Waka nanga Gado na ini den muilek ten disi

„Heinok ben tan waka nanga a tru Gado. Ne a no ben de moro, bika Gado ben teki en.”​—GENESIS 5:24.

1. San na wan tu sani fu a ten fu wi di e meki a libi kon muilek srefisrefi?

MUILEK ten! Den wortu disi e sori wi krin taki a libisma famiri kisi fu du nanga bun furu dyugudyugu èn ogridu sensi a Mesias Kownukondre seti na ini 1914. Sensi a ten dati, libisma e libi na ini „den lasti dei”. Rampu soleki angriten, siki, gronseki, nanga feti, trobi libisma moro leki iniwan ten bifo (2 Timoteyus 3:1; Openbaring 6:1-8). Den wan di e dini Yehovah ondrofeni den rampu disi tu. Na wan noso tra fasi, wi alamala e kisi fu du nanga den problema fu a ten disi, aladi wi no sabi san a dei fu tamara o tyari kon. Problema na ekonomia sei, dyugudyugu na ini politiek, sosrefi ogridu, nanga siki, na wan tu fu den sani di e meki a libi kon muilek srefisrefi.

2. Sortu problema e miti den futuboi fu Yehovah?

² Boiti dati, furu futuboi fu Yehovah kisi hebi frufolgu doronomo, fu di Satan e tan feti nanga den wan di ’e du san den komando fu Gado e taki èn di kisi a wroko fu kotoigi fu Yesus’ (Openbaring 12:17). A tru taki a no wi alamala kisi hebi frufolgu, ma toku ala tru Kresten abi fu kakafutu gi Satan Didibri èn gi a yeye noso a denki di a e meki sma kisi (Efeisesma 2:2; 6:12). Wi musu luku bun ala ten taki a yeye dati no abi krakti na wi tapu, fu di wi e kisi fu du nanga dati na wrokope, na skoro, èn na iniwan tra presi pe wi e miti sma di no wani sabi noti fu a soifri anbegi.

Waka nanga Gado, no waka nanga den grontapusma

3, 4. Na sortu fasi Kresten de heri tra fasi leki grontapusma?

³ Na ini a fosi yarihondro, Kresten ben abi fu kakafutu tu gi a yeye fu a grontapu disi, èn dati meki den ben de heri tra fasi leki den sma di no ben de memre fu a Kresten gemeente. Paulus ben sori fa Kresten e difrenti fu den sma disi, di a taki: „Fu dati ede, na ini a nen fu Masra mi e  taki disi èn e kotoigi taki un no musu libi moro leki den grontapusma di abi wan don denki; den de na ini dungru na frustan sei èn den no man kisi a libi di Gado e gi, fu di den no wani sabi noti fu Gado èn fu di na ati fu den kon tranga. Den no sabi moro san bun, noso san ogri, èn fu dati ede den e gi densrefi abra na wan yayolibi èn den gridi fu du wan lo morsu sani.”​—Efeisesma 4:17-19.

⁴ Den wortu disi e sori krin taki a grontapu disi de na ini dipi dungru na yeye fasi, èn taki sma e tyari densrefi na wan fasi di no fiti kwetikweti. A ben de so na ini a ten fu Paulus, èn na so a de tu na ini a ten fu wi! Neleki den Kresten fu a fosi yarihondro, na so Kresten na ini a ten disi ’no e libi moro leki den grontapusma’. Na presi fu dati, den abi a tumusi bigi grani fu waka nanga Gado. Ma son sma kan aksi densrefi efu a kan taki lagi, sondu libisma man waka nanga Yehovah. We, Bijbel e sori taki a sani dati kan. Boiti dati, Yehovah wani taki den du disi. Na ini a di fu aiti yarihondro bifo Gewoon Teri, santa yeye ben meki a profeiti Mika skrifi den wortu disi: „San Yehovah e aksi fu yu baka, leki fu du san reti èn fu lobi bunfasi èn fu sori sakafasi te yu e waka nanga yu Gado?”​—Mika 6:8.

