Aksi fu leisiman

Fu san ede wi kan taki dati den wortu soleki „a wan-enkri sma di no man dede” èn a wan ’di nowan sma no si, èn di nowan sma man si’, no abi fu du nanga Yehovah Gado, ma nanga Yesus?

Na apostel Paulus ben skrifi: „A wan-enkri Tiriman, a wan di de koloku, o sori ensrefi na en eigi reti ten; en na Kownu fu den wan di e tiri leki kownu èn Masra fu den wan di e tiri leki masra; en na a wan-enkri sma di no man dede, èn a e tan na ini wan leti pe sma no man go; nowan sma no si en, èn nowan sma man si en.”​—1 Timoteyus 6:15, 16.

Moro furu a de so taki sma di e fruklari sani fu Bijbel e si a tori na a fasi disi: ’Fa den wortu soleki „a wan-enkri Tiriman”, nanga a wan ’di nowan sma no si èn di nowan sma man si’ kan abi fu du nanga iniwan tra sma, leki na Almaktiwan nomo?’ A no de fu taki, dati sma ben kan gebroiki den wortu dati fu taki fu Yehovah. Ma den tra wortu na ini den tekst disi e sori krin taki na 1 Timoteyus 6:15, 16, Paulus ben e taki fu Yesus.

Na a kaba fu vers 14, Paulus e taki dati „wi Masra Yesus Krestes o sori ensrefi” (1 Timoteyus 6:14). Sobun, te Paulus e skrifi na ini vers 15 taki „a wan-enkri Tiriman, a wan di de koloku, o sori ensrefi na en eigi reti ten”, dan a no e taki dati Yehovah Gado o sori ensrefi, ma a e taki fu Yesus. We dan, suma na a „wan-enkri Tiriman”? We soleki fa a sori, dan wi kan taki dati Yesus na a Tiriman di Paulus ben taki fu en. Fu san ede dati de so? Den tra wortu na ini den tekst e tyari kon na krin taki Paulus e agersi Yesus nanga libisma tiriman. Yesus na trutru soleki fa Paulus ben skrifi: „Kownu fu den [libisma] di e tiri leki kownu èn Masra fu den [libisma] di e tiri leki masra.” * Iya, te yu e agersi Yesus nanga den sma dati, dan Yesus na a „wan-enkri Tiriman”. Yesus ben kisi „tirimakti nanga wartifasi nanga wan kownukondre, so taki den pipel, den grupu fu ala kondre nanga tongo den alamala ben sa dini en” (Danièl 7:14). Nowan libisma tiriman kan taki nanga leti fu ensrefi taki a kisi ala den sani disi!

Fa a de nanga den wortu „a sma di en wawan no man dede”? Paulus e agersi Yesus baka nanga den libisma kownu. Nowan tiriman na grontapu kan taki dati a kisi a grani fu libi sondro fu man dede, ma Yesus kisi a grani dati. Paulus ben skrifi: „Wi sabi taki now di Krestes kisi wan opobaka, a no sa dede moro; dede no abi makti na en tapu moro” (Romesma 6:9). Sobun, Yesus na a fosiwan di Bijbel e taki fu en dati a kisi a presenti fu libi sondro fu man dede. Iya, na a ten di Paulus ben skrifi a brifi gi Timoteyus, Yesus ben de a wan-enkri sma di ben kisi libi di no man pori.

Wi musu hori na prakseri sosrefi taki Paulus no ben kan taki dati Yehovah wawan e libi sondro taki a man dede, bika na a ten di Paulus ben skrifi den wortu dati, Yesus sosrefi ben e libi sondro fu man dede. Ma te yu e agersi Yesus nanga grontapu tiriman, dan Paulus ben kan taki nanga leti taki Yesus wawan man libi sondro fu man dede.

Boiti dati, a tru srefisrefi taki baka di Yesus kisi wan opobaka èn a opo go na hemel, dan wi kan taki fu en dati a de a wan ’di nowan sma no si, èn di nowan sma man si’. A tru taki den salfu disipel fu Yesus ben o si en baka te densrefi dede èn kisi wan opobaka na hemel leki yeye (Yohanes 17:24). Ma nowan sma na grontapu ben o si Yesus te a ben o kisi glori. Fu dati ede wi kan taki nanga leti taki sensi di Yesus kisi wan opobaka èn di a opo go na hemel, „nowan sma” no si Yesus trutru.

Iya, te yu e leisi den wortu di skrifi na 1 Timoteyus 6:15, 16, dan a kan gersi leki den abi fu du nanga Gado. Ma den tra sani di Paulus e taki, èn den tra tekst sosrefi di e tyari a tori disi kon moro na krin, e sori taki Paulus ben e taki fu Yesus.

[Futuwortu]