi no ben frutrow dorodoro tapu a tru Gado.—Numeri 20:12.

Bijbel abi ete wan sani di e buweisi taki a komoto fu Gado. A buweisi dati na den profeititori di kon tru, sobun historia di sma skrifi langa ten na fesi. Sonwan fu den profeititori disi abi fu du nanga Yesus Krestes. Fu eksempre, moro leki 700 yari bifo Yesus gebore, den Hebrew Buku fu Bijbel ben taki soifri taki a Sma di Gado ben pramisi ben o gebore „na Betlehem na ini Yudea”.​—Mateyus 2:1-6; Mika 5:2.

Luku ete wan eksempre. Na ini 2 Timoteyus 3:1-5, Bijbel e taki: „Na ini den lasti dei muilek ten o de di tranga fu pasa. Bika sma sa lobi densrefi nomo, den sa lobi moni, den sa denki tumusi furu fu densrefi, den sa abi heimemre, den sa taki ogri fu trawan, den sa trangayesi papa nanga mama, den no sa de nanga tangi, den no sa de loyaal; den no sa lobi trawan, den no sa wani meki kruderi, den sa de sma di e fruteri ogri-ati lei fu trawan, den no sa man dwengi densrefi, den sa du sani nanga trawan na wan ogri-ati fasi, den no sa lobi san bun; den sa de sma di e tori trawan, den sa du san densrefi wani, den sa abi bigimemre, den sa de sma di lobi prisiri na presi taki den lobi Gado; a o gersi leki den e dini Gado na wan getrow fasi, ma a libi fu den o sori taki dati no de so.” A no na a fasi disi furu sma e tyari densrefi na ini a ten disi? Den wortu disi skrifi na ini a yari 65 G.T., moro leki 1900 yari pasa.

San Bijbel e leri wi?

Te yu e leisi Bijbel, dan yu o man si taki a koni di de fu feni na ini Bijbel, kefalek moro a koni fu libisma. A e gi den yoisti piki tapu aksi soleki: Suma na Gado? Didibri de trutru? Suma na Yesus Krestes? Fu san ede sma e pina? San e pasa nanga wi te wi dede? Neleki fa ala sortu bribi nanga gwenti de, na so yu o kisi ala sortu piki tu fu den sma di abi den bribi nanga den gwenti disi. Ma Bijbel e gi wi a tru piki tapu den aksi disi èn tapu furu tra tori ete. Boiti dati, Bijbel na a moro bun tiri di sma kan feni fu sabi fa den musu libi nanga trawan èn fa den musu si tiriman. *

San Bijbel e tyari kon na krin fu den sani di Gado abi na prakseri gi grontapu èn gi a libisma famiri? Bijbel e pramisi: „Ete wan syatu pisi ten èn na ogri sma no sa de moro . . . Ma den safri-ati sma srefi sa abi grontapu leki a gudu fu den, èn trutru den sa feni switi prisiri na ini vrede di sa de pasa marki” (Psalm 37:10, 11). „Gado srefi sa de nanga [libisma]. Èn a sa figi ala watra puru na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba” (Openbaring 21:3, 4). „Den regtfardikisma srefi sa abi grontapu leki a gudu fu den, èn den sa libi na tapu fu têgo.”​—Psalm 37:29.

Bijbel e fruteri tu taki wan syatu pisi ten de ete, fosi orloku, takrudu, èn ogri di sma e du nanga tranga, sa kon na wan kaba. Siki, owrudei, nanga dede no sa de moro. Fu tru, sma sa man libi fu têgo na ini wan paradijs na grontapu. Disi na wan moi howpu trutru! Ala den sani disi e sori fa Gado lobi libisma!

 San yu o du?

Bijbel na wan moi presenti fu a Mekiman. San yu musu du nanga a buku disi? Wan man di kweki leki wan Hindu, ben e bribi taki efu den sani di Gado tyari kon na krin gi libisma, musu abi wini gi den, dan den tori dati musu abi fu du nanga sani di pasa sensi a bigin fu libisma. Di a kon frustan taki son pisi fu Bijbel owru moro leki den moro owru Hindu buku, namku den Vedas, dan a teki a bosroiti fu leisi Bijbel èn fu ondrosuku den sani di skrifi na ini. * Wan professor di e gi leri na wan universiteit na ini Amerkankondre, ben kon si tu taki bifo wan sma kan taki wan sani fu Bijbel, dan a fosi sani di a musu du, na fu leisi a buku disi di de a wan-enkri buku di someni sma na heri grontapu abi.

Te yu e leisi Bijbel èn e du den sani di a e leri wi, dan yu o kisi furu blesi. Bijbel e taki: „Koloku fu a sma . . . [di] en prisiri de na ini a wet fu Yehovah, èn na ini en wet a e leisi nanga wan safri sten dei nanga neti. Fu tru, a sa tron leki wan bon di prani pe watra e lon pasa, di e gi en eigi froktu te en ten doro, èn den wiwiri fu en no e kon flaw, èn ala san a e du sa waka bun” (Psalm 1:1-3). * Te yu e studeri Bijbel èn e prakseri dipi fu san a e taki, dan yu o firi koloku fu di na a fasi disi yu e kisi san yu abi fanowdu na yeye fasi (Mateyus 5:3). Bijbel o sori yu fa fu libi wan bun libi èn fa fu kakafutu gi problema na wan bun fasi. Iya, „furu pai de gi den sma di e hori [Gado en wet di skrifi na ini Bijbel]” (Psalm 19:11). Sosrefi, te yu e poti frutrow na ini den pramisi fu Gado, dan yu o kisi blesi na ini a ten disi, èn yu o abi howpu gi a tamara.

Bijbel e gi wi a deki-ati: „Neleki nyunyun pikin un musu kweki wan lostu gi a soifri merki di de na ini a wortu fu Gado” (1 Petrus 2:2). Wan nyunyun pikin abi merki fanowdu, èn a e sori taki a wani en nomonomo. We, wi sosrefi no man tan sondro a sabi fu Gado. Sobun, „kweki wan lostu” gi a Wortu fu en, noso angri fu en. Bijbel na wan buku di abi den tru leri fu Gado na ini. Poti en leki marki fu leisi Bijbel ibri dei. Yehovah Kotoigi na ini a birti fu yu o prisiri fu yepi yu fu kisi moro wini fu a studie fu yu. Wi e gi yu a switi kari fu go taki nanga den. Noso yu kan skrifi go na den sma di meki a tijdschrift disi.

[Futuwortu]

[Prenki na tapu bladzijde 7]

„Kweki wan lostu” gi Gado Wortu. Abi a gwenti fu studeri Bijbel

[Sma di abi a reti fu a prenki na tapu bladzijde 5]

NASA fowtow