„A swari dede fu têgo”

PRAKSERI taki yu e leisi den wortu disi di skrifi nanga bigi letter na fesisei fu wan koranti, na presi fu leisi taki wan pikin meisje kiri ensrefi. A no de fu taki dati nowan enkri koranti oiti ben man skrifi a sani dati. Ma toku a de so taki den wortu di skrifi na tapusei, de fu feni na ini wan buku di owru dusundusun yari, namku Bijbel.

Bijbel e fruklari krin san na dede. Boiti dati, Bijbel no e tyari kon na krin nomo fu san ede wi e dede, ma a e tyari kon na krin sosrefi san na a situwâsi fu den dedewan èn a e sori taki howpu de gi den lobiwan fu wi di dede. Te fu kaba, Bijbel e taki fu wan prenspari ten te wi sa yere a nyunsu: „A swari dede fu têgo.”—1 Korentesma 15:54.

Te Bijbel e fruklari san na dede, dan a no e du dati na wan fasi di muilek fu frustan, ma a e gebroiki wortu di ala sma man frustan. Fu gi wan eksempre, doronomo Bijbel e agersi a dede di sma e dede nanga ’a fadon di wan sma e fadon na sribi’, èn a e taki dati dedesma „e sribi na ini dede” (Psalm 13:3; 1 Tesalonikasma 4:13, futuwortu; Yohanes 11:11-14, futuwortu). Boiti dati, Bijbel e kari dede wan „feanti” tu (1 Korentesma 15:26). Ma san moro prenspari, na taki Bijbel e yepi wi fu frustan fu san ede dede de leki wan sribi, fu san ede libisma e dede, èn fa a feanti disi no sa abi krakti moro tapu libisma te fu kaba.

Fu san ede wi e dede?

A fosi buku fu Bijbel e fruteri fa Gado meki a fosi libisma Adam, èn fa a poti en fu tan na ini wan paradijs (Genesis 2:7, 15). Na a bigin fu en  libi, Adam ben kisi wroko fu du, ma wan tumusi prenspari sani ben de tu di a no ben mag du. Disi na san Gado ben taigi en fu wan spesrutu bon na ini a dyari fu Eden: „Fu dati yu no musu nyan, bika na a dei di yu sa nyan fu dati, yu o dede fu tru” (Genesis 2:17). * Sobun, Adam ben frustan taki a ben kan dede. A ben o dede te a ben o pasa a wet fu Gado.

A sari fu taki dati Adam nanga en wefi Eva, trangayesi Gado. Den ben bosroiti fu no du a wani fu a Mekiman fu den, èn den ondrofeni a bakapisi fu dati. „Doti yu de èn na doti yu sa drai go baka”, na so Gado taigi den fu sori den san na den bakapisi fu a sondu di den ben du (Genesis 3:19). Den kon kisi seryusu fowtu, iya, den no ben de volmaakti moro. Fu di den no ben de volmaakti sma, noso fu di den ben tron sondu sma, meki den ben o dede.

Den bakapikin fu Adam nanga Eva kisi a fowtu disi tu, iya, ala libisma kisi sondu. Te yu luku en bun, dan a sondu disi de leki wan famiri-siki. Boiti taki Adam lasi na okasi fu libi wan libi sondro a strafu fu dede, a meki den bakapikin fu en kisi sondu tu. A libisma famiri ben kon de na ini katibo fu sondu. Bijbel e taki: „Fu dati ede a de so, taki neleki fa wan man meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu.”​—Romesma 5:12.

„Sondu kon na grontapu”

A fowtu noso sondu disi di libisma kisi fu Adam, a no wan sani di sma man si nanga den ai. „Sondu” abi fu du nanga a fowtu fasi fa libisma e handri èn e denki, èn a sani disi di wi kisi fu wi fosi papa nanga mama, e tyari takru bakapisi kon gi wi na skin sei. Ma Bijbel e sori taki Gado sorgu gi wan dresi. Na apostel Paulus e fruklari: „A pai di sma e kisi gi sondu, na dede, ma a presenti di Gado e gi na têgo libi nanga yepi fu Krestes Yesus wi Masra” (Romesma 6:23). Na ini a fosi brifi di Paulus ben skrifi gi den Korentesma, a ben gi den a dyaranti disi, di ben de wan tumusi prenspari sani gi en: „Neleki fa ala sma dede na ini Adam, na so ala sma sa kon na libi baka tu na ini Krestes.”​—1 Korentesma 15:22.

