Yehovah teri ’srefi ala den wiwiri na tapu yu ede’

„Nowan fu den [pikin] fowru sa fadon na gron sondro fu un Tata sabi. Ma a Tata teri srefi ala den wiwiri na tapu un ede.”​—MATEYUS 10:29, 30.

1, 2. (a) Fu san ede Yob ben denki taki Gado gowe libi en? (b) A de so taki den sani di Yob taki e sori taki a ben drai baka gi Yehovah? Fruklari dati.

„MI E bari kari yu, o Gado, ma yu no e piki noiti; èn te mi e begi, yu no e poti prakseri. Na wan ogri-ati fasi yu e handri nanga mi; yu e frufolgu mi nanga ala yu krakti.” A man di ben taki den wortu disi ben abi hebi pen, èn a no e fruwondru wi taki a ben e firi so! A ben lasi ala san a ben abi, wan tumusi ogri rampu ben meki taki den pikin fu en lasi libi, èn now a ben abi wan siki di ben e meki a kon moro swaki dei fu dei. A nen fu a man disi ben de Yob, èn a pisi tori fu a hebi pina di a ben e pina, skrifi na ini Bijbel so taki wi kan leri wan sani fu dati.​—Yob 30:20, 21, Today’s English Version.

² Te yu e luku den sani di Yob taki, dan a kan gersi leki Yob ben drai baka gi Gado, ma dati no ben de so. Yob ben taki nomo fu den broko-ede di a ben abi dipi na ini en ati (Yob 6:2, 3). Fu di a no ben sabi taki na Satan ben e meki a kisi tesi, meki a ben denki taki Gado gowe libi en, aladi dati no ben de so. Wan leisi Yob taigi Yehovah srefi: „Fu san ede yu e kibri yu fesi srefi gi mi, èn fu san ede yu e si mi leki wan feanti fu yu?” *​—Yob 13:24.

3. Te tesi e miti wi, dan san wi kan bigin denki?

³ Na ini a ten disi, furu sma fu a pipel fu Yehovah musu nyan pina doronomo, kande fu di feti de na a presi pe den e tan, fu di dyugudyugu de na ini politiek noso na ini a libimakandra, fu di rampu soleki gronseki miti den, fu di den kon owru noso siki, fu di den pôti srefisrefi, noso fu di lanti tapu a wroko fu den. Kande na wan noso tra fasi yu e kisi tesi tu. Kande yu e denki son leisi taki Yehovah e kibri en fesi gi yu. A no de fu taki dati yu sabi heri bun san skrifi na ini Yohanes 3:16: „Gado ben lobi grontapu so te, taki a gi en wan-enkri Manpikin.” Ma toku, te yu e nyan pina, èn a gersi leki a no o kon na wan kaba, dan kande yu e aksi yusrefi: ’Gado lobi mi trutru? A e si san fa mi e pina? A e broko en ede nanga mi spesrutu?’

4. Na ini sortu situwâsi Paulus ben abi fu horidoro, èn na sortu fasi so wan situwâsi kan abi krakti na wi tapu?

⁴ Luku san ben pasa nanga na apostel Paulus. „Mi kisi wan maka na ini mi skin, namku wan engel fu Satan, fu tan pina mi”, na so a ben skrifi, èn a ben skrifi sosrefi: „Mi begi Masra dri leisi fu puru a maka na ini mi skin.” Yehovah ben yere fa a ben e begi en. Ma toku a sori Paulus taki a no ben o du wan wondru fu puru a problema fu en. Na presi fu dati, Paulus ben musu frutrow taki a krakti fu Gado ben o yepi en nanga ’a maka di a ben abi na ini en skin’ (2 Korentesma 12:7-9). * A kan, taki neleki Paulus, yu de na ini wan tesi di e go nanga langa. Kande yu e prakseri: ’A gersi leki Yehovah no e du noti fu puru mi na ini a tesi fu mi. Disi wani taki dati Yehovah no sabi na ini sortu situwâsi mi de, noso dati a no e broko en ede nanga mi?’ Nanga a bradi kanti fu wi mofo wi kan taki: Kwetikweti! Taki Yehovah e broko en ede trutru nanga ibriwan fu  den getrow futuboi fu en, de fu si krin na ini den wortu di Yesus taigi wan tu fu den disipel fu en, syatu baka di a ben teki den leki apostel. Meki wi go luku fa den wortu fu en kan gi wi deki-ati na ini a ten disi.

