„Mi sa kisi yepi fu Yehovah”

Milyunmilyun sma e anbegi Yehovah

BIJBEL profeititori di e taki fu a ten fu wi, ben taki na fesi dati ipi-ipi sma fu ala kondre ben o anbegi Yehovah. Fu eksempre, Yehovah Gado ben meki a profeiti Hagai taki: „Mi wani seki ala den nâsi, èn den warti sani fu ala den pipel musu kon na ini; èn mi wani furu na oso disi nanga glori” (Hagai 2:7). Yesaya nanga Mika ben taki na fesi dati na ini a ten fu wi, sobun na „a kabapisi fu den dei”, den kondre nanga den pipel ben o anbegi Yehovah na wan fasi di a feni bun.​—Yesaya 2:2-4; Mika 4:1-4.

Den sortu profeititori disi e kon tru na ini a ten disi trutru? Kon meki wi go luku wan tu tru tori. Soso na ini den tin yari di pasa, moro leki 3.110.000 nyun sma na ini moro leki 230 kondre gi den libi abra na Yehovah. Iya, siksi fu ibri tin Kotoigi fu Yehovah di e dini en now na heri grontapu teki dopu na ini den tin yari di pasa. Na ini 2004, ibri tu miniti wán nyun futuboi ben gi en libi abra na Gado èn a ben tron wan memre fu a Kresten gemeente! *

Neleki fa a ben de na ini a fosi yarihondro, na so ’furu fu den wan di teki a bribi, tron futuboi fu Masra’ na ini a ten disi. Aladi a nomru fu Kotoigi e gro kon moro bigi, disi wawan no de wan buweisi taki Gado e blesi wi; toku a e sori taki Yehovah „e horibaka gi” a pipel fu en (Tori fu den Apostel 11:21). Fu san ede milyunmilyun sma e go anbegi Yehovah? Fa disi abi krakti tapu yusrefi?

A e hari opregtisma kon

Yesus ben taki krin: „Nowan sma kan kon na mi, efu a Tata di seni mi kon no e hari en kon” (Yohanes 6:44). Fu dati ede, te yu luku en bun, dan Yehovah na a wan di e hari den sma kon di „abi a yoisti denki fu man kisi têgo libi” (Tori fu den Apostel 13:48). A yeye fu Gado kan meki den kon si taki den abi Gado fanowdu (Mateyus 5:3). Kande son sma o go suku Gado fu di a konsensi fu den e fon den, noso fu di den e suku wan sani di kan gi den howpu, noso fu di den abi wan bun bigi problema; kande dati e pusu den fu kon leri san Gado abi na prakseri gi libisma.​—Markus 7:26-30; Lukas 19:2-10.

Furu sma wani anbegi Yehovah fu di wan seti de na ini a Kresten gemeente pe sma kan kisi Bijbel leri di e yepi den fu feni piki tapu den aksi di e moro den.

„Efu wan Gado de, dan fu san ede sma e tan pina fu di trawan e du ogri nanga den?” Dati ben de na aksi di ben e moro Davide, wan man fu Italiakondre di ben e seri drugs. A no ben wani kon sabi sani fu Bijbel, fu dati ede a poti a muilek aksi disi, soso fu kan haritaki nanga a Kotoigi. A e taki: „Mi no ben prakseri taki mi ben o kisi wan bun piki di ben kan overtoigi mi. Ma a Kotoigi di ben taki nanga mi, ben abi furu pasensi èn ala sani di a ben taki, a ben sori mi na ini Bijbel. A takimakandra dati ben abi furu krakti na mi tapu.” Now Davide drai a libi fu en èn a e dini Yehovah.

Trawan wani tron wan memre fu Yehovah en organisâsi na grontapu fu di den wani kon  sabi san a libi wani taki trutru èn fa den man libi wan moro koloku libi. Wan uma fu Zagreb, na ini Krowâsia, na wan datra di e yepi sma di siki na frustan sei. Fu di ensrefi ben e firi brokosaka srefisrefi, meki a go na wan barinen datra di e du a srefi wroko leki en. A ben fruwondru di a datra disi gi en a telefon-nomru fu a bijkantoro fu Yehovah Kotoigi na Zagreb, nanga a nen fu wan Kotoigi di a ben sabi. A datra disi taki: „Luku, mi denki taki den sma disi kan yepi yu. Efu mi o seni yu go na kerki, dan yu o feni soso popki drape di no abi libi, nowan sma e taki nanga yu, èn nowan sma drape sabi sani fu Gado. Mi no denki taki kerki man yepi yu. Mi seni tra sikisma go na Yehovah Kotoigi, èn mi denki taki disi ben o de a moro bun sani gi yu sosrefi.” Den Kotoigi di ben e go na a uma disi, ben de nanga switifasi èn baka wan syatu pisi ten den bigin wan bijbelstudie nanga na uma. Baka wan tu wiki, a datra disi ben e prisiri fu taki dati a kan libi wan moro koloku libi now, fu di a kon sabi san Gado abi na prakseri.​—Preikiman 12:13.

Furu sma di e kisi fu du nanga wan bigi problema, kon si taki Bijbel waarheid nomo kan trowstu den trutru. Na ini Grikikondre, wan boi fu seibi yari fadon komoto fu a daki fu en skoro èn a dede. Wan tu mun baka dati, tu Kotoigi miti a mama fu a boi èn den ben pruberi fu trowstu en fu di den ben taki nanga en fu na opobaka howpu (Yohanes 5:28, 29). Ne na uma bigin krei. Den sisa aksi en: „Efu yu wani sabi moro fu Bijbel, dan o ten wi kan kon na yu baka?” Na uma piki den: „Nownowde.” Na uma tyari den Kotoigi go na en oso, èn den ben kan bigin wan bijbelstudie nanga en. Now en heri osofamiri e dini Yehovah.

Yu abi wan prati na a diniwroko?

Den sortu ondrofenitori disi e sori na wan moi fasi san e pasa na heri grontapu. Yehovah e tyari wan bigi ipi tru anbegiman fu difrenti kondre kon na wán èn a e gi den leri. A grupu disi fu sma di komoto fu difrenti kondre, abi a moi howpu fu tan na libi te a kaba fu na ogri sistema disi o kon. Den abi a howpu tu fu libi na ini wan regtfardiki nyun grontapu.​—2 Petrus 3:13.

Fu di Yehovah e blesi a bigi wroko disi fu tyari sma kon na wán, meki a sa kon na wan bun kaba seiker (Yesaya 55:10, 11; Mateyus 24:3, 14). Yu e teki prati na a Kownukondre preikiwroko disi fayafaya? Efu yu e du dati, dan yu kan de seiker taki Gado o horibaka gi yu èn yu kan taki a srefi sani di a psalm skrifiman ben taki, namku: „Mi sa kisi yepi fu Yehovah.”​—Psalm 121:2.

[Futuwortu]

[Prenspari pisi na tapu bladzijde 9]

„Nowan sma kan kon na mi, efu a Tata di seni mi kon no e hari en kon.”​—YOHANES 6:44

[Faki na tapu bladzijde 8]

SUMA E MEKI TAKI A WROKO E GRO NA SO WAN FASI?

„Efu Yehovah srefi no bow na oso, dan na fu soso den wrokoman wroko tranga na en.”​—Psalm 127:1.

„Gado tan meki a sani gro; dati meki a no a sma di e prani noso a sma di e gi watra de wan sani, ma na Gado di e meki a sani gro.”​—1 Korentesma 3:6, 7.