Yu de getrow na ini ala sani?
Yu de getrow na ini ala sani?
„A sma di de getrow na ini a moro pikin sani, sa de getrow tu na ini furu sani.”—LUKAS 16:10.
1. San na wan fu den fasi fa Yehovah de getrow?
OITI yu si san e pasa nanga a skaduw fu wan bon na den difrenti pisi ten fu a dei? We, ibri tron a e kenki kon moro bigi noso moro pikin, èn ibri tron a de na wan tra presi! Nofo tron den muiti di libisma e du fu doro wan marki èn den pramisi fu den e kenki ibri tron, neleki wan skaduw. Ma na a tra sei, Yehovah Gado no e kenki, awinsi omeni ten e pasa. A disipel Yakobus e kari en „a Tata fu den sani di e skèin leti na hemel”, èn a e taki fu en: „A Tata no e kenki soleki fa skaduw e kenki” (Yakobus 1:17). Ala ten Yehovah de a srefi èn ala ten a de getrow, srefi na ini den moro pikin sani. A de „wan Gado fu getrowfasi”.—Deuteronomium 32:4
2. (a) Fu san ede wi musu ondrosuku wisrefi fu sabi efu wi de getrow? (b) Sortu aksi di abi fu du nanga getrowfasi wi sa luku?
2 Fa Gado e si a getrowfasi fu den anbegiman fu en? A e si en na a srefi fasi leki fa David ben e si en. A ben taki fu den getrow anbegiman: „Mi ai de na tapu den getrow-wan fu grontapu, so taki den kan tan nanga mi. A sma di e waka sondro fowtu, na a sma di sa dini mi” (Psalm 101:6). Iya, Yehovah e prisiri te den futuboi fu en de getrow. Fu dati ede, Paulus ben kan skrifi: „Fu di wi na futuboi, meki wi musu de getrow” (1 Korentesma 4:2). San a wani taki fu de getrow? Na ini sortu afersi fu a libi wi musu de getrow? Sortu blesi wi sa kisi te wi e „waka sondro fowtu”?
San a wani taki fu de getrow
3. San e sori efu wi de getrow?
3 „Moses ben de wan getrow dinari”, na so Hebrewsma 3:5 e taki. San meki taki a profeiti Moses ben de getrow? Di den ben e seti sani fu meki a tabernakel èn di den ben e bow en, dan „Moses ben du ala sani soleki fa Yehovah taigi en fu du. A ben du leti so” (Exodus 40:16). Leki anbegiman fu Yehovah, wi e sori taki wi de getrow te wi e dini en soleki fa a e aksi fu wi. A de krin taki disi wani taki dati wi musu tan getrow na Yehovah aladi wi e kisi fu du nanga muilek problema noso hebi tesi. Ma a no soso te wi horidoro na ini bigi tesi, dan dati e sori kaba taki wi de getrow. „A sma di de getrow na ini a moro pikin sani, sa de getrow tu na ini furu sani”, na so Yesus ben taki, „èn a sma di no de regtfardiki na ini a moro pikin sani, no sa de regtfardiki na ini furu sani” (Lukas 16:10). Wi musu tan getrow, srefi na ini afersi di no sori so prenspari.
4, 5. Te wi de getrow na ini „a moro pikin sani”, dan san dati e sori?
4 Tu sani de fu san ede a de prenspari fu de getrow ibri dei na ini „a moro pikin sani”. A fosi sani, na taki disi e sori fa wi e denki fu a reti di Yehovah abi fu tiri hemel nanga grontapu. Prakseri a tesi di a fosi libisma trowpaar, Adam nanga Eva ben kisi; a ben de wan tesi pe den ben musu sori taki den de getrow. A no ben de wan muilek sani fu gi yesi na a komando. Den ben mag nyan ala sortu nyanyan di ben de na ini a dyari fu Eden, ma a wan-enkri sani di den no ben mag du, na fu nyan fu a froktu fu wán bon nomo, namku „a bon fu sabi bun nanga ogri” (Genesis 2:16, 17). Te a fosi libisma trowpaar ben o gi yesi na wan getrow fasi na a makriki komando dati, dan den ben o sori taki den ben e horibaka gi a tirimakti fu Yehovah. Te wi e gi yesi na den komando fu Yehovah na ini wi aladei libi, dan dati e sori taki wi e horibaka gi Yehovah leki a Moro Hei Tiriman.
