Wan sma e kisi wini trutru te a de loyaal

NA INI son kondre, pikin-nengre feni en wan prisiri sani fu plak toriman na tapu a bosroko fu wan mati fu den, kande fu dreigi en. Den toriman e plak na a krosi èn awinsi san a mati fu den e du, efu na waka a e waka, lon a e lon, seki a e seki en skin, noso efu na dyompo a e dyompo, toku den toriman e tan plak. A wan-enkri fasi fa yu kan lusu den, na fu puru den wan fru wan. Yonguwan e prisiri fu du dati.

A no de fu taki, dati a no ala sma lobi en te toriman plak na den krosi fu en, ma ala sma e fruwondru fu a fasi fa den kan tan plak na sani. Wan sma di de loyaal abi wan srefi sortu fasi. Wan loyaal sma e tan abi wan krosibei banti nanga wan tra sma. Na wan loyaal fasi a e tyari den frantwortu di a matifasi dati e tyari kon, srefi te a no makriki fu du dati. A wortu „loyaalfasi” e memre wi na fasi soleki opregtifasi, a hori di wan sma e horibaka gi wan trawan ala ten, èn trutru lobi. Ma aladi yu e warderi en te sma de loyaal na yu, toku yu musu aksi yusrefi efu yu abi a fasti bosroiti fu de loyaal na trawan. Efu dati de so, dan na suma yu musu de loyaal?

A de prenspari fu de loyaal na ini a trowlibi

A trowlibi na wan fu den seti pe a de tumusi prenspari taki sma de loyaal na makandra, ma a sari fu si taki furu tron disi no de so. Wan masra nanga wan wefi musu tan getrow na a pramisi di den meki tapu den trowdei. Disi wani taki, dati den e tan na makandra èn e wroko gi a bun fu makandra. Te den de getrow na makandra, dan den e du wan prenspari sani di sa meki den de koloku èn di sa meki taki den kan frutrow makandra. Fu san ede wi kan taki dati? Fu di Gado meki libisma nanga a firi fu de loyaal na trawan, èn fu trawan de loyaal na den. Baka di Gado trow Adam nanga Eva na ini a dyari fu Eden, Gado ben taki: „Wan man sa gowe libi en papa nanga en mama èn a musu tai hori na en wefi.” A wefi ben musu du a srefi sani; a ben musu tai hori na en masra. A masra nanga a wefi ben musu de loyaal na makandra èn den ben musu wroko nanga makandra.​—Genesis 2:24; Mateyus 19:3-9.

A tru taki dati ben de dusundusun yari pasa. Disi wani taki dan, dati a no de fanowdu moro fu de loyaal na ini a trowlibi na ini a ten disi? Furu sma ben o taki dati a de fanowdu fu de loyaal. Ondrosukuman na ini Doisrikondre kon si taki 80 procent fu den sma di den aksi, feni taki a de prenspari trutru fu de loyaal na ini a trowlibi. Den ben du wan tra ondrosuku fu kon sabi sortu spesrutu fasi mansma nanga umasma ben feni moro moi. Den ben aksi wan grupu mansma fu kari feifi fasi di den ben sa wani si na umasma, èn den ben aksi wan grupu umasma fu kari feifi fasi di den ben sa wani si na mansma. Ala tu grupu, den mansma nanga den umasma, ben feni taki loyaalfasi na a moro prenspariwan.

Iya, loyaalfasi na wan fu den tumusi prenspari sani fu meki wan trowlibi waka bun. Ma soleki fa wi ben si na ini a fosi artikel, dan furu sma no de loyaal, aladi den feni taki a de wan bun sani fu de loyaal. Fu eksempre, taki someni sma e brokotrow na ini furu kondre, e sori taki na ala sei yu abi sma di no de loyaal. Fa trowpatna kan kakafutu gi a sani disi di furu sma e du, èn fa den kan tan loyaal na makandra?

 Loyaalfasi e meki taki wan trowlibi e tan

Te trowpatna e suku okasi fu sori taki den lobi makandra ete, dan na so fasi den e sori taki den de loyaal. Fu eksempre, furu tron a moro bun fu taki „wi” na presi fu taki „mi”. Yu kan taki sani soleki „den mati fu wi”, „den pikin fu wi”, „wi oso”, „den sani di wi ondrofeni”, èn so moro fara. Te masra nanga wefi wani du wan sani èn te den e teki bosroiti, efu na bosroiti di abi fu du nanga wan tanpresi, wroko, a kweki fu pikin, prisiriten, fakansi, noso nanga na anbegi, dan a bun taki den e hori den firi nanga den denki fu a patna fu den na prakseri.​—Odo 11:14; 15:22.

