Suma na Yesus Krestes?

PRAKSERI nomo o breiti wan yongu Dyu di nen Andreas ben musu de di a yere fu a fosi leisi san Yesus fu Nasaret ben abi fu taki! Bijbel e taki dati Andreas lon go na en brada, dan a taki: „Wi feni a Mesias [noso, Krestes]” (Yohanes 1:41). Nofo tron, den wortu „Mesias” nanga „Krestes” wani taki „Salfuwan” na ini Hebrewtongo nanga Grikitongo. Yesus ben de a Salfuwan, noso a Wan di Gado teki, sobun a ben de a Tiriman di Gado ben pramisi fu seni (Yesaya 55:4). Na ini Bijbel, profeititori ben de di ben e taki fu en, èn na a ten dati den Dyu ben e fruwakti en.—Lukas 3:15.

Fa wi du sabi taki trutru Yesus ben de a Wan di Gado teki? We, luku san pasa na ini 29 G.T. di Yesus ben abi 30 yari. A ben go na Yohanes a Dopuman fu meki a man disi dopu en na ini a watra fu Yordanliba. Bijbel e taki: „Di Yesus dopu, dan wantewante a opo komoto fu a watra; ne hemel opo èn Yohanes si Gado en yeye e saka kon na Yesus tapu leki wan doifi. Luku! Wan sten komoto fu hemel tu, èn a taki: ’Disi na mi Manpikin, a lobiwan di mi feni bun’” (Mateyus 3:16, 17). A de so taki, Yohanes, di ben yere Gado e taki dati a feni Yesus bun, ben kan tweifri taki Yesus ben de a Wan di Gado teki? Di Yehovah Gado meki En santa yeye kon na tapu Yesus, dan a salfu Yesus, noso a poti en leki Kownu fu En Kownukondre di ben de na pasi e kon. Na so fasi Yesus tron Yesus Krestes, noso Yesus a Salfuwan. Ma fa Yesus de Gado Manpikin? Fu pe a komoto?

A ben de kaba „sensi owruten”

Wi ben sa kan prati a libi fu Yesus na ini dri pisi ten. A fosi pisi fu en libi bigin langa ten bifo a gebore leki libisma. A ben de kaba „sensi owruten, fu den dei fu ten di no skotu”, na so Mika 5:2 e taki. Yesus srefi ben taki: „Mi na fu den kontren na tapusei”, namku fu hemel (Yohanes 8:23). Di a ben de na hemel, a ben de wan yeye di abi furu makti.

Ala sani di meki ben abi wan bigin, fu dati ede wan ten ben de taki Gado ben de en wawan. Ma dusundusun yari pasa, Gado bigin meki sani. Suma ben de a fosi sma di a meki? A lasti buku fu Bijbel e taki dati Yesus ben de „a bigin fu den sani di Gado meki” (Openbaring 3:14). Yesus na „a fosiwan fu ala sani di Gado meki”. Disi de so „bika nanga yepi fu en, Gado meki ala tra sani na hemel èn na grontapu, iya, den sani di sma man si, nanga den sani di sma no man si” (Kolosesma 1:15, 16). Iya, Yesus ben de a wan-enkri sma di Gado srefi meki. Fu dati ede Bijbel e kari en a „wan-enkri Manpikin” (Yohanes 3:16). A fosi Manpikin abi wan tra nen tu, namku „a Wortu” (Yohanes 1:14). Fu san ede? Bika fosi a gebore leki libisma, dan a ben de a sma di ben e taki gi Gado na ini hemel.

„Na a bigin”, di Gado meki „hemel nanga grontapu”, „a Wortu” ben de nanga Yehovah Gado. Na en ben de a sma di Gado ben taigi: „Meki wi meki libisma akruderi a prenki fu wi” (Yohanes 1:1; Genesis 1:1, 26). Yehovah en fosi Manpikin ben de na ini hemel nanga en Tata, èn a ben e wroko tranga makandra nanga en. Odo 8:22-31 e taki fu en: „Mi ben tron leki wan tumusi bun wrokoman [sei a Mekiman] èn mi ben tron a wan di a ben lobi trutru ibri dei, èn mi ben breiti na en fesi ala ten.”