A krin fu si taki Yesus Krestes na a moro prenspari sma di sa tyari wan kaba kon na sondu nanga dede. A ben taki dati a ben kon na grontapu „fu gi en sili leki wan lusu-paiman fu frulusu furu sma” (Mateyus 20:28). Wi kan gersi a situwâsi dati nanga a tyari di wan sma e tyari wan trawan gowe nanga tranga, so taki a wan-enkri fasi fa a sma dati kan kon fri, na te trawan e pai wan spesrutu moni gi en. Ma a pai di kan fri wi fu sondu nanga dede, na a volmaakti libi di Yesus ben abi leki libisma. *​—Tori fu den Apostel 10:39-43.

Fu man pai a lusu-paiman, meki Gado ben seni Yesus kon na grontapu fu gi en libi leki srakti-ofrandi. „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en sa . . . kisi têgo libi” (Yohanes 3:16). Bifo Krestes dede fu gi en libi leki wan srakti-ofrandi, dan a ’gi kotoigi fu a waarheid’ (Yohanes 18:37). Èn na a ten di a ben e du a diniwroko fu en, a gebroiki difrenti okasi fu fruteri sma san na dede trutru.

 „A pikin meisje . . . e sribi”

Di Yesus ben de na grontapu, dan a ben sabi san na dede. A ben e firi sari te sma di a ben sabi ben e dede, èn a ben sabi heri bun taki a ben o dede fruku (Mateyus 17:22, 23). Soleki fa a sori, dan wan tu mun bifo sma kiri Yesus, en bun mati Lasarus dede. A sani dati e yepi wi fu kon frustan moro bun fa Yesus ben e si dede.

Syatu baka di Yesus kon yere taki Lasarus dede, a taki: „Wi mati Lasarus go sribi, ma mi e go drape fu wiki en.” Den disipel ben e denki taki efu Lasarus ben e rostu nomo, dan a ben o kon betre baka. Fu dati ede Yesus taigi den krin: „Lasarus dede” (Yohanes 11:11-14). A krin fu si taki Yesus ben e si dede leki wan sribi. Aladi a muilek gi wi kande fu frustan san na dede, toku wi e frustan san sribi wani taki. Te wi e sribi dipi te neti, dan wi no sabi taki a ten e pasa èn san e pasa na wi lontu, fu di wi no sabi noti na a pisi ten dati. Bijbel e fruklari a situwâsi fu den dedewan leti so. Preikiman 9:5 e taki: „Den dedewan no sabi notinoti.”

Yesus ben agersi dede tu nanga wan sribi, fu di nanga yepi fu a krakti fu Gado, sma kan wiki fu dede. Wan leisi, Yesus ben go na a oso fu wan famiri di ben e sari fu tru fu di a pikin meisje fu den ben dede wan syatu pisi ten na fesi. „A pikin meisje no dede, ma a e sribi”, na so Yesus ben taki. Ne a go moro krosibei na a meisje di ben dede, èn di a hori en anu, dan a meisje „opo”. Fu taki en tra fasi, a ben opo baka fu dede.​—Mateyus 9:24, 25.

Na so Yesus ben wiki en mati Lasarus fu dede. Ma fosi a du a wondru dati, a trowstu Marta, a sisa fu Lasarus, fu di a taki: „Yu brada o opo baka.” Nanga overtoigi Marta piki en: „Mi sabi taki a o kon na libi baka te na opobaka o de na tapu a lasti dei” (Yohanes 11:23, 24). A krin fu si taki a ben e fruwakti taki wan dei ala den futuboi fu Yehovah ben o kisi wan opobaka.

San a wani taki trutru te wan sma e kisi wan opobaka? A Griki wortu di vertaal leki „opobaka” (a·naʹsta·sis), trutru wani taki „opo”. A wani taki dati wan sma e opo baka fu dede. Kande a muilek gi son sma fu bribi disi, ma toku a de so taki baka di Yesus ben taki dati den dedewan ben o yere en sten, dan a taki: „No fruwondru fu disi” (Yohanes 5:28). Den opobaka di Yesus srefi ben gi sma na grontapu, e gi wi a dyaranti taki trutru den dedewan di de na ini Gado en prakseri, sa wiki fu a langa „sribi” fu den, soleki fa Bijbel e pramisi dati. Openbaring 20:13 e taki na fesi: „A se lusu den dedesma di ben de na ini en, èn dede nanga Hades [a grebi fu ala libisma] lusu den dedesma di ben de na ini den.”

