Aksi fu leisiman

A de so taki a wortu „kande” na Sefanya 2:3 wani taki dati futuboi fu Gado no abi a dyaranti taki den sa kisi têgo libi?

A tekst disi e taki: „Suku Yehovah, ala un safri-atisma fu grontapu, di e hori densrefi na den krutubosroiti fu En. Suku regtfardikifasi, suku safri-atifasi. Kande unu sa kisi kibri tapu a dei fu Yehovah en atibron.” Fu san ede a tekst disi e taki „kande”?

Fu man frustan fa Yehovah sa handri nanga den getrow-wan fu en te Armagedon doro, dan a bun fu memre san Bijbel e leri. Bijbel e sori wi san Gado o du gi den wan di e dede bifo a krutudei dati doro. Son sma sa kisi wan opobaka fu libi na ini hemel leki yeye di noiti no man dede, aladi trawan sa kisi wan opobaka na grontapu pe den sa abi a howpu fu libi fu têgo na ini Paradijs (Yohanes 5:28, 29; 1 Korentesma 15:53, 54). Efu Yehovah e memre èn e blesi den loyaalwan fu en di dede fosi Armagedon, dan a no de fu taki dati a sa handri na a srefi fasi nanga den futuboi fu en di sa de na libi tapu a dei fu en atibron.

Den wortu di na apostel Petrus skrifi nanga yepi fu santa yeye, e gi deki-ati tu. A ben skrifi: „[Gado] ben kibri Noa, wan preikiman fu regtfardikifasi, makandra nanga seibi tra sma, di a ben tyari wan bigi frudu kon na tapu wan libimakandra fu ogri sma; sosrefi, a ben krutu Sodom nanga Gomora fu di a bron den tron asisi, . . . èn a frulusu a regtfardiki man Lot . . . Yehovah sabi fa fu frulusu sma di e dini en na wan getrow fasi te tesi miti den, ma a sabi tu fa fu libi onregtfardiki sma gi a krutudei, fu koti den puru” (2 Petrus 2:5-9). Aladi Yehovah tyari pori kon tapu den ogrisma fu fositen, toku a kibri a libi fu Noa nanga Lot di ben e dini en na wan getrow fasi. Te Yehovah o tyari pori kon tapu den ogrisma na Armagedon, dan a sa kibri sma tu di e dini en na wan getrow fasi. „Wan bigi ipi” fu regtfardiki sma sa tan na libi.​—Openbaring 7:9, 14.

We, soleki fa a sori, dan a wortu „kande” na ini Sefanya 2:3 no musu meki wi denki taki Gado no man kibri den wan di a feni bun. Na presi fu dati, na te wan sma e bigin suku regtfardikifasi nanga safri-atifasi, dan fosi wi kan taki dati kande a sma dati o kisi kibri tapu a dei fu Yehovah en atibron. Wan sma sa kisi kibri soso te a e tan suku safri-atifasi nanga regtfardikifasi.​—Sefanya 2:3.

[Prenki na tapu bladzijde 31]

„Yehovah sabi fa fu frulusu sma di e dini en na wan getrow fasi te tesi miti den”