„No frede”​—Fu san ede?

5, 6. (a) Fa Yesus yepi den apostel fu no frede den sani di ben kan pasa nanga den na ini a ten di ben de na den fesi? (b) Fa Paulus sori taki a ben abi na overtoigi taki Yehovah ben e broko en ede nanga en?

⁵ Den apostel ben kisi krakti fu Yesus fu du spesrutu sani; a ben gi den „makti fu yagi ogri yeye puru na sma tapu èn fu dresi ibri sortu siki nanga ibri sortu mankeri”. Toku disi no ben wani taki dati tesi nanga problema no ben o miti den na ini a libi. Na presi fu dati, Yesus ben fruteri den finifini fu son sani di ben o pasa nanga den. Ma a ben gi den a deki-ati disi tu: „No frede den sma di kan meki a skin kisi pori, ma di no man kiri a sili; ma frede a sma di kan pori a sili èn a skin na ini Gehena.”​—Mateyus 10:1, 16-22, 28.

⁶ Yesus ben gi den apostel fu en tu agersitori, fu yepi den frustan fu san ede den no ben abi fu frede. A ben taigi den: „A no de so, taki sma e seri tu pikin fowru gi wan sensi di no warti furu? Ma toku nowan fu den fowru sa fadon na gron sondro fu un Tata sabi. Ma a Tata teri srefi ala den wiwiri na tapu un ede. Fu dati ede no frede: un warti moro leki wan heri ipi pikin fowru” (Mateyus 10:29-31). Luku taki Yesus sori den apostel taki efu den no ben wani frede te den kisi tesi, dan den ben musu abi na overtoigi taki Yehovah e broko en ede nanga ibriwan fu wi. Soleki fa a sori, dan Paulus ben abi na overtoigi disi. A ben skrifi: „Efu Gado de nanga wi, dan suma o man feti nanga wi? En eigi Manpikin a no ben kibri, ma a gi en abra gi a bun fu wi alamala; we, efu a gi wi en Manpikin, dan fu san ede a no ben sa gi wi ala tra sani tu fu sori wi bun-ati?” (Romesma 8:31, 32) Awinsi sortu problema yu abi, yu kan abi na overtoigi tu taki Yehovah e broko en ede nanga yu, solanga yu e tan loyaal na en. Wi sa si disi moro krin te wi o luku moro fini sortu deki-ati Yesus gi den apostel fu en.

A waarde fu wan pikin fowru

7, 8. (a) Fa sma ben e si den pikin fowru na ini a ten fu Yesus? (b) Soleki fa a sori, dan fu san ede Mateyus 10:29 e gebroiki wan Griki wortu di e sori go na wan pikin-toti fowru?

⁷ Na wan moi fasi den agersitori fu Yesus e sori fa Yehovah e broko en ede nanga ibriwan fu den futuboi fu En. Luku fosi, a tori fu den pikin fowru. Na ini a ten fu Yesus, sma ben e nyan den pikin fowru disi, ma fu di den fowru ben e nyan den sani di sma prani, meki furu sma no ben lobi den kwetikweti. Den pikin fowru disi ben lai so furu, taki na ini a ten disi, a moni fu bai tu fu den, no ben doro feifi Amerkan sensi srefi. Efu yu ben abi tu tron so furu moni, dan yu no ben o kisi fo fowru, ma feifi, fu di den ben e gi  wan baksis, neleki a no ben warti noti srefi!​—Lukas 12:6.

⁸ Prakseri sosrefi o pikin a fowru de fu san Yesus ben taki. Srefi te a fowru disi kon bigi kaba, a pikin moro leki den tra fowru di wi e si furu tron. Toku, a Griki wortu di gebroiki gi „pikin fowru” na ini Mateyus 10:29, e sori go spesrutu na a moro pikinwan fu den sortu fowru dati. Soleki fa a sori, dan Yesus ben wani taki den apostel ben musu prakseri a moro pikin fowru di ben de, èn di no ben warti noti. Wan buku e taki dati Yesus no e taki fu pikin fowru nomo, ma a e taki fu wan pikin-totiwan fu den fowru disi!

