Yu sa skèin a glori fu Gado?

„Neleki wan spikri, wi e skèin a glori fu Yehovah.”​—2 KORENTESMA 3:18.

1. San Moses si, èn san pasa baka dati?

A FISYUN disi ben de wan fu den moro fruwondru sani di sma oiti ben si. Moses ben de hei na tapu Sinaibergi, èn nowan sma ben de nanga en di Gado du wan tumusi aparti sani di Moses ben aksi en fu du. Gado ben gi Moses primisi fu si wan sani di nowan libisma ben si ete, èn dati ben de a glori fu Yehovah. Wi kan frustan taki a no Yehovah srefi Moses ben si. Te Gado e sori ensrefi, dan dati de so wan kefalek moi sani taki nowan libisma kan luku Gado èn tan na libi. Ma Yehovah poti en „mindri-anu” abra Moses, fu gi en kibri teleki A pasa; soleki fa a sori, a gebroiki wan engel fu du disi. Baka dati, Yehovah meki Moses si a brenki leti di ben e skèin, baka di Gado pasa na ini a glori fu en. Yehovah ben taki nanga Moses tu nanga yepi fu wan engel. Bijbel e fruteri san pasa baka dati: „A ben de so, taki di Moses saka komoto fu Sinaibergi, . . . a buba fu en fesi ben e brenki baka di a taki nanga [Yehovah].”​—Exodus 33:18–34:7, 29.

2. San na apostel Paulus ben skrifi fu a glori di Kresten e skèin?

² Kon meki wi taki dati yu ben drape nanga Moses na tapu a bergi. A ben o de wan tumusi moi sani fu si a kefalek bigi glori fu na Almaktiwan èn fu yere san a ben abi fu taki! A ben o de wan bigi grani fu saka komoto fu Sinaibergi makandra nanga Moses, a mindriman fu a Wet frubontu! Ma yu sabi taki tru Kresten e skèin a glori fu Gado na wan fasi di bigi moro leki a fasi fa Moses ben e skèin dati? Na apostel Paulus ben skrifi wan brifi pe wi kan leisi fu a seryusu tori disi di e meki wi denki. A ben skrifi taki salfu Kresten de leki ’spikri di e skèin a glori fu Yehovah’ (2 Korentesma 3:7, 8, 18). Yu ben sa kan taki dati Kresten di abi a howpu fu libi na grontapu, e skèin a glori fu Gado tu.

Fa Kresten e skèin a glori fu Gado?

3. Fa wi kon sabi sani fu Yehovah di Moses noiti ben kon sabi?

³ Ma fa wi ben sa man skèin a glori fu Gado? Wi no si noso yere Yehovah soleki fa Moses ben si noso yere en. Ma wi kon sabi sani fu Yehovah di Moses noiti ben kon sabi. Di Moses dede, Yesus no ben kon ete. Sowan 1500 yari ben pasa, fosi Yesus kon leki Mesias. Fu dati ede, Moses no ben man sabi fa a Wet ben o kon tru na ini Yesus, di dede so taki libisma ben kan kisi frulusu fu a hebi banawtu di sondu nanga dede tyari kon na den tapu (Romesma 5:20, 21; Galasiasma 3:19). Boiti dati, Moses ben man si soso wan tu fu den moi sani di Yehovah ben abi na prakseri, sani di abi furu fu du nanga a Mesias Kownukondre èn nanga a Paradijs di a Kownukondre disi o tyari kon na grontapu. Sobun, wi no e si a glori fu Yehovah nanga wi trutru ai, ma wi e si en fu di wi kisi bribi nanga yepi fu den Bijbel leri. Sosrefi, a no wan engel meki wi yere a sten fu Yehovah, ma wi yere en sten nanga yepi fu Bijbel, èn spesrutu nanga yepi fu den Evangelietori di e fruteri wi na wan heri moi fasi fu den leri nanga a diniwroko fu Yesus.

4. (a) Fa salfu Kresten e skèin a glori fu Gado? (b) Na sortu fasi den wan di abi a howpu fu libi na grontapu, kan skèin a glori fu Gado?

