Bijbel kan yepi yu fu de nanga prisiri

ALADI Bijbel a no wan buku di e gi rai fa fu dresi siki, toku a e taki sortu krakti den firi fu sma, efu na bun noso takru firi, kan abi tapu a frustan èn tapu a skin fu den. „Wan ati di e prisiri e du bun fu di a de wan dresi”, na so Bijbel e taki, „ma wan yeye di brokosaka e drei den bonyo.” Wi e leisi moro fara: „Yu sori taki yu lasi-ati tapu a dei fu banawtu? A krakti fu yu sa de pikinso nomo” (Odo 17:22; 24:10). Te wi e firi brokosaka, dan dati kan meki wi lasi krakti so taki wi e kon firi swaki, èn sani di trawan e du kan hati den firi fu wi makriki. Boiti dati, wi no sa du muiti fu tyari wan kenki kon na a situwâsi fu wi, noso fu suku yepi.

Te wan sma lasi-ati, dan dati kan abi krakti tu tapu a yeyefasi fu en. Sma di feni taki den no warti noti, furu tron feni taki noiti den kan abi wan bun banti nanga Gado, so taki a kan feni den bun. Simone di ben kari na ini na artikel na fesi, ben e tweifri efu a ben de „a sortu sma di Gado ben o feni bun”. Ma te wi e luku Gado Wortu, Bijbel, dan wi e si taki Gado abi wan bun denki fu den wan di e pruberi fu plisi en.

Gado e broko en ede nanga wi trutru

Bijbel e fruteri wi taki „Yehovah de krosibei fu den wan di lasi-ati; èn den wan di e firi brokosaka, a e frulusu.” Gado no e wisiwasi „wan ati di broko èn di masi”, ma a e pramisi taki a o ’gi a yeye fu den sakafasiwan krakti baka èn taki a o gi na ati fu den sma di brokosaka krakti baka’.​—Psalm 34:18; 51:17; Yesaya 57:15.

Wan leisi, Gado en Manpikin, Yesus, ben  feni en fanowdu fu meki den disipel fu en kon frustan taki Gado e si den bun fasi di den futuboi fu En abi. A gebroiki wan agersitori fu fruteri den taki Gado e si te wan pikin fowru e fadon na gron, aladi furu sma no ben o broko den ede srefisrefi nanga a sani dati. A meki sma kon frustan sosrefi taki Gado sabi a moro pikin sani fu libisma, iya, a sabi srefi omeni wiwiri de na tapu den ede. Na a kaba fu na agersitori Yesus taki: „Fu dati ede no frede: un warti moro leki wan heri ipi pikin fowru” (Mateyus 10:29-31). * Yesus ben sori taki awansi fa son sma e denki fu densrefi, toku a de so trutru taki libisma di abi bribi, warti na ini Gado ai. Fu taki en leti, na apostel Petrus e memre wi taki „Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun.”​—Tori fu den Apostel 10:34, 35.

Tan abi wan yoisti denki fu sani

Gado Wortu e gi wi deki-ati fu leri abi wan yoisti denki fu wisrefi. Nanga yepi fu santa yeye, na apostel Paulus skrifi: „Fu di Gado ben sori mi no-frudini bun-ati, meki mi e taigi un alamala drape fu no denki moro fu unsrefi leki san de fanowdu, ma fu gebroiki un frustan na wan koni fasi, èn ibriwan fu unu musu du dati nanga a bribi di Gado gi unu.”​—Romesma 12:3.

A no de fu taki dati wi no wani denki so furu fu wisrefi taki wi e kisi bigimemre, ma na a tra sei wi no wani denki tu taki wi no warti noti. Na presi fu dati, wi musu leri fu abi wan yoisti denki fu wisrefi, iya, wi musu hori na prakseri taki wi abi bun fasi, ma wi no musu frigiti taki wi abi swakifasi tu. Wan Kresten uma ben taki en so: „Mi a no wan takru sma; ma mi abi mi fowtu tu. Mi abi mi bun sei, ma mi abi mi fruferi sani tu, neleki fa ala sma abi dati.”

A no de fu taki dati a no makriki fu kon abi wan yoisti denki fu wisrefi. Kande wi kon kisi so wan takru denki fu wisrefi na ini den someni yari di pasa, taki wi sa abi fu meki bun furu muiti fu tapu nanga a denki dati. Toku Gado kan yepi wi fu kenki den fasi fu wi, èn sosrefi a fasi fa wi e denki fu a libi. Fu taki en leti, na dati Gado Wortu e gi wi deki-ati fu du. A Wortu disi e taki: „Kenki a fasi fa unu ben de fosi; dati na a fasi fa unu ben gwenti tyari unsrefi, iya, a fasi disi kon pori fu di unu ben abi takru lostu; ma . . . a krakti di e pusu un frustan musu meki unu kon nyun, èn un musu tron wan nyun sma di de soleki fa Gado wani, nanga trutru regtfardikifasi èn loyaalfasi.”​—Efeisesma 4:22-24.

Te wi e meki muiti fu kenki ’a krakti di e pusu wi frustan’, namku a denki di abi moro bigi krakti tapu wi frustan, dan wi sa tron sma di no e denki tumusi takru fu sani moro, ma wi sa tron sma di abi wan bun denki fu sani. Lena, di kari na ini na artikel na fesi, kon frustan taki solanga a no ben tapu nanga a denki taki nowan sma lobi en èn taki nowan sma wani yepi en, dan noiti a ben o man kenki a  fasi fa a ben e denki fu ensrefi. Sortu bun rai na ini Bijbel yepi Lena, Simone, nanga tra sma fu kon kisi wan moro bun denki fu densrefi?