Fa èn fu san ede wi musu waka nanga Gado

5. Fa wan sondu libisma kan waka nanga Gado?

⁵ Fa wi kan waka nanga na almakti Gado di wi no man si? A de krin taki wi no man du dati leki fa wi ben o du dati nanga tra libisma. Na ini Bijbel, den wortu „fu waka” wani taki son leisi „fu handri na wan spesrutu sortu fasi”. * Nanga disi na prakseri, wi e frustan taki wan sma di e waka nanga Gado e libi soleki fa Gado wani èn soleki fa En feni bun. Te wi e du muiti fu libi na so wan fasi, dan wi o de tra fasi leki furu sma na wi lontu. Toku, disi na a wan-enkri bun fasi fa wan Kresten musu libi. Fu san ede? Furu reide de fu san ede.

6, 7. Fu san ede a moro bun fasi fu libi na fu waka nanga Gado?

⁶ A fosi reide, na taki Yehovah na wi Mekiman, a Sma di gi wi libi, èn a Sma di e gi wi ala san wi abi fanowdu fu man tan na libi (Openbaring 4:11). Fu dati ede, na en wawan abi a reti fu taigi wi na sortu fasi wi musu libi. Boiti dati, a moro bun fasi fu libi, na fu waka nanga Gado. Yehovah seti sani, so taki den wan di e waka nanga en kan kisi pardon fu sondu, èn a e gi den a trutru howpu fu kisi têgo libi. Wi hemel Tata di lobi wi alamala, e gi koni rai sosrefi di e yepi den wan di e waka nanga en, fu abi wan bun libi nownow, aladi den na sondusma èn aladi den e libi na ini wan grontapu di de na ini a makti fu Satan (Yohanes 3:16; 2 Timoteyus 3:15, 16; 1 Yohanes 1:8; 2:25; 5:19). Wan tra reide fu san ede wi musu waka nanga Gado, na taki te wi de klariklari fu du dati, dan dati e yepi fu meki vrede nanga wánfasi tan na ini a gemeente.​—Kolosesma 3:15, 16.

⁷ Te fu kaba, a moro prenspari reide fu san ede wi musu waka nanga Gado, na taki te wi e du disi, dan wi e sori na sortu sei wi de na ini a bigi strei di bigin na ini Eden, namku a strei di abi fu du nanga suma abi a reti fu tiri hemel nanga grontapu (Genesis 3:1-6). Nanga a fasi fa wi e libi, wi e sori taki wi e tanapu krinkrin na a sei fu Yehovah, èn na wan deki-ati fasi wi e meki bekènti taki en wawan abi a reti fu de a Moro Hei Tiriman (Psalm 83:18). Na so fasi wi e handri akruderi a begi fu wi, taki a nen fu Gado musu kon santa èn taki sani musu pasa soleki fa en wani (Mateyus 6:9, 10). Iya, den wan di bosroiti fu waka nanga Gado, koni trutru! Den kan de seiker taki den e waka a reti pasi, fu di Yehovah „abi ala koni”. Noiti a e meki fowtu.​—Romesma 16:27.

8. Fa a ten fu Noa nanga Heinok ben de leki a ten fu wi?

⁸ Ma fa wi kan libi leki Kresten, aladi wi e libi na ini a muilek ten disi pe so furu sma no wani dini Yehovah? Wi o kon sabi a piki tapu na aksi disi te wi o luku fa getrow man na ini owruten ben tan hori den soifri retifasi na ini ten di ben muilek srefisrefi. Tu fu den man disi ben de  Heinok nanga Noa. Ala tu ben e libi na ini wan ten di ben de leki a ten fu wi. Ogridu ben lai srefisrefi. Na ini den dei fu Noa, grontapu ben furu nanga takrudu èn hurudu. Toku Heinok nanga Noa kakafutu gi a yeye fu a grontapu na ini a ten dati èn den ben e waka nanga Yehovah. Fa den ben man du dati? Fu gi piki tapu na aksi dati, wi sa luku na eksempre fu Heinok na ini na artikel disi. Na ini na artikel baka a wan disi, wi sa luku na eksempre fu Noa.

