A bigi sari di dede e tyari kon

„WAN PIKIN FU SIKSI YARI KIRI ENSREFI.” Den wortu disi di e meki sma skreki, ben skrifi nanga bigi letter na fesisei fu wan koranti. Den ben abi fu du nanga, Jackie, wan pikin meisje di lasi en libi na wan tumusi sari fasi. Wan syatu pisi ten na fesi en mama dede fu di a ben siki seryusu. Fosi Jackie dyompo na fesi a loko di kiri en, a taigi den brada nanga sisa fu en taki a ben wani ’tron wan engel fu man de nanga en mama’.

Ian ben abi 18 yari di a begi a priester fu en fu fruteri en fu san ede en papa dede fu kanker. A priester taigi Ian taki en papa ben de wan bun man, èn taki na fu dati ede Gado ben wani en na ini hemel. Di Ian yere dati, dan a bosroiti taki a no ben wani sabi so wan ogri-ati Gado. Fu di Ian ben feni taki a libi na fu soso, meki a bosroiti fu libi soso fu meki prisiri. Na fu dati ede meki a bigin dringi sopi, a bigin gebroiki drugs, èn a bigin du hurudu. A no ben abi krakti moro tapu a fasi fa ben e libi.

„Den libiwan sabi taki den sa dede”

Den tu sari sani disi di pasa, e sori fa dede kan pori sma libi, spesrutu te wan sma fu den e dede sondro taki den e fruwakti dati. A no de fu taki, dati ala sma sabi a sani disi di skrifi na ini Bijbel: „Den libiwan sabi taki den sa dede” (Preikiman 9:5). Ma sma no wani denki a tru tori dati, fu di a no de wan moi sani fu prakseri. Fa a de nanga yu? Fu di wi musu du èn musu prakseri so furu sani te dei opo, meki a kan taki wi no e prakseri dede so furu, fu di wi e denki taki a sani dati no o miti wi so esi.

„Furu sma e frede dede èn den e pruberi fu no denki a tori dati”, na so a buku The World Book Encyclopedia e taki. Toku a de so taki wan seryusu ongoloku noso wan seryusu siki kan dwengi wi wantronso fu prakseri taki wisrefi kan dede wan dei. Noso kande a beri fu wan mati noso fu wan famiriman e memre wi na wan tumusi sari fasi taki te fu kaba ala sma musu dede.

Toku a de so furu tron taki na wan beri, sma di e sari e taki sani soleki „A libi musu go doro”. Èn na dati e pasa tu. Fu taki en leti, a kan gersi leki a libi e pasa so esi, taki fosi yu denki, wi e ondrofeni den problema di abi fu du nanga owrudei. Te dati e pasa, dan wi e fruwakti moro esi taki wan dei wi sa dede. Tumusi furu sma de di wi musu go beri, èn wi e ondrofeni taki furu mati di wi sabi wi heri libi kaba, e dede. Furu owru sma gwenti aksi densrefi a sani disi di e trobi den: „O ten mi o dede?”

Wan prenspari aksi

Aladi ala sma sabi taki den sa musu dede wan dei, toku den no sabi soifri san e pasa baka te wan sma dede. Sma e gi someni fruklari di no e kruderi nanga makandra, èn den fruklari disi kan meki taki wan sma di no e bribi ala sani esi-esi, e feni taki sma e haritaki fu soso fu wan sani di nowan sma no man frustan. Wan sma di e si sani soleki fa den de trutru, kan feni taki fu di „wan sma e libi wán leisi nomo”, meki a musu du ala san a man fu nyan bun fu den bun sani fu a libi.

Ma dan yu abi tra sma baka di e weigri fu bribi taki dede na a kaba fu ala sani. Toku den sma disi  no sabi soifri san e pasa baka te wan sma dede. Son sma e denki taki den sa tan libi go doro na wan presi pe den sa de koloku fu têgo, aladi trawan e denki taki den sa libi baka na wan ten di e kon, kande leki wan tra sma.

Famiriman di lasi sma na ini dede, furu tron e aksi densrefi „Pe den dedewan de?” Wan tu yari pasa, den memre fu wan futubal grupu ben de na pasi fu go na wan sportwega, di wantronso wan truck rèi kon naki a pikin bus pe den ben de na ini, èn a bus lolo komoto fu a pasi. Feifi memre fu a grupu lasi den libi. Sensi a dei dati a mama fu wan fu den boi di lasi en libi na ini na ongoloku dati, pikinmoro no abi nowan enkri prisiri moro na ini a libi. A e tan aksi ensrefi pe a boi fu en de trutru. Doronomo a e go na a grebi fu a boi, pe furu yuru langa a e taki nanga en neleki a boi de drape e arki en. „Mi no man bribi taki dede na a kaba fu ala sani” na so a e kragi, „ma mi no de seiker.”

A de krin fu si taki a fasi fa wi e si dede kan abi krakti tapu a libi fu wi now. Te wi e luku fa sma feni en te den e ondrofeni a sari di dede e tyari kon, dan difrenti aksi e opo kon. Prakseri fa yu ben o piki den aksi dati. Wi musu frigiti dede soso fu poti prakseri na a libi? Wi musu gi pasi taki wi no e feni prisiri moro na ini a libi fu di wi e frede taki wi o dede wan dei? A de so taki wan sma di e sari fu di a lasi wan famiriman na ini dede sa abi fu aksi ensrefi en heri libi langa pe a lobiwan fu en de, now di a dede? A de so taki dede musu tan wan dangra tori?