Aksi fu leisiman

Na ini owruten Israel, wan wondru leti di sma ben e kari Syekina son tron, ben e skèin na ini a Moro Santa Presi fu a tabernakel èn fu a tempel. San a leti disi ben wani taki?

Yehovah, a lobi-ati Tata di ben e kibri en pipel, ben sori krin taki a ben de na ini Israel. Wan fasi fa a ben e du disi, ben de nanga yepi fu wan wolku di ben e brenki srefisrefi èn di ben abi furu fu du nanga a presi pe sma ben e anbegi en.

A kefalek leti disi, ben e sori taki Yehovah ben de drape, aladi sma no ben man si en nanga ai. A leti ben de fu si na ini a Moro Santa Presi fu a tabernakel èn sosrefi na ini a Moro Santa Presi fu a tempel di Salomo ben bow. A wondru leti disi no ben e sori taki Yehovah ben de drape. Gado no man tan na ini wan oso di libisma bow (2 Kroniki 6:18; Tori fu den Apostel 17:24). A wondru leti disi di ben kon fu Gado èn di ben e skèin krin na ini a santa presi fu En, ben gi a granpriester frutrow, so taki a ben kan gi ala den Israelsma a dyaranti taki Yehovah ben de drape fu kibri den, fu sorgu gi den, èn fu gi den san den ben abi fanowdu.

Baka a pisi ten di Bijbel kaba skrifi, sma ben e kari a leti disi Syekina (Sjekhi·nahʹ) na ini Arameisitongo. A wortu disi wani taki „a sani di e tan”, noso „a tanpresi”. A wortu disi no skrifi na ini Bijbel, ma a de fu feni na ini den Hebrew buku fu Bijbel di vertaal na ini Arameisitongo, èn di sma e kari den Targum.

Di Yehovah ben e fruteri Moses fa a ben musu bow a tabernakel, dan a taigi Moses: „Yu musu poti a tapun na tapu na Ark, èn na ini na Ark yu musu poti a kotoigi di mi sa gi yu. Drape mi sa sori misrefi na yu, èn na tapusei fu a tapun, na mindri den tu syerub di de na tapu na ark, mi sa taki nanga yu” (Exodus 25:21, 22). Na Ark fu san a tekst e taki ben de wan kisi di ben tapu nanga gowtu èn di ben de na ini a Moro Santa Presi. Tu gowtu syerub ben de na tapu a tapun fu na Ark.

Fu sortu presi Yehovah ben o taki? A ben gi piki tapu na aksi disi di a taigi Moses: „Na ini wan wolku na tapusei fu a tapun, mi sa sori misrefi” (Lefitikus 16:2). A wolku disi ben e anga na tapusei fu a santa Ark, na mindri den tu syerub. Bijbel no e taki o hei a wolku ben de, noso o hei a ben e anga na tapusei fu den syerub.

A wolku disi ben e gi leti na ini a Moro Santa Presi. Fu taki en leti, a ben de a wan-enkri sani di ben e gi leti na ini a kamra dati. A leti ben de wan bigi yepi gi a granpriester, fu man si krin te a ben e go na ini na inisei kamra dati tapu a Verzoendei. Drape a ben e tanapu na fesi Yehovah.

A wondru leti disi wani taki wan sani gi Kresten? Na ini wan fisyun, na apostel Yohanes ben si wan foto pe ’neti no sa de kwetikweti’. A foto dati na a Nyun Yerusalem, noso a grupu fu salfu Kresten di kisi wan opobaka fu tiri makandra nanga Yesus. A leti fu na agersi foto disi no e kon fu a son, noso fu a mun. A glori fu Yehovah Gado e gi leti na a organisâsi disi, neleki fa a Syekina wolku ben e gi leti na a Moro Santa Presi. A Pikin Skapu, Yesus Krestes, na a „lampu” fu a foto sosrefi. Fu dati ede, a „foto” disi e skèin en leti na yeye fasi fu tiri den sma fu ala kondre di kisi frulusu èn a e blesi den sma disi tu.​—Openbaring 21:22-25.

Fu di den anbegiman fu Yehovah e kisi so furu blesi fu en, meki den de seiker taki Yehovah na a Skapuman di e kibri den èn taki en na a lobi-ati Tata fu den.