⁴ Aladi a fesi fu Kresten no e brenki trutru te den e skèin a glori fu Gado, toku yu ben sa kan taki dati a fesi fu den e brenki te den e fruteri trawan fu den tumusi moi eigifasi fu Yehovah nanga den sani di a abi na prakseri. A profeiti Yesaya ben taki na fesi dati ’fu a pipel fu Gado ben o fruteri sma fu ala kondre fu a glori fu [Yehovah]’ (Yesaya 66:19). Na ini 2 Korentesma 4:1, 2 wi e leisi sosrefi: „Wi abi a diniwroko disi, . . .  èn dati meki . . .  wi no e du den syen sani moro di wi  ben du na wan kibri fasi, wi no abi trikifasi èn wi no e drai a wortu fu Gado, ma fu di wi e sori sma a waarheid krin, meki wi e tron wan bun eksempre na fesi Gado, na wan fasi di abi krakti tapu a konsensi fu ala sma.” Paulus ben e taki spesrutu fu salfu Kresten di de „dinari fu wan nyun frubontu” (2 Korentesma 3:6). Ma a diniwroko fu den ben abi krakti tapu bun furu sma di kisi a howpu fu libi fu têgo na grontapu. A diniwroko di den tu grupu disi kisi fu du, na fu skèin a glori fu Yehovah nanga yepi fu den sani di den e leri sma, ma sosrefi nanga den sani di den e du. Wi abi a frantwortu nanga a grani fu skèin a glori fu a Moro Hei Gado!

5. Sortu buweisi wi e kisi te wi e si taki a e go bun nanga wi na yeye fasi?

⁵ Na ini a ten disi, a tumusi moi bun nyunsu fu Gado Kownukondre e preiki gi sma na heri grontapu, soleki fa Yesus ben taki na fesi (Mateyus 24:14). Sma fu ala kondre, lo, pipel, nanga tongo ben breiti srefisrefi fu yere a bun nyunsu èn den kenki a libi fu den fu du a wani fu Gado (Romesma 12:2; Openbaring 7:9). Neleki fa a ben de nanga den fosi Kresten, na so den sma disi no man tapu fu taki fu den sani di den si èn yere (Tori fu den Apostel 4:20). Moro leki siksi milyun sma e skèin a glori fu Gado na ini a ten disi, èn dati na moro sma leki iniwan tra ten na ini historia. Yu na wan fu den? Na yeye fasi a e go bun nanga a pipel fu Gado, èn disi na wan krin buweisi taki Yehovah e blesi den èn e kibri den. Wan fasi fa yu kan si moro krin taki a yeye fu Yehovah de na wi tapu, na te tranga feanti wani du wi ogri. Kon meki wi go luku now fu san ede disi de so.

Sma no sa man meki a pipel fu Gado tapu den mofo

6. Fu san ede wi musu abi bribi nanga deki-ati efu wi wani horibaka gi Yehovah?

⁶ Kon meki wi taki dati den ben gi yu wan kari fu go na krutu fu kotoigi teige wan bigi ogriman. Yu sabi taki na ogriman abi wan organisâsi di abi furu makti èn taki a sa du ala san a man fu no meki yu fruteri sma san a du. Yu musu abi deki-ati fu kotoigi teige so wan ogriman èn yu musu abi a frutrow tu taki den tiriman sa man gi yu kibri, so taki na ogriman no man du yu ogri. Wi de na ini wan srefi sortu situwâsi tu. Te wi e taki nanga sma fu Yehovah èn fu den sani di a abi na prakseri, dan wi e kotoigi teige Satan Didibri, èn na so fasi wi e sori sma taki a de wan kiriman èn wan leiman di e kori sma na heri grontapu (Yohanes 8:44; Openbaring 12:9). Efu yu wani opo taki gi Yehovah èn efu yu wani kotoigi teige Didibri, dan yu musu abi bribi nanga deki-ati.

7. Omeni makti Satan abi, èn san a e pruberi fu du?

⁷ A no de fu taki dati Yehovah na a Moro Hei Sma di de. A makti fu en bigi krinkrin moro leki di fu Satan. Wi kan de seiker taki boiti taki Yehovah man kibri wi, a e angri tu fu du dati efu wi e dini en na wan loyaal fasi (2 Kroniki 16:9). Ma toku wi sabi taki Satan na a tiriman fu den ogri yeye èn fu den libisma na grontapu di no abi wan banti nanga Gado (Mateyus 12:24, 26; Yohanes 14:30). Fu di Satan man tan soso na ini a birti fu grontapu èn fu di a abi „bigi atibron”, meki a e du ala san a man fu gens den futuboi fu Yehovah. Nanga yepi fu a grontapu di a e tiri, a e pruberi fu tapu a mofo fu ala sma di e preiki a bun nyunsu (Openbaring 12:7-9, 12, 17). Fa a e du disi? Wi kan kari dri fasi.

