Wi sa waka na ini a nen fu Yehovah, wi Gado
Wi sa waka na ini a nen fu Yehovah, wi Gado
„Wi, fu wi sei, sa waka na ini a nen fu Yehovah, wi Gado, te ten di no skotu, iya fu têgo.”—MIKA 4:5.
1. Fa sma ben e tyari densrefi na ini a ten fu Noa, èn fa Noa ben de tra fasi leki den?
A FOSI man fu suma Bijbel e taki dati a ben e waka nanga Gado, ben de Heinok. A di fu tu man ben de Noa. Bijbel e fruteri wi: „Noa ben de wan regtfardiki man. A ben sori fu de sondro fowtu na mindri den sma fu en ten. Noa ben waka nanga a tru Gado” (Genesis 6:9). Na ini a ten fu Noa, a moro bigi pisi fu den libisma na grontapu, ben gowe libi a tru anbegi. Efu dati no ben ogri nofo, dan den engel di no ben de getrow, ben kon libi nanga den umasma na grontapu, aladi Gado no ben meki den fu du dati. A bakapisi ben de taki den uma ben kisi pikin di sma ben e kari Nefilim, „den tranga man”, noso ’den pôpi man’ fu a ten dati. A no de fu fruwondru taki ogridu ben kon lai na grontapu! (Genesis 6:2, 4, 11) Ma toku, Noa ben sori taki a ben de sondro fowtu èn a ben de „wan preikiman fu regtfardikifasi” (2 Petrus 2:5). Di Gado ben gi en a komando fu bow wan ark so taki sma ben kan tan na libi, dan Noa gi yesi èn a „du ala san Gado ben komanderi en. A ben du leti so” (Genesis 6:22). Fu tru, Noa ben waka nanga Gado.
2, 3. Sortu moi eksempre Noa de gi wi na ini a ten disi?
2 Paulus ben kari a nen fu Noa tu, di a ben e taki fu getrow kotoigi, èn a ben skrifi: „Na fu di Noa ben abi bribi, meki a ben frede Gado èn a ben bow wan ark fu frulusu en osofamiri, baka di Gado warskow en gi sani di a no ben si ete; nanga a bribi disi Noa ben krutu grontapu, èn a ben tron wan sma di regtfardiki na ini Gado ai, fu di a ben abi bribi” (Hebrewsma 11:7). Dati na wan moi eksempre trutru! Noa ben de seiker taki den wortu fu Yehovah ben o kon tru, èn fu dati ede a ben gebroiki en ten, en krakti, nanga den sani di a ben abi, fu du san Gado ben komanderi en. Na a srefi fasi, furu sma na ini a ten disi e weigri fu suku wan moro bun libi na ini a grontapu disi, ma den e gebroiki den ten, den krakti, nanga den sani di den abi, fu du san Yehovah e komanderi. Den de fu prèise trutru fu a bribi fu den, èn den sani di den e du sa meki taki densrefi nanga tra sma sa kisi frulusu.—Lukas 16:9; 1 Timoteyus 4:16.
3 A ben musu fu de wan muilek sani gi Noa nanga en osofamiri fu sori bribi, neleki fa a ben muilek gi Heinok, na afo fu Noa, fu suma wi ben taki na ini na artikel na fesi. Neleki fa a ben de na ini a ten fu Heinok, na so a ben de tu na ini a ten fu Noa taki wan tu sma nomo ben e anbegi a tru Gado, bika na aiti sma nomo ben de getrow èn ben pasa a Frudu libilibi. Noa ben e preiki fu regtfardikifasi, aladi a ben e libi na ini wan ogri grontapu pe sma ben e libi wan yayolibi. Boiti dati, Noa nanga en osofamiri ben e bow wan bun bigi udu ark fu sreka densrefi gi wan frudu di ben o sungu heri grontapu, aladi nowan sma ben si so wan sani bifo. A ben musu fu de wan freimde sani gi den sma di ben e luku san Noa nanga en osofamiri ben e du.