Te trowpaar e sori taki den abi makandra fanowdu, dan den e sori taki den de loyaal. Wan umasma di trow no e firi seiker te a masra fu en abi wan tumusi krosibei banti nanga wan tra umasma, èn wan masra e bigin frede te en wefi abi wan tumusi krosibei banti nanga wan tra mansma. Bijbel e gi mansma a rai fu tan na „a wefi fu [den] yongu yari”. Wan masra no musu gi pasi taki a lostu opo kon na ini en ati taki wan tra uma boiti a wefi fu en, sori lobi firi gi en. A no de fu taki dati a musu luku bun fu no du sutadu nanga wan tra uma. Bijbel e warskow: „Iniwan sma di e du sutadu nanga wan uma e mankeri ati; a sma di e du dati e tyari pori kon na tapu en eigi sili.” Na so a de tu taki wan uma musu handri na wan loyaal fasi fu di a e hori ensrefi na a srefi hei markitiki dati.​—Odo 5:18; 6:32.

A warti fu du muiti fu de loyaal na ini a trowlibi? Iya, seiker. A e meki taki sma e kisi wan moro bun trowlibi, a e meki taki den trowpatna e tan na makandra, èn a e meki taki ibriwan fu den trowpatna e kisi wini. Fu eksempre, te wan masra de loyaal na a wefi fu en fu di a e hori a tan bun fu en wefi na prakseri, dan a wefi o frutrow na en tapu èn dati e meki en moro makriki gi a wefi fu tyari ensrefi na wan tumusi bun fasi. Na so a de tu nanga a masra. A sa tyari ensrefi na wan tumusi bun fasi tu te en wefi de loyaal na en. A fasti bosroiti di a masra teki fu tan loyaal na en wefi e yepi en fu tan hori ensrefi na regtfardiki gronprakseri na ini ala sani di a e du na ini en libi.

Efu wan masra nanga wan wefi musu pasa muilek ten, dan loyaalfasi sa meki taki nowan fu den e bruya. Na a tra sei, te trowpaar no de loyaal na makandra, dan furu tron den e prati noso brokotrow te den e kisi problema. Te den e du dati, dan na presi taki den problema fu den e lusu, den e kisi tra problema. Na ini den yari baka 1980, wan barinen man di ben e gi sma rai di abi fu du nanga modo, ben gowe libi en wefi nanga den pikin fu en. A ben kon moro koloku, baka di a go libi en wawan? We, tu tenti yari baka dati, a ben taki dati a no ben de koloku baka di a prati nanga en osofamiri. Fu di a ben de ’en wawan, a ben broko en ede èn a no ben man sribi te neti fu di a no ben man winsi den pikin fu en wan switi neti rostu’.

Loyaalfasi na mindri papa nanga mama èn den pikin fu den

Te papa nanga mama de loyaal na makandra, dan furu tron den pikin fu den e leri fu de loyaal tu. Den pikin di kweki na ini wan osofamiri pe loyaalfasi nanga lobi de, sa feni en moro makriki bakaten fu tyari den frantwortu fu den te den  trow èn sosrefi te a papa nanga mama fu den kon siki fu di den kon owru.​—1 Timoteyus 5:4, 8.

A no de fu taki dati a no ala ten den papa nanga mama e kon siki fosi. Son leisi a de a pikin di abi a sorgu disi fanowdu. Na dati Herbert nanga Gertrud, di de Yehovah Kotoigi, ben musu du 40 yari langa. Dietmar, a manpikin fu den, ben abi wan siki pe den tetei fu en skin ben kon swaki so te, taki a no ben man du noti gi ensrefi èn a ben abi a siki disi en heri libi langa. Den lasti seibi yari bifo a dede na ini november 2002, Dietmar ben musu kisi sorgu dei nanga neti. En papa nanga mama ben sorgu gi en na wan lobi-ati fasi. Na ini den oso, den ben poti yepisani srefi di datra e gebroiki èn den ben kisi spesrutu leri fu datra so taki den ben kan yepi a boi nanga a siki fu en. Disi na wan moi eksempre fu wan osofamiri di de loyaal!

A de tumusi prenspari fu de loyaal na wi mati

„Wan sma kan de koloku sondro wan trowpatna, ma a muilek gi en fu de koloku efu a no abi mati”, na so Birgit e taki. Kande yu e agri nanga en. Awinsi yu trow noso yu no trow, a loyaalfasi fu wan bun mati sa meki yu firi prisiri èn a sa meki yu de moro koloku na ini a libi. A no de fu taki dati te yu trow, dan yu trowpatna musu de a moro krosibei mati fu yu.