9. Sortu prenspari sani e kon na krin na ini na agersitori di Yesus ben gi fu den pikin fowru?

⁹ Na agersitori di Yesus ben gi fu den pikin fowru e tyari wan prenspari sani kon na krin: Den sani di no warti noti na ini libisma ai, de prenspari gi Yehovah Gado. Yesus ben poti moro krakti tapu a tori disi di a taki dati srefi a moro pikinwan fu den pikin fowru disi no sa „fadon na gron” sondro taki Yehovah sabi. * A de krin san wi kan leri fu disi. Efu Yehovah Gado e broko en ede nanga a moro pikin fowru di no warti noti, dan o moro a sa broko en ede nanga den problema fu wan libisma di teki a bosroiti fu dini en!

10. San a wani taki dati „a Tata teri srefi ala den wiwiri na tapu un ede”?

¹⁰ Boiti na agersitori fu den pikin fowru, Yesus ben taki tu: „A Tata teri srefi ala den wiwiri na tapu un ede” (Mateyus 10:30). Den krakti wortu disi e sori finifini san Yesus ben wani sori nanga na agersitori fu den pikin fowru. Prakseri nomo: Nofo tron a de so taki wan libisma abi sowan 100.000 wiwiri na tapu en ede. Ala wiwiri na tapu yu ede gersi makandra, sobun yu no ben o poti spesrutu prakseri na wán wiwiri nomo, a no so? Toku Yehovah Gado e poti prakseri na ibriwan fu den èn a teri den alamala. We, efu Yehovah sabi soifri omeni wiwiri yu abi, dan yu denki taki wan pisi fu yu libi de di A no sabi finifini? A no de fu taki dati Yehovah sabi finifini fa ibriwan fu den futuboi fu en de. Iya, a „e si fa na ati de”.​—1 Samuel 16:7.

11. Fa David sori taki a ben abi a frutrow taki Yehovah ben e poti prakseri na en?

¹¹ David, di ben ondrofeni furu problema, ben abi na overtoigi taki Yehovah ben e poti prakseri na en. „O Yehovah, yu ondrosuku mi finifini, èn yu sabi mi”, na so a ben skrifi. „Yusrefi kon sabi te mi e sidon èn te mi e opo. Yu si san mi e prakseri fu farawe kaba” (Psalm 139:1, 2). Yu sosrefi kan de seiker taki Yehovah sabi yu finifini (Yeremia 17:10). No de esi fu prakseri taki yu no prenspari nofo fu Yehovah si yu nanga den ai fu en di e si ala sani!

„Poti den watra-ai fu mi na ini a leer-saka fu yu”

12. Fa wi du sabi taki Yehovah sabi heri bun sortu problema e trobi en pipel?

¹² Yehovah no sabi ibriwan fu den futuboi fu en nomo, ma a sabi heri bun tu sortu problema e trobi ibriwan fu den. Fu eksempre, di den Israelsma ben e kisi kwinsi leki srafu, dan Yehovah taigi Moses: „Sondro tweifri mi si a pina fu mi pipel di de na Egepte, èn mi yere fa den e bari fu di tra sma e dwengi den fu wroko; bika mi sabi heri bun sortu pen den e firi” (Exodus 3:7). A de wan trowstu trutru fu sabi taki te wan tesi e  miti wi, Yehovah e si san e pasa èn a e yere te wi e bari kari en! A sabi trutru sortu pen wi e firi.

13. Fa wi kan si taki Yehovah e firi trutru gi den futuboi fu en?

¹³ Te wi e luku sortu firi Yehovah ben abi gi den Israelsma, dan wi e si krin tu taki a e broko en ede trutru nanga den sma di abi wan krosibei banti nanga en. Nofo tron na a tranga-ede fasi fu den Israelsma ben e meki taki den nyan pina, ma toku Yesaya ben skrifi fu Yehovah, taki: „Ala ten te den ben de na ini banawtu, a ben de na ini banawtu sosrefi” (Yesaya 63:9). Fu dati ede, yu leki wan getrow futuboi fu Yehovah kan de seiker taki te yu e sari, Yehovah e sari tu. Dati e gi yu deki-ati fu horidoro na ini tesi sondro fu frede, èn fu tan du ala muiti fu dini en, a no so?​—1 Petrus 5:6, 7.