Heinok ben waka nanga Gado na ini muilek ten

9. San wi sabi fu Heinok?

⁹ Heinok na a fosi sma fu suma Bijbel e taki dati a ben e waka nanga Gado. Bijbel e taki: „Baka di a tron papa fu Metusala, dan Heinok ben e waka nanga a tru Gado ete” (Genesis 5:22). Baka dati, wi e leisi o langa Heinok libi. Gi wi na ini a ten disi, Heinok ben libi wan bun langa pisi ten, ma gi den sma na ini a ten fu en, Heinok ben libi syatu nomo. Baka di a tori fruteri o langa Heinok libi, dan a e taki: „Heinok ben tan waka nanga a tru Gado. Ne a no ben de moro, bika Gado ben teki en” (Genesis 5:24). Soleki fa a sori, dan Yehovah puru Heinok na mindri den libiwan èn a meki a sribi na ini dede fosi gensman ben kan du en ogri (Hebrewsma 11:5, 13). Boiti den syatu vers di wi leisi didyonsro, wan tu tekst nomo de na ini Bijbel di e taki fu Heinok. Ma te wi e luku den sani disi di wi sabi èn tra buweisi sosrefi, dan wi kan si trutru taki a ten fu Heinok ben muilek srefisrefi.

10, 11. (a) Fa moro nanga moro sma bigin du kruktudu, baka di Adam nanga Eva opo densrefi teige Gado? (b) Sortu profeiti boskopu Heinok ben e preiki, èn fa den sma ben feni a boskopu disi?

¹⁰ Fu eksempre, luku taki baka di Adam sondu, dan heri esi kruktudu panya na heri grontapu. Bijbel e taigi wi taki Kain, a fosi manpikin fu Adam, ben tron a fosi kiriman di a kiri en brada Abel (Genesis 4:8-10). Baka di Abel dede na wan ogri-ati fasi, Adam nanga Eva kisi wan tra manpikin di den ben kari Set. Disi na san wi e leisi fu en: „Set ben kisi wan manpikin tu èn a ben kari en Enos. Na a ten dati, den ben bigin kari a nen fu Yehovah (Genesis 4:25, 26). A sari fu taki dati ’a kari di den ben e kari a nen fu Yehovah’ na a ten dati, no ben de a yoisti fasi fu du dati. * Furu yari baka di Enos gebore, dan  Lamek, wan bakapikin fu Kain, ben meki wan singi gi den tu wefi fu en pe a ben e fruteri fa a ben kiri wan yongu man di ben gi en mankeri. A ben warskow sosrefi: „Efu na seibi tron wan sma musu pai te a du Kain ogri, dan na seibitenti na seibi tron a sa musu pai te a du Lamek ogri.”​—Genesis 4:10, 19, 23, 24.

¹¹ Den syatu pisi tori di wi luku didyonsro e sori taki a kruktudu di Satan ben du na ini a dyari fu Eden biginbigin, ben meki taki heri esi moro nanga moro bakapikin fu Adam bigin du ogridu. Na ini so wan grontapu, Heinok ben e dini leki profeiti fu Yehovah, èn den sani di a taki nanga yepi fu santa yeye abi furu krakti, srefi na ini a ten fu wi. Yudas e fruteri taki Heinok ben taki a profeititori disi: „Luku! Yehovah ben kon nanga den dusundusun santawan fu en, fu krutu ala sma èn fu buweisi ala den ogrisma ala den sani di den du na wan ogri fasi, èn ala den takru sani di den ogri sondari ben taki fu en” (Yudas 14, 15). Den wortu disi o kon tru te fu kaba na ini Armagedon (Openbaring 16:14, 16). Toku a ben musu fu de so, taki srefi na ini a ten fu Heinok furu „ogri sondari” atibron di den yere a profeititori fu Heinok. A ben de wan lobi-ati sani trutru taki Yehovah puru a profeiti na mindri den sma disi!