Wan mati a no wan sma di yu sabi frafra. Kande furu sma de di wi no sabi so bun, soleki den birtisma fu wi, den sma na wi wrokope, èn sma di wi e miti wanwan leisi. Fu de trutru mati nanga wan sma, wani taki dati wi musu gebroiki wi ten nanga wi krakti gi a bun fu a sma, èn wi musu lobi a sma trutru. A de wan grani fu de wan mati fu wan sma. Wi e kisi wini te wi abi mati, ma wi musu tyari frantwortu sosrefi.

A de prenspari trutru fu abi bun takimakandra nanga den mati fu wi. Son leisi a de fanowdu fu taki nanga makandra, spesrutu te problema de. „Efu wan fu wi abi wan problema, dan mi nanga a mati fu mi e bel makandra tu leisi na ini wan wiki. A e gi mi trowstu fu sabi taki a de klariklari fu arki mi”, na so Birgit e fruklari. Awinsi mati e tan farawe fu makandra, toku dati no abi fu de wan problema. Gerda nanga Helga e libi dusundusun kilometer fara fu makandra, ma den na bun mati sowan 35 yari kaba. „Wi e seni brifi gi makandra doronomo”, na so Gerda e taki, „èn wi e fruteri makandra san wi ondrofeni èn fa wi e firi trutru, awinsi wi ondrofeni prisiri sani noso sani di e meki wi firi sari. Te mi e kisi brifi fu Helga, dan mi e prisiri trutru. Fu taki en leti, wi abi a srefi prakseri.”

A de tumusi prenspari fu de loyaal na wi mati. Efu wi du wan sani di e sori taki wi no de loyaal, dan dati kan pori srefi krosibei banti na mindri sma di ben de mati furu yari langa. Furu tron mati e taki nanga makandra fu sani di den no ben o fruteri tra sma èn den e gi makandra rai. Mati e fruteri makandra san de tapu den ati, sondro fu frede taki a trawan o gi en syen, noso taki a trawan o panya a tori fu en. Bijbel e taki: „Wan trutru mati abi lobi ala ten, èn a de wan brada di en mama meki fu te banawtu de.”​—Odo 17:17.

Fu di mati abi krakti tapu a fasi fa wi e denki, firi, èn handri, meki a de prenspari taki wi e suku fu de mati nanga sma di abi a srefi prakseri leki wi èn di abi densrefi marki di wi abi. Fu eksempre, luku bun taki yu e tron mati nanga sma di abi a srefi bribi leki yu, sma di e tyari densrefi na wan lespeki fasi neleki yu, èn sma di e libi akruderi den srefi markitiki di e sori yu san bun èn san takru. Den sortu mati disi sa yepi yu fu doro den marki fu yu. Bika te yu luku en bun, dan fu san ede yu sa wani de mati fu wan sma di no e hori ensrefi na den srefi markitiki leki yu, èn di no e tyari ensrefi soleki fa yu e tyari yusrefi? Bijbel e sori o prenspari a de fu suku den yoisti mati, te a e taki: „A sma di e waka nanga konisma, sa kon koni, ma a sma di abi demakandra nanga den wan sondro frustan, no sa abi bun bakapisi.”​—Odo 13:20.

 Wi kan leri fu de loyaal

Te wan pikin-nengre kon sabi fa fu plak toriman na den krosi fu wan sma, dan a kan taki a o wani prei a sani dati ibri tron baka. Wi kan taki a srefi sani fu wan sma di de loyaal. Fu san ede? Bika o moro wi e pruberi fu sori taki wi de loyaal, o moro makriki a o de gi wi fu de loyaal trutru. Efu wan sma e leri frukufruku kaba fu de loyaal na ini na osofamiri, dan bakaten a o moro makriki gi en fu de loyaal na den mati fu en. Fu di a abi krosibei matifasi kaba nanga tra sma, meki dati kan yepi en bakaten fu de loyaal na ini a trowlibi tu. Disi sa yepi en tu fu de loyaal na a moro prenspari mati di a kan abi.

Yesus ben taki dati a moro prenspari komando na fu lobi Yehovah Gado nanga wi heri ati, wi heri sili, wi heri frustan, èn nanga ala wi krakti (Markus 12:30). Dati wani taki dati wi musu de loyaal na Gado dorodoro. Wi e kisi furu blesi te wi de loyaal na Yehovah Gado. Noiti a sa meki wi firi brokosaka, fu di ensrefi e taki: „Mi de loyaal” (Yeremia 3:12). Fu tru, wi e kisi têgo blesi te wi de loyaal, noso getrow na Gado.​—1 Yohanes 2:17.

[Prenspari pisi na tapu bladzijde 6]

Te wan bun mati de loyaal na yu, dan dati sa meki yu firi prisiri

[Prenki na tapu bladzijde 5]

Te memre fu na osofamiri de loyaal na makandra, dan den e sorgu gi makandra