14. Na ini sortu situwâsi David ben de di a skrifi Psalm 56?

¹⁴ Kownu David ben abi na overtoigi taki Yehovah ben e broko en ede nanga en èn taki A ben e firi gi en. Disi de krin fu si na ini Psalm 56, di David ben skrifi na ini a pisi ten di a ben e lowe gi Kownu Saul di ben e suku fu kiri en. David ben lowe go na Gat, ma a ben kon frede taki den ben o kisi en di den Filistiasma kon sabi suma na en. A ben skrifi: „Heri dei den feanti fu mi e suku fu swari mi, bika furu sma de di e feti teige mi na wan heimemre fasi.” Fu di David ben de na ini wan situwâsi pe a ben kan lasi en libi, meki a go suku yepi na Yehovah. „Heri dei den e tan hati mi”, na so a ben taki. „Soso ogri den abi na prakseri fu du nanga mi.”​—Psalm 56:2, 5.

15. (a) San David ben wani sori di a aksi Yehovah fu poti den watra-ai fu en na ini wan leer-saka, noso na ini wan buku? (b) Te wi e kisi tesi tapu a bribi fu wi èn e horidoro, dan sortu dyaranti wi kan abi?

¹⁵ Dan David e taki den heri moi wortu disi na ini Psalm 56:8: „Yusrefi skrifi taki mi na wan loweman. Grantangi, poti den watra-ai fu mi na ini a leer-saka fu yu. Den no de na ini a buku fu yu?” Disi na tumusi moi wortu di e sori fa Yehovah e broko en ede nanga wi trutru! Te wi de nanga broko-ede, dan nanga watra-ai wi e bari kari Yehovah kande. Srefi a volmaakti man Yesus ben du so (Hebrewsma 5:7). David ben sabi seiker taki Yehovah ben e poti prakseri na en èn taki A ben o memre a pina di a ben e pina; a ben de neleki Yehovah kibri den watra-ai fu en na ini wan leer-saka, noso neleki a ben skrifi den na ini wan buku. * Kande yu e firi leki den watra-ai fu yu ben o furu a leer-saka, noso taki den ben o furu wan bigi pisi fu a buku fu Yehovah. Efu disi de so, dan yu kan kisi trowstu. Bijbel e gi wi a dyaranti: „Yehovah de krosibei fu den wan di lasi-ati; èn den wan di e firi brokosaka, a e frulusu.”​—Psalm 34:18.

Kon tron wan bun mati fu Gado

16, 17. (a) Fa wi du sabi taki Yehovah e poti prakseri na den problema di e miti a pipel fu en? (b) San Yehovah du so taki libisma kan abi wan tranga banti nanga en?

¹⁶ Te wi e prakseri taki Yehovah teri ’ala den wiwiri na tapu wi ede’, dan wi kan frustan pikinso kaba taki wi abi wan bigi grani fu anbegi so wan Gado di e poti prakseri na wi èn di e broko en ede nanga wi. A tru taki wi abi fu wakti a nyun grontapu pe Yehovah pramisi fu puru ala pen nanga pina, ma nownow kaba a e du wan tumusi moi sani gi en pipel. David ben skrifi: „Yehovah abi wan tranga banti nanga den wan di e frede en, èn a e meki den kon sabi sosrefi a frubontu fu en.”​—Psalm 25:14.

¹⁷ ’Wan tranga banti nanga Yehovah.’ A gersi leki a sani disi no kan te yu e prakseri taki wi na sondu libisma! Toku Yehovah e gi den wan di e frede en, wan kari fu de fisitiman na ini en tenti (Psalm 15:1-5). Èn san Yehovah e du gi den fisitiman fu en? A e meki den kon sabi a frubontu fu en, soleki fa David ben taki. Yehovah e frutrow den, fu di a e tyari en „frutrow afersi” kon na krin gi den profeiti, so taki den kan sabi san a abi na prakseri èn san den musu du fu libi akruderi dati.​—Amos 3:7.