8, 9. San Satan e du fu meki sma sori tumusi furu lobi gi sani di no de so prenspari, èn fu san ede wi musu luku bun sortu mati wi e teki?

 ⁸ Wan sani di Satan e gebroiki fu pruberi fu puru wi prakseri, na den broko-ede fu a libi. Sma di e libi na ini den lasti dei disi na sma di lobi moni, di lobi densrefi nomo, èn di e prakseri soso prisiri. Den no de sma di lobi Gado (2 Timoteyus 3:1-4). Fu di moro furu sma e poti so furu prakseri na den sani fu na aladei libi, meki den ’no e poti prakseri’ na a bun nyunsu di wi e fruteri den. Den no wani kon leri sabi a Bijbel waarheid kwetikweti (Mateyus 24:37-39). Wi ben sa kan teki a fasi fu denki disi abra, èn a kan meki wi fadon na sribi na yeye fasi. Efu wi e kon lobi gudu èn den prisiri fu a libi, dan a lobi di wi abi gi Gado sa kon kowru.​—Mateyus 24:12.

⁹ Fu dati ede, Kresten e luku bun suma den e teki leki mati. Kownu Salomo ben skrifi: „A sma di e waka nanga konisma, sa kon koni, ma a sma di abi demakandra nanga den wan sondro frustan, no sa abi bun bakapisi” (Odo 13:20). Meki a de so taki wi e „waka” nanga den sma di e skèin a glori fu Gado. A de wan prisiri sani trutru fu du disi! Te wi e kon makandra nanga wi Kresten brada nanga sisa na den konmakandra fu wi èn na tra okasi sosrefi, dan a lobi, a bribi, a prisiri, nanga a koni fu den, e gi wi deki-ati. A bun demakandra disi e gi wi moro deki-ati fu tan abi a fasti bosroiti fu horidoro na ini wi diniwroko.

10. Na sortu fasi Satan e gebroiki spotu fu gens den sma di e skèin a glori fu Gado?

¹⁰ Wan tra sani di Satan e gebroiki fu pruberi fu tapu ala Kresten fu skèin a glori fu Gado, na a spotu di sma e spotu den. A no musu fruwondru wi taki sma e du dati. Di Yesus Krestes ben e du en diniwroko na grontapu, dan sma ben e spotu en, den ben e lafu en, den ben e kosi en, den ben e dreigi en, den du ala sortu ogri nanga en, èn den spiti srefi na en tapu (Markus 5:40; Lukas 16:14; 18:32). Sma ben e spotu den fosi Kresten tu (Tori fu den Apostel 2:13; 17:32). Sma e du den srefi sortu ogri disi nanga den futuboi fu Yehovah na ini a ten disi. Soleki fa na apostel Petrus e sori wi, dan te yu luku en bun, sma ben o taki dati Kresten na „falsi profeiti”. „Na ini den lasti dei,” na so Petrus ben taki na fesi, „spotuman o kon di o spotu unu èn di o handri akruderi den eigi lostu, èn den o taki: ’Pe a denoya fu en de di Gado ben pramisi? We, . . . ala sani tan soifri soleki fa den ben de sensi di Gado bigin meki sani’” (2 Petrus 3:3, 4). Sma di e spotu a pipel fu Gado, e taki dati wi no sabi san e pasa trutru na ini a libi. Sma e si den Bijbel markitiki di e sori fa wi musu tyari wisrefi, leki sani di no e fiti moro na ini a nyunmodo ten fu wi. Furu sma e si a boskopu di wi e preiki, leki wan lawlaw sani (1 Korentesma 1:18, 19). A kan taki sma e spotu wi na skoro, na wrokope, èn son leisi srefi na ini na osofamiri, fu di wi na Kresten. Ma wi abi a fasti bosroiti fu tan skèin a glori fu Gado nanga yepi fu a preikiwroko fu wi, bika neleki Yesus wi sabi taki Gado Wortu na waarheid.​—Yohanes 17:17.

