Aksi fu leisiman

A de so taki a banti di wan sma abi nanga Yehovah kan pori te a sma dati e prei computer game di lai ogridu?

„Yehovah srefi e ondrosuku a regtfardikisma, sosrefi a sma di e du ogri”, na so Kownu David fu owruten Israel ben skrifi, „èn En sili kwetikweti no lobi wan sma di lobi ogri di e du nanga tranga” (Psalm 11:5). Na ini a Hebrewtongo fu fosi, den wortu di vertaal nanga ’no lobi kwetikweti’ wani taki sosrefi „wan sma di de wan feanti”. Fu dati ede, iniwan sma di lobi ogri di e du nanga tranga, e tron wan feanti fu Gado. A sani di wi musu aksi wisrefi na disi: A prei di wi e prei spesrutu computer game kan meki taki wi e kon tron sma di lobi ogridu?

Computer game di lai ogridu e gi sma a denki taki a bun fu gebroiki fetisani. Furu tron den game disi e leri sma fa fu feti. A tijdschrift The Economist ben taki: „A legre fu Amerkankondre e gebroiki computer game moro nanga moro fu leri srudati fa fu feti. Sonwan fu den game di a legre e gebroiki, na sani di iniwan sma kan bai na wenkri.”

A tru taki den sma di e prei computer game di lai ogridu, no e du sma ogri trutru. Ma te wan sma e prei den sortu game disi, dan san e pasa trutru nanga na ati fu a sma dati? (Mateyus 5:21, 22; Lukas 6:45) San yu ben o denki fu wan sma di lobi fu prei game pe a e dyuku èn e sutu sma, pe a e gi sma mankeri èn e kiri den sosrefi? San yu ben o denki fu a sma disi te ibri wiki a e poti prakseri omeni yuru langa na den ogri-ati sani dati, so taki pikinmoro a no man tan sondro den sortu game dati? Awansi fa a no fa, yu ben o taki dati a e kweki wan lobi gi ogridu, neleki fa wan sma di e luku seksfelem nanga seksbuku e kweki takru lostu.​—Mateyus 5:27-29.

O tranga Yehovah e tegu gi wan sma di lobi ogridu? David ben taki dati Yehovah ’no lobi a sma dati kwetikweti’. Na ini a ten fu Noa, Yehovah ben sori o tranga a ben tegu gi den wan di lobi ogridu. Yehovah ben taigi Noa: „A kaba fu ala skin kon na fesi mi, bika fu den ede meki grontapu kon furu nanga ogri di sma e du nanga tranga; èn luku, mi e pori den makandra nanga grontapu” (Genesis 6:13). A tru Gado pori wan heri grontapu fu libisma fu di den ben lobi fu du ogri nanga tranga. A ben kibri soso Noa nanga en osofamiri, èn dati ben de aiti sma di no ben lobi ogridu.​—2 Petrus 2:5.

Sma di wani de wan mati fu Yehovah e „naki den feti-owru fu den kon tron plugu èn den lansri fu den kon tron grasi-nefi”. Na presi taki den e leri fu lobi ogridu, den no e „leri orloku moro” (Yesaya 2:4). Fu man tan wan mati fu Yehovah, na presi taki wi e tron wan feanti fu en, dan wi musu ’drai baka gi san ogri èn du san bun’. Wi musu ’suku vrede èn wi musu du muiti sosrefi fu meki a vrede disi tan’.​—1 Petrus 3:11.

Ma san fu du te wi gwenti kaba fu prei video game di lai ogridu? Dan wi musu abi a fasti bosroiti fu plisi Yehovah fu di wi e weigri fu du sani di a no lobi kwetikweti. A no de fu taki dati wi musu begi Gado fu kisi yepi fu a santa yeye fu en, so taki wi kan tapu fu du a takru sani disi di e pori a yeyefasi fu wi. Wi kan tapu nanga a gwenti dati te wi e kweki den fasi soleki vrede, bunfasi, nanga a dwengi di wi e dwengi wisrefi, so taki wi kan tyari wisrefi na wan fasi di e kruderi moro nanga a pasi fu Gado.​—Lukas 11:13; Galasiasma 5:22, 23.