Di Yehovah Gado nanga en wan-enkri Manpikin ben e wroko sei nanga sei makandra, den ben musu fu kon sabi makandra heri bun! A tranga banti di a Manpikin fu Gado ben abi nanga Yehovah someni dusun yari langa, ben musu fu abi krakti na en tapu. A Manpikin disi di ben e gi yesi na Gado, ben tron neleki en Tata Yehovah. Fu taki en leti, Kolosesma 1:15 e  kari Yesus „a prenki fu a Gado di sma no man si”. Disi na fu san ede a de tumusi prenspari fu kon sabi suma na Yesus, efu wi e angri fu abi wan tranga banti nanga Gado èn efu wi wani kon sabi Gado. Ala sani di Yesus du di a ben de na grontapu, na soifri san Yehovah ben wani en fu du. Fu dati ede, efu wi e kon sabi Yesus, dan disi wani taki tu dati wi e kon sabi moro fu Yehovah (Yohanes 8:28; 14:8-10). Ma fa Yesus kon na grontapu?

Di a ben e libi na grontapu leki wan libisma

A tra pisi fu Yesus en libi bigin di Gado seni en Manpikin kon na grontapu. Yehovah du disi di a teki a libi fu Yesus na ini hemel èn a poti en na ini a bere fu a getrow Dyu nyunwenke di nen Maria. Di Yesus gebore, a no ben abi sondu fu di a no ben abi wan libisma papa. A santa yeye fu Yehovah, noso a wroko krakti fu en, ben kon na tapu Maria èn a krakti fu en „tapu” Maria, san meki a kisi bere nanga yepi fu wan wondru (Lukas 1:34, 35). Fu dati ede Maria meki wan volmaakti pikin. Yesus, di gro kon bigi leki a manpikin fu a temreman Yosef, kweki na ini wan pôti osofamiri, èn baka di a gebore, Yosef nanga Maria kisi tra pikin tu.—Yesaya 7:14; Mateyus 1:22, 23; Markus 6:3.

Wi no sabi furu fu Yesus en pikin-nengreten, ma wán prenspari sani pasa di a ben de wan pikin ete. Di Yesus ben abi 12 yari, en papa nanga mama tyari en go na Yerusalem fu hori a Paskafesa, soleki fa den ben gwenti e du ala yari. Di a ben drape, a tan wan heri pisi ten na ini a tempel, aladi a ben „e sidon na mindri den leriman, e arki den èn e poti aksi gi den”. A ben de so tu taki „ala den sma di ben e arki en, ben fruwondru ibri leisi baka taki a ben abi someni koni èn taki a ben man piki den na so wan bun fasi”. Iya,a yongu Yesus no ben man poti aksi nomo di ben e meki sma prakseri bun fu sani, noso aksi di ben abi fu du nanga Gado, ma a ben man gi koni piki tu di ben e fruwondru sma (Lukas 2:41-50). Di a gro kon bigi na ini a foto Nasaret, a leri a temreman-wroko; a no de fu taki dati en kweki papa Yosef leri en a wroko disi.​—Mateyus 13:55.

Yesus ben e libi na ini Nasaret teleki a doro 30 yari. Baka dati a go na Yohanes fu teki dopu. Baka di Yesus teki dopu, a bigin nanga a fayafaya diniwroko fu en. Dri nanga afu yari langa, a ben e waka na ini a heri kondre pe a gro kon bigi, fu preiki a bun nyunsu fu Gado Kownukondre. A ben sori sma taki na Gado ben seni en kon. Fa a ben du dati? A ben du dati fu di a ben du furu wondru di nowan libisma ben man du.​—Mateyus 4:17; Lukas 19:37, 38.

