Yehovah e „pai den sma di e suku en fayafaya”

„A sma di e anbegi Gado musu bribi taki a de trutru èn taki a sa pai den sma di e suku en fayafaya.”​—HEBREWSMA 11:6.

1, 2. Fu san ede a kan taki son futuboi fu Yehovah e denki takru fu densrefi?

„SOWAN 30 yari kaba mi de wan Kotoigi fu Yehovah, ma noiti mi ben abi a firi taki mi warti fu de wan Kotoigi”, na so Barbara e taki. * „Aladi mi ben du a pionierwroko èn aladi mi ben kisi furu tra spesrutu wroko fu du, toku nowan fu den sani dati ben gi mi a firi taki mi warti trutru fu de wan Kotoigi.” Keith abi a srefi denki disi tu. A e taki: „Ten na ten mi ben e firi taki mi no warti nofo, fu di futuboi fu Yehovah abi furu sani di e meki taki den de koloku, ma mi no ben de koloku. Èn efu dati no sari ete, a heri situwâsi disi ben meki mi firi leki mi du wan ogri sani.”

² Furu getrow futuboi fu Yehovah na ini a ten di pasa èn na ini a ten disi, feti nanga den srefi sortu firi disi. Oiti yu firi so tu? Kande yu e bruya fu di furu problema e miti yu, aladi a gersi leki den Kresten brada nanga sisa fu yu e prisiri na ini a libi, den no abi nowan broko-ede, èn den de koloku. A bakapisi kan de taki yu e firi leki Yehovah no feni yu bun èn taki yu no warti fu a poti prakseri na yu. No bigin denki wantewante taki na so sani de trutru. Bijbel e gi wi a dyaranti disi: „[Yehovah] no ben abi bita-ati noso tegu gi a nowtu fu a sma di e pina; a no tapu en fesi gi en, èn di a bari  kari en fu kisi yepi, a yere en” (Psalm 22:24). Den wortu disi, di de wan profeititori di abi fu du nanga a Mesias, e sori taki Yehovah no e yere den getrow-wan fu en nomo, ma a e blesi den sosrefi.

3. Fu san ede a seti fu sani disi abi krakti tapu wi tu?

³ A seti fu sani disi abi krakti tapu ibriwan sma, srefi tapu a pipel fu Yehovah. Wi e libi na ini wan grontapu di de ondro a makti fu a moro bigi feanti fu Yehovah, namku Satan Didibri (2 Korentesma 4:4; 1 Yohanes 5:19). Na presi taki den futuboi fu Yehovah e kisi kibri na wan wondru fasi, dan te yu luku en bun, den de a moro prenspari grupu sma di Satan wani du ogri (Yob 1:7-12; Openbaring 2:10). Fu dati ede, teleki a reti ten fu Gado doro, wi musu ’horidoro te wi de na ini banawtu’ èn wi musu „tan begi” nanga na overtoigi taki Yehovah e broko en ede nanga wi (Romesma 12:12). Wi no musu gi pasi taki a grontapu disi meki wi kisi a denki taki Yehovah, wi Gado, no lobi wi!

Eksempre fu sma na ini owruten di ben e horidoro

4. Gi wan tu eksempre fu getrow futuboi fu Yehovah di ben horidoro na ini muilek situwâsi.

⁴ Na ini owruten, furu futuboi fu Yehovah ben abi fu horidoro na ini muilek situwâsi. Fu eksempre, Hana „en ati ben broko” fu di a no ben abi nowan pikin, èn fu dati ede a ben abi a firi taki Gado frigiti en (1 Samuel 1:9-11). Di a Kownu-uma Iseibel ben suku fu kiri Elia, dan Elia ben kon frede èn a taigi Yehovah na ini begi: „A nofo! Tyari mi sili gowe now, o Yehovah, bika mi no moro bun leki den fositen tata fu mi” (1 Kownu 19:4). Èn na apostel Paulus ben musu fu firi brokosaka trutru fu a sondu skin di a ben abi, bika a ben taki: „Te mi wani du bun, dan ogri de na ini mi.” A ben taki tu: „Ke, pôti fu mi!”​—Romesma 7:21-24.