4. Soleki fa Yesus ben sori krin, dan sortu fowtu den sma fu a ten fu Noa ben meki?
4 A moi fu si taki di Yesus taki fu den dei fu Noa, dan a no taki fu na ogridu, a falsi bribi, nanga a yayolibi fu den sma, aladi den sani dati na seryusu sondu trutru. A fowtu di den sma disi ben meki, soleki fa Yesus sori krin, na taki den no ben poti prakseri na a warskow di den ben kisi. A ben taki dati den sma ben ’e nyan, den ben e dringi, man ben e teki uma fu trow, èn uma ben e trow nanga man, teleki a dei doro di Noa go na ini na ark’. Wan sma kan denki: ’Fu nyan, fu dringi, èn fu trow, a no sani di fowtu, a no so? Disi na sani di sma e du ala dei!’ Ma wan frudu ben de fu kon, èn Noa ben e preiki fu regtfardikifasi. Den sani di a ben e taki èn a fasi fa a ben e tyari ensrefi ben musu de wan warskow gi den. Toku, den „no ben poti prakseri na san ben e pasa, teleki a frudu kon èn a wai den alamala puru”.—Mateyus 24:38, 39.
5. San na wan tu fasi di Noa nanga en osofamiri ben musu abi?
5 Te wi e luku san pasa na a ten dati, dan wi e si taki Noa ben e libi na wan koni fasi trutru. Ma na ini den dei bifo a Frudu, a ben musu fu abi deki-ati fu man tyari ensrefi tra fasi leki ala den tra sma. Noa nanga en osofamiri ben musu fu abi wan tranga bribi fu man bow a bun bigi ark èn fu poti ala den difrenti sortu meti na ini. Kande wan tu fu den getrow sma dati ben e prakseri son tron fu no de so aparti èn fu libi leki den tra sma. We, awinsi den ben e prakseri so ten na ten, toku den tan hori den soifri retifasi. Baka bun furu yari, iya, moro langa leki iniwan fu wi o abi fu horidoro na ini a grontapu sistema disi, a bribi fu Noa ben meki taki a pasa a Frudu libilibi. Ma Yehovah ben strafu ala den tra sma di ben e libi den aladei libi fu den èn di no ben poti prakseri na den marki fu a ten dati.
Ogridu e trobi a libisma famiri agen
6. Sortu situwâsi ben de ete baka a Frudu?
6 Baka di a watra fu a Frudu saka, libisma bigin wan nyun libi baka. Ma den ben de sondusma ete, èn „den firi di libisma abi na ini den ati” ben tan „takru fu sensi den yongu yari” (Genesis 8:21). Boiti dati, den ogri yeye ben e du ogri ete, aladi den no ben man teki libisma skin moro leki fa den ben du fosi. Heri esi a ben de krin fu si taki na ogri grontapu dati ben de „na ini a makti fu na ogriwan” èn den tru anbegiman ben abi fu feti teige „den triki fu Didibri”, neleki fa a de na ini a ten disi.—1 Yohanes 5:19; Efeisesma 6:11, 12.
7. Fa sma bigin du moro nanga moro ogri baka a Frudu?
7 Na a ten fu Nimrod, a grontapu baka a Frudu ben tron wan presi baka pe libisma ben e du soso ogri. Bakaten, di moro nanga moro sma ben kon de na grontapu èn di sabidensi ben e go na fesi, dan ogridu ben kon moro furu tu. Na ini owruten, sma ben e feti nanga feti-owru, lansri, bo, peiri, nanga asiwagi. Bakaten, sma ben e feti nanga gon èn nanga kanu, dan yu ben abi onti-gon nanga den tra kefalek fetisani na a bigin fu a di fu twenti yarihondro. Na ini a Fosi Grontapufeti sma ben gebroiki moro ogri fetisani, soleki opolani, pantserwagi, boto di e waka ondro watra, nanga difrenti sortu gas di e kiri sma. Na ini a feti dati, den fetisani disi kiri milyunmilyun sma. Yu denki taki den sani disi pasa, sondro taki sma ben kan fruwakti dati? Nôno.