Yesus ben de wan sma di ben abi switifasi tu èn a ben e hori a firi fu tra sma na prakseri. A switifasi fu en ben de fu si spesrutu na a fasi fa a ben prakseri fu tra sma èn na a fasi fa a ben e handri nanga den. Fu di Yesus ben de wan sma di trawan ben kan taki nanga en makriki èn fu di a ben abi switifasi, meki den ben wani kon na en. Srefi pikin-nengre no ben frede te den ben de nanga en (Markus 10:13-16). Yesus ben e lespeki umasma, aladi son sma na ini a ten fu  en ben e si umasma leki soso sma (Yohanes 4:9, 27). A ben e yepi den pôtisma nanga den wan di ben e kisi kwinsi, so taki den ben man „kisi krakti baka” (Mateyus 11:28-30). A ben e gi leri na wan krin fasi di ben de makriki fu frustan, èn di ben sori sma san den ben musu du. San a ben e leri sma, ben sori taki a ben e angri trutru fu meki den arkiman fu en kon sabi a tru Gado, Yehovah.​—Yohanes 17:6-8.

Te Yesus ben gebroiki a santa yeye fu Gado fu du wondru, dan na wan safri-ati fasi a ben e dresi den sikisma nanga den wan di ben e pina (Mateyus 15:30, 31). Fu eksempre, wan gwasiman kon na en èn a taki: „Efu yu wani nomo, yu kan meki mi kon krin.” San Yesus du? A langa en anu fu fasi a man èn a taki: „Mi wani. Kon krin.” Ne a sikiman kon betre!​—Mateyus 8:2-4.

Luku wan tra okasi sosrefi di wan heri ipi sma di ben kon na Yesus, tan dri dei nanga en, aladi den no ben abi noti fu nyan. A ben firi sari gi den sma èn nanga yepi fu wan wondru a gi nyanyan na ’fo dusun man, . . . dan wi no teri den uma nanga den yongu pikin’ ete (Mateyus 15:32-38). Na wan tra okasi, Yesus ben tapu wan bigi winti di ben kan meki den mati fu en lasi den libi (Markus 4:37-39). A ben gi den dedewan wan opobaka, noso a ben meki den kon na libi baka (Lukas 7:22; Yohanes 11:43, 44). * Yesus ben de klariklari srefi fu gi en volmaakti libisma libi, so taki sondu libisma ben kan abi wan howpu gi a tamara. Yesus ben lobi sma trutru!

Pe Yesus de now?

Yesus dede na wan pina-postu di a ben abi 33 1/2 yari. * Ma a dede dati no ben de a kaba fu en libi. A di fu dri pisi fu en libi bigin sowan dri dei baka di Yehovah Gado gi en Manpikin wan opobaka leki wan yeye. Baka di Yesus kisi wan opobaka, dan a sori ensrefi na hondrohondro sma di ben e libi na ini a fosi yarihondro G.T. (1 Korentesma 15:3-8). Baka dati „a go sidon na a reti-anusei fu Gado” èn a ben e wakti a ten di a ben o kisi makti leki kownu (Hebrewsma 10:12, 13). Di a ten dati doro, dan Yesus bigin tiri leki Kownu. Sobun, fa wi musu si Yesus na ini a ten disi? Wi musu si en leki wan man di e nyan pina fu di sma e du ogri sani nanga en fu kiri en? Noso wi musu si en leki wan sma di wi musu anbegi? Na ini a ten disi, Yesus no de wan libisma noso na Almakti Gado. Ma a de wan yeye di abi furu makti, wan sma di e tiri leki Kownu. Ma a no sa teki langa moro fosi a sa sori a makti fu en na tapu a heri grontapu disi di lai nanga problema.

Openbaring 19:11-16 e taki na wan agersi fasi fu Yesus Krestes leki wan kownu di e sidon na tapu wan weti asi, di e kon fu krutu sma èn di e kon fu feti wan regtfardiki orloku. A abi ’wan langa srapu feti-owru, so taki a kan kiri den pipel nanga disi’. Iya, Yesus o gebroiki a bigi krakti fu en fu pori den ogrisma. San o pasa nanga den sma di e du muiti fu waka baka na eksempre di a ben gi di a ben de na grontapu? (1 Petrus 2:21) Krestes nanga en Tata o kibri den sma disi so taki den sa tan na libi na a pisi ten fu a ’feti di o feti na tapu a bigi dei fu Gado na Almaktiwan’, wan feti di furu sma e kari Armagedon. Na so fasi den kan libi fu têgo na grontapu ondro a tiri fu Gado en Kownukondre na hemel.​—Openbaring 7:9, 14; 16:14, 16; 21:3, 4.