5. (a) Fa Hana, Elia, nanga Paulus ben kisi blesi? (b) Sortu trowstu Gado Wortu e gi wi te wi e feti nanga firi soleki sari nanga lasi-ati?

⁵ A no de fu taki dati wi sabi taki Hana, Elia, nanga Paulus horidoro na ini a diniwroko gi Yehovah, èn A ben gi den furu blesi (1 Samuel 1:20; 2:21; 1 Kownu 19:5-18; 2 Timoteyus 4:8). Toku, den ben e feti nanga ala sortu firi di libisma abi, firi soleki sari, lasi-ati, nanga frede. Fu dati ede, a no musu fruwondru wi taki ten na ten wi abi den sortu firi disi. Ma san yu kan du te den broko-ede fu a libi e meki taki yu e aksi yusrefi efu Yehovah lobi yu trutru? Gado Wortu kan gi yu trowstu. Fu eksempre, na ini na artikel fosi a wan disi, wi ben luku san Yesus ben wani tyari kon na krin di a taki dati Yehovah ’teri srefi ala den wiwiri na tapu wi ede’ (Mateyus 10:30). Den wortu dati di e gi deki-ati, e sori taki Yehovah e poti prakseri trutru na ibriwan fu den futuboi fu en. Memre sosrefi na agersitori di Yesus ben gi fu den pikin fowru. We, efu nowan fu den pikin fowru disi e fadon na gron sondro taki Yehovah sabi, dan yu denki taki a no ben o arki yu te yu e begi en?

6. Fa Bijbel kan gi trowstu na sma di e feti nanga firi soleki sari nanga lasi-ati?

⁶ A de so trutru taki wi leki sondusma kan de warti na ini na ai fu na almakti Mekiman, Yehovah Gado? Iya! Fu taki en leti, furu bijbeltekst de di e gi wi a dyaranti taki disi de so. Te wi e go prakseri fu den tekst disi, dan wi kan taki den srefi wortu fu a psalm skrifiman di ben taki: „Te den prakseri fu mi di e trobi mi, ben kon furu na ini mi ati, dan mi sili ben kon firi korostu fu di yu ben trowstu mi” (Psalm 94:19). Meki wi go luku wan tu fu den wortu fu trowstu na ini Gado Wortu, di sa yepi wi fu frustan moro bun taki wi warti na ini Gado ai èn taki a sa blesi wi te wi e tan du a wani fu en.

A „spesrutu gudu” fu Yehovah

7. Sortu profeititori di e gi deki-ati, Yehovah ben meki Maleaki taigi na ogri nâsi Israel?

⁷ Den Dyu na ini a di fu feifi yarihondro b.G.T. ben de na ini wan tumusi muilek situwâsi. Den priester ben e teki meti di no fiti fu gi leki ofrandi, èn den ben e gebroiki den  meti disi leki srakti-ofrandi na tapu na altari fu Yehovah. Krutuman ben e teki partèi na ini krutu afersi. Na ala sei sma ben e du afkodrei, den ben e lei, den ben e bedrigi makandra, èn den ben e du hurudu (Maleaki 1:8; 2:9; 3:5). Toku Maleaki ben taki wan moi profeititori di ben abi fu du nanga a nâsi disi di ben e du ogri sondro fu syen srefi. Baka wan pisi ten, Yehovah ben o meki en pipel kon bun baka. Wi e leisi: „’Fu tru den sa kon de fu mi’, na so Yehovah fu den legre taki, ’na a dei di mi e meki wan spesrutu gudu. Èn mi sa abi sari-ati nanga den, neleki fa wan man abi sari-ati nanga en manpikin di e dini en.’”​—Maleaki 3:17.

8. Fu san ede wi kan taki dati Maleaki 3:17 abi fu du nanga a bigi ipi sosrefi?

⁸ A disiten kontru fu a profeititori fu Maleaki abi fu du nanga Kresten di salfu nanga santa yeye èn di tron wan yeye nâsi fu 144.000 sma. A nâsi dati de trutru „wan spesrutu gudu”, noso „wan pipel di de wan spesrutu gudu” gi Yehovah (1 Petrus 2:9). A profeititori fu Maleaki kan de wan deki-ati tu gi „a bigi ipi” di e ’tanapu na ini langa weti krosi na fesi a kownusturu èn na fesi a Pikin Skapu’ (Openbaring 7:4, 9). Makandra nanga den salfuwan, den e tron wán ipi di abi wán Skapuman, namku Yesus Krestes.​—Yohanes 10:16.