18. Fa wi du sabi taki Yehovah wani wi fu abi wan krosibei banti nanga en?

 ¹⁸ Iya, a de wan prisiri sani trutru fu sabi taki wi leki sondu libisma kan tron bun mati fu a Moro Heiwan, Yehovah Gado. Fu taki en leti, na ensrefi e gi wi deki-ati fu du disi. „Kon krosibei na Gado, èn a sa kon krosibei na unu”, na so Bijbel e taki (Yakobus 4:8). Yehovah wani taki wi abi wan krosibei banti nanga en. Te yu luku en bun, dan a seti sani kaba fu meki taki wi kan abi so wan banti nanga en. A frulusu-ofrandi fu Yesus opo a pasi gi wi so taki wi kan tron mati fu na Almakti Gado. Bijbel e taki: „Wi abi lobi, bika na Gado fosi ben lobi wi.”​—1 Yohanes 4:19.

19. Fa wi kan kisi wan moro krosibei banti nanga Yehovah te tesi miti wi èn wi e horidoro?

¹⁹ A krosibei banti di wi abi nanga Yehovah e kon moro tranga te wi e horidoro na ini muilek situwâsi. A disipel Yakobus ben skrifi: „Un musu tan horidoro te na a kaba, so taki unu kan kon lepi èn bun na ala fasi, èn na so fasi unu no sa mankeri noti” (Yakobus 1:4). San na a bakapisi te wi e horidoro na ini muilek ten? Memre a „maka” di Paulus ben abi na ini en skin. San ben de a bakapisi di a horidoro? Paulus ben taki fu den tesi fu en: „Fu dati ede, nanga trutru prisiri mi sa meki bigi, spesrutu te a abi fu du nanga den swakifasi fu mi, so taki a krakti fu Krestes kan tan leki wan tenti na mi tapu. Dati meki mi e prisiri te mi swaki, te sma e kosi mi, te mi de na nowtu, èn sosrefi te frufolgu nanga problema e miti mi, fu Krestes ede. Bika te mi swaki, dan mi tranga” (2 Korentesma 12:9, 10). Paulus ondrofeni taki Yehovah ben o gi en a krakti di a ben abi fanowdu fu man horidoro, awinsi Yehovah ben abi fu gi en „krakti di bigi pasa marki” srefi. Disi ben meki taki Paulus ben kon kisi wan moro krosibei banti nanga Krestes èn nanga Yehovah Gado.​—2 Korentesma 4:7; Filipisma 4:11-13.

20. Fu san ede wi kan de seiker taki Yehovah o horibaka gi wi èn trowstu wi te tesi e miti wi?

²⁰ Kande Yehovah gi pasi taki a tesi fu yu e go nanga langa. Efu disi de so, dan tan prakseri a pramisi di a gi den wan di e frede en: „Mi no sa libi yu kwetikweti èn noiti mi no sa gowe fu yu” (Hebrewsma 13:5). Yusrefi kan ondrofeni taki a o horibaka gi yu èn taki a o trowstu yu. Yehovah teri ’srefi ala den wiwiri na tapu yu ede’. A e si fa yu e horidoro. A e firi a pen fu yu. A e broko en ede nanga yu trutru. Èn noiti a o ’frigiti den wroko fu yu èn a lobi di yu sori gi a nen fu en’.​—Hebrewsma 6:10.

[Futuwortu]

Yu e memre disi ete?

• San kan meki taki wan sma e firi leki Gado gowe libi en?

• San wi kan leri fu na agersitori di Yesus ben gi fu den pikin fowru èn fu a teri di Yehovah teri ala den wiwiri na tapu wi ede?

• San a wani taki te Yehovah e poti den watra-ai fu wan sma na ini en „leer-saka”, noso na ini en „buku”?

• Fa wi kan kisi ’wan tranga banti nanga Yehovah’?

[Aksi fu a tori disi]

[Prenki na tapu bladzijde 22]

Fu san ede Yehovah no puru a „maka” na ini Paulus skin?

[Prenki na tapu bladzijde 23]

San wi kan leri fu na agersitori di Yesus ben gi fu den pikin fowru?

[Sma di abi a reti fu a prenki]

© J. Heidecker/VIREO

[Prenki na tapu bladzijde 25]

Te wi e leisi Bijbel doronomo, dan wi kan kisi a dyaranti taki Gado e broko en ede trutru nanga ibriwan fu wi