5 A di fu tu sani, na taki a fasi fa wi e tyari wisrefi na ini „a moro pikin sani” e sori fa wi o handri „tu na ini furu sani”, sobun fa wi o handri te wi e kisi fu du nanga moro bigi afersi na ini a libi. Nanga disi na prakseri, luku san ben pasa nanga Danièl èn nanga den dri getrow Hebrew mati fu en, namku Hananya, Misael, nanga Asarya. Sma ben tyari den go na ini katibo na Babilon na ini 617 b.G.T. Den boi disi ben yongu ete; kande den ben de tini di sma tyari den go na a oso fu Kownu Nebukadnesar. Drape sma „ben poti wan aladei porsi gi den fu den switisani fu a kownu èn fu a win di a ben dringi, iya, fu gi den nyanyan dri yari langa, so taki na a kaba fu a ten dati den ben sa kan tanapu na fesi a kownu”.—Danièl 1:3-5.
6. Sortu tesi ben miti Danièl nanga den dri Hebrew mati fu en na ini na oso fu a kownu fu Babilon?
6 Ma den nyanyan-sani di a kownu fu Babilon ben e gi den, ben kan de wan tesi gi den fo Hebrew yonkuman disi. A kan taki wan tu fu den switisani fu a kownu ben de sani di den no ben mag nyan soleki fa a Wet fu Moses ben taki (Deuteronomium 14:3-20). Kande den Babilonsma no ben e teki ten fu meki ala brudu fu a meti lon te den ben srakti en, èn efu den fo boi ben o nyan so wan meti, dan den ben o pasa a Wet fu Gado (Deuteronomium 12:23-25). A kan tu taki den sma ben gi a nyanyan leki ofrandi na kruktugado, soleki fa den anbegiman na Babilon ben gwenti du fosi den ben e nyan nanga makandra.
7. San kon na krin fu di Danièl nanga den dri mati fu en ben gi yesi na Gado?
7 A no de fu taki, dati den sma na ini a kownu-oso fu Babilon no ben e broko den ede nanga wet di ben tapu sma fu nyan son sani. Ma na ini den ati, Danièl nanga den mati fu en ben teki a fasti bosroiti fu no nyan nowan sani di ben o meki taki den no krin moro, soleki fa a Wet di Gado ben gi Israel ben sori. Disi ben de wan afersi pe den ben musu sori efu den ben o tan loyaal èn getrow na Gado. Fu dati ede den aksi fu kisi gruntu nanga watra nomo, èn den sma ben gi den san den aksi (Danièl 1:9-14). Son sma na ini a ten disi no e si a sani disi di den fo yonkuman du, leki wan prenspari sani. Ma a gi di den ben gi yesi na Gado, sori krin sortu sei den teki na ini a strei di abi fu du nanga a reti di Yehovah abi fu tiri hemel nanga grontapu.
8. (a) Sortu muilek tesi ben miti den dri Hebrewman pe den ben musu sori taki den de getrow? (b) San ben de a bakapisi fu a tesi, èn san disi e sori?
8 Fu di den dri mati fu Danièl tan getrow na ini wan sani di no ben e gersi so prenspari, meki den ben de srekasreka gi wan moro bigi tesi di ben o miti den. Teki kapitel 3 fu a Bijbel buku Danièl na yu fesi, èn leisi gi yusrefi fa den dri Hebrewman ben kisi dedestrafu fu di den ben weigri fu anbegi wan gowtu popki di Kownu Nebukadnesar ben poti fu sma anbegi dati. Di sma tyari den go na fesi a kownu, den Hebrewman taki nanga ala frutrow sortu fasti bosroiti den teki. Den taki: „Efu a musu de so, dan wi Gado di wi e dini, man frulusu wi. Fu a bun faya onfu èn fu yu anu, o kownu, a sa frulusu wi. Ma efu dati no de so, dan sabi, o kownu, taki den gado fu yu a no den wan di wi e dini, èn a gowtu popki di yu poti wi no sa anbegi” (Danièl 3:17, 18). Yehovah ben frulusu den? Den waktiman di trowe den yonkuman na ini a faya onfu, dede. Ma den dri getrow Hebrewman komoto libilibi na ini na onfu èn notinoti fu den ben bron srefi! A bun gwenti di den ben abi fu de getrow na ini pikin sani, ben sreka den fu de getrow di a muilek tesi dati miti den. Disi e sori taki a de tumusi prenspari fu de getrow na ini pikin sani, a no so?
