„Den ben kan kon fri wantewante”

GENEVIÈVE DE GAULLE, wan famiri fu Charles de Gaulle di ben de presidenti fu Fransikondre fosi, ben kon leri sabi den Kotoigi fu Yehovah di a ben de na ini wan Nazi strafuman kampu na Ravensbrück, noordsei fu Doisrikondre. Na ini augustus 1945, Geneviève de Gaulle ben skrifi na ini wan brifi den wortu di yu e si na tapusei.

Den strafuman na ini a strafuman kampu na Auschwitz, na ini Polen, ben kon fri tapu 27 yanuari 1945. Sensi 1996, a dei disi na wan spesrutu dei na ini Doisrikondre fu memre den sma di ben e nyan pina ondro a tirimakti fu Hitler di ben nen a Derde Rijk.

Tapu 27 yanuari 2003, Peter Straub, a presidenti fu na asamblei fu Baden-Württemberg, ben hori wan spesrutu lezing fu memre den sma disi. A ben taki: „Wi musu abi bigi lespeki gi ala den sma di ben kisi frufolgu fu a bribi fu den ede, noso fu politiek afersi ede; den ben de klariklari fu dede, na presi fu gi yesi na Hitler. Wortu no de fu taki omeni lespeki wi musu abi gi den sma disi. Yehovah Kotoigi ben de a wan-enkri kerki di ben weigri krinkrin fu gi yesi na a tirimakti fu Hitler: Den no ben opo den anu fu gi Hitler grani. Den ben weigri fu sweri taki den ben o de getrow na a tiriman èn na a kondre; den ben weigri sosrefi fu tron srudati, noso fu wroko gi den srudati. Èn den pikin fu den no ben go na ini a Hitler Jeugdbeweging (a grupu yonguwan di ben e horibaka gi Hitler).”

Yesus Krestes ben taki fu den bakaman fu en: „Den no de wan pisi fu grontapu, neleki fa mi no de wan pisi fu grontapu” (Yohanes 17:16). Fu dati ede, a bosroiti di Yehovah Kotoigi ben teki, ben de soso fu di den ben hori densrefi na a bribi fu den. Straub ben taki moro fara: „Yehovah Kotoigi, di ben musu weri strafuman krosi nanga wan paars dri-uku na tapu, ben de den wan-enkri sma di ben kan fri densrefi efu den ben wani dati; den no ben abi fu kisi dedestrafu srefi. A wan-enkri sani di den ben abi fu du, na fu poti den nen na tapu wan pisi papira pe skrifi taki den drai baka gi a bribi fu den.”

A moro bigi pisi fu den Kotoigi ben weigri krinkrin fu drai baka gi a bribi fu den. Fu dati ede, sowan 1200 fu den dede na ini a pisi ten di den Nazi ben e tiri. Fu di den Kotoigi ben e hori densrefi na Bijbel markitiki, meki den ben weigri fu go na ini a legre fu den Nazi, èn fu a sani disi ede den Nazi kiri 270 fu den. A no nanga mofo wawan den ben gi yesi na a komando disi: „Fu di Gado na wi tiriman, meki wi musu gi yesi na en na presi fu libisma.”​—Tori fu den Apostel 5:29.

Yehovah Kotoigi a no spesrutu sortu sma, soleki fa Ulrich Schmidt, a presidenti fu na asamblei fu Noordrijn-Westfalen ben sori. A brochure Landtag Intern e sori taki Ulrich Schmidt ben taki dati Kotoigi „de leki ala tra sma; den ben e arki den konsensi, den ben hori densrefi steifi na a bribi fu den, den ben sori taki den de deki-ati borgu fu a kondre, èn den ben kakafutu gi a denki fu den Nazi fu di den ben hori densrefi na a Kresten bribi”. Wi kan de seiker taki Yehovah Gado e prisiri nanga ala den wan di e tan loyaal na en na ini muilek situwâsi. Na Odo 27:11 wi e leisi: „Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi.”

[Sma di abi a reti fu a prenki na tapu bladzijde 30]

Courtesy of United States Holocaust Memorial Museum