Den sani di wi kan du fu basi den firi fu wi

A DE so taki den firi fu yu e moro yu ten na ten? Yu e sari, yu e atibron, noso yu e bruya esi-esi? A de so taki furu tron yu no sabi fa fu du nanga den broko-ede fu a libi? San sa de wan yepi gi yu?

Ten na ten, ala sma e taki noso e handri na wan fasi di e sori taki den e sari, noso taki den e firi atibron. Te wi e meki muiti fu basi den sortu firi disi na a yoisti fasi, dan dati e meki taki a libi e kon moro prisiri. Ma Bijbel e sori taki „soso kwinsi kan meki wan koniman du law sani” (Preikiman 7:7). Suma kan taki dati den someni ogri di sma e du èn den someni ongoloku di e pasa na ini a grontapu disi, no abi krakti tapu den firi fu en? Ma Bijbel e taki sosrefi: „Wan moro bun sani no de, leki taki . . . libisma musu prisiri nanga den wroko fu en” (Preikiman 3:22). Fu dati ede, fu meki a libi kon moro prisiri, dan wi musu leri fu firi prisiri, èn wi kan du dati te wi e kon abi wan bun denki fu sani. Fa wi kan kon abi wan bun denki fu sani so taki wi kan basi den takru denki fu wi?

Te wi e du spesrutu sani fu basi den takru denki fu wi, dan nofo tron dati kan yepi wi fu no abi so wan takru denki fu sani moro. Fu gi wan eksempre, te wi e broko wi ede nanga sani di wi no sa man kenki, dan a moro bun fu du wan tra sani noso fu go na wan tra presi, na presi taki wi e tan broko wi ede nomo, a no so? Te wi e go koiri, te wi e arki switi poku, te wi e du wan sani fu lusu wi skin, noso te wi e du wan bun sani gi wan trawan di de na nowtu, dan dati kan tyari pikinso frulekti kon, èn a kan meki wi firi moro koloku.—Tori fu den Apostel 20:35.

Ma a moro bun fasi fa wi kan puru takru denki na wi ede, na te wi e poti wi frutrow na ini Yehovah. Te takru denki e tan trobi wi, dan wi musu ’trowe ala wi sorgu tapu Gado’ fu di wi e taki nanga en na ini begi (1 Petrus 5:6, 7). Bijbel e gi wi a dyaranti disi: „Yehovah de krosibei fu den wan di lasi-ati . . . Den rampu fu a regtfardikiwan furu, ma Yehovah e frulusu en fu den alamala” (Psalm 34:18, 19). Fa wi kan abi na overtoigi taki Gado kan de wi ’Yepiman èn a Sma di e gi wi frulusu’? (Psalm 40:17) Wi kan abi na overtoigi disi te wi e studeri Bijbel èn te wi e poti prakseri na den tru eksempre na ini, di e sori taki Gado srefi e broko en ede nanga den futuboi fu en.