A de so taki den dedewan disi sa kisi wan opobaka fu libi, soso fu kon owru èn fu dede baka, neleki fa dati ben pasa nanga Lasarus? Dati a no san Gado abi na prakseri. Bijbel e gi wi a dyaranti taki a ten sa kon te „dede no sa de moro”, sobun nowan sma sa gro kon owru fu dede te fu kaba.​—Openbaring 21:4.

Dede na wan feanti. Libisma abi furu tra feanti, soleki siki nanga owrudei, èn den feanti disi e meki tu taki sma e pina srefisrefi. Gado e pramisi fu pori den alamala, èn fu strafu a moro bigi feanti fu libisma te fu kaba. „Leki lasti feanti, dede musu kon na wan kaba.”​—1 Korentesma 15:26.

 Te a pramisi dati kon tru, dan libisma sa abi volmaakti libi, sondro taki sondu nanga dede e flaka a libi disi. Na a srefi ten, wi kan feni trowstu fu di wi sabi taki den lobiwan fu wi di dede e rostu, èn taki efu den de na ini Gado en prakseri, dan den sa kisi wan opobaka na wan ten di en feni bun.

Te wi e frustan san na dede, dan dati e yepi wi fu abi wan marki na ini a libi

Te wi e frustan bun san na dede èn san na a howpu di de gi den dedewan, dan dati kan kenki a fasi fa wi e si a libi. Ian, di ben kari na ini na artikel na fesi, kon sabi san Bijbel e taki fu dede, na a ten di a ben abi moro leki 20 yari. „Ala ten mi ben abi wan sortu firi taki mi papa ben de na wan presi”, na so a e taki. „Sobun, di mi leri taki a ben e sribi nomo na ini dede, dan mi ben e firi brokosaka fosi.” Toku, di Ian leisi fu a pramisi di Gado e gi taki a o gi den dedewan wan opobaka, dan a ben prisiri srefisrefi fu sabi taki a ben o man si en papa baka. „Disi ben de a fosi leisi na ini mi libi taki mi ben e firi bun”, na so a e taki. Fu di a ben kon frustan bun san dede wani taki, meki a kisi wan korostu firi di meki taki a no ben e firi brokosaka moro.

Clive nanga Brenda lasi Steven, a manpikin fu den di ben abi 21 yari, di wan tra wagi naki a bus pe a ben e sidon na ini, soleki fa a fosi artikel ben taki. Aladi den ben sabi san Bijbel e taki fu dede, toku den ben e sari trutru di den lasi a boi fu den wantronso. Fu taki en leti, dede na wan feanti, èn te a maka fu en dyuku sma, dan dati e hati fu tru. Fu di den ben sabi san Bijbel e taki fu a situwâsi fu den dedewan, meki safrisafri den no ben e sari so furu moro. Brenda e taki: „Fu di wi e frustan san na dede, meki wi ben man go doro nanga wi libi, èn wi abi wan korostu firi na ini wi ati. A no de fu taki dati nowan dei e pasa di wi no e prakseri a ten te Steven sa wiki fu a dipi sribi fu en.”

„Dede, pe yu maka de?”

A krin fu si taki te wi e frustan san na a situwâsi fu den dedewan, dan dati kan yepi wi fu si a libi na a yoisti fasi. Dede no abi fu de wan dangra tori gi wi. Wi kan nyan bun fu a libi sondro fu frede dede. Èn fu di wi sabi taki a no abi fu de so taki wan sma noiti no sa libi moro baka te a dede, meki wi no sa prakseri srefisrefi fu libi soso fu meki prisiri fu di wi e denki taki „a libi syatu tumusi”. Te wi sabi taki den dede lobiwan fu wi di de na ini Gado en prakseri, e sribi na ini dede èn e wakti fu kisi wan opobaka, dan dati kan trowstu wi èn a kan meki taki wi wani libi go doro.

Iya, wi kan luku go na fesi nanga a frutrow taki Yehovah Gado, a Sma di e gi libi, sa beri dede fu têgo. A sa de wan blesi trutru te wi kan taki nanga leti: „Dede, yu a no winiman moro! Dede, pe yu maka de?”​—1 Korentesma 15:55.

[Futuwortu]

[Prenki na tapu bladzijde 5]

Adam nanga Eva dede fu di den ben trangayesi

[Prenki na tapu bladzijde 6]

Yesus teki na anu fu a dede meisje, èn a meisje opo

[Prenki na tapu bladzijde 7]

Furu sma e wakti a ten te den lobiwan fu den di dede sa wiki baka, soleki fa dati ben pasa nanga Lasarus