Wi musu de getrow na ini a fasi fa wi e gebroiki „onregtfardiki gudu”
9. San Yesus taki na ini den vers lontu Lukas 16:10?
9 Yesus ben gi den arkiman fu en wan bun rai, fosi a ben taki fu a gronprakseri di e sori taki wan sma di de getrow na ini sani di no sori so prenspari, de getrow tu na ini prenspari sani. A ben taki: „Meki mati nanga yepi fu onregtfardiki gudu, so taki te yu no abi noti moro, dan den mati dati kan teki yu na ini den têgo tanpresi.” Baka dati a ben taki fu sma di de getrow na ini a moro pikin sani. Dan Yesus taki: „Fu dati ede, efu unu no ben de getrow na ini a fasi fa unu e gebroiki onregtfardiki gudu, dan suma sa gi unu a trutru gudu? . . . Nowan futuboi di e wroko na ini oso kan de wan srafu fu tu masra, bika a sa teige a wan èn lobi a trawan, noso a sa tan nanga a wan èn wisiwasi a trawan. Unu no kan dini Gado èn dini Gudu na a srefi ten.”—Lukas 16:9-13.
10. Fa wi kan sori taki wi de getrow na ini a fasi fa wi e gebroiki „onregtfardiki gudu”?
10 Soleki fa den vers lontu Lukas 16:10 e sori, dan a pisi tori disi abi fu du nanga a fasi fa wi e gebroiki „onregtfardiki gudu”, dati na a moni nanga den tra gudu di wi abi. Yesus e kari den onregtfardiki gudu, fu di den sortu gudu disi, spesrutu moni, na sani di sondu libisma e tiri. Boiti dati, te wan sma e gridi fu kisi gudu, dan a kan du wan lo onregtfardiki sani fu man kisi dati. Wi e sori taki wi de getrow, te wi e gebroiki den gudu fu wi na wan koni fasi. Na presi fu gebroiki den gi wisrefi nomo, wi wani gebroiki den fu horibaka gi Kownukondre afersi èn fu yepi sma di de na nowtu. Te wi de getrow na a fasi disi, dan wi e kon de mati fu Yehovah Gado nanga Yesus Krestes, den sma di abi „den têgo tanpresi”. Den sa teki wi na ini den presi disi, èn den sa gi wi têgo libi na ini hemel, noso na ini wan Paradijs na grontapu.
11. Fu san ede wi no musu draidrai fu fruteri den ososma taki wi e teki friwani bijdrage gi a wroko di Yehovah Kotoigi e du na heri grontapu?
11 Luku sosrefi san wi e gi sma efu wi e prati Bijbel nanga Bijbel publikâsi gi den te wi e meki a Kownukondre boskopu bekènti, èn te wi e fruteri den taki wi e teki friwani bijdrage gi a wroko di a pipel fu Yehovah e du na heri grontapu. Wi e gi den sma na okasi fu gebroiki den gudu fu den na wan koni fasi, a no so? Na a fosi presi, a gronprakseri na ini Lukas 16:10 abi fu du nanga a fasi fa wi e gebroiki den gudu fu wi, ma wi kan gebroiki a gronprakseri disi na ini tra afersi fu a libi tu.
Opregtifasi de prenspari trutru
12, 13. Na ini sortu afersi wi kan sori taki wi de opregti?