9. Fu san ede a pipel fu Yehovah de „wan spesrutu gudu” gi en?

⁹ Fa Yehovah e si den wan di bosroiti fu dini en? Soleki fa Maleaki 3:17 e taki, dan a e si den na a srefi fasi fa wan lobi-ati papa e si en manpikin. Èn luku sortu moi wortu a e gebroiki te a e taki fu en pipel; a e kari den „wan spesrutu gudu”. Na ini son Bijbel den wortu disi vertaal nanga „den wan fu mi”, „a moro warti sani fu mi”, èn „den diriston fu mi”. Ma fu san ede den sma di e dini Yehovah, de so spesrutu gi en dan? We, wan sani, na fu di a de wan Gado di abi warderi (Hebrewsma 6:10). A e kon krosibei na den wan di e dini en nanga den heri ati, èn a e si den leki spesrutu sma.

10. Fa Yehovah e kibri en pipel?

¹⁰ Yu abi wan sani di yu e si leki wan spesrutu gudu? Yu no e meki muiti fu kibri a sani disi? Na so Yehovah e du tu nanga a „spesrutu gudu” fu en. A tru taki a no e kibri en pipel gi ala tesi èn gi ala sari sani di e pasa na ini a libi (Preikiman 9:11). Ma Yehovah man kibri en getrow futuboi na yeye fasi, èn a sa du dati tu. A e gi den a krakti di den abi fanowdu fu horidoro te iniwan tesi e miti den (1 Korentesma 10:13). Fu dati ede Moses ben taigi den Israelsma, na owruten pipel fu Gado: „Abi deki-ati, tanapu kánkan. . . . Yehovah yu Gado na a wan di e hari go nanga yu. A no sa libi yu na baka, a no sa gowe libi yu krinkrin” (Deuteronomium 31:6). Yehovah e blesi en pipel. Gi en, den de „wan spesrutu gudu”.

Yehovah, ’e blesi sma’

11, 12. Te wi e frustan fa Yehovah e blesi wi, dan fa dati kan yepi wi fu no tweifri?

¹¹ Wan tra sani di e sori taki den futuboi fu Yehovah warti gi en trutru na taki a e blesi, noso pai den. A ben taigi den Israelsma: „’Grantangi, tesi mi nanga dati’, Yehovah fu den legre taki, ’efu mi no sa opo den sroisi fu hemel gi unu èn trutru kanti wan blesi kon na unu tapu teleki nowan sani e mankeri moro’” (Maleaki 3:10). A no de fu taki dati te fu kaba Yehovah o blesi den futuboi fu en nanga têgo libi (Yohanes 5:24; Openbaring 21:4). A tumusi warti pai disi e sori omeni lobi Yehovah abi èn a e sori taki a lobi fu gi sani trutru. A e  sori sosrefi taki den sma di bosroiti fu dini en, warti gi en trutru. Te wi e leri fu si Yehovah leki wan sma di lobi fu blesi wi, dan dati kan yepi wi fu no tweifri na a banti di wi abi nanga Gado. Fu taki en leti, Yehovah e gi wi deki-ati fu si en leki a Sma di e pai, noso e blesi libisma! Paulus ben skrifi: „A sma di e anbegi Gado musu bribi taki a de trutru èn taki a sa pai den sma di e suku en fayafaya.”​—Hebrewsma 11:6.

¹² A no de fu taki dati wi e dini Yehovah fu di wi lobi en, èn no fu di a pramisi fu blesi wi. Toku, a no de wan fowtu sani fu abi a howpu taki a o blesi wi, èn disi no e sori taki wi e denki wisrefi nomo (Kolosesma 3:23, 24). Fu di Yehovah lobi den wan di e suku en fayafaya, èn fu di den warti gi en trutru, meki En fosi e du muiti fu kon krosibei na den èn fu blesi den.