San ben gi Heinok krakti fu waka nanga Gado?

12. San ben meki taki Heinok ben de tra fasi leki den sma fu a ten fu en?

¹² Na ini a dyari fu Eden, Adam nanga Eva ben arki Satan, èn Adam ben opo ensrefi teige Yehovah (Genesis 3:1-6). Abel, a manpikin fu den, ben libi na wan tra fasi, èn Yehovah ben feni en bun (Genesis 4:3, 4). A sari fu taki dati moro furu fu den bakapikin fu Adam no ben de leki Abel. Ma toku, baka hondrohondro yari, wan man gebore di ben e libi neleki Abel, namku Heinok. San ben de a difrenti na mindri Heinok nanga den furu tra bakapikin fu Adam? Na apostel Paulus ben gi piki tapu na aksi dati, di a skrifi: „Na fu di Heinok ben abi bribi, meki Gado tyari en gowe, so taki a no ben o abi fu si dede, èn na nowan presi sma ben man feni en, fu di Gado ben tyari en gowe; bika bifo Gado tyari Heinok gowe, a taigi Heinok taki a ben prisiri nanga en” (Hebrewsma 11:5). Heinok ben de wan fu den „someni kotoigi” di ben e libi fosi a ten fu den Kresten èn di ben de heri moi eksempre fu sma di abi wan tranga bribi (Hebrewsma 12:1). Na bribi ben meki taki Heinok ben man tan tyari ensrefi na wan reti fasi na ini den moro leki 300 hondro yari di a ben e libi. Dati na moro leki dri tron a libimarki di furu fu wi e doro na ini a ten disi!

13. Sortu bribi Heinok ben abi?

¹³ Paulus ben taki fu a bribi fu Heinok nanga tra kotoigi, di a skrifi: „Bribi na te wan sma e fruwakti taki den sani di a e howpu, o kon seiker; a de a krin buweisi fu sani di de trutru, ma di wi no man si” (Hebrewsma 11:1). Iya, bribi na a overtoigi di wi abi taki den sani di wi e howpu sa kon tru, fu di wi abi buweisi fu dati. Na overtoigi disi de so tranga taki a abi krakti tapu san wi e si leki den moro prenspari sani na ini wi libi. Na a sortu bribi dati ben meki taki Heinok ben man waka nanga Gado, aladi den sma lontu en no ben e du disi.

14. Sortu soifri sabi Heinok ben abi kande di meki taki a kisi bribi?

¹⁴ Wan sma e kisi trutru bribi efu a abi soifri sabi. Sortu sabi Heinok ben abi? (Romesma 10:14, 17; 1 Timoteyus 2:4) A no de fu taki dati a ben sabi san ben pasa na ini Eden. Soleki fa a sori, dan a ben yere tu fa a libi ben de na ini a  dyari fu Eden di ben de ete na a ten dati kande, aladi libisma no ben man go drape (Genesis 3:23, 24). Heinok ben sabi sosrefi taki Gado ben abi na prakseri fu meki den bakapikin fu Adam kon furu na grontapu èn fu meki heri grontapu tron leki a fosi Paradijs (Genesis 1:28). Boiti dati, a no de fu taki dati Heinok ben lobi a pramisi fu Yehovah, taki A ben o meki wan Siri kon di ben o masi na ede fu Satan èn di ben o puru ala den takru bakapisi fu a kori di Satan ben kori libisma (Genesis 3:15). Iya, a profeititori di Heinok srefi ben taki nanga yepi fu santa yeye, èn di skrifi na ini a buku Yudas, ben taki na fesi fu a pori di a siri fu Satan o kisi. Fu di Heinok ben abi bribi, meki wi sabi taki a ben e anbegi Yehovah fu di a ben sabi taki Yehovah e „pai den sma di e suku en fayafaya” (Hebrewsma 11:6). Fu dati ede, aladi Heinok no ben sabi so furu leki wi na ini a ten disi, toku a ben sabi nofo fu man kisi wan tranga bribi. Nanga a bribi dati, a tan hori en soifri retifasi na ini muilek ten.