12 Na apostel Paulus ben skrifi: „Wi sabi trutru taki wi abi wan krin konsensi, fu di wi wani du ala sani na wan opregti fasi” (Hebrewsma 13:18). A no de fu taki dati „ala sani” wani taki sosrefi ala sani di abi fu du nanga moni afersi. Wi e pai den paiman fu wi èn a belasting moni fu wi biten èn na wan opregti fasi. Fu san ede? Wi e du disi fu di wi konsensi e taigi wi fu du so, èn na a fosi presi wi e du disi fu di wi lobi Gado èn fu di wi e gi yesi na den komando fu en (Romesma 13:5, 6). San wi e du te wi feni wan sani di no de fu wi? Wi e suku fu kon sabi suma abi a sani. Na wan moi okasi fu gi a sma kotoigi te wi o fruteri en fu san ede wi tyari a sani kon baka gi en!
13 Fu de getrow èn opregti na ini ala sani, wani taki tu dati wi musu de opregti te wi de na wrokope. Te wi de opregti na ini den sani di wi gwenti du na wrokope, dan sma o si sortu Gado wi e dini. Wi no e „nyan” ten fu di wi lesi. Na presi fu dati, wi e wroko tranga, neleki wi e wroko gi Yehovah (Efeisesma 4:28; Kolosesma 3:23). Na ini wan kondre na Europa, sma kon si taki wan di fu dri pisi fu den wrokoman e go aksi datra fu skrifi wan papira gi den di e sori taki den tan na oso fu di den siki, aladi dati no de so. Tru anbegiman fu Gado no e meki lei, soso fu di den no wani go na wroko. Son tron, Yehovah Kotoigi kisi wan moro hei posisi na wrokope fu di den wrokobasi si fa den e wroko tranga èn na wan opregti fasi.—Odo 10:4.
Wi musu de getrow na ini wi Kresten diniwroko
14, 15. San na wan tu fasi fa wi kan sori taki wi de getrow na ini a Kresten diniwroko?
14 Fa wi e sori taki wi de getrow na ini a diniwroko di wi kisi fu du? „Meki wi . . . gi Gado wan srakti-ofrandi fu prèise ala ten”, na so Bijbel e taki, „namku den froktu fu a mofo di e meki en nen bekènti na trawan” (Hebrewsma 13:15). A moro prenspari fasi fa wi kan sori taki wi de getrow na ini a preikiwroko, na fu teki prati na a wroko disi doronomo. Wi no musu gi pasi taki wan heri mun pasa, sondro taki wi gi kotoigi fu Yehovah èn fu den sani di a abi na prakseri. Te wi e teki prati na a preikiwroko doronomo, dan dati e yepi wi tu fu du a wroko fu wi moro bun, èn fu abi moro bun bakapisi na ini a wroko fu wi.
15 Wan tra moi fasi fa wi kan sori taki wi de getrow na ini a preikiwroko, na fu gebroiki den eksempre di skrifi na ini A Waktitoren nanga Wi Kownukondre diniwroko. Te wi e sreka wisrefi èn e gebroiki den eksempre disi noso tra eksempre di e wroko bun, dan wi e si taki wi e kisi moro bun bakapisi na ini a preikiwroko, a no so? Te wi miti wan sma di wani sabi moro fu a Kownukondre boskopu, dan wi e go baka wantewante na a sma fu fruteri en moro? Èn fa a de nanga den oso-bijbelstudie di wi ben kan bigin nanga sma di wani sabi moro? Den sma kan abi a frutrow taki wi o kon hori a bijbelstudie doronomo? Te wi e sori taki wi de getrow na ini a preikiwroko, dan disi kan meki taki wi nanga den sma di e arki wi, sa kisi libi.—1 Timoteyus 4:15, 16.
Wi musu tan aparti fu grontapu
16, 17. Na sortu fasi wi kan sori taki wi no de wan pisi fu grontapu?
