Wan langa waka di ben abi bun bakapisi

DISI na wan ondrofenitori di komoto fu a Demokrasia Republiek Kongo. A tori disi abi fu du nanga tu sisa di komoto fu wán mamabere. Den ben bosroiti fu teki wan langa waka na ini wan kontren pe orloku de doronomo. Den ben wani go na a „Gi Gado glori” Distrikt Kongres di ben o hori na ini a foto Lisala. Boiti taki den ben e fruwakti fu leri sani fu Gado èn fu abi demakandra nanga Kresten brada nanga sisa na a kongres, den ben e fruwakti sosrefi fu miti brada nanga sisa fu a bijkantoro fu Yehovah Kotoigi na ini Kinsyasa. Fu di wan borgufeti ben de na ini a kondre, meki furu yari langa den no ben miti nowan sma fu a bijkantoro. Dati meki den ben wani teki na okasi disi fu miti den.

Nanga kruyara den tu sisa disi komoto fu Basankusu, a foto pe den gebore, fu go na Lisala, èn dati ben de wan waka fu sowan 300 kilometer. Den ben musu waka na ini busi, èn den ben musu pasa tu liba. A waka disi teki dri wiki. Ala tu sisa de na ini a furuten diniwroko, wan fu den e dini 3 yari kaba leki pionier èn a trawan e dini 19 yari kaba. Dati meki di den ben de na pasi fu go na a kongres, den teki na okasi fu prati a Kownukondre bun nyunsu gi trawan. Den gebroiki sowan 110 yuru fu preiki gi den sma di den ben e miti na pasi, èn den prati 200 traktaat nanga 30 tijdschrift.

Di den ben de na tapu a liba, den ben musu pasa na mindri nijlpaard (bigi sortu watrabofru) nanga bigi kaiman di lai na ini a kontren dati. Den no ben man waka nanga boto te neti, bika yu no man si pe yu e go te dungru fadon! Den pasa wan lo presi tu pe srudati e tapu sma na pasi fu ondrosuku den wagi nanga tra sani fu den.

A waka disi ben de wan bun langawan èn den tu sisa ben weri srefisrefi, ma toku den ben breiti taki den meki a muiti fu go. Den ala tu ben de nanga tangi srefisrefi èn den ben breiti taki den ben de na a kongres na ini Lisala. Na ati fu den ben de fayafaya gi a waarheid, èn den kisi deki-ati di den ben de makandra nanga den 7000 brada nanga sisa di ben drape. Baka a kongres, den go baka na oso èn den miti den srefi tyalensi di den ben miti na pasi na ini a bigin. Di den doro na oso, den kon si taki den famiriman fu den ben de bunbun ete èn taki noti no ben pasa nanga den.