Teki na eksempre fu Heinok

15, 16. Fa wi kan libi leki Heinok?

¹⁵ Neleki Heinok, wi wani plisi Yehovah na ini den muilek ten disi, èn fu dati ede a bun fu teki na eksempre fu en. Wi musu kisi soifri sabi fu Yehovah èn fu den sani di a abi na prakseri, èn wi no musu lasi a sabi dati. Ma moro de fanowdu. Wi musu meki a soifri sabi dati tiri a fasi fa wi e libi (Psalm 119:101; 2 Petrus 1:19). Wi musu denki soleki fa Gado e denki, aladi wi e tan du muiti fu plisi en nanga ibri sani di wi e denki èn e du.

¹⁶ Bijbel no e fruteri wi efu moro sma ben e dini Yehovah na a ten fu Heinok, ma a de krin taki a ben e du dati en wawan, noso makandra nanga wan pikin grupu. Wi no de nanga so furu tu, ma dati no e meki wi lasi-ati. Yehovah sa horibaka gi wi, awinsi suma de teige wi (Romesma 8:31). Na wan deki-ati fasi, Heinok ben warskow taki den ogriman ben o kisi pori. Wi sosrefi, abi deki-ati tu te wi e preiki „a bun nyunsu disi fu a kownukondre”, awinsi sma e kosi wi, e gens wi, èn e frufolgu wi (Mateyus 24:14). Heinok no ben libi so langa leki den sma fu en ten. Toku a no ben e howpu tapu sani fu a grontapu dati. A ben e howpu tapu wan moro kefalek sani (Hebrewsma 11:10, 35). Wi sosrefi e howpu tapu a kontru fu den sani di Yehovah abi na prakseri fu du. Fu dati ede, wi no e gebroiki den sani fu grontapu dorodoro (1 Korentesma 7:31). Na presi fu dati, wi e gebroiki a krakti nanga den sani di wi abi, moro furu na ini a diniwroko di wi e du gi Yehovah.

17. Sortu sabi wi abi di Heinok no ben abi, èn san wi musu du fu dati ede?

¹⁷ Heinok ben abi a bribi taki a Siri di Gado ben pramisi, ben o kon na a ten di Yehovah poti. Now na pikinmoro 2000 yari pasa sensi a Siri dati, Yesus Krestes, kon. A sorgu taki a lusu-paiman pai, èn a meki taki wi nanga den getrow kotoigi fu owruten soleki Heinok, abi na okasi fu kisi têgo libi. A Siri dati, di de Kownu fu Gado Kownukondre now, ben trowe Satan komoto fu hemel kon na a grontapu disi, èn wi man si den takru bakapisi fu dati ala sei na wi lontu (Openbaring 12:12). Iya, wi kan kon sabi moro sani leki san Heinok ben sabi. Fu dati ede, meki wi abi tranga bribi neleki en. Meki na overtoigi di wi abi na ini a kontru fu den pramisi fu Gado, abi krakti tapu ala san wi e du. Meki wi de neleki Heinok èn waka nanga Gado, aladi wi e libi na ini muilek ten.

[Futuwortu]

San yu ben sa piki?

• San a wani taki fu waka nanga Gado?

• Fu san ede a moro bun fasi fu libi, na fu waka nanga Gado?

• San meki taki Heinok ben man waka nanga Gado, aladi a ben e libi na ini muilek ten?

• Fa wi kan teki na eksempre fu Heinok?

[Aksi fu a tori disi]

[Prenki na tapu bladzijde 15]

„Heinok ben tan waka nanga a tru Gado” fu di a ben abi bribi

[Prenki na tapu bladzijde 17]

Wi abi a tranga bribi taki den pramisi fu Yehovah sa kon tru

[Sma di abi a reti fu a prenki na tapu bladzijde 13]

Woman, far right: FAO photo/B. Imevbore; collapsing building: San Hong R-C Picture Company