13. Fu san ede a lusu-paiman na a moro prenspari buweisi taki Yehovah lobi wi?

¹³ A moro prenspari sani di e sori taki wi warti trutru na ini Yehovah ai, na a gi di a gi wi a lusu-paiman. Na apostel Yohanes ben skrifi: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). A seti fu a frulusu-ofrandi fu Yesus Krestes e meki wi si krin taki a no tru taki wi no warti na ini Yehovah ai èn taki a no lobi wi. Iya, efu Yehovah ben pai so furu gi wi, namku a libi fu en wan-enkri gebore Manpikin, dan a musu fu de so taki a lobi wi trutru.

14. San e sori fa Paulus ben e si a lusu-paiman?

¹⁴ Fu dati ede, te yu e firi leki yu no warti noti, dan prakseri a lusu-paiman. Iya, yu musu si disi leki wan kado di Yehovah gi yu spesrutu. Na so na apostel Paulus ben e si dati. Memre san a ben taki: „Ke, pôti fu mi!” Ma dan a taki moro fara: „Mi e taki Gado tangi nanga yepi fu wi Masra Yesus Krestes” di „ben lobi mi èn di gi ensrefi abra fu a bun fu mi” (Romesma 7:24, 25; Galasiasma 2:20). Nanga den wortu disi Paulus no ben wani sori taki a ben e si ensrefi leki wan prenspari sma. A ben sori nomo taki a ben abi na overtoigi taki Yehovah ben e si en leki wan warti sma. Neleki Paulus, yu musu leri tu fu si a lusu-paiman leki wan kado di Gado gi yu spesrutu. Yehovah a no wan makti Frulusuman nomo, ma a de wan Sma tu di e pai libisma na wan lobi-ati fasi.

Luku bun nanga den „triki” fu Satan

15-17. (a) Fa Didibri e kori sma nanga a denki taki den no warti noti? (b) Sortu deki-ati wi kan kisi te wi e luku den sani di Yob ondrofeni?

¹⁵ Toku a kan de wan muilek sani gi yu fu bribi taki den wortu fu trowstu di Gado meki sma skrifi na ini en Wortu, abi fu du nanga yu trutru. Kande yu e denki taki têgo libi na ini a nyun grontapu fu Gado, na wan blesi di tra sma kan kisi, ma yu no warti fu kisi dati. Efu na so yu e denki, dan san yu kan du?

¹⁶ A no de fu taki dati yu sabi a deki-ati di Paulus ben gi den Efeisesma, namku: „Un musu sorgu taki unu abi ala den sani di Gado gi unu fu feti, so taki unu kan tanapu kánkan gi den triki di Didibri e gebroiki fu kori sma” (Efeisesma 6:11). Te wi e prakseri fu den triki di Satan e gebroiki fu kori sma, dan wantewante wi o denki fu sani soleki a feti di sma e feti baka gudu, èn hurudu. Wi abi leti fu prakseri fu den sani disi leki triki fu Satan. A gebroiki den tesi disi fu kori furu sma fu a pipel fu Gado na ini owruten èn na ini a ten disi. Ma wi no musu frigiti wan tra triki fu Satan, namku a muiti di a e du fu overtoigi sma taki Yehovah Gado no lobi den.

¹⁷ Didibri sabi heri bun fa fu gebroiki a denki disi te a e pruberi fu meki sma drai baka gi Gado. Memre san Bildad taigi Yob: „Fa wan libisma di e dede kan abi reti na Gado, èn fa wan sma di wan uma meki, kan de krin? Luku! A mun de drape srefi, ma a no e skèin krin, èn den stari srefi no krin na ini en ai. Dan san na libisma di e dede, di de wan woron, èn san na a manpikin fu libisma di de noti moro leki wan woron!” (Yob 25:4-6;  Yohanes 8:44) Yu kan frustan taki den wortu disi ben musu fu meki Yob firi brokosaka srefisrefi. No gi Satan pasi fu meki yu firi brokosaka. Na a tra sei, yu musu sabi den triki fu Satan so taki yu sa abi a deki-ati èn a krakti fu meki moro muiti fu du san reti (2 Korentesma 2:11). Aladi Yehovah ben abi fu piri-ai gi Yob, toku di Yob horidoro, dan Yehovah blesi en fu di A ben gi en tu tron moro leki san a ben abi fosi.​—Yob 42:10.

Yehovah „bigi moro wi ati”

18, 19. Fa Gado „bigi moro wi ati”, èn na sortu fasi a „sabi ala sani”?