Te Yesus o tiri na ini vrede, dan a o du bigi wondru gi a heri libisma famiri! (Yesaya 9:6, 7; 11:1-10) A o dresi den sikisma èn tyari wan kaba kon na dede. Gado o gebroiki Yesus fu gi milyardmilyard sma wan opobaka, èn fu gi den wan okasi fu libi fu têgo na grontapu (Yohanes 5:28, 29). Wi no man prakseri srefi o switi a libi fu wi o de te a Kownukondre o tiri. Fu dati ede a de prenspari taki wi e tan leri moro fu Bijbel èn taki wi e kon sabi Yesus Krestes moro bun.

[Futuwortu]

 [Faki na tapu bladzijde 7]

YESUS NA A ALMAKTI GADO?

Furu sma di e bribi na ini wan gado, e taki dati Yesus na Gado. Sonwan fu den e taki dati Gado na wan Dri-wánfasi. A leri disi e taki dati „a Tata na Gado, a Manpikin na Gado, èn a Santa Yeye na Gado, èn toku a no dri Gado de, ma wán Gado”. Sma e bribi taki den ala dri e libi fu têgo èn den ala dri de a srefi (The Catholic Encyclopedia). A denki disi bun?

Yehovah Gado na a Mekiman (Openbaring 4:11). A no abi wan bigin noso wan kaba, èn a abi ala makti (Psalm 90:2). Yesus, na a tra sei, ben abi wan bigin (Kolosesma 1:15, 16). Yesus di ben kari Gado en Tata, ben taki fu en: „A Tata bigi moro mi” (Yohanes 14:28). Yesus ben taki tu dati wan tu sani ben de di en nanga den engel no ben sabi, ma di en Tata wawan ben sabi.​—Markus 13:32.

Boiti dati, Yesus ben begi en Tata: „A no mi wani musu pasa, ma yu wani” (Lukas 22:42). Suma Yesus ben begi efu a no ben e begi wan moro hei Sma? Sosrefi, na Gado gi Yesus wan opobaka, a no Yesus srefi du dati (Tori fu den Apostel 2:32). A de krin, taki a Tata nanga a Manpikin no ben de a srefi sma bifo Yesus ben kon na grontapu, noso na a pisi ten di a ben de na grontapu. Ma san pasa baka di Yesus kisi wan opobaka èn go na hemel? Wán Korentesma 11:3 e taki: „Gado na a ede fu Krestes.” Fu taki en leti, a Manpikin sa musu saka ensrefi na ondro Gado ala ten (1 Korentesma 15:28). Fu dati ede Bijbel e sori taki Yesus no de na Almakti Gado. Ma a de a Manpikin fu Gado.

A sokari di fu dri sma fu a Dri-wánfasi, namku a santa yeye, a no wan sma. Di a psalm skrifiman ben e begi Gado, dan a taki: „Efu yu e seni a yeye fu yu go, dan yu e meki den” (Psalm 104:30). A yeye disi a no Gado srefi; a de a wroko krakti di a e seni go noso di a e gebroiki fu du iniwan sani di a abi na prakseri. Nanga yepi fu a yeye disi, Gado meki hemel, grontapu, nanga ala libisani (Genesis 1:2; Psalm 33:6). Gado gebroiki en santa yeye fu meki libisma skrifi Bijbel (2 Petrus 1:20, 21). Fu dati ede, a Dri-wánfasi a no wan sani di Bijbel e leri. * Bijbel e taki dati „Yehovah, wi Gado, na wán Yehovah”.​—Deuteronomium 6:4.

[Futuwortu]

[Prenki na tapu bladzijde 5]

Di Yesus teki dopu, a tron a Salfuwan fu Gado

[Prenki na tapu bladzijde 7]

Yesus gebroiki ala en krakti fu du a wroko di Gado ben gi en fu du

[Prenki na tapu bladzijde 7]

Na ini a ten disi, Yesus na wan Kownu di abi furu makti