Bijbel gronprakseri di e yepi wi fu de nanga prisiri

„Trowe yu hebi na tapu Yehovah, èn ensrefi sa horibaka gi yu” (Psalm 55:22). Na a fosi presi, begi kan yepi wi fu feni trutru prisiri na ini a libi. Simone e taki: „Ibri tron te mi e firi brokosaka, mi e begi Yehovah fu yepi mi. Na ini ala situwâsi mi firi taki a gi mi krakti èn taki a yepi mi.” Te a psalm skrifiman e gi wi deki-ati fu trowe wi hebi na tapu Yehovah, dan fu taki en leti, a e memre wi taki a no de so nomo taki Yehovah e broko en ede nanga wi, ma a e si wi sosrefi leki sma di warti fu kisi yepi fu en. Na a neti fu a Paskafesa fu 33 G.T., den disipel fu Yesus ben e sari fu di Yesus taigi den taki heri esi a ben o gowe libi den. Yesus gi den deki-ati fu begi a Tata, èn baka dati a taki: „Aksi, dan unu o kisi, so taki unu sa prisiri pasa marki.”​—Yohanes 16:23, 24.

„Wan sma sa de moro koloku te a e gi sani, leki te a e kisi sani” (Tori fu den Apostel 20:35). Soleki fa Yesus ben leri sma, a de prenspari taki wi e gi sani fu man feni trutru prisiri na ini a libi. Te wi e du soleki fa a tru tori disi na ini Bijbel e taki, dan dati sa yepi wi fu poti prakseri na den nowtu fu trawan, na presi taki wi e poti prakseri na wi eigi swakifasi. Te wi e yepi trawan èn wi e si fa den e warderi dati, dan a e meki wi firi bun. Lena abi na overtoigi taki a prati di a e prati a bun nyunsu fu Bijbel doronomo nanga trawan, e yepi en na tu difrenti fasi. A e taki: „Na a fosi presi, a e meki mi firi koloku èn prisiri soleki fa Yesus ben taki. Na a di fu tu presi, trawan e taigi mi furu tron fa den e warderi san mi e du gi den, èn dati e yepi mi fu firi prisiri.” Te wi e gi bogobogo fu wi ten, wi krakti, nanga tra sani di wi abi, dan wi sa ondrofeni taki den wortu fu Odo 11:25 tru srefisrefi. Drape skrifi: „A sma di e kowru na ati fu trawan pasa marki, sa kisi kowru-ati pasa marki tu.”

„Ala den dei fu den mofinawan de takru; ma a sma di e firi prisiri na ini en ati, abi wan fesa nyanyan ala ten” (Odo 15:15). Wi alamala kan bosroiti fa wi wani denki fu wisrefi èn fu a situwâsi fu wi. Wi kan de leki den wan di e denki takru fu ala sani èn di e firi sari, noso wi kan bosroiti fu abi wan bun denki fu sani, iya, wi kan firi „prisiri na ini wi ati” èn firi switi neleki te wi de na wan fesa. Simone e taki: „Mi e meki ala muiti fu tan abi wan bun denki fu sani. Mi e tan studeri Bijbel, mi e teki prati na a preikiwroko doronomo, èn mi e horidoro na ini begi. Mi e pruberi sosrefi fu abi demakandra nanga sma di abi wan bun denki fu sani, èn mi e pruberi fu yepi trawan te den abi yepi fanowdu. Te wan sma abi a denki disi, dan dati e meki taki a firi prisiri trutru, soleki fa Bijbel e gi wi deki-ati fu du: „Abi prisiri na ini Yehovah èn de nanga prisiri, unu regtfardikiwan; èn bari wan prisiri babari, un alamala di abi opregti ati.”​—Psalm 32:11.

„Wan trutru mati abi lobi ala ten èn a de wan brada di en mama meki fu te banawtu de”  (Odo 17:17). Te wi e fruteri wan lobiwan fu wi san de na tapu wi ati, noso te wi e suku rai na wan sma di wi e frutrow, dan dati kan yepi wi fu basi den takru denki di wi abi fu wisrefi, èn fu puru den na wi ede so taki den no e meki wi firi brokosaka. Te wi e taki nanga trawan, dan den kan yepi wi fu si sani na a yoisti fasi èn fu abi wan bun denki fu sani. „A e yepi trutru te mi e taki fu den firi fu mi”, na so Simone e taki. „Yu musu taigi wan sma fa yu e firi. Furu tron a nofo kaba te yu e fruteri wan trawan san de tapu yu ati.” Te yu e du dati, dan dati sa yepi yu fu kon si taki den wortu fu na odo disi de tru: „Tumusi furu broko-ede sa meki wan sma lasi-ati, ma a bun wortu, na dati sa meki na ati prisiri.”​—Odo 12:25.

San yu kan du

Wi poti prakseri na soso wan tu fu den furu moi èn bun gronprakseri fu Bijbel di kan yepi wi fu basi den takru denki di wi abi fu wisrefi èn fu feni trutru prisiri. Efu yu na wan fu den sma di abi a firi taki yu no warti nofo, dan wi e gi yu deki-ati fu ondrosuku Gado Wortu, Bijbel, moro fini. Leri fu denki bun fu yusrefi èn fu a banti di yu abi nanga Gado. Wi e howpu trutru taki den rai na ini Gado Wortu sa yepi yu fu feni trutru prisiri na ini ala san yu e du.

[Futuwortu]

[Prenki na tapu bladzijde 7]

Te wi e libi akruderi Bijbel gronprakseri, dan dati sa yepi wi fu de nanga prisiri