11. Fa Satan gebroiki frufolgu fu pruberi fu meki den Kresten tapu den mofo?

¹¹ Ete wan sani di Didibri e du fu pruberi fu meki wi tapu wi mofo, na taki a e gens wi, noso a e frufolgu wi. Yesus ben taigi den bakaman fu  en: „Sma o tyari banawtu kon na un tapu èn den o kiri unu; na ini ala kondre den sma o teige unu fu mi nen ede” (Mateyus 24:9). Iya, wi leki Yehovah Kotoigi kisi fu du nanga hebi frufolgu na ini furu presi na grontapu. Wi sabi taki langa ten pasa, Yehovah ben taki na fesi dati den sma di e dini Gado èn den wan di e dini Satan Didibri, ben o abi bita-ati gi makandra, noso den ben o de feanti fu makandra (Genesis 3:15). Wi sabi tu taki efu wi e hori wi soifri retifasi te wi e kisi tesi, dan wi e buweisi taki Yehovah wawan abi a reti fu tiri wi. Te wi sabi disi, dan a kan meki wi kon tranga, awansi sortu hebi tesi e miti wi. Nowan frufolgu sa meki wi tapu wi mofo fu ala ten efu wi tan abi a fasti bosroiti fu skèin a glori fu Gado.

12. Fu san ede wi musu prisiri te wi e tan du muiti fu de getrow awansi Satan e gens wi?

¹² Yu e kakafutu gi a denki fu grontapu èn yu e tan getrow awansi sma e spotu yu èn e frufolgu yu? Efu dati de so, dan yu kan de nanga prisiri. Yesus ben gi den sma di ben o de bakaman fu en, a dyaranti disi: „Koloku fu unu te sma e gi unu porinen èn te den e frufolgu unu, aladi den e lei èn e taki ala sortu ogri fu unu, fu mi ede. Un musu breiti èn prisiri pasa marki, fu di unu o kisi wan bigi pai na hemel; bika na so sma ben frufolgu den profeiti di ben de fosi unu” (Mateyus 5:11, 12). Te yu e horidoro, dan dati na wan buweisi taki a tranga santa yeye fu Yehovah de na yu tapu, èn taki a e gi yu a krakti fu skèin a glori fu en.​—2 Korentesma 12:9.

Na Yehovah e yepi wi fu horidoro

13. San na a moro prenspari sani di e meki taki wi e horidoro na ini wi Kresten diniwroko?

¹³ Wan prenspari sani di meki taki wi e horidoro na ini a diniwroko, na taki wi lobi Yehovah èn wi e prisiri fu skèin a glori fu en. Nofo tron a de so, taki te wan sma lobi wan trawan èn a abi lespeki gi en, dan a wani du sani soleki fa a sma disi e du en èn a wani waka na en baka. We, a moro bun Sma di wi kan waka na baka, na Yehovah Gado. Fu di Gado srefi lobi wi trutru, meki a seni en Manpikin kon na grontapu fu kotoigi fu a waarheid èn fu frulusu a libisma famiri di e gi yesi na En (Yohanes 3:16; 18:37). Neleki Gado, wi wani taki ala sortu sma musu sori berow èn kisi frulusu; dati meki wi e preiki gi den (2 Petrus 3:9). Na fu di wi e angri fu du disi, èn fu di wi abi a fasti bosroiti fu waka baka Gado, meki wi e tan skèin a glori fu en nanga yepi fu a diniwroko fu wi.

14. Fa Yehovah e tranga wi so taki wi man horidoro na ini a diniwroko fu wi?

¹⁴ Ma te fu kaba, na Yehovah e gi wi a krakti fu horidoro na ini a Kresten diniwroko. A e horibaka gi wi èn a e tranga wi nanga yepi fu en santa yeye èn en organisâsi, èn sosrefi nanga yepi fu Bijbel, a Wortu fu en. Yehovah e ’meki taki [den sma di de klariklari fu skèin a glori fu en] man  horidoro’. A e gi piki tapu den begi fu wi èn a e gi wi a koni fu kakafutu gi tesi (Romesma 15:5; Yakobus 1:5). Boiti dati, Yehovah no e gi pasi taki wi e kisi wan tesi di hebi so te, taki wi no man horidoro. Efu wi e frutrow tapu Yehovah, dan a sa tyari frulekti kon so taki wi kan tan skèin a glori fu en.​—1 Korentesma 10:13.