8. Fa Openbaring 6:1-4 kon tru?
8 Na ini a yari 1914, Yesus tron Kownu fu a hemel Kownukondre fu Gado, èn na a ten dati „a dei fu Masra” bigin (Openbaring 1:10). A buku Openbaring e fruteri fu wan fisyun pe Yesus de leki wan Kownu di e rèi na tapu wan weti asi fu go wini wan feti. Tra man e kon na en baka na tapu asi sosrefi, èn ibriwan fu den e prenki wan difrenti sortu rampu di e kon tapu a libisma famiri. Wan fu den man e rèi na tapu wan asi di redi leki faya, èn a ben kisi primisi „fu puru a vrede fu grontapu, so taki sma ben o kiri makandra; èn a ben kisi wan bigi feti-owru tu” (Openbaring 6:1-4). Na asi disi nanga a man di e rèi na en tapu e agersi orloku, èn a bigi feti-owru e sori taki noiti ete orloku tyari so furu pori kon leki na ini a ten disi pe sma e gebroiki ala sortu kefalek fetisani. Na ini a ten disi, yu abi fetisani soleki atoombom di kan kiri someni tenti dusun sma na ini wan blo; den raket di e tyari den sortu bom disi, kan frei go trowe den na presi di de dusundusun kilometer moro fara; yu abi tra sortu kefalek fetisani tu di e meki ipi-ipi sma kon siki so taki den dede te fu kaba.
Wi e poti prakseri na den warskow fu Yehovah
9. Fa a disiten grontapu de a srefi leki a grontapu di ben de bifo a Frudu?
9 Na ini den dei fu Noa, Yehovah ben pori a libisma famiri fu di den ogrisma ben e du ogri pasa marki èn den Nefilim ben e horibaka gi den. Fa a de na ini a ten disi? Grontapu no de so ogri moro leki na ini a ten dati? Kwetikweti! Boiti dati, sma na ini a ten disi de leki den sma fu a ten fu Noa, fu di den e go doro nanga den aladei sani fu den, aladi den e pruberi fu libi leki ala tra sma, èn den e weigri fu poti prakseri na den warskow di e meki bekènti (Lukas 17:26, 27). Sobun, wi musu tweifri dan taki Yehovah o pori libisma ete wan leisi? Nôno.
10. (a) Sortu warskow Bijbel profeititori e gi ibri tron baka? (b) San na a wan-enkri koni fasi fu libi na ini a ten disi?
10 Hondrohondro yari bifo a Frudu, Heinok ben taki na ini wan profeititori taki wan pori ben o kon na ini a ten fu wi (Yudas 14, 15). Yesus sosrefi ben taki fu a „bigi banawtu” di de fu kon (Mateyus 24:21). Tra profeiti ben warskow fu a ten dati tu (Esekièl 38:18-23; Danièl 12:1; Yoèl 2:31, 32). Èn na ini a buku Openbaring wi e leisi finifini fa a lasti pori dati o de (Openbaring 19:11-21). Ibriwan fu wi e teki na eksempre fu Noa èn wi e wroko fayafaya leki preikiman fu regtfardikifasi. Wi e poti prakseri na den warskow fu Yehovah èn na wan lobi-ati fasi wi e yepi tra sma fu du a srefi tu. Fu dati ede, wi e waka nanga Gado, neleki fa Noa ben du dati. Iya, a de tumusi prenspari taki efu wan sma wani tan na libi, dan a musu tan waka nanga Gado. Fa wi kan du dati nanga ala den problema di e miti wi ibri dei? Wi musu kon kisi a tranga bribi taki den sani di Gado abi na prakseri, o kon tru.—Hebrewsma 11:6.
Tan waka nanga Gado na ini muilek ten
11. Na sortu fasi wi de leki den fosi yarihondro Kresten?
11 Na ini a fosi yarihondro, sma ben e taki fu salfu Kresten taki den ben de fu „A Pasi” (Tori fu den Apostel 9:2). Den heri fasi fu libi ben sori taki bribi na ini Yehovah nanga Yesus Krestes ben de tumusi prenspari gi den. Den ben e waka a pasi fu a Masra fu den. Na ini a ten disi, getrow Kresten e du a srefi tu.