16 Wan leisi di Yesus ben e begi Gado, dan a taki fu den bakaman fu en: „Mi gi den a wortu fu yu, ma grontapu e teige den, fu di den no de wan pisi fu grontapu, neleki fa mi no de wan pisi fu grontapu. Mi no e aksi yu fu puru den na grontapu, ma fu kibri den so taki na ogriwan no kan du den ogri. Den no de wan pisi fu grontapu, neleki fa mi no de wan pisi fu grontapu” (Yohanes 17:14-16). A kan taki wi teki a fasti bosroiti fu no de wan pisi fu grontapu na ini prenspari afersi, soleki a bosroiti fu no teki sei na ini feti, fu no teki prati na kerki fesa nanga kerki gwenti, èn fu no du hurudu. Ma fa a de nanga afersi di no sori so prenspari? A de so taki den fasi fu grontapu abi krakti na wi tapu, kande sondro fu wi sabi srefi? Fu eksempre, efu wi no e luku bun, dan a makriki fu go weri krosi di no e sori lespeki èn di no fiti! Efu wi wani de getrow, dan wi musu weri krosi èn moi wisrefi „na wan lespeki fasi èn nanga krin frustan” (1 Timoteyus 2:9, 10). Iya, „na nowan enkri fasi wi e du sani di e meki trawan fadon, so taki sma no sa taki takru fu a diniwroko fu wi; ma na ala fasi wi e buweisi taki wi na dinari fu Gado”.—2 Korentesma 6:3, 4.
17 Fu di wi wani gi grani na Yehovah, meki wi e weri krosi na wan lespeki fasi te wi e go na den gemeente konmakandra fu wi. Na so a de tu te wi e kon makandra na ini bigi grupu na den kring konmakandra nanga den kongres fu wi. A fasi fa wi weri krosi musu fiti na okasi èn a musu fiti ai. Disi de leki wan kotoigi gi sma di e luku fa wi e tyari wisrefi. Srefi den engel e luku san wi e du, neleki fa den ben e luku san Paulus nanga den Kresten mati fu en ben e du (1 Korentesma 4:9). Fu taki en leti, ala ten wi musu weri krosi na wan fasi di fiti. Son sma no e si en leki wan prenspari sani fu de getrow na ini a fasi fa den e weri krosi, ma na ini Gado ai disi na wan prenspari sani.
Den blesi di wi sa kisi te wi de getrow
18, 19. Sortu blesi wi sa kisi te wi de getrow?
18 Bijbel e taki dati Kresten na ’bun futuboi fu a no-frudini bun-ati di Gado sori na difrenti fasi’. Fu dati ede, den „no man dini sondro a krakti di Gado e gi” (1 Petrus 4:10, 11). Boiti dati, wi leki futuboi kisi wan sani di no de fu wisrefi, iya, na difrenti fasi Gado sori wi en no-frudini bun-ati, èn wan fu den fasi fa a du dati na fu gi wi a preikiwroko. Aladi wi e meki muiti fu sori taki wi na bun futuboi, wi e frutrow tapu a krakti di Gado e gi, iya, „krakti di bigi pasa marki” (2 Korentesma 4:7). Disi na wan tumusi moi fasi fa wi e leri fu sreka wisrefi gi iniwan tesi di kan miti wi na ini a ten di e kon!
19 A psalm skrifiman ben singi: „O lobi Yehovah, ala un loyaalwan fu en. Na den getrow sma Yehovah e kibri” (Psalm 31:23). Meki wi abi a fasti bosroiti fu sori taki wi de getrow, fu di wi abi na overtoigi taki Yehovah na „wan Frulusuman fu ala sortu sma, spesrutu fu getrow sma”.—1 Timoteyus 4:10.
Yu e memre disi ete?
• Fu san ede wi musu de „getrow na ini a moro pikin sani”?
• Fa wi kan sori taki wi de getrow
te wi e du sani na wan opregti fasi?
te wi de na ini a preikiwroko?
te wi e tan aparti fu grontapu?
[Aksi fu a tori disi]
[Prenki na tapu bladzijde 26]
Den ben de getrow na ini a moro pikin sani èn den ben de getrow tu na ini furu sani
[Prenki na tapu bladzijde 29]
„Du ala sani na wan opregti fasi”
[Prenki na tapu bladzijde 29]
Wan moi fasi fa wi kan sori taki wi de getrow, na te wi e sreka wisrefi bun gi a preikiwroko
[Prenki na tapu bladzijde 30]
Weri krosi èn moi yusrefi na wan lespeki fasi