Den feni en wan moi sani taki wi e poti prakseri na Bijbel

MARIANNA na wan Kotoigi fu Yehovah di e libi na a zuidsei fu Italiakondre. A abi 18 yari èn a de na ini a lasti klas fu middelbaar skoro. A e go na a srefi skoro pe wan tu tra yongu Kotoigi e go tu.

„Wan tu yari kaba”, na so Marianna skrifi, „wan tu fu wi e gebroiki a buku Ondrosuku den Buku fu Bijbel ala dei, fu leisi a bijbeltekst ibri dei te wi abi pauze na skoro. A wan-enkri presi pe wi ben kan du disi, ben de na ini wan gadri fu a skoro, krosibei fu a kamra fu den skoromeester nanga skoromisi. A no ben de wan tiri presi. Furu fu den leriman ben e si wi te den ben e pasa, èn sonwan fu den ben e tan tanapu fu luku san wi ben e du. Furu tron disi ben gi wi na okasi fu gi piki tapu den aksi fu den. Ibri dei den ben e tanapu luku wi, awinsi na wan fu den nomo. Wan tu fu den ben tan arki fa wi ben e taki makandra fu a deitekst èn den ben feni en wan heri moi sani taki wi leki Kotoigi lobi yeye afersi. Wan leisi, na ondro-driktoro fu a skoro kari wi fu kon hori a deitekst na ini a kamra fu den skoromeester nanga den skoromisi.

Di a skoromeester fu mi si pe wi ben e hori a deitekst, dan a aksi a driktoro fu a skoro efu wi ben kan du dati na ini wan fu den klas, pe dyugudyugu no de. A driktoro ben feni en bun, èn a skoromeester ben prèise wi na fesi a heri klas fu di wi ben de wan bun eksempre gi trawan. Wi alamala breiti srefisrefi fu a bigi grani disi di Yehovah gi wi.”