12. San ben pasa baka di Yesus du wan wondru fu gi wan ipi sma nyanyan?
12 Wi man si krin o prenspari a de fu abi bribi, te wi e luku wan sani di pasa na a pisi ten di Yesus ben e du en diniwroko. Wan leisi, Yesus ben du wan wondru fu man gi nyanyan na sowan 5000 sma. Den sma ben fruwondru fu dati èn den ben breiti. Ma luku san pasa baka dati. Wi e leisi: „Di den sma si den wondru di a du, den taki: ’Fu tru, a sma disi na a profeiti di ben o kon na grontapu.’ Fu di Yesus ben sabi taki den ben wani grabu en fu meki a tron kownu, meki a gowe baka na a bergi en wawan” (Yohanes 6:10-15). A neti dati a go na wan tra presi. Soleki fa a sori, dan furu sma no ben feni en wan prisiri sani taki Yesus no ben wani tron kownu, bika te yu luku en bun, a ben sori krin taki a ben koni nofo fu de wan kownu èn taki a ben abi a makti fu gi sma san den abi fanowdu. Ma a ten fu Yehovah no ben doro ete fu meki Yesus tiri leki Kownu. Boiti dati, a Kownukondre fu Yesus ben o de na hemel, a no ben o de na grontapu.
13, 14. Sortu denki furu sma ben abi, èn fa den ben kisi tesi tapu a bribi fu den?
13 Toku den sma ben de nomonomo fu waka na Yesus baka èn den feni en te fu kaba na „abrasei fu a se”, soleki fa Yohanes e taki. Fu san ede na ipi ben kon na en baka, aladi a no ben wani taki den meki a tron wan kownu? Furu fu den ben e denki soso den sani di den ben kan kisi fu en, èn dati meki den ben e taki krinkrin fu a nyanyan di Yehovah ben gi den di den ben de na ini a gran sabana na ini a ten fu Moses. Nanga disi den ben wani taigi Yesus taki a ben musu gi den nyanyan go doro. Fu di Yesus ben frustan sortu fowtu denki den ben abi, meki a bigin leri den wan tu tru tori di abi fu du nanga yeye afersi èn di ben kan yepi den fu kenki a denki fu den (Yohanes 6:17, 24, 25, 30, 31, 35-40). A bakapisi ben de taki son sma bigin krutu en, spesrutu di a fruteri den na agersitori disi: „Fu tru, mi e taigi unu: Efu unu no e nyan a skin fu a Manpikin fu libisma èn unu no e dringi en brudu, dan unu no abi libi na ini unsrefi. A sma di e nyan mi skin èn di e dringi mi brudu o kisi têgo libi, èn mi sa gi en wan opobaka na a lasti dei.”—Yohanes 6:53, 54.
14 Nofo tron den agersitori fu Yesus ben abi so wan krakti tapu den arkiman, taki den ben e sori efu den ben wani waka nanga Gado trutru. Na agersitori disi ben du a srefi tu. A ben meki sma sori krin san den ben e denki. Wi e leisi: „Furu fu den disipel fu en di yere den sani disi, taki: ’A sani di a taki e gi groskin; suma kan tan arki den sani disi?’” Baka dati, Yesus sori den taki den ben musu pruberi fu frustan san na agersitori disi wani taki na yeye fasi. A ben taki: „Na a yeye e gi sma libi; a skin no man du noti kwetikweti. Den sani di mi taigi unu, komopo fu a yeye èn den e gi libi.” Ma toku furu sma no ben wani arki, èn a tori e taki moro fara: „Na fu a sani disi ede, meki furu fu den disipel fu en gowe fu go du den sani baka di den ben libi èn den no ben wani waka moro nanga en.”—Yohanes 6:60, 63, 66.
15. Sortu bun denki son bakaman fu Yesus ben abi?
15 Ma toku, a no ala disipel fu Yesus ben handri na a fasi dati. A tru taki den loyaal disipel no ben e frustan krin san Yesus ben taki. Toku den ben poti ala frutrow na ini en. Petrus, wan fu den loyaal disipel dati, ben sori sortu denki ala den trawan di tan nanga Yesus, ben abi. A ben taki: „Masra, na suma wi musu go? Yu abi wortu di e gi sma têgo libi” (Yohanes 6:68). Dati na wan tumusi moi fasi fu denki, èn wan moi eksempre trutru!
16. Fa wi kan kisi tesi, èn sortu yoisti denki wi musu kisi?
16 Wi na ini a ten disi kan kisi tesi tu neleki den fosi disipel. Kande wi lasi-ati fu di wi e si taki den pramisi fu Yehovah no kon tru so esi leki fa wi ben sa wani. Kande wi e feni taki a fasi fa den buku fu wi e fruklari den tori fu Bijbel, de muilek fu frustan. A fasi fa wan tra Kresten e tyari ensrefi kan meki wi firi brokosaka. Ma a ben o de wan bun sani fu no waka moro nanga Gado fu den sani disi ede, noso fu tra sani ede? Kwetikweti! Den disipel di gowe libi Yesus ben sori taki den ben e denki libisma fasi. Wi musu luku bun fu no du a srefi sani.