¹⁸ A tru taki te wi e firi brokosaka na ini a dipi fu wi ati, dan a kan muilek fu feti nanga a firi disi. Ma toku a yeye fu Yehovah kan yepi yu safrisafri fu puru ’sani di tanapu steifi . . . di meki fu gens a sabi fu Gado’ (2 Korentesma 10:4, 5). Te yu e firi leki yu no warti noti èn yu no man moro, dan denki dipi fu den wortu fu na apostel Yohanes: „Na so wi o sabi taki wi kon fu a waarheid, èn wi kan de seiker na ini wi ati taki a lobi wi, awansi na sortu fasi wi ati e krutu wi. Bika Gado bigi moro wi ati èn a sabi ala sani.”​—1 Yohanes 3:19, 20.

¹⁹ San den wortu „Gado bigi moro wi ati” wani taki? Son ten, wi ati kan krutu wi, spesrutu te wi e kon si krin taki wi na sondusma èn taki wi no man du ala sani. Disi kan meki wi firi leki wi no warti noti. Noso a kan taki a fasi fa wi kweki, meki taki wi no e denki bun fu wisrefi, èn a de leki wi no kan du nowan sani di bun nofo gi Yehovah. Den wortu fu na apostel Yohanes e gi wi a dyaranti taki Yehovah bigi moro dati! A e luku pasa den fowtu fu wi èn a e si san wi man du trutru. A sabi sosrefi fu san ede wi e du sani èn san wi abi na prakseri fu du. David ben skrifi: „Ensrefi sabi heri bun fa wi meki; a e hori na prakseri taki wi na doti” (Psalm 103:14). Iya, Yehovah sabi wi moro bun leki wi sabi wisrefi!

„Wan moi kroon” èn „wan kownu-ati”

20. Fa a profeititori fu Yesaya di e taki dati Israel ben o kon bun baka, e sori fa Yehovah e si den futuboi fu en?

²⁰ Nanga yepi fu a profeiti Yesaya, Yehovah ben gi na owruten pipel fu en a howpu taki sani ben o kon bun baka. Te den ben o de na ini katibo na Babilon, dan a trowstu èn a dyaranti disi ben o de soifri san den sma disi, di den ben firi brokosaka, ben o abi fanowdu! Yehovah ben fruteri na fesi san ben o pasa te den ben o drai go baka na a mamakondre fu en. A ben taki: „Un musu tron wan moi kroon na ini na anu fu Yehovah, èn wan kownu-ati na ini na anu fu un Gado” (Yesaya 62:3). Nanga den wortu disi, Yehovah ben sori taki a pipel fu en warti èn taki den moi fu tru. Na a srefi fasi a e si a yeye nâsi Israel na ini a ten disi. A de leki Yehovah hori den hei so taki ala sma kan si o moi den de.

21. Fa yu kan kisi na overtoigi taki Yehovah sa pai yu te yu horidoro na wan getrow fasi?

²¹ Aladi a profeititori disi abi fu du na a fosi presi nanga den salfuwan, toku a e sori tu taki ala sma di e dini Yehovah, warti gi en trutru. Fu dati ede, te yu e tweifri, memre taki aladi yu no de volmaakti, toku yu kan warti leki „wan moi kroon” èn „wan kownu-ati” gi Yehovah. Fu dati ede, tan du muiti fu meki en ati prisiri fu di yu e meki muiti fayafaya fu du en wani (Odo 27:11). Te yu e du disi, dan yu kan abi na overtoigi taki Yehovah sa pai yu te yu horidoro na wan getrow fasi!

[Futuwortu]

Yu e memre disi ete?

• Na sortu fasi wi de „wan spesrutu gudu” gi Yehovah?

• Fu san ede a de prenspari fu si Yehovah leki a Sma di e pai libisma?

• Gi sortu „triki” fu Satan wi musu luku bun?

• Na sortu fasi Gado „bigi moro wi ati”?

[Aksi fu a tori disi]

[Prenki na tapu bladzijde 26]

Paulus

[Prenki na tapu bladzijde 26]

Elia

[Prenki na tapu bladzijde 26]

Hana

[Prenki na tapu bladzijde 28]

Gado Wortu abi bun furu sani na ini di kan gi wi trowstu