15. San e yepi wi fu horidoro?

¹⁵ Te wi e horidoro na ini a diniwroko fu wi, dan dati e buweisi taki a yeye fu Gado de na wi tapu. Fu eksempre: Kon meki wi taki dati wan sma aksi yu fu go na sma oso fu prati wan spesrutu sortu brede èn taki den no abi fu pai gi a brede. A sma e taigi yu taki yu musu pai den kostu nanga yu eigi moni èn taki yu musu prati a brede na wan ten di yu ben kan gebroiki gi yusrefi. Ma baka wan syatu pisi ten, yu e kon si taki wan tu sma nomo wani a brede fu yu; son sma wani tapu yu srefi fu prati a brede. Yu denki taki yu ben o tan du a wroko dati ibri mun baka, noso yari go yari kon? Kande yu no ben o du dati. Ma toku yu du furu muiti kande fu preiki a bun nyunsu na wan ten di yu ben kan gebroiki gi yusrefi, èn a kan taki yu pai den kostu nanga yu eigi moni furu yari langa, iya, furu tenti yari langa srefi. Fu san ede? A no fu di yu lobi Yehovah? Èn a gebroiki en yeye fu blesi yu gi den muiti di yu du fu di a yepi yu fu horidoro, a no so? Iya, na so a de!

Wan wroko di sma no sa frigiti

16. San a wani taki gi wi èn gi den wan di e arki wi, te wi e horidoro na ini a diniwroko fu wi?

¹⁶ A diniwroko di abi fu du nanga a nyun frubontu, na wan presenti di bigi pasa marki (2 Korentesma 4:7). Na so wi kan taki dati a Kresten diniwroko di den tra skapu e du na heri grontapu, na wan bigi gudu tu. Efu yu e tan horidoro na ini a diniwroko fu yu, dan soleki fa Paulus ben skrifi gi Timoteyus, yu sa man „frulusu yusrefi èn sosrefi den sma di e arki yu” (1 Timoteyus 4:16). Prakseri san disi wani taki. A bun nyunsu di yu e preiki, e gi trawan na okasi fu libi fu têgo. Yu kan kisi wan tranga banti nanga den sma di yu e yepi na yeye fasi. Prakseri nomo fa a o de wan prisiri sani fu libi fu têgo na ini a Paradijs nanga den sma di yu yepi fu kon sabi Gado! Yu kan de seiker taki den no sa frigiti a muiti di yu du fu yepi den. Iya, a o de wan sani di o meki yu firi bun srefisrefi!

17. Fu san ede wi kan taki dati wi e libi na ini wan tumusi aparti pisi ten fu a historia fu libisma?

¹⁷ Yu e libi na ini wan tumusi aparti pisi ten fu a historia fu libisma. Noiti moro, sma o preiki a bun nyunsu gi sma di no abi wan banti nanga Gado. Noa ben e libi na mindri den sortu sma disi, èn a si fa den kisi pori. A ben musu prisiri trutru fu sabi taki a bow wan ark soifri soleki fa Gado ben wani, èn taki en osofamiri kisi frulusu leki bakapisi fu dati! (Hebrewsma 11:7) Yu sosrefi kan prisiri na a fasi disi tu. Prakseri nomo fa yu o firi te yu de na ini a nyun grontapu èn te yu o prakseri baka fu a wroko di yu ben du na ini den lasti dei disi, aladi yu sabi taki yu du san yu ben man fu horibaka gi den afersi fu a Kownukondre.

18. Sortu dyaranti nanga deki-ati Yehovah e gi den futuboi fu en?

¹⁸ Fu dati ede, kon meki wi tan skèin a glori fu Gado. A sa de wan sani di wi no sa frigiti noiti moro te wi e du dati. Yehovah sosrefi no e frigiti a wroko fu wi. Bijbel e gi wi a deki-ati disi: „Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en, fu di unu ben dini den santawan èn unu e tan dini den te now ete. Ma wi wani srefisrefi taki ibriwan fu unu musu abi a srefi faya, so taki unu kan de seiker fu a howpu te na a kaba. Na so fasi unu no sa kon lesi, ma unu sa waka baka na eksempre fu den sma di kisi den pramisi fu di den ben abi bribi èn fu di den ben abi pasensi.”​—Hebrewsma 6:10-12.

Yu kan tyari disi kon na krin?

• Fa Kresten e skèin a glori fu Gado?

• San na wan tu sani di Satan e gebroiki fu pruberi fu tapu a mofo fu Gado pipel?

• Sortu buweisi wi abi taki a yeye fu Gado de na wi tapu?

[Aksi fu a tori disi]

[Prenki na tapu bladzijde 15]

A glori fu Gado ben de fu si na tapu a fesi fu Moses

[Prenki na tapu bladzijde 16, 17]

Wi e skèin a glori fu Gado te wi e du a diniwroko fu wi