„Wi a no sma di e hari densrefi puru fu di den frede”
17. Fa wi kan kisi yepi fu tan waka nanga Gado?
17 Na apostel Paulus ben skrifi: „Na Gado srefi ben meki sma skrifi ala den sani di de na ini Gado Buku” (2 Timoteyus 3:16). Na ini a heri Bijbel, Yehovah e taigi wi krinkrin: „Disi na a pasi. Waka na tapu” (Yesaya 30:21). Te wi e gi yesi na a Wortu fu Gado, dan dati e yepi wi fu ’luku bun fa wi e waka’ (Efeisesma 5:15). Te wi e studeri Bijbel èn e denki dipi fu san wi leri, dan dati o meki wi „tan waka na ini a waarheid” (3 Yohanes 3). A de trutru soleki fa Yesus taki, dati „a yeye e gi sma libi; a skin no man du noti kwetikweti”. A wan-enkri fasi fa wi o man waka a yoisti pasi, na te Gado e tiri wi, èn a e du disi nanga yepi fu a Wortu fu En, en yeye, nanga en organisâsi.
18. (a) Sortu don sani son sma e du? (b) Sortu bribi wi e meki muiti fu kisi?
18 Na ini a ten disi, den wan di no de tevrede fu di den e denki libisma fasi, noso fu di den no si a kontru fu sani di den ben e howpu, furu tron e go suku wini na ini a grontapu disi so furu leki den man. Fu di den no e si o prenspari a ten disi de, meki den no e frustan taki a de fanowdu fu „tan na ai”, ma den e bosroiti fu suku wini gi densrefi nomo, na presi fu poti Kownukondre afersi na a fosi presi (Mateyus 24:42). Na wan don sani fu waka so wan pasi. Luku san na apostel Paulus taki: „Wi a no sma di e hari densrefi puru fu di den frede, bika a bakapisi fu dati na dede; ma wi na sma di abi bribi, bika a bakapisi fu dati na taki wi sa tan na libi” (Hebrewsma 10:39). Aladi wi e libi na ini muilek ten neleki Heinok nanga Noa, toku neleki den, wi abi a grani fu waka nanga Gado. Te wi e du dati, dan wi abi a dyaranti taki wi sa si fa den pramisi fu Yehovah o kon tru, fa ogridu o kon na wan kaba, èn fa wan regtfardiki nyun grontapu o seti. Dati na wan moi howpu trutru!
19. Sortu pasi tru anbegiman e waka, soleki fa Mika ben taki?
19 A profeiti Mika ben taki nanga yepi fu santa yeye, taki den pipel fu grontapu ben o „waka ibriwan fu den na ini a nen fu en gado”. Dan a taki fu ensrefi èn fu tra getrow anbegiman: „Wi, fu wi sei, sa waka na ini a nen fu Yehovah, wi Gado, te ten di no skotu, iya, fu têgo” (Mika 4:5). Efu yu abi a srefi fasti bosroiti leki Mika, dan tan krosibei fu Yehovah, awinsi o muilek a ten o kon de (Yakobus 4:8). Meki a de so, taki ibriwan fu wi e angri trutru fu waka nanga Yehovah wi Gado nownow te ten di no skotu, iya, fu têgo!
San yu ben sa piki?
• Sortu sani na ini a ten fu Noa èn na ini a ten fu wi de a srefi?
• Fa Noa nanga en osofamiri ben e libi, èn fa wi kan abi bribi neleki den?
• Sortu fowtu denki son bakaman fu Yesus ben abi?
• Sortu fasti bosroiti tru Kresten abi?
[Aksi fu a tori disi]
[Prenki na tapu bladzijde 20]
Neleki fa a ben de na ini a ten fu Noa, na so sma na ini a ten disi e poti prakseri nomo na den aladei sani fu den
[Prenki na tapu bladzijde 21]
Leki Kownukondre preikiman, „wi a no sma di e hari densrefi puru fu di den frede”